Il-​Kelma taʼ Ġeħova Hi Ħajja

Punti Prinċipali mill-​Ittri taʼ Ġwanni u taʼ Ġuda

IT-​TLIET ittri taʼ l-​appostlu Ġwanni, li x’aktarx inkitbu fis-​sena 98 E.K. minn Efesu, huma fost l-​aħħar kotba li jifformaw l-​Iskrittura mnebbħa. L-​ewwel żewġ ittri jinkuraġġixxu lill-​Kristjani biex jibqgħu mexjin fid-​dawl u biex jirreżistu l-​apostasija. Fit-​tielet waħda, Ġwanni ma jitkellimx biss dwar li wieħed jimxi fil-​verità imma wkoll jinkuraġġixxi l-​kooperazzjoni Kristjana.

Fl-ittra li kiteb mill-​Palestina, x’aktarx fis-​sena 65 E.K., Ġuda, ħu Ġesù mill-​omm, iwissi lil sħabu l-​Kristjani dwar uħud mill-​agħar li kienu daħlu baxx baxx fil-​kongregazzjoni, u jagħtihom parir dwar kif jirreżistu l-​influwenzi ħżiena. Jekk noqogħdu attenti għall-​messaġġ li hemm fit-​tliet ittri taʼ Ġwanni u fl-​epistola taʼ Ġuda nistgħu niġu megħjunin nibqgħu b’saħħitna fil-​fidi minkejja l-​ostakli.—Ebr. 4:12.

IBQGĦU MEXJIN FID-​DAWL U FL-​IMĦABBA U BIL-​FIDI

(1 Ġw. 1:1–5:21)

L-​ewwel ittra taʼ Ġwanni, li kienet intenzjonata għas-​sħubija kollha taʼ dawk f’unjoni mal-​Kristu, tipprovdi parir sod imfassal biex jgħin lill-​Kristjani jieħdu l-​waqfa tagħhom kontra l-​apostasija u jibqgħu sodi għall-​verità u għas-​sewwa. Hu jenfasizza l-​ħtieġa li nibqgħu mexjin fid-​dawl u fl-​imħabba u bil-​fidi.

“Jekk qed nimxu fid-​dawl bħalma [Alla] stess qiegħed fid-​dawl,” jikteb Ġwanni, “aħna mseħbin maʼ xulxin.” U ladarba Alla hu s-​Sors taʼ l-​imħabba, l-​appostlu jgħid: “Ħa nkomplu nħobbu lil xulxin.” Waqt li “l-​imħabba t’Alla” tqanqalna biex “nosservaw il-​kmandamenti tiegħu,” aħna nirbħu lid-​dinja permezz tal-​“fidi tagħna” f’Alla Ġeħova, fil-​Kelma tiegħu, u f’Ibnu.—1 Ġw. 1:7; 4:7; 5:3, 4.

Mistoqsijiet Skritturali Mweġbin:

2:2; 4:10—Ġesù kif inhu “sagrifiċċju propizjatorju”? Li tippropizja jfisser li “tberred,” jew li “tikkwieta.” Ġesù ta ħajtu bħala sagrifiċċju propizjatorju fis-​sens li billi għamel hekk, hu berred, jew issodisfa, dak li kienet teħtieġ il-​ġustizzja perfetta. Fuq il-​bażi taʼ dan is-​sagrifiċċju, Alla setaʼ jestendi l-​ħniena, u setaʼ jaħfer id-​dnubiet taʼ dawk li jeżerċitaw il-​fidi f’Ġesù.—Ġw. 3:16; Rum. 6:23.

