တိုက်ခန်းများတွင် သက်သေခံခြင်းဖြင့် “စေ့စေ့စပ်စပ် သက်သေခံ” ပါ

၁။ “သတင်းကောင်းကို စေ့စေ့စပ်စပ် သက်သေခံ” ခြင်းတွင် အဘယ်အရာပါဝင်သနည်း။

^၁ တမန်တော်ပေါလုနည်းတူ ကျွန်ုပ်တို့၏ဆန္ဒမှာ “သတင်းကောင်းကို စေ့စေ့စပ်စပ် သက်သေခံရန်” ဖြစ်သည်။ (တမန်တော် ၂၀:​၂၄၊ ကဘ) ထို့ကြောင့် ကျွန်ုပ်တို့သည် ကျွန်ုပ်တို့၏ရပ်ကွက်ရှိ လူများနိုင်သရွေ့များများထံ နိုင်ငံတော်သတင်းရောက်ရှိရန် အတတ်နိုင်ဆုံး ကြိုးစားကြသည်။ ယင်းတွင် တိုက်ခန်းများ၌နေထိုင်သော လူများစွာလည်းပါဝင်သည်။ တစ်ခါတစ်ရံ ထိုကဲ့သို့သောအဆောက်အအုံထဲသို့ ဝင်ရောက်ရန်မှာ စိန်ခေါ်ချက်တစ်ရပ်ဖြစ်နိုင်ပါသည်။ သို့သော်၊ တိုက်ခန်းများတွင် လူများစွာနေထိုင်သောကြောင့် ယင်းသည် ကျွန်ုပ်တို့အတွက် သတင်းကောင်းပျံ့နှံ့ရန် အခွင့်အလမ်းများစွာရရှိစေပါသည်။

၂။ တိုက်ခန်းများကိုသက်သေခံရာတွင် အမြော်အမြင်ရှိမှုနှင့် ကောင်းစွာစဉ်းစားချင့်ချိန်မှုရှိရန် အဘယ်ကြောင့် လိုအပ်သနည်း။

^၂ ရာဇဝတ်မှုနှင့်အကြမ်းဖက်မှုများ၏ ခြိမ်းခြောက်မှုအရေအတွက် များပြားလာသောကြောင့် တိုက်ခန်းအဆောက်အအုံများစွာကို သော့ခတ်၍ တံခါးစောင့်များထားရှိကြသည်၊ သို့မဟုတ် စောင့်ကြည့်ကင်မရာများ တပ်ဆင်ထားကြသည်။ (၂ တိ. ၃:၁၊ ၂) စီမံကွပ်ကဲသူများသည် မဖိတ်ခေါ်ထားသူများကို ဝင်ခွင့်မပြုသည့် စည်းကမ်းတစ်ခု ထုတ်ထားပေမည်။ ကြီးကြပ်သူ သို့မဟုတ် မန်နေဂျာတစ်ဦးသည် ကျွန်ုပ်တို့ကို အဆောက်အအုံထဲမှထွက်သွားရန် တောင်းဆိုပေမည်၊ အထူးသဖြင့် ထိုတွင်နေထိုင်သူတစ်ဦးက တိုင်တန်းသည့်အခါတွင်ဖြစ်သည်။ ထို့ကြောင့် အမြော်အမြင်ရှိမှုနှင့် ကောင်းစွာစဉ်းစားချင့်ချိန်မှုရှိရန် အရေးကြီးပါသည်။

၃။ တိုက်ခန်းများ၌ မည်သည့်အချိန်တွင်လုပ်ဆောင်ခြင်းသည် အကောင်းဆုံးဖြစ်သနည်း၊ အဘယ်ကြောင့်နည်း။

