¿Technankilia Jehová kema timomaijtouaj?

1, 2. ¿Tlake uelis kichiuas ma timoiljuikaj Jehová amo technankilia kema timomaijtouaj?

“XIMOUAMPOJCHIUA iuaya TOTEKO, uan yajaya mitsmakas tlen moyolo kineki” (Sal. 37:4). ¡Tlauel yejyektsi tlen Jehová kiijtoua! Pero, ¿kiijtosneki Jehová nima techmakas tlen tijtlajtlaniaj? Tlauel moneki ma timotlajtlanikaj ni tlamantli. ¿Kenke? Ximoiljui ipan ni tlamantli. Se tosiuaikni katli amo monamiktijtok kitlajtlania Jehová ma kipaleui pampa kineki yas Kampa kinmachtiaj katli senkistok tlatekipanouaj, pero pano xiuitl uan amo kitlaneuij. Se toikni telpokatl katli tlauel mokokoua kiiljuia Jehová ma kipaleui mochikauas uan kiampa uelis más tlapaleuis ipan tlanechikoli, pero amo mochikaua. Se toikni iuaya isiua kitlajtlaniaj Jehová ma kipaleui ininkone nojua ma kitekipano, pero nopa telpokatl kitlauelkaua Jehová.

² Uelis nojkia tijtlajtlanijtok Jehová se tlamantli uan amo tijselijtok. Nopa uelis kichiuas ximoiljui Jehová san kinpaleuia sekinok o tijchijki tlen amo kuali uan yeka amo mitsmaka tlen tijtlajtlania. Tosiuaikni Janice kiampa kiyolmatki.b Ya uan iueue kiiljuijkej Jehová kinekiyayaj tlatekipanotij Betel. Ya kiijtoua: “Nimoiljuik nima techtlaneuiskiaj”. Pero panok xiuitl uan amo kintlanejkej. Janice kiijtoua: “Tlauel nimoyolkokojtoya uan amo nijmatiyaya tlake panotoya. Nimoiljuiyaya nikixpanotoya Jehová ipan se tlamantli. Nikiljuijtoya Jehová nijnekiyaya nias Betel uan amo nijmatiyaya kenke amo techtlaneuiyayaj”.

3. ¿Tlake tikitasej ipan ni tlamachtili?

³ Uelis kemantika timotlajtlaniaj tlaj Jehová techtlakakilia kema timomaijtouaj. Se keskij Jehová itekipanojkauaj katli uejkajkia itstoyaj nojkia kiampa moiljuijkej (Job 30:20; Sal. 22:2; Hab. 1:2). ¿Tlake mitspaleuis ximotemachi Dios mitstlakakilia kema timomaijtoua? (Sal. 65:2). Tijnankilisej ni tlajtlanili ika ni eyi tlamantli: 1) tlen Jehová kichiua kema timomaijtouaj, 2) tlen Jehová kineki ma tijchiuakaj uan 3) kemantika moneki tijpatlasej tlen titlajtlanij.

TLEN JEHOVÁ KICHIUA KEMA TIMOMAIJTOUAJ

4. Kej kiijtoua Jeremías 29:12, ¿tlake kiijtojtok Jehová?

⁴ Jehová kiijtojtok nochipa techtlakakilis (xijpoua Jeremías 29:12). Jehová kiniknelia itekipanojkauaj uan nochipa kintlakakilia kema momaijtouaj (Sal. 10:17; 37:28). Maske techtlakakilia, amo nochipa techmakas tlen tijtlajtlaniaj. Se keski tlamantli uelis techmakas hasta kema mokualtlalis Tlaltipaktli.

5. ¿Tlake kiita Jehová kema tijtlajtlaniaj se tlamantli?

⁵ Kema tijtlajtlaniaj Jehová se tlamantli, kiita tlaj tlapaleuis ma mochiua tlen mosentlalijtok (Is. 55:8, 9). Ya mosentlalijtok ma itstokaj ipan Tlaltipaktli san katli kikauasej ma kinyakana, uan kiampa kitekipanosej ika pakilistli uan itstosej sansejko. Pero Satanás kiijtok maseualmej más kuali itstosej tlaj moyakanasej ininselti (Gén. 3:1-5). Jehová kinejki kinextis Diablo san istlakati, yeka kikajtok maseualmej ma moyakanakaj ininselti, uan nopa kichijtok miakej ma tlaijiyouikaj (Ecl. 8:9). Jehová amo nima kitlamiltis nochi tlen techtlaijiyouiltia, pampa tlaj kiampa kichiuaskia, miakej moiljuiskiaj maseualmej uelij moyakanaj ininselti uan uelij kisenkauaj kuesoli.

