Yemwi Makajija Kudakara ngo Zvamunazvo Here?

1. Zvinoda kubhuyenyi kudakara ngo zvatinazvo uye ngazvipi zvazvisingadi kubhuya?

YEMWI muri mundhu wakadakara here? Mundhu anodakara ngo zvanazvo unowana mudakaro uye no runyararo ngo kukanda murangariro wake pamakomborero aanawo zvino. Iyena aanyangajwi ngo ndava yokuti aana zviro zvakawanda. Ngo kudaro, kunyange tiri vandhu vanodakara ngo zvatinazvo, izvi azvibhui kuti atisadikani kubatikana ngo upenyu wedu. Inga muezaniso, muKristu anonasa kupsaka mukana kuitira kuengejera basa rake. (VaR. 12:1; 1 Tim. 3:1) Kunyange zvakadaro, iyena aaperehwi ngo mudakaro kudai akatama kuwana makomborero aaisoterera ngokukasika.

2. Ngenyi kutama ku gutsikana ngo zvatinazvo kuno ngozi?

² Kudai tikatama kudakara ngo zvatinazvo, tinozotanga kuita zvikhetwa zvakashata. Vayani vasikadakari ngo zvovanazvo vangapeja nguva yakareba vesishanda kuti vawane zviro zvokurarama nazvo, zvisingakoshi maningi. Zvinosuruvarisa, ngozvo kuti maKristu amweni akaguma pa kuba mare uye no zviro zvimweni zvavaida. Zvingaita kuti ivona vakarangarira kuti, yeni ndakasisira izvi, ndaemera zvakwana kana kuti ndizohwirija mareyo ngo kuhamba ko nguva.’ Asi, kuba kuri kese akudakaji Mwari uye akupi rukujo Jehovha. (Zvi. 30:9) Vamweni vavo vakanyangajwa ngo kutama kuashira mabasa ovaida, ngo kudaro vakasiya kushandira Jehovha. (VaG. 6:9) Zvingaitisa kudini kuti mushandiri wa Jehovha arangarire kuita izvi? Zvingaita kuti mundhuwo aasiripi kudakara ngo zvaanazvo.

3. Icpkwadi cipi catinojija kuvha kuma gama ari pana VaFiripi 4:11,12?

³ Yesu tese tinodika kuvangisira kuti tidakare ngo zvatinazvo. Mupostori Pauro wakanyora kuti: “Ndakajija kudakara ngo zvandinazvo pasinenyi no mugariro unonesa.” (Verenganyi VaFiripi 4:11, 12.) Mupostori Pauro wakanyora masoko aya painga mujere. Kunyange zvakadaro wainga asito kurasikirwa ngo mudakaro wake. Asi wainga akajijira ciro cimweni cokuti vandhu vakawanda vainga vasito kuzvijija, zvo kudakara ngo zvavanazvo. Zvakaitikari no upostori Pauro zvinokhombija kuti na yesu tingadakara ngo zvatinazvo pasinei no mugariro wedu wo zviro. Atidikani kuemera kuti upenyu wedu uve wakatojana mazuva ese. Ngo kudaro, tinodikana kujija kudakara ngo zvatinazvo. Ngenyi? Ngatimbobhuya ngo zviro zvinganane zvingatibesa kuti tijije kudakara ngo zviro zvatinazo.

JIJIRANYI KUBONGA NGO ZVAMUNAZVO

4. Kuitisa kudini kuva vandhu vanobonga kuno tiita kuti tive vandhu vakadakara? (1 VaTesaronika 5:18)

⁴ Mundhu anobonga anonga esidakara ngo zvaanazvo. (Verenganyi 1 VaTesaronika 5:18.) Inga muezaniso, Kudai tikava tesibonga ngo zvatinazvo atizogari tesirangarira zvatisina. Kudai tikava tinobonga Jehovha ngo mashandire atiri kumuita zvino, izvi zvinozotibesa kurangarira kuti, tingaitisa kudini zvese zvatinokona kuti timushandire azvinenyi no zvineso zvatingasangana nazvo mu basa ratakagajwa. Jehoovha anozviziva kuti zvinokosha maningi kuva tinobonga. Ngo iyo ndava mu soko rake Bhaibheri iyena anotivangisa kuti tive tinomubonga patinoita mukumbiro! Kudai tikava vanobonga zvinozotibesa kuti tive no “runyararo wa Mwari unopinda kurangarira kese.”—VaF. 4:6, 7.

5. Ngenyi vaIziraeri vaidikana kuva vandhu vanobonga? (Wonanyi foto.)

⁵ Ngatiwone kuti zvicinyi zvakaitika no vaIziraeri. Munguva jakawanda ivona vainyunyutira Jehovha kuti avasaiwana zvokurhya zvo vainga vakajaera ku Ijipita. (Num. 11:4-6) Ngozvo cokwadi kuti upenyu mu zvipare wainga usito kureruka. Zvicinyi zvaizovabesa kuti varambe vakadakara ngo zvovanazvo? Ivona vaidikana kunasa kurangarira ngo pamusoro po zvese zvo vakaizirwa ndi Jehovha no kumubonga ndi zvona. Ivona vaidikana kurangarira kuti po vainga varanda uye vesibatwa zvisito kunaka ku Ijipita, Jehovha wakaviisa matambukijo 10 ku Ijipita kuti vasujunure vandhu vake. VaIziraeri povakabhuda ku Ijipita, Jehovha wakavavhunja kuti vakumbire “goridhe, sirivha no zvokusimira”. (Eki. 12:35, 36) VaIziraeri povakatevererwa ngo va Ijipita pa jombe ro kupsuka, Jehovha vakavhura jombe iri kuti ivona vapone. Povainga vesihamba muzvipare, Jehovha waivapa zvokurhya mazuva ese. Hino, ngenyi VaIziraeri vainyunyuta ngo ndava yo zvokurhya? Azvinenyi kuti Jehovha wavapa zvese zvovaida kuti varambe vesirarama, asi ivona avasaibonga ngo zvovaipuwari.

6. Tingaitisa kudini kuti tive vandhu vanobonga?

⁶ Zvicinyi zvingamubesawo kuti muve munobonga? Cokutanga: Psakanyi nguva yo kurangarira mazuva ese ngo zviro zvamunodakarira. Imwimwi mungatonyorera zviro zviviri kana zvitatu zva mungada kubonga ndizvona. (Mar. 3:22, 23) Cocipiri: Bongeseranyi ndizvona. Bonganyi vamweni ngo zvavanomuitira. Pamusoro po zvese, bonganyi Jehovha ngo zvese zvaanomuitira nguva jese. (Ps. 75:1) Cocitatu: Khetanyi shamwari jinobongeserawo. Kudai shamwari jedu jinobonga ngo zvajinazvo, na isusuwo tinozova tinobongawo ngo zvatinazvo asi kudai vakatama kuva vanobonga na isusuwo atizovi tinobonga. (Dhe. 1:26-28; 2 Tim. 3:1, 2, 5) Patinopsaka mukana wo kubongesera nguva jese, tinozova no mudakaro uye atizoneseki ngo zvineso zvedu uye zvatinoda kana kuti zvatisina.

7. Ngazvipi zvakabesera hanzvaji Aci kuti vave mundhu anobongesera, uye ngaupi wakava muviyo?

⁷ Ngatimbowona kuti zvicinyi zvakaitika na Aci unogara ku Indoneziya. Iyena wakati: “Mukati mo mutungu wo COVID-19 ndakatanga kuezanisa mugariro wangu no wo hama jandinonamata najo. Asi izvi “zvakandiita kuti ndisadakara ngo zvandinazvo.” (VaG. 6:4) Zvicinyi zvakabesa Aci kuti acinje murangariro wake? “ Iyena wakati: “Ndakatanga kurangarira ngo pamusoro po makomborero andaiwana zuva ngo zuva uye ndakarangarira ngo pamusoro po zviro zvakawanda zvakanaka zvondainga nazvo mu sangano ra Mwari. Ngokurangarira zvese izvi ndakabonga Jehovha. Inga muviyo, ndakatanga kudakara ngo zviro zvandinazvo.” Kudai imwimwi mukatama kuva no mudakaro ngo ndava yo mugariro wo zviro wamuri kusangana nawo, mungaitenyi kuti muve munobongesera?