^၃ လုပ်ဆောင်ရမည့်အချိန်–  အခြားရပ်ကွက်တွင်သုံးသောနည်းများကဲ့သို့ပင် ထိုတွင် နေထိုင်သူများ အခန်းတွင်ရှိပုံရသောအချိန်၌ ဟောပြောခြင်းသည် အကောင်းဆုံးဖြစ်သည်။ နေထိုင်သူအများစု အပြင်ရောက်နေချိန်တွင် ကျွန်ုပ်တို့ ထိုတွင်ရှိနေပါက မသင်္ကာစရာအခြေအနေများ ပေါ်ပေါက်လာနိုင်ပါသည်။ ကြေညာသူများစွာသည် ညနေအစောပိုင်းအချိန်တွင်သာမက စနေတနင်္ဂနွေ နေ့လယ်ပိုင်းများတွင်လည်း လူများကို အခန်းများတွင်ရှာဖွေရာ၌ အောင်မြင်ခဲ့ကြပါသည်။ တိုက်ခန်းများ၌ နံနက်စောစောလုပ်ဆောင်ခြင်း၊ အထူးသဖြင့် ရက်သတ္တပတ်အဆုံးပိုင်းနေ့များတွင် ထိုသို့လုပ်ဆောင်ခြင်းသည် ကြီးကြပ်သူ သို့မဟုတ် မန်နေဂျာကို မကျေမနပ်ဖြစ်စေနိုင်သည်။

၄။ တံခါးစောင့်တစ်ဦးရှိသော အဆောက်အအုံများတွင် လုပ်ဆောင်သောအခါ ကျွန်ုပ်တို့ အဘယ်အရာ ပြုလုပ်သင့်သနည်း။

^၄ အဆောက်အအုံထဲ ဝင်ရောက်ခြင်း– ကျွန်ုပ်တို့ကို အဆောက်အအုံရှိ တိုက်ခန်းများ၌လုပ်ဆောင်ရန် ခွင့်မပြုသော တံခါးစောင့်တစ်ဦးရှိပါက ထိုသူကို သက်သေခံရန် ကျွန်ုပ်တို့ကြိုးစားနိုင်ပါသည်။ တံခါးစောင့်များစွာသည် ကျွန်ုပ်တို့၏စာအုပ်စာပေများကို နှစ်သက်စွာဖတ်ရှုကြသည်။ ကျွန်ုပ်တို့သည် ကျမ်းစာသင်အံမှုတစ်ခုကိုပင် စတင်နိုင်ပြီး ၎င်းကို ဧည့်ခန်းထဲတွင် ပြုလုပ်နိုင်ပါသည်။ တံခါးစောင့်သည် စိတ်ဝင်စားမှုပြခဲ့သော နေထိုင်သူတစ်ဦးဦးထံ လည်ပတ်ရန် ကျွန်ုပ်တို့ကိုခွင့်ပြုမည်ဆိုပါက အဆောက်အအုံထဲရှိ အခြားတံခါးများကို မခေါက်ခြင်းသည် အကောင်းဆုံးဖြစ်သည်။

၅။ ကျွန်ုပ်တို့သက်သေခံသည့်အခါ အဘယ်အချက်ကို စိတ်စွဲမှတ်ထားသင့်သနည်း။

^၅ အသွင်အပြင်နှင့် ယဉ်ကျေးသောအမူအကျင့်– ကြီးမားသော လက်ဆွဲအိတ်များ ယူဆောင်သွားခြင်းသည် ကျွန်ုပ်တို့ကို အလွန်သတိထားမိစေနိုင်ပါသည်။ ထို့ကြောင့် ကျွန်ုပ်တို့သည် သိပ်မသိသာသောအိတ်များကို အသုံးပြုနိုင်သည် သို့မဟုတ် အိတ်ယူဆောင်သွားခြင်းကို ရှောင်နိုင်ပါသည်။ အချို့သောကြေညာသူများသည် ဝေငှမည့်စာပေများကို ဖိုင် ခပ်ပါးပါးတစ်ခုထဲတွင် ထည့်ကြပြီး ကျမ်းစာအုပ်ကို လက်တွင်ကိုင်၍ သို့မဟုတ် အိတ်ကပ်တွင် ထည့်၍ ယူသွားကြသည်။

