Min Huma Dawk li Qegħdin Isegwu d-Dawl tad-Dinja?

“Intom qegħdin tiddu bħala dawwala fid-​dinja.”​—FILIPPIN 2:15.

1. Il-​Bibbja x’tgħid dwar dwal reliġjużi foloz?

IL-​BIBBJA tidentifika b’mod ċar lil Ġesù bħala “dawl kbir,” “id-​dawl tad-​dinja.” (Isaija 9:2; Ġwann 8:12) Madankollu, relattivament ftit segwewh meta kien fuq l-​art. Il-​maġġoranza għażlu li jsegwu dwal foloz li kienu, fir-​realtà, uħud li jġorru d-​dlam. Dwar dawn il-​Kelma t’Alla tgħid: “Irġiel bħal dawn huma appostli foloz, ħaddiema qarrieqa, billi jittrasformaw lilhom infushom f’appostli taʼ Kristu. U ma nistagħġbux, għax Satana nnifsu jibqaʼ jittrasforma lilu nnifsu f’anġlu tad-​dawl. Mhix xi ħaġa kbira għalhekk jekk il-​ministri tiegħu wkoll jibqgħu jittrasformaw lilhom infushom f’ministri taʼ tjieba. Imma t-​tmiem tagħhom se jkun skond xogħlijiethom.”—2 Korintin 11:13-15.

2. Ġesù x’qal li se jkun il-​bażi biex jiġu ġġudikati n-​nies?

² B’hekk, mhux in-​nies kollha jridu d-​dawl, għalkemm hu tant meraviljuż. Ġesù qal: “Dan hu l-​bażi għall-​ġudizzju, li d-​dawl ġie fid-​dinja imma l-​bnedmin ħabbew id-​dlam minflok id-​dawl, għax xogħlijiethom kienu mill-​agħar. Għax dak li jipprattika affarijiet vili jobgħod id-​dawl u ma jiġix għad-​dawl, sabiex ix-​xogħlijiet tiegħu jistgħu ma jiġux imċanfrin.”—Ġwann 3:19, 20.

Dawk li Jħobbu d-​Dlam

3, 4. Il-​mexxejja reliġjużi fi żmien Ġesù kif urew li ma ridux isegwu d-​dawl?

³ Ikkunsidra kif dak kien il-​każ meta Ġesù kien fuq l-​art. Alla kien ta l-​qawwa lil Ġesù biex iwettaq mirakli tal-​għaġeb bħala mod biex jistabbilixxi li hu kien il-​Messija. Per eżempju, f’jum taʼ Sabat, hu ta lura d-​dawl lil raġel imwieled għama. X’att taʼ ħniena tal-għaġeb! Kemm kien grat dak ir-​raġel! Hu setaʼ jara għall-​ewwel darba! X’kienet, iżda, ir-​reazzjoni tal-​mexxejja reliġjużi? Ġwann 9:16 jirrakkonta: “Xi wħud mill-​Fariżej bdew igħidu [dwar Ġesù]: ‘Dan m’huwiex raġel mingħand Alla, għaliex ma josservax is-​Sabat.’” Kemm kienu perverti qlubhom! Hawn kien seħħ fejqan meraviljuż, imma minflok ma esprimew ferħ għar-​raġel li qabel kien għama u apprezzament lejn dak li fejqu, huma kkundannaw lil Ġesù! Billi għamlu dan, huma bla dubju dinbu kontra l-​manifestazzjoni tal-​ispirtu qaddis t’Alla, dnub li ma jinħafirx.—Mattew 12:​31, 32.

⁴ Iktar tard, meta dawk l-​ipokriti staqsew lir-​raġel li qabel kien għama dwar Ġesù, ir-​raġel qal: “Din ċertament li hi ħaġa tal-​għaġeb, li ma tafux minfejn hu [Ġesù], u madankollu hu fetaħli għajnejja. Aħna nafu li Alla ma jismax lill-​midinbin, imma jekk xi ħadd jibżaʼ minn Alla u jagħmel ir-​rieda tiegħu, hu jismaʼ lil dan il-​wieħed. Mill-​qedem qatt ma nstemaʼ li xi ħadd fetaħ il-​għajnejn taʼ wieħed imwieled għama. Kieku dan ir-​raġel [Ġesù] ma kienx mingħand Alla, hu ma setaʼ jagħmel xejn affattu.” Kif wieġbu l-​mexxejja reliġjużi? “Bi tweġiba huma qalulu: ‘Inti kont imwieled għalkollox fi dnubiet, u madankollu qiegħed tgħallem lilna?’ U tefgħuh ’il barra!” Kemm kienu neqsin mill-​mogħdrija! Huma kellhom ġebel flok qlub. Mela Ġesù qalilhom li waqt li setgħu jaraw bil-​għajnejn fiżiċi tagħhom, huma kienu spiritwalment għomja.—Ġwann 9:30-41.