6. ¿Kenke moneki timotemachisej Jehová tlauel techiknelia uan kichiua tlen xitlauak?

⁶ Jehová amo sanse technankilia maske tijtlajtlaniaj sanse tlamantli. Ma timoiljuikaj ipan ni tlamantli. Kema tlanauatijketl Ezequías tlauel mokokok, kiiljuik Jehová ma kipaleui (2 Rey. 20:1-6). Pero kema apóstol Pablo kitlajtlanik Jehová ma kikixtili nopa kokolistli tlen kipixtoya, ya amo kichikajki (2 Cor. 12:7-9). Ma tikilnamikikaj tlen kinpanok apóstoles Santiago uan Pedro. Tlanauatijketl Herodes kinekiyaya kinmiktis. Maske toikniuaj kiiljuijkej Jehová ma kinpaleui, Santiago kimiktijkej uan Pedro amo pampa Jehová kimakixtik ika se milagro (Hech. 12:1-11). Uelis amo tijkuamachiliaj kenke se kimanauik uan nopa seyok amo. Maske Biblia amo kiijtoua kenke Jehová kiampa kichijki, uelis timotemachisej ya “axkema kichiua tlen axijki” uan tlauel kiniknelik nopa omej apóstoles (Deut. 32:4; Apoc. 21:14).c Maske Jehová amo technankilis kej tijnekiskiaj, timotemachiaj ya nochipa technankilia kej kinamiki pampa ya tlauel techiknelia uan kichiua tlen xitlauak (Job 33:13).

7. ¿Tlake amo kinamiki tijchiuasej, uan kenke?

⁷ Amo kinamiki tijtlachilisej tlen tojuantij techpano ika tlen sekinok kinpano. Uelis tijtlajtlanijkej Jehová se tlamantli uan ya amo technankilik kej tijnekiyayaj. Teipa tijmatkej se akajya nojkia kitlajtlanik Jehová nopa tlamantli uan ya kena kinankilik. Kiampa kipanok tosiuaikni Anna, iueue Matthew kipiayaya cáncer. Yeka Anna kiiljuik Jehová ma kipaleui iueue ma mochikaua. Ipan nopa tonali, omej tosiuaikniuaj katli ya uejueyij eliyayaj nojkia kipixtoyaj cáncer, yeka Anna kiiljuiyaya Jehová nojkia ma kinpaleui. Teipa nopa omej tosiuaikniuaj mochikajkej pero Matthew mijki. Achtouia Anna moiljuiyaya kenke Jehová kinpaleuik nopa omej tosiuaikniuaj uan iueue amo. Maske amo tijmatij kenke nopa omej tosiuaikniuaj kena mochikajkej, timotemachiaj Jehová kitlamiltis nochi tlen techtlaijiyouiltia uan kinyolkuis itekipanojkauaj katli tlauel kiniknelia (Job 14:15).

8. 1) Kej kiijtoua Isaías 43:2, ¿kenijkatsa techpaleuia Jehová? 2) ¿Kenijkatsa techpaleuis tlamaijtoli? (Xikita nopa video Tlamaijtoli techpaleuia ma tikijiyouikaj kuesoli).

⁸ Jehová nochipa techpaleuis. Ya tlauel techiknelia uan amo kineki ma titlaijiyouikaj (Is. 63:9). Pero amo techkixtilia nochi nopa kuesoli tlen tijpiaj, tlen Biblia kiijtoua eli kej ueyi atemitl uan kej tlitl (xijpoua Isaías 43:2). Jehová kiijtojtok techpaleuis ma tikixnamikikaj tlen ueli tlaouijkayotl uan amo kikauas tlauel ma tlaijiyouikaj. Nojkia techmaka ichikaualis, uan kiampa techpaleuia ma tikijiyouikaj tlen techpano (Luc. 11:13; Filip. 4:13). Yeka uelis timotemachisej nochipa tijpiasej tlen techpaleuis ma tikijiyouikaj tlen techpanos uan amo ma tijtlauelkauakaj Jehová.d

TLEN JEHOVÁ KINEKI MA TIJCHIUAKAJ

9. ¿Kenijkatsa Santiago 1:6, 7 kinextia moneki timotemachisej Jehová techpaleuis?