၆။ တိုက်ခန်းများတွင် သက်သေခံရန် အုပ်စုကို မည်သို့ဖွဲ့စည်းသင့်သနည်း။

^၆ လူများများစုဝေးနေလျှင် သတိထားမိနိုင်သောကြောင့် အထူးသဖြင့် ဧည့်ခန်းများ သို့မဟုတ် ကားရပ်ရန်နေရာများတွင် အုပ်စုကြီးဖွဲ့၍ မနေခြင်းသည် အကောင်းဆုံးဖြစ်သည်။ ရာဇဝတ်မှုထူပြောသော နယ်မြေများရှိ တိုက်ခန်းများတွင် ဟောပြောသောအခါ သင့်လျော်သောကြိုတင်ကာကွယ်မှုများ ပြုလုပ်သင့်ပါသည်။ (သု. ၂၂:၃) ဥပမာ၊ ကြေညာသူ နှစ်တွဲ သို့မဟုတ် သုံးတွဲသည် အထပ်တစ်ထပ်တည်းတွင် တစ်တွဲနှင့်တစ်တွဲ ကြားနိုင်လောက်သည့်နေရာအတွင်း ဟောပြောနိုင်ပြီး တစ်တွဲကစောင့်နေစဉ် အခြားတစ်တွဲက တံခါးခေါက်ခြင်းဖြင့် အလှည့်ကျဟောပြောနိုင်ပါသည်။

၇။ ကျွန်ုပ်တို့သည် ယဉ်ကျေးရည်မွန်သည့် အပြုအမူများကို မည်သို့ပြသနိုင်သနည်း၊ ယင်းသည် အဘယ်ကြောင့် အရေးကြီးသနည်း။

^၇ တိုက်ခန်းတွဲအဆောက်အအုံတစ်ခုထဲသို့ ဝင်သောအခါ သင့်ရှူးဖိနပ်များကို သုတ်ပြီး တံခါးကို ပြန်ပိတ်ထားကြောင်းသေချာစေပါ။ ထိုကဲ့သို့ယဉ်ကျေးရည်မွန်သည့် အပြုအမူများပြသခြင်းက ထိုတွင်နေထိုင်သူများ တိုင်တန်းရသည့်အကြောင်းရင်းများကို လျော့နည်းစေနိုင်သည်။ အထဲရောက်သောအခါ အပေါက်ဝတွင် ယောင်လည်လည်လုပ်နေမည့်အစား ဓာတ်လှေကား သို့မဟုတ် ဟောပြောမည့်အထပ်သို့ ဦးတည်၍သွားပါ။ ယင်းသို့ပြုလုပ်ခြင်းသည် အကဲခတ်ကြည့်ရှုနေသူများ၏ သံသယစိတ်ကို ကင်းရှင်းစေပါလိမ့်မည်။

၈။ ကျွန်ုပ်တို့သည် စင်္ကြံများတွင် မလိုအပ်သော ဆူညံသံများပြုလုပ်ခြင်းကို မည်သို့ရှောင်ရှားနိုင်သနည်း။

^၈ တိုက်ခန်းတွဲအဆောက်အအုံများတွင် ဆူညံသံများသည် စင်္ကြံ၌ ပိုကျယ်တတ်သည်။ ထို့ကြောင့် အိမ်ရှင် သက်သောင့်သက်သာ ကြားနိုင်လောက်သည့် အသံထက်ပို၍ ကျယ်ကျယ်မပြောပါနှင့်။ သံသယဖြစ်စရာအကြောင်းများကို ရှောင်ရှားနိုင်ရန် အခြားကြေညာသူများနှင့် စကားပြောသောအခါ သင့်တော်သည့်အသံပမာဏဖြင့် အေးဆေးတည်ငြိမ်စွာ တိုးတိုးပြောပါ။ တိုက်ခန်းတွင်နေထိုင်သူများကို အလွန်အမင်းစိတ်အနှောင့်အယှက်မဖြစ်စေရန် ကြေညာသူအချို့သည် စင်္ကြံလမ်းတစ်လျှောက် တစ်ခန်းပြီးတစ်ခန်း ခေါက်သွားမည့်အစား စင်္ကြံ၏ အစွန်းတစ်ဖက်ရှိ အခန်းတစ်ခန်းကိုခေါက်ကာ ထို့နောက် အခြားအစွန်းတစ်ဖက်ရှိ အခန်းသို့သွား၍ ခေါက်သည်၊ ထိုအထပ်ပြီးဆုံးသည်အထိ ယင်းအတိုင်း ခေါက်တုံ့ခေါက်ပြန် ပြုလုပ်ကြသည်။ ထို့ပြင်၊ တံခါးကို ကျယ်လောင်စွာခေါက်ခြင်း သို့မဟုတ် အာဏာရှင်ဆန်ဆန်ပြုမူခြင်းသည် အထဲ၌ရှိသူများကို ထိတ်လန့်စေနိုင်ပါသည်။

၉။ သေးငယ်သောအပေါက်ရှိသည့် တံခါးတစ်ခုကို ခေါက်သောအခါ အဘယ်အကြံပြုချက်များသည် ကျွန်ုပ်တို့ကို ကူညီပေးနိုင်သနည်း။

^၉ အပြင်ဘက်၌မည်သူရှိကြောင်း သိမြင်နိုင်သည့် တံခါးတွင် သေးငယ်သောအပေါက်တစ်ပေါက် ရှိနေပါက ထိုရှေ့တွင် ရပ်ပါ၊ သို့မှသာ အထဲမှကြည့်သောသူသည် သင်နှင့်သင့်အဖော်ကို တွေ့မြင်နိုင်မည်ဖြစ်သည်။ အပေါက်ငယ်လေးကို တိုက်ရိုက်ကြည့်ပါ၊ တစ်ဦးဦးသည် ကြည့်နေကြောင်း သင်တွေ့မြင်သောအခါ လှိုက်လှိုက်လှဲလှဲနှုတ်ဆက်ပြီး သင့်တင်ဆက်မှုကို စတင်ပါ။ ‘ခင်ဗျား ဘယ်သူလဲ’ ဟုအထဲမှလူက မေးလျှင် သင့်နာမည်နှင့် သင်နှင့်အတူပါလာသူ၏နာမည်ကို ပြောပြခြင်းက အကောင်းဆုံးဖြစ်ကြောင်း သင်တွေ့ရပေလိမ့်မည်။ ဤသို့ဖြင့် အိမ်ရှင်တံခါးဖွင့်ပေးဖို့ ပို၍လွယ်ကူစေပေမည်။ အကယ်၍ ထိုသို့မဖြစ်ပါက တံခါးဝမှပင် သင့်တင်ဆက်မှုကို ဆက်လက်လုပ်ဆောင်နိုင်ပေမည်။

၁၀။ ကျွန်ုပ်တို့သည် လူမရှိသောအခန်းများ၌ စာပေများကို ထားခဲ့ရာတွင် ပြဿနာများကို မည်သို့ရှောင်ရှားနိုင်သနည်း။

^၁၀ လူမရှိသောအခန်းများတွင်– ကြီးကြပ်သူများက မိမိတို့သည် စာပေများကို လူသွားစင်္ကြံ သို့မဟုတ် တိုက်ခန်းဝန်းကျင်တွင် လိုက်ကောက်ရကြောင်း မကြာခဏ ပြစ်တင်ပြောဆိုကြသည်။ စာပေများကို တံခါးအပြင်ဘက်တွင် ညှပ်ထားခဲ့ခြင်းသည် ကြမ်းပြင်ပေါ်သို့ အလွယ်တကူကျသွားနိုင်ပြီး အမှိုက်ဖြစ်သွားနိုင်ပါသည်။ ထို့ကြောင့် လူမရှိသောအခန်းများတွင် စာပေများကို ဖြတ်သွားသူများ လုံးဝမမြင်နိုင်သည့်နေရာ၌ ထားခဲ့သင့်သည်။

၁၁။ ရန်လိုသောအိမ်ရှင်တစ်ဦးနှင့် ကျွန်ုပ်တို့တွေ့ဆုံလျှင် အဘယ်အရာပြုလုပ်သင့်သနည်း။

