အမှားနဲ့ အမှန်– စိတ်ချရတဲ့ လမ်းညွှန် ကျမ်းစာ

ကျွန်တော်တို့ သိပ်လိုအပ်တဲ့ လမ်းညွှန်

လူတွေဟာ ကိုယ့်ခြေလှမ်းကို လမ်းညွှန်နိုင်စွမ်း မရှိဘူး၊ လမ်းညွှန်ချက် ရဖို့ ယေဟောဝါa ဘုရားကို အားကိုးရမယ်လို့ ကျမ်းစာမှာ ဖော်ပြထားတယ်။ (ယေရမိ ၁၀:၂၃) ဒါကြောင့်လည်း ကျမ်းစာမှာ အမှားအမှန်နဲ့ပတ်သက်ပြီး လမ်းညွှန်ချက်တွေ ဘုရား ပေးထားတာ။ လူတွေကို ဘုရား သိပ်ချစ်တယ်။ အရေးကြီး ဘဝဆုံးဖြတ်ချက်တွေကို အလွဲလွဲအမှားမှား ချမိပြီး ဆိုးကျိုးတွေ ခံစားရတဲ့အဖြစ်မျိုး မကြုံစေချင်ဘူး။ ပူလောင်မနေစေချင်ဘူး။ (တရားဟောရာ ၅:၂၉။ ၁ ယောဟန် ၄:၈) ဒါ့အပြင် ဘုရားဟာ ဖန်ဆင်းရှင် ဖြစ်တာမို့ ဉာဏ်ပညာ၊ အသိပညာ ပြည့်ဝတယ်။ ဒါကြောင့် အမှားအမှန်နဲ့ပတ်သက်ပြီး အကောင်းဆုံး လမ်းညွှန်ပေးနိုင်တယ်။ (ဆာလံ ၁၀၀:၃။ ၁၀၄:၂၄) ဒါပေမဲ့ မိမိစံနှုန်းတွေကို လူတွေ လိုက်နာဖို့ အတင်း ဖိအားမပေးဘူး။

ပထမ လူသားမောင်နှံ အာဒံနဲ့ ဧဝ စစ်မှန်တဲ့ ပျော်ရွှင်မှု ခံစားရဖို့ လိုအပ်သမျှကို ယေဟောဝါဘုရား ပြင်ဆင်ပေးတယ်။ (ကမ္ဘာဦး ၁:၂၈၊ ၂၉။ ၂:၈၊ ၁၅) ရိုးရှင်းတဲ့ လမ်းညွှန်ချက်တွေလည်း ပေးတယ်။ ဒါပေမဲ့ လိုက်နာ၊ မလိုက်နာ ကိုယ်တိုင် ရွေးချယ်စေတယ်။ (ကမ္ဘာဦး ၂:၉၊ ၁၆၊ ၁၇) ဝမ်းနည်းစရာက ဘုရားစံနှုန်းတွေအတိုင်း မဟုတ်ဘဲ ကိုယ့်စံနှုန်းတွေအတိုင်း နေဖို့ အာဒံနဲ့ ဧဝ ရွေးချယ်ခဲ့ကြတယ်။ (ကမ္ဘာဦး ၃:၆) ဘာရလဒ် ရသလဲ။ ကိုယ့်စံနှုန်းတွေအတိုင်း နေလို့ လူတွေ ပျော်ကြသလား။ မပျော်ကြပါဘူး။ ဘုရားစံနှုန်းတွေကို လျစ်လျူရှုတာက တည်မြဲတဲ့ ငြိမ်သက်မှု၊ ပျော်ရွှင်မှု မရစေကြောင်း သမိုင်းက သက်သေထူတယ်။—ဒေသနာ ၈:၉။

ကျွန်တော်တို့ နောက်ခံ ဘယ်လိုပဲ ရှိပါစေ ဆုံးဖြတ်ချက်ကောင်းတွေ ချနိုင်အောင် ကူညီပေးမယ့် လမ်းညွှန်ချက်တွေ ကျမ်းစာမှာ ပါတယ်။ (၂ တိမောသေ ၃:၁၆၊ ၁၇။ “လူတိုင်းအတွက် စာအုပ်” လေးထောင့်ကွက်ကို ကြည့်ပါ။) ကျမ်းစာမှာ ဘယ်လို လမ်းညွှန်ထားသလဲ သုံးသပ်ကြည့်ပါ။

ကျမ်းစာကို “ဘုရားသခင်ရဲ့ တရားစကား” လို့ ဘာကြောင့် တပ်အပ်ပြောနိုင်ကြောင်း ထပ်လေ့လာကြည့်ပါ။—၁ သက်သာလောနိတ် ၂:၁၃။ သမ္မာကျမ်းစာရဲ့ အာဘော်ရှင်က ဘယ်သူလဲ ဗီဒီယိုကို jw.org မှာ ကြည့်ပါ။

ဘုရားလမ်းညွှန်ချက်တွေကို ကျမ်းစာမှာ ဖော်ပြထားပုံ

လူတွေကို ဘုရား ဆက်ဆံပုံအကြောင်း ကျမ်းစာမှာ ဖော်ပြထားတယ်။ ဘယ်အရာတွေကို မှန်တယ်၊ မှားတယ်၊ အကျိုးရှိတယ်၊ အန္တရာယ်ရှိတယ်လို့ ဘုရား သဘောထားကြောင်း ကျမ်းစာဖော်ပြချက်တွေက သဘောပေါက်စေတယ်။ (ဆာလံ ၁၉:၇၊ ၁၁) ကျမ်းစာကနေ သင်ယူရရှိတဲ့ သင်ခန်းစာတွေဟာ ခေတ်ကာလမရွေး အကျိုးပြုတယ်။ နေ့စဉ်အသက်တာမှာ အမှားအမှန်နဲ့ပတ်သက်ပြီး ဆုံးဖြတ်ချက်ကောင်းတွေ ချနိုင်ဖို့ ကူညီပေးတယ်။

ဥပမာ၊ “ဉာဏ်ပညာရှိသူနဲ့ ပေါင်းဖော်ရင် ဉာဏ်ပညာ ရှိလာမယ်။ လူမိုက်နဲ့ ပေါင်းဖော်ရင်တော့ ဒုက္ခလှလှ တွေ့လိမ့်မယ်” လို့ ပညာအလိမ္မာ ၁၃:၂၀ မှာ ဆိုထားတယ်။ ဒီကျမ်းစာအဆိုဟာ ရှေးအချိန်မှာ မှန်ကန်ခဲ့သလို ဒီနေ့အချိန်မှာလည်း မှန်ကန်တယ်။ ဒီလိုမျိုး လက်တွေ့ကျပြီး တန်ဖိုးရှိတဲ့ သင်ခန်းစာတွေ ကျမ်းစာမှာ အပြည့်ပဲ။—“ခေတ်ကာလမရွေး အကျိုးပြုတဲ့ ကျမ်းစာလမ်းညွှန်ချက်” လေးထောင့်ကွက်ကို ကြည့်ပါ။

‘ကျမ်းစာလမ်းညွှန်ချက်တွေဟာ ကိုယ့်အတွက် အကျိုးရှိမယ်ဆိုတာ ဘယ်လို စိတ်ချနိုင်မလဲ’ လို့ စဉ်းစားမိမယ်။ နောက်ဆောင်းပါးမှာ ဖြစ်ရပ်မှန်တချို့ သုံးသပ်သွားပါမယ်။