Jehovha Unotibesesa Kudini Kuti Ticungirire?

1. Ngenyi tinodikana kucungirira uye ibesero ripi ratinaro? (1 Pedhru 5:10)

MU MAZUVA ano okupejisira anonesa, vandhu va Jehovha vanodikana kuenderera mberi vesicungirira. Vamweni vari kutambujika ngo ndhendha jisingarapiki. Vamweni vari kutambujika ngo ndava yo kufirwa ngo mundhu wa vanoda. Vamweni vari kutevererwa ngo vopa mbhuri kana kuti ngo hurumende. (Mateu 10:18, 36, 37) Ivanyi no cokwadi cokuti, pasinenyi no zvineso zvamuri kusangana nazvo mu upenyu wenyu, Jehovha unozomupa simba ramunoda kuti muenderere mberi mesicungirira makagondeka mbhera kumugumo.—Verenganyi 1 Pedhru 5:10.

2. MuKristu unowanepi simba rokuti acungirire?

² Kucungirira kunobhuya kuramba takagondeka kuna Jehovha uye kumushandira takadara kunyange tino zvineso, zvakadai inga kutevererwa kana kuejwa kuti tiite zvakashata. Atikwanisi kucungirira ngo simba redu kamare, asi Jehovha ndiyena unotipa ‘simba kudarika ratinoda.’ (2 VaK. 4:7) Mucijijo cino, tinozowona zviro zvirongomuna zvatakapuwa ndi Jehovha kuti atibese kucungirira. Tinozowonazve kuti tingabesereka kudini ndizvona.

ITANYI MUKUMBIRO KUNA JEHOVHA

3. Ngenyi tingabhuya kuti mukumbiro cishamiso cakakura maningi cokubhuisana na Mwari?

³ Jehovha wakatipa ciro cinoshamaisa maningi cinotibesa kuti ticungirire. Iyena wakaita kuti tikwanise kubhuya naye kunyange tiri vandhu vano cishaishi. (VaH. 4:16) Rangariranyi izvi basi: Mungaita mukumbiro kuna Jehovha nguva iri yese uye ngo pamusoro po shwiro iri yese. Iyena ungakwanisa kuzwa mukumbiro jedu pasinenyi kuti tinovereketa ndumi ipi kana kuti indau ipi yatiri, kunyange tiri tega kana tiri mujere. (Jona 2:1, 2; Mabasa 16:25, 26) Kudai tiri kuneseka ngokuti atiripi kukwanisa kubhuya magama ari mumurangariro medu, Jehovha unoziva zvataida kubhuya. (VaR. 8:26, 27) Icokwadi, kuti mukumbiro cishamiso co kubhuisana na Jehovha!

4. Ngenyi tingabhuya kuti mukumbiro jatinoita tesikumbira kucungirira, jinoenderana no zvinodiwa ndi Jehovha?

⁴ Musoko rake Bhaibheri, Jehovha unotithembesa kuti ‘pasinenyi no zvatinokumbira maererano no kuda kake iyena unotizwa.’ (1 Joh. 5:14) Tingakumbira kubeswa ndi Jehovha kuti ticungirire here? Eya! Kuita izvi zvinoenderana no kuda kake. Ngenyi tesibhuya kudaro? Patinocungirira muejo uri wese, tinonga tesibesa Jehovha kuti adavire muvengi wake, Sathana Dhiyabhu. (Zvi. 27:11) Kunja ka izvi, Bhaibheri rinobhuya kuti Jehovha ano cidaka daka “co kukhombija simba rake kuitira vano mwoyo jakaperera kaari.” (2 Mk. 16:9) Ngo kudaro, tingava no cokwadi co kuti Jehovha uno simba rakawanda no cido co kuti atibese kucungirira.—Isa. 30:18; 41:10; Ruka 11:13.

5. Mukumbiro ungatibesesa kudini kuti tive no runyararo wo cokwadi? (Isaya 26:3)

⁵ Bhaibheri rinobhuya kuti patinoita mukumbiro kuna Jehovha ngo mwoyo wese ngo pamusoro po zvinotinesa, “runyararo ra Mwari rinodarika kuzwisisa kese rinozongwarira mwoyo yedu no murangariro wedu.” (VaF. 4:7) Wonanyi kuti izvi zvinoda kubhuyenyi. Vandhu vasinganamati Jehovha vari kusangana no matambujiko akawanda uye ivona vari kueja kuti vave no runyararo mumurangariro. Inga muezaniso, vamweni vanorapwa ngo kuitira kuthuruja murangariro pazviro zvinovanesa. Mundhu paanoita zviro izvi uye otama kungwarira murangariro wake unonga esindundihwa ngo madhimoni. Izvi zvakashata maningi. (Ezanisanyi na Mateu 12:43-45.) Kunja ka izvi, runyararo watinopuwa ndi Jehovha patinoita mukumbiro wakakura maningi kudarika runyararo wese unova no mundhu unoshandisa mutombo. Patinoita mukumbiro kuna, Jehovha tinokhombija kuti tinotsigira Jehovha uye iyena unotipa runyararo rusingaperi. (Verenganyi Isaya 26:3.) Maitire amweni aanozvita ndiwona, ngo okutibesa kurangarira cokwadi cinodakajisa co takajija musoko rake Bhaibheri. Cokwadi ici, cinonyaraja murangariro no mwoyo wedu ngokuti tinoziva kuti Jehovha unotida uye unoda kuti zviro zvitihambire zvakanaka.—Ps. 62:1, 2.