5, 6. Mexxejja reliġjużi tal-​ewwel seklu x’għamlu li wera li huma kienu jħobbu d-​dlam?

⁵ Li dawn l-​ipokriti reliġjużi kienu qegħdin jidinbu kontra l-​ispirtu t’Alla jistaʼ jidher malajr minn okkażjoni oħra, meta Ġesù rxoxta lil Lażżru mill-​mewt. Minħabba f’dak il-​miraklu, ħafna min-​nies komuni poġġew fidi f’Ġesù. Innota, madankollu, x’għamlu l-​mexxejja reliġjużi. “Il-​qassisin ewlenin u l-​Fariżej ġabru lis-​Sinedriju flimkien u bdew igħidu: ‘X’se nagħmlu, għaliex dan ir-​raġel iwettaq ħafna sinjali? Jekk inħalluh waħdu b’dan il-​mod, huma kollha se jpoġġu fidi fih, u r-​Rumani se jiġu u jeħdulna kemm lil postna u kemm lil ġensna.’” (Ġwann 11:47, 48) Huma kienu qegħdin jinkwetaw dwar il-​pożizzjonijiet u l-​prominenza tagħhom. Jiġri x’jiġri huma riedu jogħġbu lir-​Rumani, mhux lil Alla. Mela, x’għamlu? “Minn dak in-​nhar ’il quddiem huma ħadu parir li joqtluh [lil Ġesù].”—Ġwann 11:53.

⁶ Dak kien kollox? Le. Dak li għamlu wara dan juri kemm huma kienu jħobbu d-​dlam: “Il-​qassisin ewlenin issa ħadu parir li joqtlu lil Lażżru wkoll, għaliex minħabba fih ħafna mil-​Lhud kienu qegħdin imorru hemm u jpoġġu fidi f’Ġesù.” (Ġwann 12:​10, 11) X’ħażen inkredibbli! Għalkemm għamlu dan kollu biex jipproteġu l-​pożizzjonijiet tagħhom, x’ġara? F’dik l-​istess ġenerazzjoni, huma għamlu rewwixta kontra r-​Rumani, li ġew kontra tagħhom fis-​sena 70 E.K. u ħadulhom posthom, ġenshom, u l-​ħajjiet tagħhom ukoll!—Isaija 5:20; Luqa 19:41-44.

Il-​Mogħdrija taʼ Ġesù

7. Dawk li jħobbu l-​verità għala marru għand Ġesù?

⁷ Hekk ukoll fi żmienna, mhux kulħadd irid tidwil spiritwali. Imma dawk li jħobbu l-​verità jridu jiġu lejn id-​dawl. Huma jridu lil Alla bħala s-​Sovran tagħhom, u jduru bil-​ħeġġa lejn Ġesù, li Alla bagħtu biex jispjega x’inhu d-​dawl, u jsegwuh. Hekk għamlu nies umlin meta Ġesù kien fuq l-​art. Huma marru bi ħġarhom għandu. Saħansitra l-​Fariżej kellhom jammettu dan. Huma lmentaw: “Id-​dinja marret warajh.” (Ġwann 12:19) Nies bħal ngħaġ ħabbew lil Ġesù għaliex hu kien l-​oppost tal-​mexxejja reliġjużi egoisti, arroganti, u għatxana għall-​poter li dwarhom Ġesù qal: “Huma jorbtu tagħbijiet tqal u jpoġġuhom fuq spallejn l-​irġiel, imma huma nfushom m’humiex lesti li jħarrkuhom b’sebagħhom. Ix-​xogħlijiet kollha li jagħmlu jagħmluhom biex jidhru mill-​bnedmin.”—Mattew 23:4, 5.

8. F’kuntrast mal-​ipokriti reliġjużi, x’attitudni kellu Ġesù?

⁸ F’kuntrast, innota l-​attitudni taʼ mogħdrija taʼ Ġesù: “Malli ra l-​folol tħassarhom, għaliex kienu mqaxxrin u mitfugħin ’il hawn u ’l hemm bħal ngħaġ mingħajr ragħaj.” (Mattew 9:36) U x’għamel dwar dan? Hu qal lil dawk li kienu ġew imbrolljati mis-​sistema taʼ Satana: “Ejjew għandi, intom ilkoll li qegħdin taħdmu iebes u mgħobbijin wisq, u jien se nserraħkom. Ħudu l-​madmad tiegħi fuqkom u tgħallmu minni, għax jien kalm u umli fil-​qalb, u intom se ssibu serħan għal erwieħkom. Għax il-​madmad tiegħi ħanin u t-​tagħbija tiegħi ħafifa.” (Mattew 11:28-30) Ġesù għamel dak li kien imbassar dwaru f’​Isaija 61:​1, 2, li jaqra: “Jehovah dilikni biex ingħid aħbar tajba lill-​ġwejdin. Hu bagħatni biex norbot lil dawk taʼ qalb maqsuma, biex nipproklama libertà lil dawk meħudin fil-​jasar u l-​ftuħ beraħ tal-​għajnejn saħansitra lill-​priġunieri; biex nipproklama s-​sena taʼ rieda tajba min-​naħa taʼ Jehovah u jum il-​vendetta min-​naħa t’Alla tagħna; biex infarraġ lill-​imnikktin kollha.”

Jiġbor lil Dawk li Jġorru d-​Dawl

9. Liema ġrajjiet memorabbli seħħew fl-​1914?

⁹ Wara t-​tlugħ tiegħu fis-​sema, Ġesù kellu jistenna sakemm jasal iż-​żmien biex Alla jagħtih qawwa tas-​Saltna. Imbagħad kellu jissepara “n-​ngħaġ” mill-​“mogħoż.” (Mattew 25:31-33; Salm 110:1, 2) Dak iż-​żmien wasal meta bdew “l-​aħħar jiem” fl-​1914. (2 Timotew 3:1-5) Ġesù, mogħni b’qawwa bħala Sultan tas-​Saltna tas-​sema t’Alla, beda jiġbor lejn l-​id il-​leminija tiegħu taʼ favur lil dawk li riedu jsegwu d-​dawl. Wara l-​Ewwel Gwerra Dinjija, dak ix-​xogħol taʼ ġbir avvanza b’għaġġla akbar.

10. Liema mistoqsija tistaʼ ssir dwar dawk li Ġesù qed juża fix-​xogħol tal-​ġbir?

¹⁰ Taħt it-​tmexxija taʼ Kristu Ġesù, ix-​xogħol taʼ ġbir ġie nkurunat b’suċċess kbir. Qatt qabel fl-​istorja ma kien hemm tant nies mill-​ġnus kollha miġburin flimkien f’qima vera mdawla. U min illum huma dawk li jsegwu d-​dawl li ġej mingħand Alla u Kristu? Min huma dawk li qegħdin jagħmlu dak li jgħid Filippin 2:​15, ‘jiddu bħala dawwala fid-​dinja,’ billi jistiednu lil oħrajn biex ‘jiġu u jieħdu l-​ilma tal-​ħajja b’xejn’?—Rivelazzjoni 22:17.

11. X’inhi l-​pożizzjoni tal-​Kristjaneżmu f’relazzjoni mad-​dawl spiritwali?

¹¹ Il-​Kristjaneżmu qiegħed jagħmel dan? Il-​Kristjaneżmu, bir-​reliġjonijiet mifrudin tiegħu, ċertament li mhux qed jiddi bħala dawwal. Fil-​fatt, il-​kleru huma bħall-​mexxejja reliġjużi fi żmien Ġesù. M’humiex qegħdin jirriflettu d-​dawl veru mingħand Alla u Kristu. Tlieta u tletin sena ilu, ir-​rivista Theology Today qalet: “B’sogħba jrid jiġi rrikonoxxut li dan id-​dawl ma jiddix fil-​Knisja b’dija li tidher. . . . Il-​Knisja wriet it-​tendenza li ssir iktar u iktar bħall-​komunitajiet li tkun imdawra bihom. M’hijiex daqstant id-​dawl tad-​dinja daqskemm hi riflettur tad-​dwal li jiddi fid-​dinja nfisha.” U l-​qagħda tal-​Kristjaneżmu hija saħansitra agħar illum. Il-​hekk imsejjaħ dawl li hi tirrifletti mid-​dinja hu fir-realtà dlam għaliex dak hu kulma għandhom x’joffru Satana u d-​dinja tiegħu. Le, m’hemm ebda dawl taʼ verità ħiereġ mir-​reliġjonijiet mifrudin u għalkollox dinjin tal-​Kristjaneżmu.