⁹ Jehová kineki ma timotemachikaj ipan ya (Heb. 11:6). Uelis kemantika timoiljuiaj nopa tlaouijkayotl tlen tikixnamikij eli tlauel ouij uan Jehová amo uelis techpaleuis. Pero Biblia kiijtoua Jehová uelis techpaleuis kema tikixnamikisej se tlaouijkayotl maske eli kejuak se ueyi “tepamitl” (Sal. 18:29). Uajka amo ma timajmauikaj, ma timomaijtokaj uan ma timotemachikaj Jehová technankilis (xijpoua Santiago 1:6, 7).

10. ¿Tlake ueliskia tijchiuasej maske ya timomaijtokej?

¹⁰ Jehová kineki ma tijchiuakaj se keski tlamantli. Ma timoiljuikaj se toikni kineki yas ipan se ueyi tlanechikolistli, yeka kiiljuia Jehová ma kipaleui kiiljuis katli kitekimakatok ma kikaua yas. ¿Kenijkatsa kipaleuis Jehová? Uelis kipaleuis amo ma majmaui. Pero toikni nojkia moneki kichiuas kampeka kamanaltis iuaya katli kitekimakatok, uan uelis monekis miakpa kiampa kichiuas. Nojkia uelis kiiljuis kipatlas tonali iuaya seyok katli tekiti nopaya. O uelis kiiljuis amo ma kitlaxtlaui nopa tonali kema yas ipan ueyi tlanechikolistli.

11. ¿Kenke moneki miakpa titlajtlanisej tlen tijnekij?

¹¹ Jehová kineki miakpa ma tikiljuikaj tlen techtekipachoua (1 Tes. 5:17). Jesús kiijtok kemantika Jehová amo nima technankilis (Luc. 11:9). Uajka nochipa ma timomaijtokaj uan ma tijchiuakaj ika nochi toyolo (Luc. 18:1-7). Kema miakpa tijtlajtlaniaj Jehová se tlamantli, tijnextiaj nelnelia tijnekij ma techmaka tlen tijtlajtlaniaj uan timotemachiaj nelia techpaleuis.

KEMANTIKA MONEKI TIJPATLASEJ TLEN TITLAJTLANIJ

12. 1) ¿Tlake uelis timotlajtlanisej uan kenke? 2) ¿Tlake moneki tikilnamikisej uan kiampa titlajtlanisej tlen kinamiki? (Xikita nopa recuadro “¿Nijnextia nijtlepanita Jehová ika tlen nijtlajtlania?”).

¹² Tlaj Jehová ayamo techmakatok tlen tijtlajtlanijkej, uelis timotlajtlanisej ni eyi tlamantli. Se, “¿kinamiki nitlajtlanis ni tlamantli?”. Maske uelis timoiljuiaj tijmatij tlake techpaleuis kuali ma tiitstokaj, uelis tlen titlajtlanij amo techpaleuis teipa. Uelis kemantika tikiljuiaj Jehová ma techpaleui tijsenkauasej se kuesoli kej tojuantij tijnekiskia, pero uelis Jehová techpaleuis ma tijsenkauakaj nopa kuesoli ika sekinok tlamantli. Nojkia, uelis tlen titlajtlanij amo tlapaleuis ma mochiua tlen Jehová kineki (1 Juan 5:14). Ma timoiljuikaj ipan nopa tetajmej tlen tikijtojkej ipan párrafo 1. Inijuantij kiiljuijkej Jehová ma kipaleui ininkone nojua ma kitekipano uan amo ma kitlauelkaua. Maske kuali tlen kitlajtlanijkej, Jehová amo aka kichiualtia ma kitekipano. Ya kineki nochi ma tijtekipanokaj uan nojkia tokoneuaj, pampa kiampa tijnekij tijchiuasej (Deut. 10:12, 13; 30:19, 20). Uajka, ¿tlake kinamiki kitlajtlanisej Jehová? Nopa tetajmej moneki kitlajtlanisej ma kinpaleui, kiampa uelis kipaleuisej ininkone ma kiikneli uan ma mouampojchiua iuaya (Prov. 22:6; Efes. 6:4).