6. Zvicinyi zvamungabatanija pamunonga mesiita mukumbiro? (Wonanyi foto.)

⁶ Zvicinyi zvamungaita. Pamunonga mesihwisana no muejo, ‘kandanyi mutwaro wenyu kuna Jehovha’ uye itanyi mukumbiro mesikumbira runyararo rake. (Ps. 55:22) Itanyiwo mukumbiro mesikumbira ruzivo kuitira kuhwisana no cineso cenyu. (Zvi. 2:10, 11) Pamunonga mesiita mukumbiro jo kuti mucungirire musakanganwa kubonga Jehovha. (VaF. 4:6) Psakanyi zviro zvinokhombija kuti Jehovha uri kumubesa, uye mubongenyi ngo zvese zvaari kumuitira. Musasiya kuti muejo yamuri kusangana nayo imuitise kuti mukanganwe makomborero omakaashira.—Ps. 16:5, 6.

JEHOVHA WAKATIPA SOKO RAKE BHAIBHERI

7. Kuitisa kudini kuverenga Bhaibheri kungatibesa kucungirira zvineso?

⁷ Jehovha wakatipa soko rake kuti ritibese kucungirira. Bhaibheri rino mavhesi akawanda anotithembesa kuti Jehovha unozotibesa. Ngatimbowona muezaniso uwu basi. Pana Mateu 6:8 panoti: “Baba venyu vanoziva zvamunoda musati mavakumbira.” Jesu ndiyena wakabhuya masoko aya, iyena unonasa kuziva Jehovha kudarika mundhu wese. Ngo kudaro, tingava no cokwadi co kuti, kudai tiri kutambujika Jehovha unozviziva zvatinoda uye unozotibesa. Bhaibheri rakazara ngo zvigondiso zvakanaka zva Jehovha zvinotipa simba ratinoda kuti ticungirire zvineso.—Ps. 94:19.

8. (a) Ipanyi muezaniso wo ndhungamiriro jo Bhaibheri jingatibesa kucungirira. (b) Zvicinyi zvingatibesera kuejurira ndhungamiriro jo Bhaibheri, paya patinoda kuita cikhetwa kana kucungirira cineso ciri cese?

⁸ Ndhungamiriro jo Bhaibheri jingatibesa kuti ticungirire. Kupinda zvese ijona jino uzivi ungatibesa kuti tiite zvikhetwa zvakanaka. (Zvi. 2:6, 7) Inga muezaniso, Bhaibheri rinotivhunja kuti atidikani kuneseka ngo zviro zvinozoitika muno ramangwana, asi kunja ka izvi tinodikana kuthemba Jehovha mazuva ese. (Mateu 6:34) Kudai tesiverenga Bhaibheri no kurangarijisisa, zvinozova zvakareruka kuejurira ndhungamiriro patinozoda kujishandisa.

9. Kuitisa kudini ndhorowondho jo Bhaibheri, jingavangisa gonda redu kuna Jehovha?

⁹ Bhaibheri rino ndhorovondho jo upenyu wo vandhu vakatojana nesu, vakathemba Jehovha uye vakawana besero rake. (VaH. 11:32-34; Jak. 5:17) Patinorangarijisisa ngo pamusoro po ndhorovondho iji, tinoengejera kuthemba kedu Jehovha kuti “ndiyena ndau yedu yokutizira no simba redu, iyena nguva yese wakanasiririka kuti atibese pa nguva yo matambujiko.” (Ps. 46:1) Patinowona vashandiri vokare va Jehovha kuti vakava vakagondeka, tinova no cido cokutevejera kutenda kavo no kucungirira kavo.—Jak. 5:10, 11.