12. Min jifforma l-​organizzazzjoni vera li ġġorr id-​dawl illum?

¹² Jistaʼ jingħad b’fiduċja li s-​soċjetà tad-​dinja ġdida tax-​Xhieda taʼ Jehovah hija l-​vera organizzazzjoni li ġġorr id-​dawl illum. B’mod magħqud, il-​membri tagħha kollha—irġiel, nisa, u żgħażagħ bl-​istess mod—iħallu d-​dawl tagħhom mingħand Jehovah u Kristu jiddi quddiem l-​umanità kollha. Is-​sena l-​oħra, fi kważi 70,000 kongregazzjoni tax-​Xhieda taʼ Jehovah mad-​dinja kollha, ’il fuq ħafna minn erbaʼ miljuni wħud li jġorru d-​dawl kienu b’mod attiv qegħdin igħidu lill-​oħrajn dwar Alla u dwar l-​iskopijiet tiegħu. U kull sena issa, naraw ġbir kbir kontinwu taʼ nies li jridu wkoll jiġu mdawlin spiritwalment. Mijiet taʼ eluf qegħdin jiġu mgħammdin wara li jistudjaw il-​Bibbja u jaslu għal għarfien eżatt tal-​verità. Verament, ‘ir-​rieda t’Alla hi li kull xorta taʼ nies għandhom jiġu salvati u jiġu għal għarfien eżatt tal-​verità.’—1 Timotew 2:4.

13. Maʼ liema ħaġa nistgħu nqabblu d-​dawl ħiereġ mingħand Jehovah?

¹³ Nistgħu nqabblu t-​tidwil li issa ġej mingħand Jehovah maʼ dak li ġara meta l-​poplu t’Alla taʼ żmien il-​qedem telaq mill-​Eġittu: “Jehovah kien sejjer qabilhom bi nhar f’kolonna taʼ sħaba biex imexxihom fil-​mogħdija, u bil-​lejl f’kolonna taʼ nar biex jagħtihom dawl biex imorru bi nhar u bil-​lejl.” (Eżodu 13:​21, 22) Is-​sħaba bi nhar u n-​nar bil-​lejl mingħand Alla kienu gwidi taʼ min joqgħod fuqhom. Huma kienu taʼ min joqgħod fuqhom daqs ix-​xemx li Alla ħalaq biex tipprovdilna sigħat taʼ dawl bi nhar. Hekk, ukoll, nistgħu niddependu fuq Jehovah biex ikompli jdawwal il-​mogħdija spiritwali għal dawk li jfittxu l-​verità f’dawn l-​aħħar jiem mill-​agħar. Proverbji 4:18 jiżżgurana: “[I]l-passaġġ tal-​uħud twajbin hu bħad-​dawl qawwi li qiegħed isir iktar u iktar qawwi sakemm il-​jum jiġi stabbilit fis-​sod.”

