Thembanyi Kuti Jehovha Unomuda

1. Ngenyi makajipira kuna Jehovha? (Wonanyi foto.)

MUSIRI kurangarira pamakaita mukumbiro mesida kupira upenyu wenyu kuna Jehovha here? Imwimwi makaita cikhetwa ici ngokuti makaguma pa kumuziva uye kumuda. Imwimwi makamugondesa kuti maizokanda pakutanga kuda kake mu upenyu wenyu, uye kuti maizoenderera mberi mesimuda ngo mwoyo wese, upenyu wenyu wese, murangariro wenyu wese uye no simba renyu rese. (Mako 12:30) Kuvhira pa nguva yonayo, rudo renyu kaari rakaengejeka maningi. Ngo kudaro, maizodavirisa kudini kudai mundhu akamuvhunjisa kuti: “Muno cokwadi cokuti munoda Jehovha here?” Musingakai-kai, imwimwi maizomudavira kuti: “Inini ndinomuda kupinda mundhu ari wese kana kuti ciro cipi haco!”

2-3. Jehovha unoda kuti tive no cokwadi cenyi, uye tinozojijenyi mu cijijo cino? (Jeremiya 31:3)

² Asi maizodavirisa kudini, kudai mundhu akamuvhunjisa kuti: “Muno cokwadi co kuti Jehovha unomuda kamare?” Maizotya kudavira, morangarira kuti amufanei rudo ra Jehovha here? Hanzvaji imweni yakarerwa ngo njira inonesa iyona yakati: “Ndinozviziva kuti ndinoda maningi Jehovha. Andikai-kai ngo pamusoro pazvo. Asi kakawanda kakona ndinombokana-kana kuti Jehovha unondida here?” Asi Jehovha unorangarirenyi ngo pamusoro penyu?

³ Jehovha unoda kuti muve no cokwadi co kuti unomuda. (Verenganyi Jeremiya 31:3.) Asi cokwadi ngo cokuti, Jehovha wakamukwevera kaari. Pomakazvipira kaari uye mobhabhatijwa makaashira ciro cinokosha, rudo rake. Izvi zvinobhuya kuti iyena unomuda maningi, uye aazomusiyi. Zvesiwoneka kuti Jehovha uno rudo risangacinji ku vanamati vake vakagondeka, iyena unovaona kuti “vanokosha”. Izvi zvinokhombija kuti na imwimwiwo munokosha maningi kaari. (Mara. 3:17) Jehovha unoda kuti muve no cokwadi cokuti iyena unomuda, inga zvakaizwa ndi mu postori Pauro. Pauro wainga no cokwadi cokuti Jehovha waimuda zvokuti wakatonyora kuti: “Ngokuti ndino cokwadi kuti, kana rufu, kana upenyu, ngirosi, kana utongi, kana zviro zvazvino, kana zviro zvamangwana, kana masimba nee thuru, kana kujika, kana cisikwa ciri cese haco; azvikwanisi kuparajanisa rudo wakakhombijwa ndi Mwari esishandisa Jesu Kristu Mambo wedu.” (VaR. 8:38, 39) Mu cijijo cino, tinozowona kuti ngenyi tesidikana kuvangisa kuthemba kedu kuti ngenyi Jehovha unotida uye kuti zvicinyi zvingatibesa kuita izvi.