13. Kej kiijtoua Hebreos 4:16, ¿kema technankilia Jehová?

¹³ Nopa ompa tlamantli tlen uelis timotlajtlanisej eli, “¿kiita Jehová ya kinamiki nechmakas tlen nijtlajtlania?”. Uelis timoiljuiaj Jehová moneki nima technankilis, pero ya kimati kema kinamiki techmakas tlen tijtlajtlaniaj (xijpoua Hebreos 4:16). Tlaj Jehová amo nima techmaka tlen tijtlajtlaniaj uelis timoiljuisej ayokmo techmakas. Pero uelis Jehová kineki ma timochiakaj uan teipa techmakas tlen tijtlajtlaniaj. Sampa ma timoiljuikaj ipan nopa telpokatl katli mokokouayaya uan kitlajtlaniyaya Jehová ma kipaleui mochikauas. Tlaj kichikajtoskia, Satanás ueliskia kiijtos nopa telpokatl kitekipanoua Jehová san pampa kichikajki (Job 1:9-11; 2:4). Jehová ya kiixtlalijtok kema kitlamiltis kokolistli (Is. 33:24; Apoc. 21:3, 4). Uajka ipan ni tonali amo kinamiki timoiljuisej techchikauas ika se milagro. Uajka, ¿tlake ueliskia kitlajtlanis Jehová ni telpokatl? Uelis kitlajtlanis ma kimaka chikaualistli uan ma kipaleui kitekipanos ika pakilistli maske mokokoua (Sal. 29:11).

14. ¿Tlake techmachtia tlen kipanok Janice?

¹⁴ Ma tikilnamikikaj tosiuaikni Janice, katli kiiljuiyaya Jehová kinekiyaya tlatekipanos Betel. Kema panok makuili xiuitl kikuamachilik kenijkatsa Jehová kinankilijtoya. Ya kiijtoua: “Jehová nechpaleuik ma nijnexti sekinok kuajkuali tlamantli. Nechpaleuik más ma nimotemachi ipan ya, nojua kuali ma nimomachti uan nikitak uelis niyolpakis ika nopa tekitl tlen Jehová nechmakatok”. Teipa Janice uan iueue kintlanejkej ma tepaxalokaj chijchikuasej metstli. Ya kiijtoua: “Jehová nechnankilik ika tlen amo nimoiljuijtoya. Teipa nikitak kenijkatsa Jehová nechpaleuijtoya. Tlauel nijtlaskamatilia pampa kinextijtok ueyi iyolo touaya uan tlauel techiknelia”.

15. ¿Kenke kemantika amo kinamiki san titlajtlanisej se tlamantli? (Nojkia xikita tlaixkopinkayomej).

¹⁵ Nopa expa tlamantli tlen uelis timotlajtlanisej eli, “¿kinamiki san nimosentlalis ipan nopa tlamantli?”. Maske amo kenijki tlaj tijtlajtlaniaj Jehová se tlamantli, kemantika amo san ya nopa moneki titlajtlanisej, moneki tikitasej tlake kineki Jehová ma tijchiuakaj. Ma timoiljuikaj ipan nopa tosiuaikni katli kiiljuik Jehová ma kipaleui yas Kampa kinmachtiaj katli senkistok tlatekipanouaj. Ya kineki yas nopaya pampa kineki tlapaleuis kampa más moneki. Maske amo kenijki tlaj nojua tlajtlanis ni tlamantli, ¿tlake sekinok tlamantli ueliskia kitlajtlanis Jehová? Uelis kiiljuis ma kipaleui kiitas tlake sekinok tlamantli uelis kichiuas uan kiampa kitekipanos (Hech. 16:9, 10). Nojkia uelis kiiljuis toikni katli tepaxaloua chijchikuasej metstli tlaj moneki ma tlapaleuikaj precursores ipan seyok tlanechikoli. Nojkia uelis tlajkuilos kali Betel uan tlajtlanis kanke monekij tlajtolmoyauanij.e

16. ¿Ipan tlake uelis timotemachisej?

¹⁶ Ipan ni tlamachtili tikitakej uelis timotemachisej Jehová technankilia ika tlaiknelili kema timomaijtouaj, uan nochipa kichiua tlen xitlauak (Sal. 4:3; Is. 30:18). Maske uelis amo technankilis kej tijnekiskiaj, uelis timotemachisej ya nochipa techtlakakilia. Ya tlauel techiknelia uan amo kema techtlauelkauas (Sal. 9:10). Uajka, nochipa ma timotemachikaj ipan Jehová uan ma tikiljuikaj nochi tlen tijyolmatij kema timomaijtouaj (Sal. 62:8).