သင်သည် နိုင်ငံတော်အကြောင်း မှန်မှန် ကြွေးကြော်သူတစ်ဦးလော

^၁ မြန်မာနိုင်ငံတွင် ၁၉၉၉ နိုဝင်ဘာ၌ တစ်ခါမျှမရဖူးသည့်အများဆုံးကြေညာသူ ၂,၅၉၅ ယောက်ရရှိခဲ့သည်ကို သိရသည့်အတွက် ကျွန်ုပ်တို့အားလုံးပျော်ရွှင်ကြသည်။ အမှန်ပင် စည်းစည်းလုံးလုံးနှင့် ကြိုးစားခဲ့ကြသည်တကား! ဒီဇင်ဘာ၌ ဤကြေညာသူများမှအချို့သည် နိုင်ငံတော်အကြောင်းကို  မှန်မှန် ကြွေးကြော်သူများဖြစ်ဖို့ အခက်ကြုံခဲ့ကြကြောင်းထင်ရှားသည်၊ အကြောင်းမှာ ထိုလတွင် ကြေညာသူ ၁၀ ယောက်လျော့သွားသည်။ အောက်ပါအားပေးချက်က အခြေအနေကိုကုစားနိုင်စေမည်ဟု ကျွန်ုပ်တို့ယုံကြည်သည်။

^၂ အခွင့်ထူးကိုလေးမြတ်ပါ– ကျွန်ုပ်တို့သည် အခြားသူများအား နိုင်ငံတော်သတင်းကောင်းဝေငှရသည့်အခွင့်ထူးကို အလွန်လေးမြတ်သင့်သည်။ ဤလုပ်ငန်းသည် ယေဟောဝါ၏နှလုံးကို ရွှင်ပြုံးစေပြီး နှလုံးရိုးဖြောင့်သူများအား အသက်လမ်းကိုသိရှိရန်ကူညီပေးသည်။ (သု. ၂၇:၁၁; ၁ တိ. ၄:၁၆) ပုံမှန်သက်သေခံခြင်းသည် ဓမ္မအမှုတွင် ကျွန်ုပ်တို့၏အတွေ့အကြုံကို တိုးများစေကာ ပျော်ရွှင်မှုနှင့် ပြီးမြောက်အောင်မြင်မှုကို ရရှိစေသည်။

^၃ လုပ်ငန်းကိုမှတ်တမ်းသွင်းပါ– လယ်ကွင်းလုပ်ငန်းတွင်ပါဝင်သူအချို့သည် သူတို့၏လုပ်ငန်းကို အချိန်မီမှတ်တမ်းသွင်းရန် ပျက်ကွက်ကြသည်။ ကျွန်ုပ်တို့၏အားထုတ်မှုသည် မှတ်တမ်းသွင်းရန်မထိုက်ဟု မည်သည့်အခါမျှ မယူမှတ်သင့်ပါ။ (မာကု ၁၂:၄၁-၄၄ နှိုင်းယှဉ်။) မည်သည့်နည်းနှင့်မဆို ကျွန်ုပ်တို့လုပ်ဆောင်ခဲ့ရာကို မှတ်တမ်းသွင်းသင့်သည်! အိမ်တွင် ပြက္ခဒိန်အသုံးပြုခြင်းကဲ့သို့သော နည်းစနစ်တစ်ခုထားပါ၊ အကြောင်းမှာ ဓမ္မအမှုတွင်သုံးသည့်အချိန်ကို မှတ်ထားခြင်းသည် တစ်လစီကုန်သည်နှင့် တိကျသည့်မှတ်တမ်းတစ်ခုကိုပြုလုပ်ရန် အမြဲတမ်းသတိရစေမည်ဖြစ်သည်။

^၄ လိုအပ်သည့်အကူအညီကိုပေးပါ– ဓမ္မအမှုတွင် မှန်မှန်ပါဝင်ဖို့ အကူအညီလိုအပ်သူများကို ကူညီပေးရန်အတွက် ဒေသခံအစီအစဉ်များသည် တိုးတက်ကောင်းမွန်ဖို့လိုပေမည်။ အသင်းတော်အတွင်းရေးမှူးနှင့် စာအုပ်ကြီးသင်တန်းမှူးများသည် အကူအညီပေးရန် အတွေ့အကြုံရှိသည့်ကြေညာသူများကို စီစဉ်သင့်သည်။ သင်၌ နှစ်ခြင်းမခံရသေးသော ကြေညာသူများဖြစ်သည့် ကလေးများ သို့မဟုတ် အခြားကျမ်းစာသင်သားများရှိလျှင် လစဉ် သူတို့၏လုပ်ငန်းကို မှတ်တမ်းသွင်းရန် လေ့ကျင့်ပေးပါ။

^၅ အောက်တိုဘာ ၁၊ ၁၉၉၇၊ ကင်းမျှော်စင် ပါ “ယေဟောဝါ၏လုပ်ငန်းတော်တွင် အသက်တာရှည်ရခြင်းအတွက် ကျေးဇူးတင်ရှိ” ဟူသောဘဝအတ္ထုပ္ပတ္တိကို သတိရပါ။ နော်ဝေးနိုင်ငံမှညီအစ်မ အိုတီးလီးယား မစ်ဒ်လန် သည် ၁၉၂၁ တွင်သူနှစ်ခြင်းမခံမီကပင် သတင်းကောင်းကို မှန်မှန်ကြေညာသူတစ်ဦးဖြစ်နေသည်။ ခုနစ်ဆယ့်ခြောက်နှစ်ကြာပြီးနောက် အသက် ၉၉ နှစ်တွင် သူဤသို့ဆိုသည်– “ကျွန်မ မှန်မှန်ကြေညာသူဖြစ်နိုင်သေးတဲ့အတွက် ဝမ်းသာမိတယ်။” ယေဟောဝါ၏ကျေးကျွန်အားလုံးအတွက် တုပရန်အလွန်ကောင်းသည့် သဘောထားပါတကား!