Nirriflettu Dawl tas-​Saltna

14. X’għandu jkun l-​iskop ċentrali taʼ dawk li jġorru d-​dawl?

¹⁴ Fil-​waqt li Jehovah huwa s-​sors taʼ tidwil, u Kristu r-​Riflettur Ewlieni taʼ dak id-​dawl, is-​segwaċi taʼ Ġesù jridu jirriflettuh ukoll. Hu qal dwarhom: “Intom id-​dawl tad-​dinja. . . . Ħallu d-​dawl tagħkom jiddi quddiem il-​bnedmin, biex huma jistgħu jaraw ix-​xogħlijiet mill-​aħjar tagħkom u jagħtu glorja lil Missierkom li hu fis-​smewwiet.” (Mattew 5:​14, 16) U x’kienet it-​tema ċentrali taʼ dan id-​dawl li s-​segwaċi tiegħu kellhom iħallu jiddi quddiem il-​bnedmin? X’kellhom igħallmu f’din il-​quċċata taʼ storja dinjija? Ġesù ma qalx li s-​segwaċi tiegħu kellhom jippridkaw id-​demokrazija, id-​dittatorjat, il-​għaqda tal-​Knisja mal-​Istat, jew xi ideoloġija dinjija oħra. Minflok, f’​Mattew 24:14 hu bassar li quddiem oppożizzjoni mad-​dinja kollha, “din l-​aħbar tajba tas-​saltna [kellha] tkun ippridkata fl-​art abitata kollha għal xiehda lill-​ġnus kollha, u mbagħad [kellu] jiġi t-​tmiem.” B’hekk dawk li jġorru d-​dawl illum igħidu lill-​oħrajn dwar is-​Saltna t’Alla, li se ġġib lid-​dinja taʼ Satana għat-​tmiem tagħha u se ddaħħal id-​dinja ġdida taʼ tjieba.—1 Pietru 2:9.

15. Dawk li jridu d-​dawl fejn se jduru?

¹⁵ Dawk li jħobbu d-​dawl ma jiġux żvijati bl-​istqarrijiet u l-​miri taʼ did-dinja. Dawk l-​istqarrijiet u l-​miri kollha dalwaqt se jevaporaw, ladarba did-dinja qiegħda toqrob lejn tmiemha. Minflok, dawk li jħobbu t-​tjieba jkunu jridu jduru lejn l-​aħbar tajba li qiegħda tiġi pproklamata minn dawk li qegħdin iħallu d-​dawl tas-​Saltna t’Alla jiddi sal-​iktar irkejjen imbegħdin tal-​art. Dawn huma dawk imbassrin f’​Rivelazzjoni 7:9, 10, li jgħid: “Rajt, u, ħares! folla kbira, li l-​ebda bniedem ma kellu l-​ħila jgħodd, mill-​ġnus u t-​tribujiet u l-​popli u l-​ilsna kollha, bil-​wieqfa quddiem it-​tron [t’Alla] u quddiem il-​Ħaruf [Kristu] . . . U jibqgħu jgħajtu b’leħen qawwi, jgħidu: ‘Is-​salvazzjoni nafuha lil Alla tagħna, li qiegħed bil-​qiegħda fuq it-​tron, u lill-​Ħaruf.’” Vers 14 igħid: “Dawn huma dawk li joħorġu mit-​tribulazzjoni l-​kbira.” Iva, huma jibqgħu ħajjin fit-​tmiem taʼ did-dinja għal ġod-​dinja ġdida bla tmiem taħt is-​Saltna t’Alla.

Id-​Dinja Ġdida Mdawla

16. X’se jiġrilha d-​dinja taʼ Satana fit-​tribulazzjoni l-​kbira?

¹⁶ Id-​dinja ġdida se tkun miksija bid-​dawl jiddi taʼ verità. Tabilħaqq, ikkunsidra x’se tkun is-​sitwazzjoni l-​għada li Alla jġib lil dis-sistema fi tmiemha. Satana, id-​demonji tiegħu, u s-​sistemi politiċi, kummerċjali, u reliġjużi tiegħu se jkunu telqu​—kollha kemm huma! L-​apparat taʼ propaganda taʼ Satana kollu kemm hu se jkun telaq ukoll. B’hekk, wara t-​tribulazzjoni l-​kbira, qatt iżjed ma se tiġi ppubblikata xi gazzetta waħda, rivista, ktieb, faxxiklu, jew fuljett li tappoġġja lil did-dinja mill-​agħar. Ma se jkun hemm l-​ebda influwenzi li jikkorrompu mxandrin minn stazzjonijiet tat-​televiżjoni jew tar-​radju dinjin. L-​ambjent velenuż kollu tad-​dinja taʼ Satana se jiġi mneħħi min-​nofs b’daqqa qawwija waħda!—Mattew 24:21; Rivelazzjoni 7:14; 16:14-16; 19:11-21.

17, 18. Kif tiddeskrivi l-​ambjent spiritwali wara t-​tmiem tad-​dinja taʼ Satana?