10. Zvicinyi zvamunodikana kuita kuti munase kubeswa ngo soko ra Mwari, Bhaibheri?

¹⁰ Zvicinyi zvamungaita. Verenganyi Bhaibheri mazuva ese, uye garanyi no mundandanda wo mavhesi amunowona kuti munozoda kumashandisa. Vakawanda vakawona kuti kuverenga rugwaro wo zuva ngo zuva, injira yakanaka yo kutangisa zuva no murangariro unovangisa uri mu Bhaibheri. Hanzvaji imweni inozwi Maria,a yakawona kuti ici cainga cokwadi vabereki vakona po vakabatwa ngo ndhendha yo kanseri. Zvicinyi zvakavabesa kuti vacungirire pavaingwarira vabereki vavo mu mweji jo kupejisira? Ivona vakati: “Mangwanani ese, ndaiverenga vhesi yo Bhaibheri mu cibhuku co Rugwaro ro Zuva ngo Zuva uye ndairangarijisisa zvandaiverengaro.” “Izvi zvakandibesa kurangarira ngozva Jehovha mazuva ese, no zviro zvinoshamisa zvaanotijijisa mu soko rake Bhaibheri, kunja ko kurangarira basi ngo matambujiko andainga nawo.”—Ps. 61:2.

JEHOVHA WAKATIPA HAMA NO HANZVAJI

11. Ngenyi zvinovangisa kuziva kuti atiripi tega patinohwisana no zvineso?

¹¹ Jehovha unotipa hama no hanzvaji kuti jitibese kucungirira. Patinoziva kuti matambujiko atiri kusangana nawo, ari kusanganawo no hama no hanzvaji jo nyika yese, zvinotibesa kuziva kuti atiripi tega. (1 Ped. 5:9) Ngo kudaro, tingava no cokwadi co kuti pasinenyi no zvineso zvatiri kusangana nazvo, hama no hanzvaji jedu vakasanganawo no zvineso zvakatojana asi vakazvinyisa. Izvi, zvinobhuya kuti tingakwanisawo kucungirira —Mabasa 14:22.

12. Hama jedu jingatibesesa kudini, uye isusuwo zvicinyi zvatingavatirawo? (2 VaKorinde 1:3, 4)

¹² Hama no hanzvaji jedu jingativangisa ngo zvavanobhuya no zvavanoita. Mu positori Pauro wakawona kuti izvi ngozvo cokwadi. Mutsamba yake, iyena wakabhuya mazina o hama no hanzvaji jakamubesa paainga akasungwa pamuzi pake. Ivona vakavangisa Pauro no kumunyaraja uye vakamubesa ngo zvese zvaaida. (VaF. 2:25, 29, 30; VaK. 4:10, 11) Nyamasi uno, tingasanganawo no mugariro jakatojana. Patinonga tesida besero kuti ticungirire, hama no hanzvaji jedu jiripo kuti jitibese; ivonawo povanoda besero tiripo kuti tivabese.—Verenganyi 2 VaKorinde 1:3, 4.

13. Zvicinyi zvakabesa hanzvaji inodanijwa kuti Maya kuti icungirire?

¹³ Hama no hanzvaji jakabesa hanzvaji imweni yoku Rusiya inozwi Maya. Mugore ra 2020 maphorisa akaseca pamuzi pavo, ngo kuhamba ko nguva hanzvaji Maya vakazotongwa ngo ndava yo kuhamba vasibhuya no vamweni ngo pamusoro po kutenda kavo. Ivona vakati: “Panguva iyi, ndainga ndakaremba ndesitya uye ndakasuwa, hama no hanzvaji vaindifonera, vamweni vainditumira mesanjhi no kunditumira tsamba. Izvi zvaikhombija kamare kuti vaindida.” “Inini nguva jese ndaizviziva kuti hama no hanzvaji jaindida uye kuti imbhuri yangu. Kuvhira mugore ra 2020, ndakatanga kunasa kuziva kuti ndino hama jinondida.”

14. Zvicinyi zvatinodikana kuita kuti tibesereke ngo besero ratinopuwa ngo hama no hanzvaji jedu? (Wonanyi foto.)

¹⁴ Zvicinyi zvamungaita. Pamunonga mesicungirira muejo, zvinokosha maningi, kugara phedo no hama no hanzvaji jenyu. Musatya kukumbira besero ku vakuru. “Umwe na umwe wavo unozoita inga ndau yokutizira panoitika mbhepo, inga ndau yokuhwara panoitika dutu.” (Isa. 32:2) Rangariranyiwo kuti hama no hanzvaji jenyu jo ciKristu, jiri kusanganawo no mugariro unonesa. Ngo kudaro, pamunoitira ari wese zviro zvakanaka, zvinozomubesa kuti muve mndhu ari pakati no pakti pa kuva no mawonero akanaka pamunonga musicungirira zvineso zvenyu.—Mabasa 20:35.