2:7, 8—Ġwanni dwar liema kmandament qed jitkellem bħala li hu “qadim” kif ukoll “ġdid”? Ġwanni qed jitkellem dwar il-​kmandament rigward l-​imħabba għall-​aħwa li tqanqalna nagħmlu sagrifiċċji. (Ġw. 13:34) Hu jirreferi għalih bħala “qadim” għaliex Ġesù tah iktar minn 60 sena qabel ma Ġwanni kiteb l-​ewwel ittra mnebbħa tiegħu. B’hekk, dan il-​kmandament kien ilu għand dawk li kienu jemmnu “sa mill-​bidu” tal-​ħajjiet tagħhom bħala Kristjani. Hu wkoll “ġdid” fis-​sens li hu iktar milli wieħed ‘iħobb lil għajru bħalu nnifsu’ u jirrikjedi mħabba li tqanqlu jagħmel sagrifiċċji.—Lev. 19:18; Ġw. 15:12, 13.

3:2—X’“għadu ma ntweriex” lill-​Kristjani midlukin, u lil min se jarawh “kif inhu”? Dak li għadu ma ntweriex lilhom hu kif se jkunu meta jiġu rxoxtati lejn is-​sema b’iġsma spirti. (Flp. 3:20, 21) Madankollu, dak li jafu tassew hu li ‘meta jintwera Alla se jkunu bħalu, għax jarawh kif inhu,’ jiġifieri, “l-​Ispirtu.”—2 Kor. 3:17, 18.

5:5-8—L-​ilma, id-​demm, u l-​ispirtu kif xehdu għall-​fatt li “Ġesù hu l-​Iben t’Alla”? L-​ilma kien xhud għaliex meta Ġesù tgħammed fl-​ilma, Ġeħova nnifsu qal li kien qed japprovah bħala Ibnu. (Mt. 3:17) Id-​demm, jew il-​ħajja, taʼ Ġesù mogħti “bħala fidwa ekwivalenti” għal kulħadd, ukoll wera li Ġesù hu l-​Iben t’Alla. (1 Tim. 2:5, 6) U l-​ispirtu qaddis xehed li Ġesù hu l-​Iben t’Alla meta niżel fuqu fil-​magħmudija tiegħu, u b’hekk Ġesù setaʼ jdur “il-​pajjiż kollu jagħmel il-​ġid u jfejjaq lil dawk kollha maħqurin mix-​Xitan.”—Ġw. 1:29-34; Atti 10:38.

Lezzjonijiet Għalina:

2:9-11; 3:15. Jekk Kristjan iħalli lil xi ħaġa jew lil xi ħadd jeqridlu l-​imħabba tiegħu lejn l-​aħwa, hu jkun qed jimxi fi dlam spiritwali u ma jkunx jaf fejn sejjer.

IBQGĦU “MEXJIN FIL-​VERITÀ”

(2 Ġw. 1–13)

Ġwanni jiftaħ it-​tieni ittra tiegħu billi jgħid: “L-​anzjan lis-​sinjura magħżula u lil uliedha.” Hu jesprimi l-​ferħ meta jsib lil ‘xi wħud minn uliedha mexjin fil-​verità.’—2 Ġw. 1, 4.

Wara li jinkuraġġihom biex jikkultivaw l-​imħabba, Ġwanni jikteb: “L-​imħabba tfisser dan: li nibqgħu mexjin skond il-​kmandamenti tiegħu.” Ġwanni jwissi wkoll dwar “il-​qarrieq u l-​antikrist.”—2 Ġw. 5-7.

Mistoqsijiet Skritturali Mweġbin:

1, 13—Min hi s-​“sinjura magħżula”? Ġwanni setaʼ kien qed jirreferi għal mara individwali indirizzata bħala Kyria, li hi l-​kelma Griega għal “sinjura.” Jew forsi qed juża espressjoni figurattiva biex jindirizza lil kongregazzjoni partikulari sabiex iħawwad lill-​persekuturi. Jekk dan taʼ l-​aħħar kien il-​każ, uliedha kienu l-​membri taʼ din il-​kongregazzjoni u l-​espressjoni ‘wlied oħtha’ rreferiet għall-​membri taʼ kongregazzjoni oħra.

