စီးပွားရေးရပ်ကွက်မှာ သက်သေခံတဲ့အခါ ယုံကြည်စိတ်ချမှုရှိပါ
၁။ စီးပွားရေးရပ်ကွက်မှာ သက်သေခံဖို့တွန့်ဆုတ်နေမယ်ဆိုရင် ဘာကြောင့် စိတ်ဓာတ်မကျသင့်သလဲ။
၁ စီးပွားရေးရပ်ကွက်မှာ သက်သေခံဖို့ တွန့်ဆုတ်ဖူးသလား။ အဲဒီလိုဖြစ်နေမယ်ဆိုရင် စိတ်ဓာတ်မကျပါနဲ့။ သတ္တိရှိပြီး ကြောက်ရွံ့မှုမရှိဘဲ ဘုရားသခင့်အမှုတော်ဆောင်ခဲ့တဲ့ တမန်တော်ပေါလုတောင် ဟောပြောဖို့ “သတ္တိမွေး” ခဲ့ရတာရှိတယ်။ (၁ သက်. ၂:၂) တွန့်ဆုတ်ရတဲ့အကြောင်းရင်းတွေနဲ့ အောင်မြင်နိုင်တဲ့ အကြံပြုချက်တွေကို အောက်မှာသုံးသပ်သွားပါမယ်။
၂။ အလုပ်သမားတွေကို အနှောင့်အယှက်ပေးရာရောက်တယ်ဆိုပြီး ဘာကြောင့်မစိုးရိမ်သင့်သလဲ။
၂ အလုပ်သမားတွေကို စကားပြောတာက သူတို့ကို အနှောင့်အယှက်ဖြစ်စေသလား။ စီးပွားရေးရပ်ကွက်က အလုပ်သမားအများစုဟာ သူတို့ဆီလာတဲ့သူကို ကူညီချင်ကြပြီး အနှာင့်အယှက်ပေးတယ်လို့ မထင်ကြပါဘူး။ သူတို့က သင့်ကို ဖောက်သည်ဖြစ်လာနိုင်တဲ့သူလို့ ရှုမြင်ပြီး ယဉ်ယဉ်ကျေးကျေး ဆက်ဆံကြပါလိမ့်မယ်။ သိက္ခာရှိရှိကောင်းစွာဝတ်စားထားခြင်းနဲ့ ရင်းရင်းနှီးနှီးဖော်ဖော်ရွေရွေ ဆက်ဆံခြင်းက သင့်ကိုလေးလေးစားစားဆက်ဆံဖို့ သူတို့ကိုလှုံ့ဆော်ပေးရာရောက်တယ်။
၃။ ဖောက်သည်တွေ အနှောင့်အယှက်မဖြစ်အောင် ဘယ်လိုရှောင်နိုင်မလဲ။
၃ ဖောက်သည်အများကြီးရှိနေချိန်မှာ ဟောပြောသင့်သလား။ ဖြစ်နိုင်မယ်ဆိုရင် ဈေးဆိုင်စဖွင့်ချိန်လိုမျိုး အလုပ်အရမ်းမရှုပ်တဲ့ အချိန်ကို ရွေးသင့်ပါတယ်။ မန်နေဂျာ ဒါမှမဟုတ် အရောင်းစာရေးအားတဲ့အထိ စောင့်ပြီးမှ သူ့ဆီချဉ်းကပ်ပါ။ တိုတိုတုတ်တုတ်သာ ဟောပါ။
၄။ စီးပွားရေးရပ်ကွက်မှာ ဟောပြောတဲ့အခါ ဘယ်လိုပြောနိုင်မလဲ။
၄ ဘာပြောသင့်သလဲ။ အလုပ်သမားအများကြီးရှိနေမယ်ဆိုရင် အလုပ်မှာတာဝန်ရှိတဲ့သူနဲ့ စကားပြောပါ။ သင်ဒီလိုပြောနိုင်တယ်– “စီးပွားရေးလုပ်တဲ့သူတွေကို အိမ်မှာတွေ့ဖို့မလွယ်ဘူး၊ ဒါကြောင့် ကျွန်တော်တို့က မိတ်ဆွေရဲ့ အလုပ်ထဲကိုလာလည်တာပါ။ မိတ်ဆွေအလုပ်လုပ်နေတယ်ဆိုတာ နားလည်ပါတယ်၊ ဒါကြောင့်လိုရင်းပဲပြောပါမယ်။” ဈေးရောင်းသူနဲ့မမှားဖို့အတွက် ကျွန်ုပ်တို့လုပ်ငန်းကို ငွေကြေးဘယ်လိုထောက်ပံ့တယ်ဆိုတာ သူတို့မမေးရင် အလှူငွေအကြောင်းမပြောပါနဲ့။ အလုပ်အခြေအနေပေါ်မူတည်ပြီး အလုပ်သမားတွေကို စကားနည်းနည်းပါးပါးပြောလို့ရမရ မန်နေဂျာဆီမှာ ခွင့်တောင်းနိုင်ပါတယ်။ သူတို့ကိုလည်း ထပ်ဟောပါ။ တကယ်လို့အလုပ်သမားက အလုပ်များနေပုံရရင် သင့်ရဲ့ဟောပြောမှုကို အတိုချုပ်ပြီး ဝေစာထားခဲ့ပါ။ အလုပ်သမားတွေနဲ့ စကားပြောဖို့အခွင့်အရေးမရဘူးဆိုရင် သူတို့အတွက်စာပေထားခဲ့ဖို့ သင့်ကိုခွင့်ပြုနိုင်တယ်။
၅။ စီးပွားရေးရပ်ကွက်မှာ ယုံကြည်စိတ်ချမှုနဲ့ဟောဖို့ ဘာအကြောင်းရင်းတွေရှိသလဲ။
၅ ယေရှုနဲ့ပေါလုဟာ စီးပွားရေးရပ်ကွက်မှာ အလုပ်လုပ်နေတဲ့သူတွေကို ယုံကြည်စိတ်ချမှုရှိရှိ ဟောခဲ့သလို သင်လည်းလုပ်နိုင်ပါတယ်။ (မ. ၄:၁၈-၂၁; ၉:၉; တ. ၁၇:၁၇) စိတ်ငြိမ်သက်မှုနဲ့ သတ္တိရှိဖို့ ယေဟောဝါဆီမှာ ဆုတောင်းပါ။ (တ. ၄:၂၉) စီးပွားရေးရပ်ကွက်မှာ လူမရှိတဲ့အိမ်ဆိုတာ မရှိသလောက်ဖြစ်တဲ့အတွက် အကျိုးဖြစ်ထွန်းနိုင်ပါတယ်။ ဒါကြောင့် စီးပွားရေးရပ်ကွက်မှာ ဟောပြောဖို့ မတွန့်ဆုတ်ပါနဲ့။