သင် မှတ်မိသလား

မကြာသေးမီက ထုတ်ဝေတဲ့ ကင်းမျှော်စင်စာစောင်တွေကို သေသေချာချာ ဖတ်ရှုသလား။ အောက်ပါမေးခွန်းတွေကို သင်ဖြေနိုင်သလားဆိုတာ စမ်းကြည့်ပါ–

တိုက်နယ်ကြီးကြပ်မှူး၊ အသင်းတော် အကြီးအကဲစတဲ့ ညီအစ်ကိုတွေဟာ ဘုရားသခင့် အဖွဲ့အစည်းရဲ့ လမ်းညွှန်မှုတွေ ရရှိတဲ့အခါ ဘယ်သဘောထားမျိုး ရှိသင့်သလဲ။

ချက်ချင်း နာခံသင့်တယ်။ ကိုယ့်ကိုယ်ကိုယ် ဒီလိုမေးနိုင်တယ်– ‘ယေဟောဝါအပေါ် သစ္စာစောင့်သိဖို့ ညီအစ်ကို/မတွေကို ငါအားပေးနေသလား။ ဦးဆောင်နေတဲ့ ညီအစ်ကိုတွေရဲ့ လမ်းညွှန်ချက်ကို ချက်ချင်း လက်ခံပြီး ထောက်ခံသလား။’—w16.11, စာ. ၁၁.

စစ်မှန်တဲ့ ခရစ်ယာန်တွေ ဘယ်အချိန်မှာ ဗာဗုလုန်သုံ့ပန်းဘဝ ကျရောက်ခဲ့သလဲ။

တမန်တော်တွေ သေဆုံးပြီးတဲ့နောက် မကြာခင်မှာပဲ ကျရောက်ခဲ့တယ်။ အဲဒီအချိန်မှာ ဓမ္မဆရာအတန်းအစား စတင်ပေါ်ပေါက်လာတယ်။ ချာ့ချ် နဲ့ နိုင်ငံတော်က အယူဖောက်ပြန်တဲ့ ခရစ်ယာန် ဘာသာကို အားပေးအားမြှောက်လုပ်ပြီး ဂျုံနဲ့ တူတဲ့ ခရစ်ယာန်တွေကို နှုတ်ဆိတ်စေဖို့ ကြိုးစား ခဲ့ကြတယ်။ ဒါပေမဲ့ ၁၉၁၄ မတိုင်ခင် ဆယ်စုနှစ်ကာလအတွင်း ဘိသိက်ခံတွေ အချုပ်အနှောင်ကနေ စတင်လွတ်မြောက်ခဲ့ကြပါတယ်။—w16.11, စာ. ၂၃-၂၅။

လာဖဲဗ် ဒေးတာပ်ရဲ့ ဘာသာပြန်လက်ရာက ဘာကြောင့် ထူးခြားပါသလဲ။

၁၅၂၀ ပြည့်လွန်နှစ်ကာလအတွင်း လာဖဲဗ်က ပြင်သစ်သာမန်လူတွေအတွက် ကျမ်းစာကို ဘာသာပြန်ပေးခဲ့တယ်။ သူ့ရဲ့ကျမ်းပိုဒ် ရှင်းလင်းချက်တွေက မာတင်လူသာ၊ ဝီလျံတင်ဒေး၊ ဂျွန်ကာလ်ဗင်တို့အပေါ် ဩဇာညောင်းခဲ့တယ်။—wp16.6, စာ. ၁၀-၁၂။

“လူ့ဇာတိနှင့်ဆိုင်သောအရာများ” နဲ့ “ဘုရားသခင်နှင့်စပ်ဆိုင်ရာများ” ဘယ်လို ကွာခြားသလဲ။ (ရော. ၈:၆)

လူ့ဇာတိနဲ့ဆိုင်တဲ့အရာတွေကို လုပ်ဆောင်တဲ့သူက မစုံလင်တဲ့ လူ့ဇာတိအလိုဆန္ဒတွေကို အာရုံစိုက်ပြီး တစ်ချိန်လုံး အမွှမ်းတင်ပြောဆိုတယ်။ ဘုရားသခင်နဲ့စပ်ဆိုင်ရာတွေကို လုပ်ဆောင်သူက ဘဝမှာ ဘုရားသခင်နဲ့ စပ်ဆိုင်ရာတွေ၊ ဘုရားရဲ့ အတွေးအခေါ်တွေကို အဓိကထားတယ်။ အဲဒီလိုခရစ်ယာန်တစ်ယောက်က သန့်ရှင်းသော စွမ်းအားတော်ရဲ့ လွှမ်းမိုးမှုကို ခံယူတယ်။ လူ့ဇာတိနဲ့ဆိုင်တဲ့အရာက သေခြင်းကို ဖြစ်စေတယ်။ ဘုရားနဲ့စပ်ဆိုင်ရာတွေက အသက်နဲ့ ငြိမ်သက်ခြင်း ရရှိစေတယ်။—w16.12, စာ. ၁၅-၁၇။