NGENYI TINODIKANA KUTHEMBA KUTI JEHOVHA UNOTIDA

4. Sathana unoda kuti titende manyepo api, uye tingaitenyi kuti timarambe?

⁴ Ngo kuthemba rudo ra Jehovha, “tingarwisana no murau ja Sathana.” (VaE. 6:11) Sathana unoita zviri zvese zvaanokona, kuti tisiye kushandira Jehovha. Murau unonyanya kushandiswa ndi Sathana, ngo wo kundhandhanisa munyepo okuti Jehovha aatidi. Musakanganwa kuti Sathana, mundhu unoshandisa mukana jese jaanowana kuti atipause. Iyena maningi-ningi unotihwisa patinonga takaremba ngo zviro zvakatiitikira kare, no zvineso zvatiri kusangana nazvo, kana kuti kutama kuva no cokwadi ngo pamusoro po ramangwana. (Zvi. 24:10) Sathana wakadai inga mbhondoro, inopsaka mukana uri wese kuti ibate cinyama cisina jiviriro. Ngo kudaro, iyena unoeja kuvhisa kungwaririka kedu mu murangariro kuitira kuti tirembe. Asi, kudai tikaramba tesivangisa kuthemba kedu kuti Jehovha unotida, tinozova takanasiririka kuti tirwisane na Sathana, no zvimazano zvake zvokucengejera.—1 Ped. 5:8, 9; Jak. 4:7.

5. Ngenyi zvakanaka kuti tizvizwe kuti Jehovha unotida uye unotikoshesa maningi?

⁵ Kudai tikava no cokwadi cokuti Jehovha unotida, ushamwari wedu naye unozovanga maningi. Ngatimbowona kuti ngenyi tesibhuya kudaro. Jehovha wakasika vandhu kuti vakhombijire rudo kuno vamweni, uye kuti ivona vakhombijirwewo kuti vanodiwa. Mundhu paanotikhombijira rudo, izvi zvinotindundira kuti timudewo. Ngo kudaro, patinozwa kuti Jehovha unotida no kutikoshesa, kumuda katinoita kunoengejereka. (1 Joh. 4:19) Rudo redu parinoengejereka kaari, rudo rakewo rinoengejereka katiri. Bhaibheri rinobhuya zvakajeka kuti: “Khwederanyi kuna Mwari, uye iyena anozokhwederawo kamuri.” (Jak. 4:8) Asi, tingavangisa kudini kuthemba kedu kuti Jehovha unotida?

ZVICINYI ZVINGATIBESA KUTI TITHEMBE KUTI JEHOVHA UNOTIDA?

6. Kuti titendere rudo ra Jehovha, tinodikana kuita mukumbiro ngo pamusoro penyi?

⁶ Rambanyi mesiita mukumbiro kuna Jehovha kuti amubese kuzwisisa kuti ngenyi iyena unomuda. (Ruka 18:1; VaR. 12:12) Kumbiranyi Jehovha kakawanda kudai zvesiita, kuti amubese kuwona inga mawonero aanoita iyena. Icokwadi kuti mwoyo unojipa ndava, unotiita kuti tisathemba kuti Jehovha unotida. Asi rangariranyi kuti Jehovha mukuru kudarika mwoyo wenyu. (1 Joh. 3:19, 20) Iyena unomuziva kudarika imwimwi kamare, cimwenizve iyena unowona zvamusingakwanisi kuwona. (1 Sam. 16:7; 2 Mk. 6:30) Ngo kudaro, ‘muvhunjenyi’ mazwiro enyu ese, mesimukumbira kuti amubese kuti muthembe kuti iyena unomuda. (Ps. 62:8) Mapeja, itanyi mukuzwirana no mukumbiro jenyu mesishandisa mazano anotevera.

7-8. Bhuku ra Pisarema rinotibesesa kudini kuti tithembe kuti Jehovha unotida?

⁷ Thembanyi soko ra Jehovha. Iyena wakafemera vanarume vakanyora Bhaibheri. Ngo kudaro, zvavakabhuya ngo pamusoro pake ngo zvo cokwadi. Wonanyi zvakanyorwa ngo munyori wo pisarema Davhidhi ngo pamusoro pa Jehovha. Iyena wakati: ‘Jehovha uri phedo no vaya vano mwoyo inowajiwa; Iyena unoponesa vakasuruvara.’ (Ps. 34:18) Kudai imwimwi makasuwa, mungajizwa inga muri mega. Asi Jehovha unotithembesa kuti pamugariro yakadai inga iyi, iyena uri phedo nemwi ngo kuti iyena unowona kuti munoda kubeswa. Pa pisarema imweni, Dhavhidhi wakanyora kuti: ‘Ndapota, kandanyi musoji jangu mu botiri renyu.’ (Ps. 56:8) Jehovha unomuwona pamunonga mesitambujika. Iyena unoneseka maningi ndimwi uye iyena unozwa kuwajiwa kenyu mu mwoyo. Inga dondwe ro kumwa riri mubotiri, rinokosha maningi kumundhu anonga esihamba muzvipare, ngo kudaro musoji yenyu inokosha maningi kuna Jehovha iyena unorangarira nguva jese jamunowajiwa uye pamunocema. Pana Pisarema 139:3, inoti: ‘Munonasa kuziva makwanja angu ese.’ Jehovha unowona makwanja enyu ese, asi unosotesesa zvakanaka zvamunoita. (VaH. 6:10) Ngenyi? Ngokuti iyena unokoshesa kuvangisira kamunoita kuti mumudakaje.a

