“Ersqu Lejn Alla, U Hu Jersaq Lejkom”

Qabel u Wara—Prinċipji Bibliċi Għenuh Jinbidel

META Adrian kien żagħżugħ kien mimli rabja u riżentiment. Minħabba li kien jitlagħlu malajr kien f’daqqa waħda jiżbroffa u jsir vjolenti. Kien jixrob, ipejjep, u jgħix ħajja immorali. Adrian kien magħruf bħala punk u għamel tatwaġġ li wera kemm kien jemmen fl-​anarkija. Biex jiddeskrivi dawk is-​snin, hu jgħid: “Qtajt xagħri bl-​istil tradizzjonali tal-​punk, dliktu bil-​kolla biex joqgħodli wieqaf, u kultant kont niżbgħu aħmar jew xi kulur ieħor.” Adrian ukoll għamel misluta fi mnieħru.

Adrian mar jgħix f’dar diżabitata maʼ xi żgħażagħ oħra ribellużi. Hemmhekk kienu jixorbu l-​alkoħol u jieħdu d-​drogi. “Jien kont nieħu l-​ispeed flimkien mal-​Valium u kwalunkwe ħaġa oħra li stajt nakkwista,” jgħid Adrian. “Meta ma stajtx nakkwista d-​drogi jew il-​kolla, kont nisraq il-​petrol mill-​karozzi tan-​nies u kont inħossni f’estasi (high) bih.” Minħabba li kien jinvolvi ruħu fil-​kriminalità fit-​toroq, Adrian sar taʼ min jibżaʼ minnu u vjolenti ħafna. In-​nies in ġenerali kienu jevitawh. Fl-​istess ħin, minħabba r-​reputazzjoni tiegħu ġibed ħbieb ħżiena.

Iktar m’għadda ż-​żmien Adrian iktar beda jirrealizza li “sħabu” kienu jassoċjaw miegħu biss għal dak li setgħu jakkwistaw. Iktar minn hekk, hu induna li “r-​rabja u l-​vjolenza kollha ma kienu wettqu xejn.” Billi ħassu vojt u frustrat, hu telaq lil sħabu. Meta sab kopja tat-​Torri taʼ l-​Għassa fi nħawi fejn kien qed isir xogħol taʼ bini, hu ħassu jinġibed mill-​messaġġ tal-​Bibbja li kien fih, u dan wassal għal studju tal-​Bibbja max-​Xhieda taʼ Jehovah. Adrian wieġeb bil-​ħeġġa għall-​istedina: “Ersqu lejn Alla, u hu jersaq lejkom.” (Ġakbu 4:8) B’hekk, Adrian malajr ħass il-​bżonn li jibda japplika l-​prinċipji misjubin fl-​Iskrittura Mqaddsa.

L-għarfien li kompla jieħu mill-​Bibbja kellu effett tajjeb fuq il-​kuxjenza taʼ Adrian u biddillu ħajtu. Hu ġie megħjun jikkontrolla t-​tempra tiegħu u jiżviluppa r-​rażna. Grazzi għall-​qawwa tal-​Kelma t’Alla, il-​personalità taʼ Adrian saret differenti ħafna.​—Lhud 4:​12.

Iżda, il-​Bibbja kif jistaʼ jkollha effett daqshekk qawwi? Għarfien taʼ l-​Iskrittura jgħinna ‘nilbsu l-​[“personalità,” NW] l-​ġdida.’ (Efesin 4:​24) Iva, il-​personalità tagħna tinbidel meta napplikaw l-​għarfien eżatt li nsibu fil-​Bibbja. Imma dan l-​għarfien kif ibiddel lin-​nies?

L-ewwelnett, il-​Bibbja tidentifika tendenzi xejn sbieħ fil-​personalità li jeħtieġ jinbidlu. (Proverbji 6:​16-​19) It-​tieni, l-​Iskrittura tħeġġiġna nuru l-​kwalitajiet mixtiqin li jipproduċi l-​ispirtu qaddis t’Alla. Dawn jinkludu “l-​imħabba, l-​hena, is-​sliem, is-​sabar, il-​ħniena, it-​tjieba, il-​fidi, il-​ħlewwa, ir-​rażan.”​—Galatin 5:​22, 23.