JEHOVHA WAKATIPA SOTERERO YO RAMANGWANA

15. Soterero ya ramangwana yakabesesa kudini Jesu uye ingatibesesawo kudini? (VaHebheru 12:2)

¹⁵ Jehovha wakatipa soterero yakavanga, inotibesa kuti ticungirire. (VaR. 15:13) Rangariranyi kuti soterero yakabeseresa kudini Jesu, kuti acungirire pa mazuva ainesa okupejisira oupenyu wake pa nyika. (Verenganyi VaHebheru 12:2.) Jesu waizviziva kuti kugondeka kake kaizobesa kuti zina ra Jehovha riceneswe, iyena waizowonesa pambhene kuti zvakabhuiwa ndi Sathana, ngo pamusoro pa Jehovha zvainga zvokunyepa, uye kuti Jehovha waidikana kuashira rukujo. Jesu waiemera kuti ahwirire kuna baba vake, uye waiemerazve nguva yaaizotonga inga mambo novo 144.000 mu Umambo wo kudenga. Mukutojanawo, soterero yedu yo kurarama no kusingaperi mu nyika ipsa ya Mwari, ingatibesa kuti ticungirire zvineso zvese zvatingasana nazvo mu nyika ino ya Sathana.

16. Soterero yakabesesa kudini hanzvaji imweni kuti icungirire, uye ngazvipi zvamajija ngo masoko oyakabhuya?

¹⁶ Wonanyi kuti soterero yo Umambo wa Mwari, yakabeseresa kudini hanzvaji imweni inozwi Ara inogara ku Rusiya, “mwamuna wavo wakasungwa okandwa mujere esiemera zuva ro kutongwa. Izvi pozvakaitika hanzvaji Ara vakati: Kuita mukumbiro ngo pamusoro po soterero yo kumberi uye kurangarijisisa ngo pamusoro payo zvakandiita kuti ndisagara ndesineseka.” Ndakazwisisa kuti zviri kuitikari asipi mugumo. Jehovha unozowina uye isusuwo tinonga tesiwinawo.

17. Tingakhombijisa kudini kuti tinobonga soterero yedu yakacijikira mu Bhaibheri? (Wonanyi foto.)

¹⁷ Zvicinyi zvamungaita. Psakanyi nguva kuti murangarijisise ngo pamusoro po ramangwana rakanaka ramakagondeswa ndi Jehovha. Jiwonenyi muri munyika ipsa ya Mwari uye rangarijisisanyi makomborero amuzowanemo. Uye muejo jese jatiri kusangana najo, mazuva ano, ‘ngo jo nguva doko uye jakareruka.’ (2 VaK. 4:17) Kunja ka izvi, itanyi zvese zvamunokona kuti mubhuye no vamweni ngo pamusoro po kutenda kenyu. Rangariranyi kuti zvingava zvesinesesa kudini ku vandhu vasikanamati Jehovha, kuhwisana no zvineso zvo nyika ya Sathana vasingazivi cinangwa ca Mwari co muno ramangwana. Kunyange kubhuya magama manganani, mungamusa cidaka-daka cavo cokuti vade kuziva ngo pamusoro po Umambo wa Jehovha uye no zvaakagondesa.

18. Ngenyi tesidikana kuthemba zvigondiso zva Jehovha?

¹⁸ Pasure po kucungirira muejo jakawanda, Jobe wakati kuna Jehovha: ‘Zvino ndaakunasa kuziva kuti imwimwi munokwanisa kuita zviro zvese, kamuri apana camunorangarira kuita cotama kuitika.’ (Job. 42:2) Jobe wakajija kuti apana ciro cingaphingaija Jehovha kukwanirisa zvaakagondesa. Kuziva izvi, zvinotipa simba rokuti ticungirire. Inga muezaniso, amborangariranyi mwanakaji umweni ari kuwaja wakanyangajwa ngokuti mamedhiko aaripi kukwanisa kurapa ndhendha yake. Asi kudai medhiko ano uzivi unothembeka uye unoziva marapirwe ondhendheyo, omuvhunja kuti unozoirapisa kudini, iyena unozwa kutothojwa uye kunyange zvesitora nguva kuti azorapwa. Iyena ungakwanisa kucungirira pa ndhendha yake, esiziva kuti uno soterero inodakajisa yokuti zvinozoita nane. Mukutojanawo, kuthemba kedu soterero yo paradhiso iri kuviya inozotibesa kuti ticungirire.

19. Zvicinyi zvingatibesa kuti ticungirire?

¹⁹ Inga zvatawona, Jehovha unotibesa kuhwisana no zvineso esishandisa mukumbiro, Soko rake, hama jatinonamata najo uye soterero yedu. Tikanasa kushandisa zviro izvi zvatinopuwa ndi Jehovha, iyena unozotibesa kuti ticungirire zvineso zvatiri kusangana nazvo nyamasi uno. Tinozokwanisa kuramba tesicungirira mbhera nguva yo kuti nyika ino ya Sathana, no matambujiko ese atiri kusangana nawo aazowanikizve.—VaF. 4:13.