¹⁷ X’serħan enormi se jkun dak! Minn dak il-​jum ’il quddiem, id-​dawl spiritwali bnin u edifikanti biss li ġej mingħand Jehovah u s-​Saltna tiegħu se jinfluwenza lill-​umanità. Isaija 54:13 ibassar: “Uliedek subien kollha se jkunu persuni mgħallmin minn Jehovah, u l-​paċi taʼ wliedek subien se tkun abbundanti.” Bil-​ħakma t’Alla li tiddomina l-​art kollha, il-​wegħda tiegħu hi li, kif igħid Isaija 26:​9, “it-​tjieba hija dak li l-​abitanti tal-​art produttiva ċertament li se jitgħallmu.”

¹⁸ Fi żmien qasir, l-​ambjent mentali u spiritwali kollu se jinbidel għall-​aħjar. Affarijiet edifikanti se jkunu r-​rutina taʼ kuljum minflok l-​affarijiet dipressi u immorali li issa tant huma mifruxin. Kulmin ikun igħix f’dak iż-​żmien se jiġi mgħallem il-​verità dwar Alla u dwar il-​għanijiet tiegħu. Fis-​sens l-​iktar komplet, il-​profezija taʼ Isaija 11:9 se titwettaq, li tgħid: “L-​art ċertament li se tkun mimlija bil-​għarfien taʼ Jehovah bħalma l-​ilmijiet qegħdin jiksu lill-​istess baħar.”

Urġenti li Nsegwu d-​Dawl

19, 20. Dawk li jridu jsegwu d-​dawl għala għandhom bżonn iżommu l-​għassa?

¹⁹ Issa, fis-​snin finali taʼ din is-​sistema mill-​agħar, huwa urġenti li nsegwu d-​dawl tad-​dinja. U rridu nkunu għassa, għax hemm gwerra intensa li qiegħda tiġi miġġielda biex iżżommna milli nimxu fid-​dawl. Din l-​oppożizzjoni tiġi mill-​qawwiet tad-​dlam​—mingħand Satana, id-​demonji tiegħu, u l-​organizzazzjoni tal-​art tiegħu. Hu għalhekk li l-​appostlu Pietru jwissi: “Ibqgħu f’sensikom, kunu għassa. L-​avversarju tagħkom, ix-​Xitan, idur bħal iljun igħajjat, ifittex biex jiblaʼ lil xi ħadd.”—1 Pietru 5:8.

²⁰ Satana se jpoġġi kull xkiel fil-​mogħdija taʼ dawk li jiġu f’kuntatt mad-​dawl, għaliex hu jrid li jġagħalhom jibqgħu fid-​dlam. Tistaʼ tkun pressjoni minn qraba jew dawk li qabel kienu ħbieb li jopponu l-​verità. Jistgħu jkunu dubji dwar il-​Bibbja minħabba li wieħed ikun ġie mgħomi bit-​tagħlim taʼ reliġjon falza jew mill-​propaganda taʼ ateisti u agnostiċi bla fidi. Jistgħu jkunu l-​inklinazzjonijiet midinbin taʼ dak li jkun li jagħmluha diffiċli li jgħix fi qbil maʼ ħtiġijiet divini.

21. Liema azzjoni trid tittieħed minn dawk kollha li jridu jgħixu fid-​dinja ġdida t’Alla?

²¹ Hu x’inhu x-​xkiel li jistaʼ jkun hemm, trid int tgawdi l-​ħajja f’dinja ġdida ħielsa mill-​faqar, mill-​kriminalità, mill-​inġustizzja, u mill-​gwerer? Trid int tgawdi saħħa perfetta u ħajja taʼ dejjem f’ġenna tal-​art? Allura aċċetta u segwi lil Ġesù bħala d-​dawl tad-​dinja u ismaʼ mill-​messaġġ taʼ dawk li qegħdin iżommu sod “mal-​kelma tal-​ħajja” u li qegħdin ‘jiddu bħala dawwala fid-​dinja.’—Filippin 2:15, 16.

Kif Twieġeb Int?

◻ Il-​mexxejja reliġjużi kif juru li huma jħobbu d-​dlam?

◻ X’attitudni kellu Ġesù lejn in-​nies?

◻ Il-​ġbir taʼ dawk li jġorru d-​dawl kif avvanza?

◻ Liema bidla memorabbli se sseħħ dalwaqt?

◻ Għala huwa urġenti li nsegwu d-​dawl tad-​dinja llum?