Fehma iktar profonda taʼ dak li Alla jirrikjedi għenet lil Adrian biex jeżamina lilu nnifsu u jara liema tendenzi fil-​personalità kellu bżonn jikkultiva u dawk li kellu jelimina. (Ġakbu 1:​22-​25) Imma dan kien biss il-​bidu. Flimkien maʼ l-​għarfien, kien hemm bżonn tal-​motivazzjoni​—xi ħaġa li tqanqal lil Adrian biex ikun irid jinbidel.

Adrian tgħallem li l-​personalità l-​ġdida tant mixtieqa tissawwar ‘skond ix-​xbieha taʼ min ħalaqha.’ (Kolossin 3:​10) Hu rrealizza li l-​personalità taʼ Kristjan għandha tkun tixbah lil dik t’Alla nnifsu. (Efesin 5:1) Permezz taʼ studju tal-​Bibbja, Adrian tgħallem dwar kif Jehovah ittratta lill-​umanità u ra l-​kwalitajiet mill-​aqwa t’Alla, bħalma huma l-​imħabba, il-​qalb tajba, il-​ħniena, u l-​ġustizzja tiegħu. Dan l-​għarfien qanqal lil Adrian biex iħobb lil Alla u biex jistinka ħalli jkun it-​tip taʼ bniedem li Jehovah japprova.​—Mattew 22:37.

Maż-żmien u bl-​għajuna taʼ l-​ispirtu qaddis t’Alla, Adrian irrnexxielu jikkontrolla t-​tempra vjolenti tiegħu. Hu u martu issa qed iħabirku biex jgħinu lil oħrajn ibiddlu ħajjithom bl-​għajnuna taʼ l-​għarfien mill-​Bibbja. “Għall-​kuntrarju tal-​ħbieb li kelli qabel, li issa huma mejtin, jien għadni ħaj u qed ingawdi ħajja taʼ familja ferħana,” jgħid hu. Adrian hu evidenza ħajja tal-​qawwa li l-​Bibbja għandha biex tbiddel il-​ħajjiet għall-​aħjar.

[Kumment f’paġna 25]

“Ir-​rabja u l-​vjolenza kollha ma kienu wettqu xejn”

[Kaxxa f’paġna 25]

Il-​Prinċipji tal-​Bibbja fil-​Prattika

Dawn li ġejjin huma xi prinċipji Bibliċi li għenu lil ħafna nies li kienu vjolenti u jirrabjaw malajr sabiex isiru nies paċifiċi:

“Għixu fil-​paċi maʼ kulħadd. Tivvendikawx ruħkom b’idejkom, għeżież tiegħi, imma ħallu l-​korla taʼ Alla tagħmel hi.” (Rumani 12:​18, 19) Ħalli lil Alla jiddetermina meta u fuq min għandu jkun hemm il-​vendetta. Hu jistaʼ jagħmel dan għax jaf il-​fatti kollha, u kwalunkwe vendetta li toriġina minnu se tirrifletti l-​ġustizzja perfetta tiegħu.

“Tinkurlaw? Imma tidinbux; tħallux ix-​xemx tgħib fuq il-​korla tagħkom, u tagħtux wisaʼ lix-​xitan.” (Efesin 4:​26, 27) Bniedem jistaʼ kultant ikollu raġun jirrabja minħabba xi sitwazzjoni. Jekk dan jiġri, m’għandux jibqaʼ ‘inkorlat.’ Għala? Għax dan jistaʼ jqanqlu biex jagħmel xi ħaġa ħażina, u b’hekk jagħti “wisaʼ lix-​xitan,” u dan jirriżulta fid-​diżapprovazzjoni t’Alla Jehovah.

“Ħallik mill-​korla u la tirrabjax; tinkedd xejn, għax deni jiswielek.” (Salm 37:8) Emozzjonijiet mhux kontrollati jwasslu għal azzjonijiet mhux kontrollati. Jekk individwu jirrabja, hi jew hu x’aktarx li se jgħidu jew jagħmlu xi ħaġa li se tweġġaʼ lil kulmin ikun involut.