IVANYI ANOZVIDODOKESA

8. Zvicinyi zvakaitikira Bharuki?

⁸ Bharuki munyori wo muporofita Jeremiya, nguva jimweni wakambosangana no mugariro unonesa muupenyu. Bharuki wainga no basa rainesa maningi. Iyena waidikana kubesa Jeremiya pakuvhunja vaIziraeri vainga vasikabongi ngo pamusoro po zviro zvo vaizosangana nazvo ngo kutama kavo kuzwira Jehovha. Panguva jimweni, iyena aato kuzwira zvaakavhunjwa. Pano kuti asotesese pa zviro zvaiidiwa ndi Jehovha, iyena wakatanga kurangarira ngo pamusoro po zviro zvaaida pacake. Jehovha esishandisa Jeremiya, wakati kuna Bharuki: “Uri kupsaka zvaunoda pacako. Siyai kupsaka zviro izvi.” (Jer. 45:3-5) Ngo magama amweni, iyena waibhuya kuti: “Dakarai ngo mugariro waunawo.” Bharuki wakazwa mazano aya a Jehovha uye wakaramba ari shamwari yake.

9. Mukuzwirana na 1 VaKorinde 4:6,7, kuzvidodokesa kunozotibesa kuti tiitenyi? (Wonanyi foto.)

⁹ Nguva jimweni, mushandiri wa Jehovha angarangarira kuva no makomborero ari ese mu sangano. Ngokuti Iyena uno ruzivo rakakura, unoshanda maningi kana kuti ano makaore akawanda esishandira Jehovha. Ngo kudaro, vamweni vainga vasikaemeri kuti vangawana makomborero aaidari, ndivona vakazomawana. Zvicinyi zvingamubesa kuti asanyangajwa? Iyena ungarangarira ngo pamusoro po masoko o mupostori Pauro anowanika pana 1 VaKorinde 4:6, 7. (Verenganyi.) Makomborero atinawo uye zvatinokwanisa zvinovha kuna Jehovha. Jehovha aatipi makomborero aya ngokuti tinokosha maningi kudarika vamweni. Asi ngokuti unotida uye uno unyasha na isusu.—VaR. 12:3, 6; VaE. 2:8, 9.

10. Tingaitenyi kuti tive vandhu vanozvidodokesa?

¹⁰ Kudai tikarangarira ngo pamusoro po muezaniso wa Jesu no kuutevejera, tinozojija kuva vandhu vanozvidodokesa. Jesu wakasambija soka jo vajiji vake kunyange kuti wainga mwana wa Mwari uye kuti wainga no simba guru. Mupostori Johani wakanyora kuti: “Ngo kudaro, Jesu waiziva kuti Baba vainga vamupa zviro zvese mu nyara jake, iyena wakavha ka Mwari, wainga woda kuhwirira ka Mwari, . . . ngo kudaro wakatanga kusambija soka jo vajiji vake.” (Johani 13:3-5) Jesu ungadai akarangarira kuti vajiji vake ndivona vaidikana kusambija soka jake. Asi Jesu aato kumbozvizwa kuti ngo kuva mwana wa Mwari unodikana kuva no nyumba yakaseja, kuva no mare yakawanda kana kuva no upenyu wakareruka. (Ruka 9:58) Jesu waizvidodokesa uye waidakara ngo mugariro wainga nawo. Iyena wakatisiira muezaniso wakanaka maningi.—Johani 13:15.

