¿Á xíni̱ún ndakuniún ndáaña kúú ña̱ nda̱a̱ ta ndáaña kúú ña̱ vatá?

1. ¿Ndáaña ndákanixi̱níún xa̱ʼa̱ ña̱ va̱xi nu̱ú Biblia?

MIÍYÓ na̱ ndásakáʼnu Jehová kúʼvi̱ní-iniyó xíniyó ña̱ nda̱a̱ ña̱ va̱xi nu̱ú tu̱ʼunra, saáchi ña̱yóʼo kúú ña̱ chíndeétáʼan xíʼinyó ña̱ kandíxakayóra (Rom. 10:17). Kúnda̱a̱-iniyó ña̱ mií Jehová kúú ta̱ ni̱ka̱ʼa̱n ña̱ koo iin congregación tá siglo nu̱ú, ta na̱yóʼo kúú na̱ xi̱natúʼun ña̱ nda̱a̱ xa̱ʼa̱ Jehová (1 Tim. 3:15). Jehová nda̱kaxinra na̱ kuniʼi yichi̱ nu̱ú na̱ ñuura, ta xíniso̱ʼoyó ña̱ káʼa̱nna chi xíniñúʼuna ña̱ va̱xi nu̱ú Biblia ña̱ ka̱ʼa̱nna xíʼinyó ndáaña xíniñúʼu keʼéyó ña̱ va̱ʼa ndasakáʼnuyó Jehová nda̱a̱ táki̱ʼva kúni̱ miíra (Heb. 13:17).

2. Nda̱a̱ táki̱ʼva káʼa̱n Santiago 5:​19, ¿ndáaña kivi kundoʼo miíyó na̱ ndásakáʼnu Jehová?

² Xa̱a̱ xíni̱vayó ña̱ nda̱a̱ ta kúnda̱a̱-iniyó ña̱ xíniñúʼu kuniso̱ʼoyó ña̱ káʼa̱n na̱ ñuu Ndióxi̱, soo xíniñúʼu kiʼinníyó kuenta ña̱ va̱ʼa kǒo sandáʼvina miíyó ta sandákooyó ña̱ nda̱a̱ (kaʼvi Santiago 5:19). Ta̱ Ndi̱va̱ʼa kǒo kúni̱ra ná kandíxayó ña̱ káʼa̱n Biblia ta saátu kǒo kúni̱ra ña̱ kuniso̱ʼoyó ña̱ káʼa̱n na̱ ñuu Ndióxi̱ xíʼinyó (Efes. 4:14).

3. ¿Nda̱chun kǒo xíniñúʼu taxiyó ña̱ sandáʼvina miíyó? (Efesios 6:​13, 14).

³ (Kaʼvi Efesios 6:​13, 14). Nu̱ú si̱lóʼoní tiempo ta̱ Ndi̱va̱ʼa kixáʼara ka̱ʼa̱nra ku̱a̱ʼání ña̱ vatá á ña̱ to̱ʼón xa̱ʼa̱ Jehová, xa̱ʼa̱ ña̱yóʼo na̱ yiví na̱ íyo iníísaá nu̱ú ñuʼú kixáʼana sa̱a̱-inina kunina Jehová (Apoc. 16:​13, 14). Ta saátu kúnda̱a̱-iniyó ña̱ ta̱ Ndi̱va̱ʼa kuni̱ra sandáʼvira ku̱a̱ʼáníka na̱ ndásakáʼnu Jehová (Apoc. 12:9). Ña̱kán ndáyáʼviní ndakuniyó ndáaña kúú ña̱ nda̱a̱ ña̱ sánáʼa̱ Jehová ta ndáaña kúú ña̱ vatá ña̱ káʼa̱n ta̱ Ndi̱va̱ʼa, tasaá kúú ña̱ kuniso̱ʼoyó ña̱ nda̱a̱ ña̱ sánáʼa̱ Jehová miíyó (Rom. 6:17; 1 Ped. 1:22). Ña̱yóʼo kúú ña̱ xíniñúʼu keʼéyó ña̱ va̱ʼa ka̱kuyó ti̱xin ña̱ gran tribulación.

4. ¿Ndáaña sakúaʼayó nu̱ú artículo yóʼo?

⁴ Nu̱ú artículo yóʼo sakúaʼayó u̱vi̱ ña̱ chindeétáʼan xíʼinyó ña̱ va̱ʼa ndakuniyó ña̱ nda̱a̱ ña̱ va̱xi nu̱ú Biblia, ta ña̱yóʼo chindeétáʼan xíʼinyó ña̱ kandíxayó ña̱ káʼa̱n na̱ ñuu Jehová. Saátu, sakúaʼayó u̱ni̱ ña̱ʼa ña̱ xíniñúʼu keʼéyó tasaá kǒo taxiyó sandáʼvina miíyó.

ÑA̱ KIVI KEʼÉYÓ ÑA̱ VA̱ʼA NDAKUNIYÓ ÑA̱ NDA̱A̱

5. Tá yíʼviyó xíniyó Jehová, ¿ndáaña kǒo keʼéyó?

⁵ Ná yi̱ʼvíyó kuniyó Jehová. Ña̱ yi̱ʼvíyó kuniyó Jehová kúni̱ kachiña ña̱ kǒo keʼéyó nda̱a̱ ni iin ña̱ʼa ña̱ kúndasíra xínira saáchi kúʼvi̱ní-iniyó xíniyóra. Kúni̱yó sakúaʼayó ndakuniyó ndáaña kúú ña̱ va̱ʼa ta ndáaña kúú ña̱ va̱ása va̱ʼa, ndáaña kúú ña̱ nda̱a̱ ta ndáaña kúú ña̱ vatá chi saá kúú ña̱ kindo̱o-ini Jehová xíʼin ña̱ kéʼéyó (Prov. 2:​3-6; Heb. 5:14). Ña̱ kúʼvi̱ní-iniyó xíniyó Jehová kúú ña̱ chindeétáʼan xíʼinyó ña̱ kǒo yi̱ʼvíyó kuniyó na̱ yiví, saáchi Jehová kúndasíra xínira ku̱a̱ʼání ña̱ kéʼé na̱ yiví.

6. ¿Ndáaña ku̱u xa̱ʼa̱ ña̱ ni̱yi̱ʼví na̱ u̱xu̱ ta̱a na̱ ni̱xa̱ʼa̱n xi̱tonaní á xi̱toniʼnivíxí ñuu Canaán?

⁶ Tá ná yi̱ʼvíkayó kuniyó na̱ yiví nu̱úka ña̱ yi̱ʼvíyó kuniyó Ndióxi̱, kivi kixáʼayó kandíxayó ña̱ vatá ña̱ káʼa̱nna xa̱ʼa̱ Jehová tasaá va̱ása kandíxakayó ña̱ nda̱a̱ ña̱ káʼa̱n Jehová xíʼinyó. Ná ndakanixi̱níyó xa̱ʼa̱ na̱ 12 ta̱a na̱ ni̱xa̱ʼa̱n xi̱tona̱ní á xi̱toniʼnivíxí ñuu ña̱ ni̱ka̱ʼa̱n Jehová taxira ndaʼa̱ na̱ ñuu Israel. U̱xu̱ na̱yóʼo ni̱yi̱ʼvínína xi̱nina na̱ cananeo nu̱úka ña̱ kuʼvi̱-inina kunina Jehová, xa̱ʼa̱ ña̱kán ni̱ka̱ʼa̱nna ña̱yóʼo: “Va̱ása kivi ku̱ʼu̱nyó kanitáʼanyó xíʼin na̱ yiví kán chi ndakúníkavana nu̱úyó” (Núm. 13:​27-31). Ndakúníkava ni̱xi̱yo na̱ cananeo nu̱ú na̱ israelita, soo tá ni̱ka̱ʼa̱n u̱xu̱ ta̱a yóʼo ña̱ kǒo kuchiñuna kanitáʼanna xíʼin na̱ cananeo na̱ndósó-inina ña̱ íyova Jehová ña̱ chindeétáʼanra xíʼinna, ta ña̱ xi̱niñúʼu keʼé kuitína kúú ña̱ ndakaʼánna ndáaña xi̱kuni̱ Jehová keʼéna. Saátu xi̱niñúʼu ndakaʼánna ndáa ki̱ʼva chi̱ndeétáʼan Jehová xíʼinna tá ya̱chi̱ tasaá kiʼinna kuenta ña̱ ni loʼo va̱ása kuchiñu na̱ cananeo xíʼin Jehová ta̱ kúúmií ku̱a̱ʼání ndee̱. Soo, ta̱ Josué xíʼin ta̱ Caleb xi̱kandíxanívana Jehová ta xi̱kuni̱na sákusi̱ína-inira, ña̱kán ni̱ka̱ʼa̱nna ña̱yóʼo xíʼin na̱ ñuu: “Tá kúsi̱í-ini Jehová xíʼin ña̱ kéʼéyó chindeétáʼanvara xíʼinyó ña̱ xa̱a̱yó nu̱ú ñuʼú kán ta ndataxivaraña ndaʼa̱yó” (Núm. 14:​6-9).