^၁၁ ရန်လိုသောအိမ်ရှင်များ– ကြီးကြပ်သူများကို ခေါ်ရန်အသင့်ဖြစ်နေနိုင်သော ရန်လိုနေသည့်အိမ်ရှင်တစ်ဦးနှင့် ကျွန်ုပ်တို့တွေ့ဆုံလျှင် ထိုအထပ်မှထွက်သွားခြင်းသည် အကောင်းဆုံးဖြစ်ပြီး နောင်တစ်ချိန်ချိန်မှပြန်သွားပါ။ ကိစ္စအချို့တွင်မူ၊ ကြီးကြပ်သူနှင့် ဖြစ်ပေါ်လာနိုင်သည့် ထိပ်တိုက်ရင်ဆိုင်ရခြင်းမှ ရှောင်ရှားနိုင်ရန် အဆောက်အအုံတွင်းမှ ထွက်သွားခြင်းသည် ပညာရှိရာကျပါလိမ့်မည်။ အိမ်ရှင်သည် နောင်တွင် သူ့အခန်းကိုမခေါ်ရန် သတ်သတ်မှတ်မှတ် တောင်းဆိုမှုမပြုလျှင်ပင် ထိုအခန်းနံပါတ်ကို မခေါ်ရန်ဟု မှတ်သားထားခြင်းက ပိုကောင်းမည်ဖြစ်ပြီး ယင်းကို ရပ်ကွက်ကတ်တွင် ဖြည့်ပါ။ အခြား မခေါ်ရန်ဟုမှတ်သားထားရာများနည်းတူ ထိုအိမ်ရှင်၏သဘောထားကို ဆုံးဖြတ်ရန် အခါအားလျော်စွာ ယင်းလိပ်စာများကို ဆက်သွယ်သင့်သည်။

၁၂၊ ၁၃။ အဆောက်အအုံ၏ ကိုယ်စားလှယ်တစ်ဦးက ထွက်သွားဖို့ သင့်အားတောင်းဆိုလာပါက အဘယ်အရာပြုလုပ်သင့်သနည်း။

^၁၂ သင့်အား ထွက်သွားဖို့တောင်းဆိုလာလျှင်– သင်သည် ထိုအဆောက်အအုံတွင် ဟောပြောနေစဉ် ကြီးကြပ်သူ၊ လုံခြုံရေးဝန်ထမ်း၊ ပြုပြင်ထိန်းသိမ်းရေးဝန်ထမ်း သို့မဟုတ် အခြားမည်သည့်ဌာနမှ ကိုယ်စားလှယ်တစ်ဦးဦးကဖြစ်စေ ထွက်သွားဖို့ သင့်အားတောင်းဆိုလာလျှင် ချက်ချင်းလိုက်နာဆောင်ရွက်ခြင်းသည် ပညာရှိရာကျပါသည်။ ဖြစ်နိုင်သည့်အခါတိုင်း ကျွန်ုပ်တို့သည် တရားစွဲဆိုမည်နှင့် ရဲတိုင်မည်ဟူသည့် ခြိမ်းခြောက်မှုများကို ထိပ်တိုက်ရင်ဆိုင်ရခြင်းမှ ရှောင်ရှားလိုကြပါသည်။ အများအားဖြင့် အဆောက်အအုံဝန်ထမ်းများသည် ယေဟောဝါသက်သေများကို စိတ်စွန်းကွက်ခြင်းမရှိပါ၊ သူတို့၏အလုပ်ကို လုပ်နေကြခြင်းသာဖြစ်သည်။

^၁၃ တစ်ခါတစ်ရံ အဆောက်အအုံ၏ ကိုယ်စားလှယ်တစ်ဦးက သင့်အား ထွက်သွားဖို့တောင်းဆိုလာသောအခါ ယဉ်ကျေးစွာနှင့် လိမ္မာပါးနပ်စွာဖြင့် သင် လာလည်ပတ်ရသည့်အကြောင်းရင်းကို ရှင်းပြနိုင်ပါသည်။ (၁ ပေ. ၃:၁၅) ထိုတွင် နေထိုင်သူများ ပျော်ရွှင်နေစေရန်နှင့် အဆောက်အအုံ လုံခြုံမှုရှိနေစေရန်ဟူသည့် သူ့တာဝန်ကို ကျွန်ုပ်တို့အသိအမှတ်ပြုပါသည်။ ထိုသူသည် အဆောက်အအုံတွင် ဆက်လုပ်ဆောင်ဖို့ သင့်အား ခွင့်ပြုကောင်းခွင့်ပြုပေလိမ့်မည်။ ခွင့်မပြုလျှင်လည်း စောဒကမတက်ဘဲ ထွက်သွားပါ။ အကယ်၍ အခြေအနေကခွင့်ပြုလျှင် စာပေများကို ဧည့်ခန်းတွင် မကြာမကြာလာထားခွင့်ပြုဖို့ သို့မဟုတ် စာထည့်ပုံးများတွင် ထည့်ခွင့်ပြုဖို့ တောင်းခံနိုင်ပါသည်။ (ကော. ၄:၆) လုပ်ငန်းတော်ကြီးကြပ်မှူးသည် ယင်းကဲ့သို့သော ဖြစ်ရပ်များနှင့်ပတ်သက်၍ နောက်ဆုံးအချက်အလက်များကို သိမ်းဆည်းထားသင့်ပါသည်။