11. Kuzvidodokesa kakabesesa kudini hama Dhenis kuti vave vakadakara?

¹¹ Hama imweni inozwi Dennis inogara ku Holanda yakati ndiri kuvangisira kuti ndive ndinozvidodokesa inga ndi Jesu, asi zviri kunesa. Iyona yakati: “Mundhu umweni paanoashira mabasa andaida muungano, ndinozvizwa ndakanyanganjwa ngokuti ndini ndaidikana kuashira basero. Pazvinoitika ndinojija ngo musoro uri wese unobhuya ngo pamusoro po kuzvidodokesa. Mu aprikativho JW Library^®, ndakanyorera mavhesi amweni anobhuya ngo pamusoro po kuzvidodokesa kuitira kuti ndimaverenge pa nguva iri yese. Ndakabashariwo mavhidhiyo amweni mu foni yangu o hurukuro jinobhuya ngo pamusoro po kuzvidodokesa uye jandinozwa nguva jese.a Ndakajijawo kuti basa rese randinoita rinodikana kuva ro kukuja Jehovha haiwa kuti inini ndiwoneke. Jehovha ngo unyasha wake anotendera kuti umwe nga umwe wedu ave no zviro zvo kuita asi ndiyena unoita kuti basa rese ribhudirire.” Kudai mukatama kuva no mudakaro ngo ndava yo makomborero mu basa ra Jehovha, shandanyi ngo simba kuti muve munozvidodokesa. Kuita izvi zvinozovangisa ushamwari wenyu na Jehovha uye zvinozomubesa kuti muve makadakara.—Jak. 4:6, 8.

RANGARIRANYI NGO PAMUSORO PO ZVIGONDISO ZVA JEHOVHA

12. Isoterero ipi yomberi ingatibesa kuti tive vakadakara? (Isaya 65:21-25)

¹² Tinowanazve mudakaro patinorangarira ngo pamusoro po soterero yo mberi yatinayo. Mubhuku ra Isaya, Jehovha unobhuya kuti iyena unozwisisa matambujiko atiri kusangana nawo Asi iyena anothembesa kuti anozomapeja. (Verenganyi Isaya 65:21-25.) Tinozova no nyumba jakanaka. Tinozova no basa rakanaka uye zvokurhya zvinovaka. Atizoneseki ngo ngozi jingaitika katiri kana kuvana vedu. (Isa. 32:17, 18; Ezek. 34:25) Tingava no cokwadi cokuti makomborero aya anozokwanisika.

13. Mugariro jipi jingatiita kuti tibatikane maningi pa soterero yedu?

¹³ Zvino inguva yo kunasa kuvangisa soterero yedu. Ngenyi? Ngokuti, tiri kurarama “mazuva okupejisira” uye tese “tinozvineso.” (2 Tim. 3:1) Jehovha unotibesa mazuva ese kuti ticungirire ngo kutipa ndhungamiriro, simba uye no besero ratinoda. (Ps. 145:14) Kunja ka izvi, soterero yedu ingatibesa munguva jo kunesa. Nguva jimweni muri kushanda maningi kuti mutenge zvokurhya, zvokusimira uye muve no ndau yakanaka yo kugara no mbhuri yenyu. Kubhuya kuti imwimwi munodika kuramba mesishanda ngo simba kuti muwane zvo kurarama ndizvona here? Haiwa! Jehovha unogondesa kumupa zvese zvamunoda mu Paradhiso. (Ps. 9:18; 72:12-14) Imwimwi mungagara mesihwaja zuva ngo zuva, kuneseka mumurangariro kana kuva no ndhendha inonesa maningi. Kubhuya kuti mugariro wenyu wo upenyu unozoramba wakadai mbhera narini? Haiwa. Kuwaja uye kufa zvinozopera mu nyika ipsa ya Mwari. (Zvak. 21:3, 4) Soterero iyi, inotibesa kuti tisagara takanyangajwa ngo zviri kuitika mazuva ano. Tingavazve no mudakaro uye runyararo kunyange kuti mundhu umweni angatiitira zvakashata, tingakafirwa ngo mundhu watinoda kana tikasangana no mugariro uri wese unotinesa muupenyu wedu. Ngenyi? Ngokuti azvinenyi no zvineso zvatingasangana nazvo, tinoziva kuti “matambujiko atiri ku sangana nawo zvino” ngo onguva doko uye mu nyika ipsa iri kuviyari, tinozova no mudakaro no kusingaperi.—2 VaK. 4:17, 18.