စိုးရိမ်ပူပန်မှု လျော့နည်းစေနိုင်တဲ့ လက်တွေ့ကျ နည်းလမ်းတချို့က ဘာတွေလဲ။

ပိုအရေးကြီးတဲ့အရာတွေကို ဦးစားထားပါ။ လက်တွေ့ကျကျ မျှော်လင့်ပါ။ နေ့စဉ် အနားယူဖို့ အချိန်ပေးပါ။ ဘုရားသခင့် ဖန်ဆင်းရာတွေမှာ မွေ့လျော်ပါ။ ဟာသဉာဏ် ရှိပါ။ လေ့ကျင့်ခန်း ပုံမှန် လုပ်ပါ။ အိပ်ရေးဝဝ အိပ်ပါ။—w16.12, စာ. ၂၂-၂၃။

“ဧနောက်သည် . . . သေခြင်းကို မရင်ဆိုင်ရမည်အကြောင်း ပြောင်းရွှေ့ခြင်း ခံရ၏။” (ဟီ. ၁၁:၅) ဘယ်လိုနည်းနဲ့လဲ။

ဘုရားသခင်က ဧနောက်ကို သေရတော့မယ်ဆိုတာ မသိစေဘဲ အသက်ရှင်ခြင်းကနေ သေခြင်းဆီ ညင်ညင်သာသာ ပြောင်းရွှေ့လိုက်တာ ဖြစ်နိုင်တယ်။—wp17.1, စာ. ၁၂-၁၃။

ကျိုးနွံမှုရှိဖို့ ဘာကြောင့် အရေးကြီးနေဆဲလဲ။

ကျိုးနွံမှုမှာ ကိုယ့်ကိုယ်ကိုယ် တော်မှန်စွာ ရှုမြင်ခြင်း၊ ကိုယ့်ကန့်သတ်ချက်တွေကို သိမှတ်ခြင်းတို့ ပါဝင်တယ်။ ကိုယ့်အပြုအမူက တခြားသူတွေကို ထိခိုက်စေနိုင်ပုံ၊ ကိုယ့်ကိုယ်ကိုယ် အလေးပေးလွန်းခြင်းတို့ကို သတိထားရမယ်။—w17.01, စာ. ၁၈။

ဒီနေ့ အုပ်ချုပ်ရေးအဖွဲ့ကို ဘုရားသခင် လမ်းညွှန်နေသလို ပထမရာစု အုပ်ချုပ်ရေးအဖွဲ့ကိုလည်း လမ်းညွှန်ခဲ့ကြောင်း ဘာအထောက်အထား ရှိသလဲ။

သန့်ရှင်းသော စွမ်းအားတော် အကူအညီနဲ့ ကျမ်းစာအမှန်တရားတွေကို နားလည်ခဲ့ကြတယ်။ ကောင်းကင်တမန်တွေ အကူအညီနဲ့ ဟောပြောခြင်းလုပ်ငန်းကို ကြီးကြပ်ခဲ့ကြတယ်။ လမ်းညွှန်ချက် ပေးတဲ့အခါ ဘုရားစကားတော်ကို အားထားခဲ့ကြတယ်။ ဒီနေ့လည်း အဲဒီအတိုင်းပဲ လုပ်ဆောင်နေကြတယ်။—w17.02, စာ. ၂၆-၂၈။

ဘယ်အချက်တွေကြောင့် ရွေးနုတ်ဖိုးကို အဖိုးတန်တယ်လို့ ရှုမြင်သင့်သလဲ။

အချက်လေးချက် ပါဝင်တယ်– ရွေးနုတ်ဖိုးကို ဘယ်သူ ပေးတာလဲ။ ဘာလို့ ပေးတာလဲ။ ဘာတွေ စွန့်လွှတ်အနစ်နာခံခဲ့ရသလဲ။ ဘယ်လိုအပ်ရာတွေကို ဖြည့်ဆည်းပေးခဲ့သလဲ။ အဲဒီအချက်တွေကို စဉ်းစားဆင်ခြင်သင့်တယ်။—wp17.2, စာ. ၄-၆။

ခရစ်ယာန်တစ်ယောက် ကိစ္စရပ်တစ်ခုကို ဆုံးဖြတ်ပြီးတဲ့အခါ ပြန်ပြင်နိုင်သလား။

ကျွန်တော်တို့ ကတိတည်သင့်တယ်။ ဒါပေမဲ့ တစ်ခါတလေ ဆုံးဖြတ်ချက်ကို ပြန်သုံးသပ်သင့်တယ်။ လူတွေ နောင်တရပြောင်းလဲပြီးနောက် နိနဝေမြို့နဲ့ပတ်သက်တဲ့ ဆုံးဖြတ်ချက်ကို ဘုရားသခင် ပြင်ခဲ့တယ်။ အခြေအနေ ပြောင်းလဲသွားတဲ့အခါ၊ အချက်အလက်သစ်တွေ ရလာတဲ့အခါ ပြောင်းလဲဖို့ လိုအပ်လာနိုင်တယ်။—w17.03, စာ. ၁၆-၁၇။

အတင်းအဖျင်းပြောဆိုခြင်းက ဘာကြောင့် အလွန်အန္တရာယ် များသလဲ။

ပြဿနာကို ပိုဆိုးရွားစေပြီး ထိန်းချုပ်မရ ဖြစ်သွားစေနိုင်တယ်။ ကျွန်တော်တို့ မှားသည်ဖြစ်စေ၊ မှန်သည်ဖြစ်စေ အတင်းအဖျင်း ပြောဆိုခြင်းက အခြေအနေကို ဘယ်တော့မှ ပိုကောင်းမလာစေဘူး။—w17.04, စာ. ၂၁။