7—Ġwanni dwar liema ‘miġja’ taʼ Ġesù qed jitkellem hawnhekk, u l-​qarriqin kif ‘ma jistqarruhiex’? Il-​‘miġja’ m’hijiex il-​miġja futura u inviżibbli taʼ Ġesù. Minflok, hija l-​miġja tiegħu bħala bniedem u l-​fatt li ġie midluk bħala l-​Kristu. (1 Ġw. 4:2) Il-​qarriqin ma jistqarruhiex din il-​miġja tiegħu bħala bniedem. Forsi jiċħdu li Ġesù qatt għex jew jirrifjutaw li ġie midluk bl-​ispirtu qaddis.

Lezzjonijiet Għalina:

2, 4. Li nsiru nafu “l-​verità”—il-​ġabra kollha kemm hi taʼ tagħlim Kristjan li sar parti mill-​Bibbja—u li nżommu magħha huma essenzjali għas-​salvazzjoni tagħna.—3 Ġw. 3, 4.

8-11. Jekk ma rridux nitilfu “l-​qalb tajba mhix mistħoqqa, il-​ħniena u l-​paċi mingħand Alla l-​Missier u mingħand Ġesù Kristu,” kif ukoll is-​sħubija kollha mħabba taʼ sħabna fit-​twemmin, għandna ‘noqogħdu attenti’ għalina nfusna spiritwalment u nwarrbu lil dawk li ‘ma jibqgħux fit-​tagħlim tal-​Kristu.’—2 Ġw. 3.

SIRU “ĦADDIEMA SĦABHOM FIL-​VERITÀ”

(3 Ġw. 1–14)

It-​tielet ittra taʼ Ġwanni hi indirizzata lill-​ħabib persunali tiegħu Gaju. “M’għandix raġuni akbar minn din biex irrodd ħajr,” jikteb hu, “li nismaʼ li wliedi jkomplu mexjin fil-​verità.”—3 Ġw. 4.

Ġwanni jfaħħar lil Gaju għax ‘qed juri fedeltà’ billi qed jgħin lill-​aħwa li jżuruh. “Aħna għandna l-​obbligu li nilqgħu lil nies bħal dawn bl-​ospitalità,” jgħid l-​appostlu, “biex insiru ħaddiema sħabhom fil-​verità.”—3 Ġw. 5-8.

Mistoqsijiet Skritturali Mweġbin:

11—Xi wħud għala jieħdu sehem f’kondotta ħażina? Billi huma neqsin mill-​ispiritwalità, xi wħud ma jarawx lil Alla bl-​għajnejn tal-​fehma. Ladarba ma jistgħux jarawh bl-​għajnejn letterali tagħhom, huma jaġixxu bħallikieku hu mhux qed jarahom.—Eżek. 9:9.

14—Min huma dawk li ssir referenza għalihom bħala “ħbieb”? It-​terminu “ħbieb” hawnhekk jinkludi iktar minn dawk li jgawdu relazzjonijiet mill-​qrib maʼ xulxin. Ġwanni jużah biex jirreferi għal sħabu fit-​twemmin in ġenerali.

Lezzjonijiet Għalina:

4. Individwi maturi spiritwalment fil-​kongregazzjoni jesperjenzaw ferħ kbir meta jaraw il-​membri iżgħar tagħha “jkomplu mexjin fil-​verità.” U x’ferħ inkomparabbli jesperjenzaw il-​ġenituri meta jirnexxilhom jgħinu lil uliedhom isiru japprezzaw l-​affarijiet spiritwali!

5-8. Fost dawk li jaħdmu iebes għan-​nom taʼ ħuthom għax iħobbu lilhom u lil Ġeħova hemm l-​indokraturi li jivvjaġġaw, il-​missjunarji, dawk li jaqdu fi djar Betel jew fl-​uffiċċji tal-​fergħa, u dawk li huma pijunieri. Il-​fidi tagħhom hi taʼ min jimitaha, u jixirqilhom l-​appoġġ bi mħabba tagħna.

9-12. Għandna nimitaw l-​eżempju tal-​leali Demetriju u mhux dak tal-​lablabi Dijotrefe, li kien kalunnjatur.

“ŻOMMU RUĦKOM FL-​IMĦABBA T’ALLA”

(Ġuda 1–25)

Ġuda jiddeskrivi lil dawk li jinfiltraw fil-​kongregazzjoni bħala li “dejjem igergru, jilmentaw dwar xortihom, jimxu skond ix-​xewqat tagħhom stess, u fommhom jgħid kliem li jneffaħ, waqt li jammiraw individwi.”—Ġuda 4, 16.

Il-Kristjani kif jistgħu jirreżistu l-​influwenzi ħżiena? “Maħbubin,” jikteb Ġuda, “ftakru l-​kliem li ntqal qabel mill-​appostli tal-​Mulej tagħna Ġesù Kristu.” Hu jżid: “Żommu ruħkom fl-​imħabba t’Alla.”—Ġuda 17-21.

Mistoqsijiet Skritturali Mweġbin:

3, 4—Ġuda għala ħeġġeġ lill-​Kristjani biex ‘jiġġieldu bl-​aħrax għall-​fidi’? Għaliex xi ‘rġiel mhux devoti kienu daħlu baxx baxx’ fil-​kongregazzjoni. Dawn l-​irġiel kienu qed “idawru l-​qalb tajba mhix mistħoqqa t’Alla . . . fi skuża għall-​kondotta laxka.”

20, 21—Kif nistgħu ‘nżommu ruħna fl-​imħabba t’Alla’? Nistgħu nagħmlu dan bi tliet modi: (1) billi ninbnew fuq “il-​fidi l-​iktar qaddisa” tagħna permezz taʼ studju diliġenti tal-​Kelma t’Alla u billi jkollna sehem żeluż fix-​xogħol taʼ l-​ippridkar; (2) billi nitolbu “bl-​ispirtu qaddis,” jew f’armonija maʼ l-​influwenza tiegħu; u (3) billi neżerċitaw il-​fidi f’dak li jagħmel il-​ħajja taʼ dejjem possibbli—is-​sagrifiċċju tal-​fidwa taʼ Ġesù Kristu.—Ġw. 3:16, 36.

Lezzjonijiet Għalina:

5-7. Jistgħu l-​ħżiena jiskansaw il-​ġudizzju taʼ Ġeħova? Skond it-​tliet eżempji taʼ twissija li jsemmi Ġuda, dan hu impossibbli.

8-10. Għandna nsegwu l-​eżempju taʼ l-​arkanġlu Mikiel u nuru rispett lejn dawk li ngħataw l-​awtorità minn Alla.

12. L-​apostati li taparsi jħobbuna huma perikolużi għall-​fidi tagħna daqskemm il-​blat moħbi taħt l-​ilma hu perikoluż għall-​vapuri jew għall-​għawwiema. L-​għalliema foloz jistgħu jidhru li huma ġenerużi, imma huma bħal sħab bla xita għaliex huma vojti spiritwalment. Uħud bħal dawn huma bla frott bħal siġar mejtin fl-​aħħar tal-​ħarifa. Huma jiffaċċjaw il-​qerda, bħalma jagħmlu s-​siġar imqaċċtin mill-​għeruq. Inkunu għorrief jekk nevitaw l-​apostati.

22, 23. Il-​Kristjani veri jobogħdu dak li hu ħażin. Fi sforz biex isalvaw lil “uħud li għandhom id-​dubji” minn ġon-​nar tal-​qerda taʼ dejjem, uħud maturi fil-​kongregazzjoni—speċjalment l-​indokraturi maħturin—jipprovdulhom l-​għajnuna spiritwali.

[Stampi f’paġna 28]

L-​ilma, l-​ispirtu, u d-​demm xehdu li “Ġesù hu l-​Iben t’Alla”