14. Zvicinyi zvatingaita kuti tivangise soterero yedu?

¹⁴ Soterero yedu yo mberi inotibesa kuti tive takadakara. Asi icinyi cingatibesa kuti tive no cokwadi cokuti zvigondiso zva Jehovha zvinozokwanirisika? Inga mundhu ungadikana kukanda magirazi kuti anase kuwona zviro zviri ndhambo, ngo kudaro tinodikana kuitawo zviri zvese kuti tivangise soterero yedu yo kumberi kuti tinase kuwona Paradhiso inga iri phedo. Inga muezaniso, patinoneseka maningi ngo pamusoro po kutama mare yo kurarama ndiyona, tingatorangarira ngo pamusoro pokuti upenyu unozova wakadini mu Paradhiso panonga pasikadikani mare uye munyika inonga isina murombo. Kudai tikava tinoneseka ngo makomborero o musangano ra Jehovha okuti atito tamawana, tinodikana kurangarira ngo pamusoro po upenyu watinozova nawo mu nyika ipsa apo patinozoshandira Jehovha tese takakwana ko makore akawanda. (1 Tim. 6:19) Nguva jimweni zvingatinesa kuti tirangarire ngo pamusoro po ramangwana ratinozova naro, asi zvingava zvakareruka maningi kuti tirangarire ngo zviro zvinotinesa. Asi patinorangarira ngo pamusoro po ramangwana ratakagondeswa ndi Jehovha, zvinozova zvakareruka katiri kusotesesa ku zvigondiso zvake, haiwa ku zvineso zvedu.

15. Majijenyi ngo zvakabhuiwa ndi hambzaji Krista?

¹⁵ Rangariranyi kuti soterero yakabesesa kudini Krista, uwo wakarovohwa ndi hama Dennis,vabhuiwaya pakutanga. Iyena wakati: “Inini ndinondhendha inoita kuti mujira yangu irambe yakaremba. Andikwanisi kuhamba uye ndinohamba ngo cituro co marodha. Ndinogara ndakavata ko nguva yakareba. Ndinozwa kuhwajiwa zuva ngo zuva. Medhiko wangu wakandivhunja kuti andizoiti nane. Ciripo-ripoco, ndakarangarira kuti: ‘Medhiko uwu ari kuwona ramangwana rangu ngo gwanja rimweni.’ Ndinoramba ndesirangarira ngo pamusoro po soterero yangu inondipa runyararo. Nyamasi, ndiri kudikana kuhwisana no zvineso zvakakura, asi munyika ipsa ndinozova no upenyu unodakajisa!”

“VAYA VANOTYA JEHOVHA AVAZOTAMI CIRI CESE”

16. Ngenyi Mambo Dhavhidhi wakabhuya kuti “apana cinoshota” kuvaya vanothya Jehovha”?

¹⁶ Azvinenyi kuti tiri vandhu vakadakara, tingasangana no zvineso. Rangarinyi ngo pamusoro pa Mambo Dhavhidhi. Iyena wakafirwa ngo vana vake vatatu. Vamweni vakamunyepera zviro zvaasito kuita, shamwari jake jakamuramba uye mambo umweni wakamupsaka kuti amuuraye ko makore akawanda. Azvinenyi no zvineso izvi, Dhavhidhi wainga no mudakaro, iyena wakati ngo pamusoro pa Jehovha: “Vaya vanotya Jehovha avazotami ciri cese.” (Ps. 34:9, 10) Ngenyi iyena wakabhuya kudai? Ngokuti iyena waizviziva kuti azvinenyi kuti Jehovha aato kurambisa matambujiko aya kuti asasangana nawo muupenyu wake asi iyena waizopa Dhavhidhi zvese zvaaida. (Ps. 145:16) Inga ndi Dhavhidhi, tingava no cokwadi cokuti Jehovha unozotibesera kuti tirambe takagondeka kaari munguva jo matambujiko. Tingava no mudakaro uye runyararo azvinenyi no mugariro wedu.

17. Ngenyi munoda kuita zvese zvamunokona kuti muve mundhu wakadakara?

¹⁷ Jehovha unoda kuti imwimwi muve makadakara. (Ps. 131:1, 2) Ngo kudaro, itanyi zvese zvamunokona kuti muve makadakara. Kudai imwimwi mukavangisira kuti muve munobonga muve anozvidodokesa uye no kuvangisa soterero yenyu, mungaguma pakuti: “Eya inini ndiri mundhu wakadakara.”—Ps. 16:5, 6.