၁၄။ တိုက်ခန်းအဆောက်အအုံတစ်ခု သို့မဟုတ် စုပေါင်းအိမ်ရာတစ်ခုတွင် ဟောပြောသောအခါ ပြဿနာများ ရှိမြဲရှိနေသည်ဆိုလျှင် ကျွန်ုပ်တို့ အဘယ်အရာပြုလုပ်သင့်သနည်း။

^၁၄ အချိန်အတော်အတန် ကြာပြီးသည့်နောက် ကြေညာသူများသည် ထိုအဆောက်အအုံတွင် သိုသိုသိပ်သိပ်ဟောပြောရန် ကြိုးစားကောင်းကြိုးစားနိုင်ပါသည်။ သို့သော်၊ ပြဿနာများသည် ဆက်လက်တည်ရှိနေဆဲဖြစ်လျှင် အကြီးအကဲများသည် ကြေညာသူများအား သူတို့နည်းသူတို့ဟန်ဖြင့် ပြဿနာများကို ဖြေရှင်းဖို့ ကြိုးစားစေမည့်အစား အကူအညီအတွက် ဌာနခွဲကို အကြောင်းကြားသင့်ပါသည်။ ကြေညာသူများသည် တိုက်ခန်းများတွင် မလုပ်ဆောင်နိုင်လျှင် ထိုတွင်နေထိုင်သူများနှင့်ဆက်သွယ်ရန် တယ်လီဖုန်းဖြင့်သက်သေခံခြင်း သို့မဟုတ် စာရေးခြင်းကဲ့သို့သော အခြားနည်းလမ်းများဖြင့်ဆက်သွယ်ရန် ကြိုးစားနိုင်ပါသည်။ ကြေညာသူအချို့သည် အများအားဖြင့် လူများအလုပ်သွားချိန်နှင့် အိမ်ပြန်ချိန်ဖြစ်သော နံနက်နှင့် ညနေပိုင်းအချိန်များအတွင်း တိုက်ခန်းအဆောက်အအုံ၏ အရှေ့ဘက် သို့မဟုတ် အနီးအနားဝန်းကျင်ရှိ လမ်းပေါ်တွင် သက်သေခံကြသည်။

၁၅။ တိုက်ခန်းများတွင် သက်သေခံခြင်းသည် အဘယ်ကြောင့် အရေးကြီးသနည်း။

^၁၅ ဤလောကအစီအစဉ်စနစ်၏အဆုံးသည် မကြာမီရောက်ရှိလာတော့မည်ဖြစ်သည်။ ယေဟောဝါ၏နာမတော်ကို ခေါ်သောသူများသာလျှင် ကယ်တင်ခံရပါလိမ့်မည်။ “သို့သော် မယုံကြည်သောအရှင်ကို မည်သို့ ခေါ်မည်နည်း။ မကြားဖူးသောအရှင်ကို မည်သို့ယုံကြည်မည်နည်း။ ဟောပြောသောသူ မရှိလျှင် မည်သို့ကြားမည်နည်း။” (ရော. ၁၀:၁၃၊ ၁၄၊ ကဘ) “ထာဝရအသက်ကို လိုလားသူ” များစွာ တိုက်ခန်းများတွင် နေထိုင်နေကြသည်။ (တမန်တော် ၁၃:​၄၈၊ ကဘ) အမြော်အမြင်ရှိမှုနှင့် ကောင်းစွာစဉ်းစားချင့်ချိန်မှု ပြသခြင်းဖြင့် သူတို့ထံ သတင်းကောင်း ရောက်ရှိစေနိုင်ကြပါသည်။