၃ ပြဿနာတွေကို ခံရပ်နိုင်ဖို့ ကူညီပေး

နာတာရှည်ရောဂါ

“မျိုးရိုးလိုက်ရောဂါကြောင့် အမြဲပဲ နာကျင်ကိုက်ခဲနေတယ်။ ဘာမှ မလုပ်နိုင်မကိုင်နိုင်ဘူး” လို့ ရို့စ် ပြောတယ်။ အဆိုးဆုံးကတော့ ကျမ်းစာလေ့လာမှု၊ ဝတ်ပြုမှုတွေကိုတောင် ကောင်းကောင်း အာရုံမစိုက်နိုင်တာပဲ။ ဒါပေမဲ့ “ဘုရားသခင်အတွက်တော့ အရာအားလုံး ဖြစ်နိုင်တယ်” ဆိုတဲ့ မဿဲ ၁၉:၂၆ ပါ ယေရှုရဲ့ စကားတွေကနေ အကူအညီရခဲ့တယ်။ တခြားနည်းတွေနဲ့လည်း လေ့လာနိုင်မှန်း သူ သိလာတယ်။ နာကျင်ကိုက်ခဲမှုကြောင့် စာမဖတ်နိုင်တဲ့အခါ ကျမ်းစာနဲ့ ကျမ်းစာစာပေတွေ အသံသွင်းထားတာကို နားထောင်တယ်။a “အဲဒါတွေသာ မရှိရင် ဘုရားနဲ့ ရင်းနှီးတဲ့ဆက်ဆံရေးရှိဖို့ မလွယ်ဘူး” လို့ သူပြောတယ်။

ရို့စ်ဟာ အရင်တုန်းကလို မလုပ်နိုင်တော့လို့ ဝမ်းနည်းမိတဲ့အခါ “စေတနာစိတ်နဲ့ ပေးလှူတာကို ဘုရားသခင် နှစ်သက်တယ်။ မတတ်နိုင်တာကို မဟုတ်ဘဲ တတ်နိုင်တာကို ပေးလှူဖို့ ဘုရားသခင် မျှော်လင့်တယ်” ဆိုတဲ့ ၂ ကောရိန္သု ၈:၁၂ ပါ ကျမ်းစကားကနေ နှစ်သိမ့်မှုရတယ်။ သူ တတ်နိုင်သလောက် လုပ်နေတာကို ဘုရား နှစ်သက်တယ်ဆိုတာကိုလည်း သတိရစေတယ်။

ဝမ်းနည်းပူဆွေးမှု

အစောပိုင်းမှာပါတဲ့ ဒက်ဖနီ အခုလို ပြောတယ်– “၁၈ နှစ်အရွယ် သမီးလေး ဆုံးသွားတဲ့နောက် ဖြေမဆည်နိုင်အောင် ဝမ်းနည်းလွန်းလို့ ဆက်အသက်ရှင်နိုင်မယ်လို့တောင် မထင်ခဲ့ဘူး။ အရင်တုန်းကအခြေအနေနဲ့ တခြားစီပဲ။” ဒါပေမဲ့ “စိုးရိမ်စိတ်တွေ သိပ်များနေတဲ့အခါ ကိုယ်တော် နှစ်သိမ့်ပေးပြီး စိတ်သက်သာရာ ရစေတယ်” ဆိုတဲ့ ဆာလံ ၉၄:၁၉ ပါ ကျမ်းစကားကနေ သူ နှစ်သိမ့်မှုရခဲ့တယ်။ “စိတ်သက်သာရာ ရစေတဲ့အရာတွေ လုပ်နိုင်အောင် ကူညီပေးပါလို့ ယေဟောဝါဆီ ဆုတောင်းတယ်” လို့ သူပြောတယ်။

စေတနာနဲ့ပေးဆပ်ရတဲ့ အလုပ်မှာ စိတ်နှစ်ထားလိုက်တယ်။ ရောင်စုံခဲတံတွေဟာ ကျိုးသွားရင်တောင် အသုံးဝင်နေတုန်းပဲ။ အဲဒီလိုပဲ သူလည်း ဝမ်းနည်းကြေကွဲနေပေမဲ့ တခြားသူတွေကို ကူညီပေးနိုင်တုန်းပဲဆိုတာ သိလာတယ်။ “တခြားသူတွေကို ကျမ်းစာသုံးပြီး နှစ်သိမ့်ပေးတဲ့အခါ ကိုယ်တိုင်လည်း ယေဟောဝါဆီက နှစ်သိမ့်မှု ခံစားရတယ်” လို့ သူပြောတယ်။ အကြီးအကျယ် ဝမ်းနည်းပူဆွေးခဲ့ရတဲ့ ကျမ်းစာဇာတ်ကောင်တွေရဲ့ နာမည်ကို ချရေးတယ်။ “သူတို့အားလုံး ဘုရားကို အားကိုးတကြီး ဆုတောင်းခဲ့ကြသူတွေ ဖြစ်တယ်၊” “ကျမ်းစာသာ မဖတ်ရင် ခံရပ်နိုင်ဖို့ မလွယ်ဘူး” ဆိုတာလည်း သူသိလာတယ်။

ကျမ်းစာကို လေ့လာတဲ့အတွက် ဒက်ဖနီဟာ အတိတ်ကို မဟုတ်ဘဲ အနာဂတ်ကို အာရုံစိုက်တတ်လာတယ်။ ‘ဖြောင့်မတ်သူရော မဖြောင့်မတ်သူတွေပါ ရှင်ပြန်ထမြောက်လာမယ်’ ဆိုတဲ့ တမန်တော် ၂၄:၁၅ ပါ ကျမ်းစကားက သူ့ကို နှစ်သိမ့်မှုပေးတယ်။ သူ့သမီးကို ယေဟောဝါ အသက်ပြန်ရှင်အောင် လုပ်ပေးမယ်ဆိုတာ သူ ဘယ်လောက် ယုံကြည်စိတ်ချသလဲ။ “သမီး အသက်ပြန်ရှင်လာတာကို မြင်ယောင်တယ်။ ပြက္ခဒိန်မှာ မှတ်ထားသလိုမျိုး သမီးနဲ့ပြန်ဆုံမယ့်ရက်ကိုလည်း ကျွန်မစိတ်ထဲ သတ်မှတ်ထားပြီးပြီ။ သမီးနဲ့ပြန်ဆုံတဲ့အခါ သမီးကို မွေးတုန်းက တစိမ့်စိမ့်ကြည့်ပြီး ချစ်ခဲ့ရသလိုမျိုး ဖြစ်နေမှာပဲ” လို့ ဒက်ဖနီ ပြောတယ်။