Ku̱a̱ʼání na̱ yiví kúni mitúʼunna | ¿Ndáaña káʼa̱n Biblia xa̱ʼa̱ ña̱yóʼo?

Ni̱nda̱ka̱tu̱ʼúnna na̱ yiví na̱ ndóo nu̱ú iníísaá ñuyǐvía xa̱ʼa̱ ña̱yóʼo ta ku̱a̱ʼánína ni̱ka̱ʼa̱nna ña̱ kúni mitúʼunnína.

• “Ni nda̱a̱ ndáaka ñuuna á ni nda̱a̱ ndáaka ku̱i̱ya̱na kivi ixayo̱ʼvi̱ña xíʼinna ña̱ kutáʼanna xíʼin inkana” (ta̱ Chido Mpemba, ta̱ káchíñu xíʼin na̱ Comisión de Conexión Social de la Organización Mundial de la Salud).

Su̱ví nda̱saa na̱ yiví na̱ xa̱a̱ ku̱chée a na̱ ndási kúú na̱ kivi kuni mitúʼun, chi saátu na̱ va̱lí, na̱ íyo xu̱ʼún, na̱ kǒo kue̱ʼe̱ kúúmií á na̱ xa̱a̱ ti̱ndaʼa̱. Na̱ yiví na̱ va̱ása kítáʼan xíʼin inkana, kivi kiʼinna kue̱ʼe̱ á ndakavaní-inina.

• Ta̱ doctor Vivek Murthy ta̱ kúú cirujano chí Estados Unidos káchira: “Na̱ kúni mitúʼun va̱ása ndákava kuití inina chi iin ña̱ ndeékava kúú ña̱yóʼo”. Ta káchikara: “Iin na̱ yiví na̱ va̱ása kítáʼan xíʼin inkana kivi xa̱a̱na kuvina nda̱a̱ táki̱ʼva ndóʼo iin na̱ yiví na̱ xáʼmi yáʼaka 15 cigarro ki̱vi̱ tá ki̱vi̱”.

¿Ndáaña káʼa̱n Biblia xa̱ʼa̱ ña̱yóʼo?

Ndióxi̱ va̱ása kúni̱ra ná kuxíkáyó nu̱ú inka na̱ yiví. Ndióxi̱ kúni̱ra ña̱ ná kusi̱í-iniyó kutáʼanyó xíʼin inkana.

• Ña̱ káʼa̱n Biblia: “Ndióxi̱ ni̱ka̱ʼa̱nra: ‘Va̱ása va̱ʼa ña̱ koo mitúʼunka ta̱ ta̱a’” (Génesis 2:18).

Ndióxi̱ kúni̱ra ná kutáʼanyó xíʼinra. Ndióxi̱ káʼa̱nra ña̱ kuyatinra nu̱úyó tá ná chikaa̱yó ndee̱ ña̱ kuyatinyó nu̱úra (Santiago 4:8).

• Ña̱ káʼa̱n Biblia: “Si̱íní íyo na̱ kúnda̱a̱-ini ña̱ xíniñúʼuna Ndióxi̱, saáchi Reino Ndióxi̱ ña̱ íyo chí ndiví kuenta na̱yóʼo kooña” (Mateo 5:3).

Ndióxi̱ kúni̱ra ná ndasakáʼnuyóra xíʼin inkaka na̱ yiví. Tá kéʼéyó ña̱yóʼo saá kivi kusi̱í-iniyó.

• Ña̱ káʼa̱n Biblia: “Ná kundi̱ʼi̱ní-iniyó xa̱ʼa̱ táʼanyó ña̱ va̱ʼa na̱ʼa̱yó ña̱ kúʼvi̱-iniyó xíniyó inkana ta ná keʼéyó ña̱ va̱ʼa, ta ná kǒo sandákooyó ña̱ ndatakayó [...]. Va̱ʼaka ná chika̱a̱yó ndee̱ xíʼin táʼanyó” (Hebreos 10:24, 25).

Ña̱ va̱ʼa kunda̱a̱ka-iniún nda̱chun ndáyáʼviní ña̱ chika̱ún ndee̱ ña̱ va̱ása kuxíkáún nu̱ú inkana ta kuni mitúʼún kaʼvi artículo yóʼo “Soledad en la era de la comunicación.”