¿Á koo iin guerra mundial? | ¿Ndáaña káʼa̱n Biblia xa̱ʼa̱ ña̱yóʼo?

Ti̱xin 30 ku̱i̱ya̱ ña̱ ni̱ya̱ʼa, ku̱a̱ʼání na̱ yiví nda̱ka̱nixi̱nína ña̱ va̱ʼaní kíxáʼa kitáʼan iin país xíʼin inka país. Soo ña̱ kúu xítoyó vitin náʼa̱ ña̱ su̱ví ña̱ ndixaví kúú ña̱yóʼo.

“Na̱ yiví yíʼvina xa̱ʼa̱ ña̱ íyo guerra chí Gaza, chi sana kixáʼa inka ñuu kanitáʼanña xíʼin inka ñuu. Saáchi Israel xíʼn Hezbollah ki̱xáʼaña kánitáʼanña yatin nu̱ú xáʼñu ña̱ Líbano” (Reuters, 6 tí enero, 2024).
“Na̱ yiví na̱ kítáʼan xíʼin ña̱ Irán xa̱a̱ ku̱a̱ʼání ñuu kánitáʼanna xíʼin, ta na̱ ñuu Irán ki̱xáʼa tukuna íxava̱ʼana ka̱a náʼnuní, tu̱xií xíʼin bomba ña̱ náʼnuní. Ta saátu Rusia xíʼin China chíndeétáʼanna xíʼin Irán, ta xa̱ʼa̱ ña̱ kítáʼan na̱yóʼo kivi kanitáʼanna xíʼin inkaka ñuu” (The New York Times, 7 tí enero, 2024).
“Ndeéní sándiʼi-xa̱ʼa̱ na̱ Rusia iníísaá Ucrania xa̱ʼa̱ ña̱ kánitáʼanna xíʼinna” (Noticias ONU 11 tí enero, 2024).
Kivi koo iin ku̱a̱chi káʼnu á guerra ña̱ ndeéní xa̱ʼa̱ ña̱ ki̱xáʼa íyo ku̱a̱ʼáka xu̱ʼún na̱ ndóo chí China ta saátu ña̱ ku̱a̱ʼáka kúú na̱ soldado na̱ kúúmiína, saátu ña̱ ni̱nuní kúni na̱ ñuu Taiwán, ta saátu ña̱ va̱ása vií kítáʼan China xíʼin Estados Unidos (The Japan Times, 9 tí enero, 2024).

¿Á íyo ña̱ káʼa̱n Biblia xa̱ʼa̱ ña̱ kúu tiempo vitin? ¿Á koo inka guerra mundial?

Biblia ni̱ka̱ʼa̱nña xa̱ʼa̱ ña̱ kúu tiempo vitin

Biblia va̱ása káʼa̱n káxivíña xa̱ʼa̱ iin guerra ña̱ koo tiempo vitin, soo ni̱ka̱ʼa̱nvaña ña̱ ndeéní kanitáʼan na̱ yiví tiempo vitin, Biblia káchiña: “Ta ki̱ta inka kuáyi̱ tí kúáʼa ñuʼu̱, ta ta̱ yósó tíyóʼo nda̱kiʼinra chiñu ña̱ sakákura ku̱a̱chi nu̱ú ñuʼú” (Apocalipsis 6:4).

Tutu ña̱ ka̱ʼyí ta̱ Daniel xa̱ʼa̱ tiempo so̱ndíʼi ña̱ ndóoyó vitin, na̱ chíñu náʼnu kixáʼana kanitáʼan ña̱ va̱ʼa na̱ʼa̱na ndáana kúú na̱ ndakúka. Na̱yóʼo na̱ʼa̱na ndáana kúúmií ku̱a̱ʼáka soldado, ta saátu ndáana íyoka ku̱a̱ʼá xu̱ʼún ña̱ kuniñúʼuna kanitáʼanna (Daniel 11:40, 42, 43).

Xa̱a̱ ku̱yatin iin guerra

Biblia káʼa̱nña ña̱ kininíka koo nu̱ú ñuʼú yóʼo, ta va̱ása kuchiñu na̱ yiví xíʼinña. Ta̱ Jesús ni̱ka̱ʼa̱nra: “Kixaa̱ tu̱ndóʼo ña̱ káʼnu. Nda̱a̱ tá ki̱xáʼa xa̱ʼa̱ ñuyǐví nda̱a̱ vitin ta̱ʼán koo táʼan ña̱yóʼo” (Mateo 24:21). Ña̱ gran tribulación á tu̱ndóʼo káʼnu ndiʼiña tá ná ki̱xáʼa guerra Ndióxi̱ ña̱ naní Armagedón, Biblia káʼa̱nña xa̱ʼa̱ ña̱yóʼo ña̱ “kanitáʼanna xíʼin Ndióxi̱ ta̱ kúúmií ndiʼi ndee̱” (Apocalipsis 16:14, 16).

Soo ña̱ Armagedón sakǎkuña na̱ yiví ta va̱ása sandíʼi-xa̱ʼa̱ña na̱yóʼo. Ndióxi̱ kuniñúʼura guerra yóʼo ña̱ sandíʼi-xa̱ʼa̱ra na̱ chíñu na̱ íyo ñuyǐví yóʼo, chi na̱yóʼo kúú na̱ kéʼé guerra ña̱ sándiʼi-xa̱ʼa̱ ku̱a̱ʼání na̱ yiví. Tá kúni̱ún kunda̱a̱-iniún ndáa ki̱ʼva koo ña̱ Armagedón, ka̱ʼvi ña̱ va̱xi chí ni̱nu yóʼo: