အမှန်တကယ်ရှိတော်မူသော ဘုရားသခင်ကို သင်ကိုးစားသလော

အစောပိုင်းခုနစ်နှစ်ခန့်ကဖြစ်သော ၁၉၀၆ ခုနှစ်တွင် စူးစမ်းရှာဖွေသူ ရောဘတ် အီး. ဖဲရီး တွေ့ ရှိခဲ့သည်ဟု သတင်းပို့ခဲ့သည့် အာတိတ်ဒေသကို အမေရိကန်သဘာဝသမိုင်းပြတိုက်မှ တာဝန်ရ စူးစမ်းရှာဖွေရေးအဖွဲ့တစ်ဖွဲ့သည် လေ့လာရန် ခရီးနှင်လျက်ရှိခဲ့သည်။

မြောက်အမေရိကတိုက်၏ မြောက်ဘက်စွန်းပိုင်းရှိ ကိုးလ်ဂိတ်အငူမှ ဖဲရီးသည် ဝေးလံသောနေရာတစ်နေရာတွင်ရှိ အဖြူရောင်တောင်ထိပ်များနှင့်တူသည့်အရာကို သတိပြုမိခဲ့သည်။ ထိုနေရာကို မိမိအားငွေကြေးထောက်ပံ့ပေးသူတစ်ဦးအမည်ဖြင့် ခရော့ခ်ကာပြည်နယ်ဟု သမုတ်ခဲ့၏။ နောက်ထပ်စူးစမ်းရှာဖွေရေးအဖွဲ့၏ အဖွဲ့ဝင်များသည် မိမိတို့ရှေ့ ရပ်ဝေးတွင် တောင်ကုန်းများ၊ ချိုင့်ဝှမ်းများနှင့် နှင်းဖုံးတောင်ထိပ်များကို ရိုးရိုးရိပ်ရိပ်မြင်လိုက်သောအခါ တကယ်ဝမ်းသာလိုက်ကြမည်ဖြစ်ခြင်း! သို့သော် သူတို့တွေ့မြင်ခဲ့သောအရာသည် အာတိတ်တံလျှပ်တစ်ခုမျှဖြစ်ကြောင်း မကြာမီ သိရှိသွားကြသည်။ ဝန်းကျင်အခြေအနေကြောင့်ဖြစ်ပေါ်သော ဤတံလျှပ်သည် ဖဲရီးကို အမြင်မှားစေခဲ့ရာ ယခု သူတို့သည် တကယ်မရှိသည့်အရာကို စူးစမ်းရှာဖွေမှုအတွက် အချိန်၊ ခွန်အားနှင့် ငွေကြေးများစွာ ကုန်ကျခံခဲ့ပြီးဖြစ်သည်။

ယနေ့ လူများစွာသည် တကယ်ရှိသည်ဟုထင်မှတ်သော ဘုရားများကိုကိုးကွယ်ပြီး ၎င်းတို့အတွက် အချိန်များစွာပေးဆက်ကြသည်။ ယေရှု၏တမန်တော်များလက်ထက်တွင် ဟေရမေနှင့် ဇုသဟူသောဘုရားများကို ကိုးကွယ်ခဲ့ကြ၏။ (တမန်တော် ၁၄:၁၁၊ ၁၂) မျက်မှောက်ခေတ်တွင် ရှင်တို၊ ဟိန္ဒူနှင့် အခြားဘာသာဝင်များ ကိုးကွယ်ဆည်းကပ်ကြသည့်ဘုရားများ သန်းနှင့်ချီ၍ရှိသည်။ သမ္မာကျမ်းစာဆိုသည့်အတိုင်း “ဘုရားများ၊ အရှင်များ” ရှိသည်။ (၁ ကောရိန္သု ၈:၅၊ ၆) ထိုဘုရားအားလုံးသည် မှန်နိုင်ပါမည်လော။

“မကယ်တင်နိုင်သော” ဘုရားများ

ဥပမာ၊ ဝတ်ပြုကိုးကွယ်ရာ၌ ရုပ်ပုံများနှင့် ကိုယ်စားပြုသင်္ကေတများ အသုံးပြုခြင်းကို သုံးသပ်ကြည့်ပါ။ ၎င်းတို့ကို ယုံကြည်ကိုးစားသူများ၊ ၎င်းတို့မှတစ်ဆင့် ဆုတောင်းကြသူများအတွက် ရုပ်ပုံတို့သည် ကောင်းကျိုးပြုနိုင်၍ အန္တရာယ်မှလွတ်မြောက်စေနိုင်သော လူတို့ထက်သာလွန်သော အစွမ်းတန်ခိုးများရှိ ကယ်တင်ရှင်များဖြစ်ဟန်ရှိသည်။ သို့ရာတွင် ၎င်းတို့သည် အမှန်တကယ်ပင် ကယ်တင်နိုင်ပါသလော။ . . . —ဆာလံ ၁၃၅:၁၅-၁၇; ဟေရှာယ ၄၅:၂၀; ၄၆:၇; ဟဗက္ကုတ် ၂:၁၈။

ယနေ့ ဖျော်ဖြေရေးသမားများ၊ အားကစားအကျော်အမော်များ၊ နိုင်ငံရေးစနစ်များနှင့် ဘာသာရေးခေါင်းဆောင်အချို့ကို အလွန်အမင်း ကြည်ညိုလေးမြတ်ခြင်းသည် အဆန်းမဟုတ်တော့ချေ။ ထို့ပြင် လူများစွာအတွက် ငွေသည် ဘုရားတစ်ဆူဖြစ်၏။ ထိုသို့သောကိစ္စတစ်ခုစီတွင် ထိုအရုပ်များ၌မရှိသည့် အရည်အသွေးများ၊ တန်ဖိုးများကို ၎င်းတို့အား ပေးထားကြသည်။ ၎င်းတို့ကို ယုံကြည်အားကိုးသူတို့ မျှော်လင့်ရာကို ထိုအရာများက မဖြည့်ဆည်းပေးနိုင်ပေ။ ဥပမာ၊ ချမ်းသာကြွယ်ဝခြင်းက ပြဿနာများစွာကို ကိုင်တွယ်ဖြေရှင်းနိုင်ပုံပေါက်သော်လည်း စည်းစိမ်ဥစ္စာသည် လှည့်စားတတ်၏။ (မာကု ၄:၁၉) သုတေသနပြုသူတစ်ဦးက ဤသို့မေးခွန်းထုတ်သည်– “ပြဿနာအားလုံးအတွက် ကုဆေးအဖြစ်ယုံကြည်ကာ လူများစွာ မက်မက်မောမောလိုချင်သည့်အရာ၊ တကယ်တမ်းရရှိလာသည့်အခါ စိတ်ပျက်စရာကောင်းခြင်းမှသည် စိတ်ဒဏ်ရာရသည်အထိ အဘယ်ကြောင့်ဖြစ်ရခြင်းကို မည်သို့ဖြေရှင်းမည်နည်း။” မှန်ပါသည်၊ လူတစ်ဦးမှာ စည်းစိမ်ဥစ္စာရှိဖို့ သူသည် အမှန်တကယ်တန်ဖိုးရှိရာများဖြစ်သည့် ကျန်းမာရေးကောင်းခြင်း၊ သာယာသောမိသားစုဘဝ၊ ရင်းနှီးသောမိတ်ဆွေများ၊ ဖန်ဆင်းရှင်နှင့် ဆက်ဆံရေးကောင်းခြင်းတို့ကို အရှုံးခံစွန့်လွှတ်ခဲ့ရပေမည်။ သို့သော် သူ၏ဘုရားသည် ‘မုသာ’ သာ ဖြစ်ကြောင်း သိလာရပေမည်!—ယောန ၂:၈။

‘ထူးသောသူမရှိ’

ပရောဖက်ဧလိယလက်ထက်ရှိ ဗာလဝတ်ပြုသူများသည် ခါးသီးသောအတွေ့အကြုံအားဖြင့် အမှန်တကယ်မရှိရာကို ရှိ၏ဟုဆိုခြင်းမှာ မိုက်မဲကြောင်းသိရှိခဲ့ကြရသည်။ ဗာလသည် ကောင်းကင်မှမီးကျစေ၍ တိရစ္ဆာန်ယဇ်သကာကို လောင်ကျွမ်းစေနိုင်စွမ်းရှိသည်ဟု သူတို့အခိုင်အမာယုံကြည်ကြသည်။ ထို့ကြောင့် သူတို့သည် “‘အိုဗာလဘုရား အကျွန်ုပ်တို့အား ထူးတော်မူပါ’ ဟု နံနက်အချိန်မှစ၍ မွန်းတည့်အချိန်တိုင်အောင် ဗာလ၏နာမကိုဟစ်ခေါ်ကြ၏။” ဗာလ၌ ကြားနိုင်သောနား၊ ပြောနိုင်သောနှုတ်ရှိပါသလော။ မှတ်တမ်းကဤသို့ဆက်ပြောပြသည်– “ဗျာဒိတ်သံမရှိ။ ထူးသောသူ အမှုထားသောသူလည်းမရှိ။” (၃ ဓမ္မရာဇဝင် ၁၈:၂၆၊ ၂၉) ဗာလသည် အသက်ရှင်လှုပ်ရှားသော တကယ့်ပုဂ္ဂိုလ်တစ်ပါးမဟုတ်ပေ။

အမှန်တကယ်ရှိသောဘုရားသခင်ကို ကျွန်ုပ်တို့သိကျွမ်းပြီး ဝတ်ပြုခြင်းသည် တကယ်အရေးကြီးလှသည်တကား! သို့ရာတွင် ကိုယ်တော်ကားမည်သူနည်း။ ကိုယ်တော့်အား ယုံကြည်ကိုးစားခြင်းက ကျွန်ုပ်တို့ကို မည်သို့အကျိုးပြုမည်နည်း။

[စာမျက်နှာ ၃ ပါ ရုပ်ပုံ]

ဖဲရီး၏အဖော် အဂင်ဝေါသည် ကုန်းမြေတွေ့ရန် မိုးကုပ်စက်ဝိုင်းကို စေ့စေ့ကြည့်ရှုနေ

ရောဘတ် အီး. ဖဲရီး

[Credit Lines]

Egingwah: From the book The North Pole: Its Discovery in 1909 Under the Auspices of the Peary Arctic Club, 1910; Robert E. Peary: NOAA

[စာမျက်နှာ ၃ ပါ ရုပ်ပုံ]

ဤလောကတွင် ကြည်ညိုလေးမြတ်ခံရရာများဖြင့် လူအများ ထင်ယောင်ထင်မှားဖြစ်ခဲ့