7. ¿Ndáaña chindeétáʼan xíʼinyó ña̱ yi̱ʼvíyó kuniyó Jehová? (Koto na̱ʼná).

⁷ Tá xa̱a̱ ndáka̱xinyó keʼéyó iin ña̱ʼa ná ndakaʼányó ndáaña kúú ña̱ kútóo Jehová ta ndáaña kúú ña̱ va̱ása kútóora, ña̱yóʼo chindeétáʼan xíʼinyó ña̱ yi̱ʼvíkayó kuniyóra (Sal. 16:8). Tá káʼviún iin ña̱ va̱xi nu̱ú Biblia ndakanixi̱ní xa̱ʼa̱ pregunta yóʼo: “¿Ndáaña keʼíi̱ tá yi̱ʼi̱ níndoʼo táʼan ña̱ ndo̱ʼo na̱kán? Tá kúú, ndakanixi̱ní ña̱ xíniso̱ʼún ña̱ káʼa̱n na̱ u̱xu̱ espía, ¿á kandíxaún ña̱ káʼa̱nna ta á yi̱ʼvíún xa̱ʼa̱ ña̱yóʼo? ¿Á na̱ʼún ña̱ kúʼvi̱níka-iniún xíniún Jehová ta kúni̱ún sákusi̱íún-inira?”. Ku̱a̱ʼání na̱ ñuu Israel i̱xayo̱ʼvi̱níña xíʼinna kandíxana ña̱ ni̱ka̱ʼa̱n ta̱ Josué xíʼin ta̱ Caleb. Ta, ¿ndáaña ndo̱ʼona xa̱ʼa̱ ña̱yóʼo? Kǒo níki̱ʼvina nu̱ú ñuʼú ña̱ ni̱ka̱ʼa̱n Jehová taxira ndaʼa̱na (Núm. 14:​10, 22, 23).

8. ¿Ndáaña xíniñúʼu chikaa̱yó ndee̱ keʼéyó, ta nda̱chun?

⁸ Vitá ná koo iniyó. Jehová sánáʼa̱ra na̱ yiví na̱ vitá-ini ña̱ va̱ʼa kunda̱a̱-inina ndáaña kúú ña̱ nda̱a̱ (Mat. 11:25). Tá sa̱kúaʼayó ña̱ nda̱a̱ xa̱ʼa̱ Jehová, vitá ni̱xi̱yo iniyó ta ta̱xiyó ña̱ chi̱ndeétáʼan inkana xíʼinyó (Hech. 8:​30, 31). Nisaá, xíniñúʼu kiʼinyó kuenta ña̱ kǒo kixáʼa ni̱nu kuniyó. Tá ná kixáʼayó ni̱nu kuniyó sana ndakanixi̱níyó ña̱ ndáyáʼviníka ña̱ ndákanixi̱ní miíyó nu̱úka ña̱ káʼa̱n tu̱ʼun Ndióxi̱ xíʼin ña̱ káʼa̱n na̱ ñuura xíʼinyó.

9. ¿Ndáaña chindeétáʼan xíʼinyó ña̱ vitá koo iniyó?

⁹ ¿Ndáaña chindeétáʼan xíʼinyó ña̱ vitá koo iniyó? Ña̱ ndakaʼányó ña̱ íyoníva ndee̱ Jehová, ta miíyó kǒovíña kúúmiíyó (Sal. 8:​3, 4). Saátu ná ka̱ʼa̱nyó xíʼin Jehová ña̱ chindeétáʼanra xíʼinyó ña̱ vitá koo iniyó tasaá kuniso̱ʼoyó ña̱ sánáʼa̱ra miíyó. Ta miíra chindeétáʼan xíʼinyó ña̱ kuniso̱ʼoyó ña̱ káʼa̱nra xíʼinyó nu̱ú tu̱ʼunra, ta saátu ña̱ káʼa̱n na̱ ñuura ta kǒo keʼéyó ña̱ ndákanixi̱ní miíyó. Tá káʼviún Biblia, nandukú texto ña̱ káʼa̱n xa̱ʼa̱ Jehová ña̱ kúni̱níra xínira na̱ vitá-ini ta kúndasíníra xínira na̱ ni̱nu kúni, na̱ so̱ʼoní. Saátu, tá táxina iin chiñu ndaʼún ti̱xin ñuu Ndióxi̱, vitá koo iniún.

¿NDÁAÑA KEʼÉYÓ ÑA̱ VA̱ʼA KUNISO̱ʼOYÓ ÑA̱ KÁʼA̱N NDIÓXI̱?

10. ¿Ndáana xa̱a̱ xíniñúʼu Jehová ña̱ va̱ʼa kuniʼina yichi̱ nu̱ú na̱ ñuura?

¹⁰ Ndiʼi tiempo ná kuniso̱ʼoyó ña̱ káʼa̱n na̱ ñuu Jehová xíʼinyó. Jehová xi̱niñúʼura ta̱ Moisés xíʼin ta̱ Josué ña̱ va̱ʼa ka̱ʼa̱nra xíʼin na̱ ñuu Israel ndáaña xi̱kuni̱ra keʼéna (Jos. 1:​16, 17). Ña̱kán, tá xi̱xiniso̱ʼo na̱ ñuu ña̱ xi̱ka̱ʼa̱n ta̱ Josué xíʼin ta̱ Moisés ku̱a̱ʼání ña̱ va̱ʼa xi̱ndakiʼinna. Tá ni̱ya̱ʼa ku̱a̱ʼá ku̱i̱ya̱, tá ki̱xáʼa íyo ña̱ congregación cristiana na̱ 12 apóstol kúú na̱ xi̱ka̱ʼa̱n xíʼinna ndáaña keʼéna (Hech. 8:​14, 15). Ta saátu ndaka̱xinna sava na̱ anciano na̱ ñuu Jerusalén ña̱ va̱ʼa chindeétáʼanna xíʼin na̱ apóstol. Xa̱ʼa̱ ña̱ va̱ʼaní xi̱xiniso̱ʼo na̱ cristiano na̱ ni̱xi̱yo siglo nu̱ú ña̱ xi̱ka̱ʼa̱nna xíʼinna, ndiʼina va̱ʼaníka ki̱xáʼa kándíxana Ndióxi̱ ta ndiʼi ki̱vi̱ ku̱a̱ʼáka xi̱nduuna (Hech. 16:​4, 5). Ta saátu tiempo vitin, ku̱a̱ʼání ña̱ va̱ʼa ndákiʼinyó tá xíniso̱ʼoyó ña̱ káʼa̱n na̱ ñuu Ndióxi̱ xíʼinyó. Ña̱kán, ¿ndáa ki̱ʼva kuni Jehová tá ná kǒo kuniso̱ʼoyó na̱ nda̱kaxinra kuniʼi yichi̱ nu̱úyó? Ña̱ va̱ʼa kunda̱a̱-iniyó xíʼin ña̱yóʼo, ná kotoyó ndáaña ku̱u xíʼin na̱ ñuu Israel tá kúma̱níka xa̱a̱na nu̱ú ñuʼú ña̱ ni̱ka̱ʼa̱n Jehová taxira ndaʼa̱na.

11. ¿Ndáaña ndo̱ʼo na̱ ñuu Israel xa̱ʼa̱ ña̱ kǒo níxiinna kuniso̱ʼona ña̱ ni̱ka̱ʼa̱n ta̱ Moisés? (Koto na̱ʼná).

¹¹ Tá kúma̱níka xa̱a̱ na̱ ñuu Israel nu̱ú ñuʼú ña̱ ni̱ka̱ʼa̱n Jehová taxira ndaʼa̱na, sava na̱ ta̱a ki̱xáʼana káʼa̱n kúáchina xa̱ʼa̱ chiñu ña̱ ta̱xi Jehová ndaʼa̱ ta̱ Moisés ta ni̱ka̱ʼa̱nna: “Ndiʼiva na̱ ñuu yóʼo kúúna na̱ yi̱i̱ ta su̱ví iinlá ta̱ Moisés, ta Jehová íyora xíʼinna” (Núm. 16:​1-3). Na̱ yi̱i̱ xi̱kuu ndiʼiva na̱ ñuu Israel nu̱ú Jehová, soo miíra nda̱kaxin ta̱ Moisés ña̱ kuniʼira yichi̱ nu̱ú na̱ ñuura (Núm. 16:28). Tá xi̱ka̱ʼa̱n na̱ ñuu Israel ña̱ va̱ása va̱ʼa xa̱ʼa̱ ta̱ Moisés, xa̱ʼa̱ Jehová xi̱ka̱ʼa̱nna ña̱yóʼo. Kǒo níxi̱kiʼinna kuenta xíʼin ña̱ xi̱ka̱ʼa̱n Jehová chi ña̱ xi̱kuni̱na kúú ña̱ kuumiína chiñu á ña̱ ka̱ʼa̱n va̱ʼana xa̱ʼa̱na. Jehová sa̱ndíʼi-xa̱ʼa̱ra na̱ xi̱ka̱ʼa̱n kúáchi xíʼin ndiʼi na̱ xi̱kitáʼan xíʼinna (Núm. 16:​30-35, 41, 49). Ki̱ʼva saá kúu tiempo vitin. Jehová kúndasíra xínira na̱ kǒo xíín kuniso̱ʼo na̱ nda̱kaxinra kuniʼi yichi̱ nu̱ú na̱ ñuura.

12. ¿Nda̱chun kivi kandíxayó ndiʼi ña̱ káʼa̱n na̱ ñuu Ndióxi̱ xíʼinyó?

¹² Va̱ʼaní kándíxayó ña̱ káʼa̱n na̱ ñuu Ndióxi̱ xíʼinyó chi ndiʼi tiempo kéʼéna ña̱ va̱xi nu̱ú tu̱ʼunra. Sava ña̱ xi̱kandíxayó tá ya̱chi̱ á sava chiñu ña̱ xi̱keʼéyó nu̱ú Ndióxi̱, tá nása̱maña ndi̱ku̱n kama káʼa̱n na̱ ñuu Ndióxi̱ xíʼinyó (Prov. 4:18). Kéʼéna ña̱yóʼo chi kúni̱na sákusi̱ína-ini Jehová, ta ndiʼi ña̱ ndáka̱xinna keʼéna távánaña nu̱ú ña̱ Biblia tasaá xíniñúʼu keʼé ndiʼi miíyó na̱ ndásakáʼnu Jehová.

13. ¿Ndáaña kúú “tu̱ʼun va̱ʼa” ta ndáaña xíniñúʼu keʼéyó xíʼinña?

¹³ “Kǒo sandákoún tu̱ʼun va̱ʼa ña̱ xi̱niso̱ʼún ni̱ka̱ʼi̱n” (2 Tim. 1:13). ¿Ndáaña kúú “tu̱ʼun va̱ʼa” yóʼo? Ña̱yóʼo kúú ña̱ sákuaʼayó nu̱ú Biblia (Juan 17:17). Nu̱ú Biblia va̱xi ndiʼi ña̱ sákuaʼayó xa̱ʼa̱ Ndióxi̱ xíʼin ña̱ kándíxayó. Na̱ ñuu Ndióxi̱ káʼa̱nna xíʼinyó ña̱ ná kuniso̱ʼoyó ndiʼi ña̱ va̱xi nu̱ú Biblia tasaá si̱íní kooyó.

14. ¿Ndáaña ku̱u xíʼin sava na̱ cristiano na̱ ni̱xi̱yo siglo nu̱ú?

¹⁴ ¿Ndáaña kundoʼoyó tá ná kǒo kandíxakayó ña̱ va̱xi nu̱ú Biblia? Ná ka̱ʼa̱nyó xa̱ʼa̱ ña̱ ku̱u tá siglo nu̱ú. Sava na̱ cristiano ki̱xáʼana káʼa̱nna ña̱ xa̱a̱ ki̱xaa̱ ki̱vi̱ káʼnu Jehová. Sana ni̱xi̱yo iin carta ña̱ xi̱ka̱ʼa̱n xa̱ʼa̱ ña̱yóʼo, ta xi̱ka̱ʼa̱nna ña̱ sana ta̱ apóstol Pablo kúú ta̱ ka̱ʼyíña. Soo, kǒo nínandukú va̱ʼana xa̱ʼa̱ña. Ña̱kán, sava na̱ cristiano na̱ congregación ña̱ Tesalónica ki̱xáʼana kándíxana ña̱yóʼo ta ki̱xáʼana nátúʼunna xa̱ʼa̱ña xíʼin inkana. Tá níndakaʼánna xa̱ʼa̱ ña̱ sa̱náʼa̱ ta̱ Pablo miína tiempo ña̱ ni̱xi̱yora xíʼinna, sana kǒo kandíxavína ña̱ vatá yóʼo (2 Tes. 2:​1-5). Ta̱ apóstol Pablo ni̱ka̱ʼa̱nra xíʼinna ña̱ ná kǒo kandíxana ndiʼi ña̱ káʼa̱nna xíʼinna. Ta ña̱ va̱ʼa kǒo sandáʼvi tukunana, tu̱ʼun ña̱ so̱ndíʼi ña̱ ka̱ʼyíra nu̱ú carta ña̱ u̱vi̱ káchiña: “Yi̱ʼi̱ ta̱ Pablo kúú ta̱ káʼyí ña̱yóʼo ku̱xa̱a̱ nu̱úndó ña̱ chíndeéi̱ ndóʼó. Saá káʼyíi̱ ndiʼi carta ña̱ va̱ʼa kunda̱a̱-inindó ña̱ yi̱ʼi̱ kúú ta̱ káʼyíña” (2 Tes. 3:17).

15. ¿Ndáaña kivi keʼéyó tasaá kǒo kandíxayó ña̱ vatá ña̱ káʼa̱n na̱ yiví? Ka̱ʼa̱n xa̱ʼa̱ iin ejemplo. (Koto na̱ʼná).

¹⁵ ¿Ndáaña sákuaʼayó xíʼin ña̱ ka̱ʼyí ta̱ Pablo ku̱a̱ʼa̱n nu̱ú na̱ tesalonicenses? Tá káʼa̱nna xíʼinyó xa̱ʼa̱ iin ña̱ʼa ña̱ ndáka̱nda̱ní-iniyó xíʼin á tá káʼa̱nna xíʼinyó xa̱ʼa̱ iin ña̱ʼa ña̱ kǒo va̱xi nu̱ú Biblia, ná kǒo kuniso̱ʼoyóna. Na̱ sáa̱-ini xíni na̱ ñuu Ndióxi̱ na̱ ni̱xi̱yo Unión Soviética ka̱ʼyína iin carta ku̱a̱ʼa̱n nu̱ú na̱ hermano, ta nu̱ú ña̱ carta yóʼo ni̱ka̱ʼa̱nna ña̱ na̱ hermano na̱ káchíñu Betel ña̱ Estados Unidos chi̱ndaʼáña nu̱úna. Ta carta yóʼo xi̱ka̱ʼa̱nña ña̱ ná ndata̱ʼvína ta ná kǒo taxina ña̱ kaʼnda inkana chiñu nu̱úna saáchi miína xíniñúʼu ndaka̱xin ña̱ keʼéna. Soo, na̱ hermano na̱ nda̱kúní ni̱xi̱yo ini xíʼin Jehová, kǒo níkeʼéna ña̱ xi̱ka̱ʼa̱n carta kán chi ki̱ʼinna kuenta ña̱ su̱ví na̱ ñuu Ndióxi̱ níchindaʼáña. Ta saátu tiempo vitin, na̱ sáa̱-ini xíni na̱ ñuu Ndióxi̱, xíniñúʼuna internet ña̱ káʼa̱nna ku̱a̱ʼání ña̱ vatá, ta xíʼin ña̱ káʼa̱nna kivi sakána xi̱níyó. Soo, ña̱ chindeétáʼan xíʼinyó ña̱ kǒo sakána xi̱níyó ni ña̱ sandáʼvina miíyó kúú ña̱ kiʼinyó kuenta ña̱ ndiʼi ña̱ xíniso̱ʼoyó xíʼin ña̱ káʼviyó ná kitáʼanña xíʼin ña̱ xa̱a̱ xíni̱yó xa̱ʼa̱ tu̱ʼun Ndióxi̱ (2 Tes. 2:2; 1 Juan 4:1).

16. Táki̱ʼva káchi Romanos 16:17 xíʼin 18, ¿á xíniñúʼu kutáʼankayó xíʼin na̱ kǒo kándixaka ña̱ káʼa̱n Jehová?

¹⁶ Kǒo sandákoún ña̱ kitáʼún xíʼin na̱ hermano na̱ nda̱kú íyo ini xíʼin Jehová. Inkáchi kúni̱ Jehová ña̱ kutáʼan ndiʼiyó ndasakáʼnuyóra, ta va̱ʼa keʼéyó ña̱yóʼo tá ndiʼi tiempo xíniso̱ʼoyó ña̱ nda̱a̱ ña̱ va̱xi nu̱ú tu̱ʼunra. Soo, na̱ kǒo kándíxaka ña̱ nda̱a̱ ña̱ va̱xi nu̱ú Biblia kíxáʼana ndátaʼvína na̱ congregación. Ña̱kán, Jehová káʼa̱nra xíʼinyó ña̱ kǒo kitáʼanyó xíʼin na̱yóʼo, chi tá kǒo kíʼinyó kuenta kivi sákuxíkana miíyó nu̱úra (kaʼvi Romanos 16:​17, 18).

17. ¿Ndáaña va̱ʼa ndakiʼinyó tá ná kandíxayó ña̱ nda̱a̱ ña̱ káʼa̱n Biblia?

¹⁷ Tá ndákuniyó ña̱ nda̱a̱ ña̱ va̱xi nu̱ú Biblia ta kéʼéyó ña̱ káʼa̱nña, ña̱yóʼo chindeétáʼan xíʼinyó ña̱ va̱ʼaníka kutáʼanyó xíʼin Jehová (Efes. 4:​15, 16). Tasaá kǒo kandíxayó ña̱ vatá ña̱ káʼa̱n na̱ yiví xíʼin ña̱ vatá ña̱ káʼa̱n ta̱ Ndi̱va̱ʼa. Tá iinlá Jehová ná kuniso̱ʼoyó saá kundaara miíyó tá ná kundikaa̱ ña̱ gran tribulación. Kǒo sandákoún kandíxaún ña̱ nda̱a̱ ña̱ káʼa̱n Biblia ta Ndióxi̱ Jehová ta̱ sándi̱ko-ini na̱ yiví chindeétáʼanra xíʼún (Filip. 4:​8, 9).