⁸ Jehovha unoshandisa mavhesi anovangisa ari mu Bhaibheri, kuti ativhunje zviro zvinokosha maningi esiti: “Ndinoda kuti muzive kuti inini ndimuda maningi uye ndinoneseka ndimwi.” Asi, inga zvatajija, kuti Sathana unobhuya manyepo okuti Jehovha aatidi. Ngo kudaro, kudai muri kukaya-kaya ngo pamusoro po rudo ra Jehovha komuri, mungajivhunjisa kudai: Ndinozothemba ani, baba wo manyepo kana kuti “Mwari wo cokwadi”?—Johani 8:44; Ps. 31:5.

9. Jehovha unogondesenyi ku vaya vaanoda? (Ekisodho 20:5, 6)

⁹ Wonanyi kuti Jehovha unokhombijisa kudini rudo kuna vaya vanomuda. Wonanyi zvakabhuya Jehovha kuna Mosi uye no ku vaIziraeri. (Verenganyi Ekisodho 20:5, 6.) Jehovha wakatigondesa kuti unozoramba esikhombija rudo risingacinji kuna vaya vanomuda. Zvesiwoneka kuti Jehovha wakagondeka, tingava no cokwadi cokuti Jehovha aazosiyi kukhombija rudo kuna vaya vanomuda. (Nee. 1:5) Ngo kudaro, nguva jimweni, mesida kuva no cokwadi cokuti Jehovha unomuda, emanyi mojivhunjise kuti: Inini ndinoda Jehovha?’ Ngo kudaro rangariranyi izvi basi: Kudai imwimwi mesimuda, mesiita zvese zvamunokona kuti mumudakaje, imwimwi munova no cokwadi cokuti iyena unomuda maningi. (Dha. 9:4; 1 VaK. 8:3) Izvi zvinoda kubhuya kuti, kudai Imwimwi muno cokwadi cokuti munoda Jehovha, amudikani kuneseka kuti iyena unomuda kana kuti haiwa. Imwimwi mungava no cokwadi cokuti iyena unozoramba esimuda uye kuti azombomusii.

10-11. Jehovha unoda kuti muwonese kudini muripo? (VaGaratiya 2:20)

¹⁰ Rangariranyi kuti Jehovha wakapa mwana wake kuitira ani. Jehovha wakapa cipo cinokosha ku vandhu, paakatuma mwana wake Jesu Kristu kuti azotifira. (Johani 3:16) Asi kubhuya kuti cipo kamuri pacenyu here? Eya! Wonanyi kuti zvicinyi zvakaitika no mupostori Pauro. Rangariranyi kuti iyena wakaita zvishaishi zvakakura maningi asati ava muKristu, uye waidikana kuramba esirwisana no kutama kukwana kake. (VaR. 7:24, 25; 1 Tim. 1:12-14) Ngo kudaro, iyena wakava no cokwadi cokuti Jehovha wakamupa mwana wake inga muripo kaari. (Verenganyi VaGaratiya 2:20.) Rangariranyi kuti Jehovha wakafemera Pauro kuti anyore masoko aya. Uye zvese zviri mu Bhaibheri zvirimo kuti zvitijijise. (VaR. 15:4) Masoko a Pauro anokhombija kuti, Jehovha unoda kuti imwimwi muwone muripo inga cipo camakapuwa pacenyu. Izvi zvakagara inga cipo caakamupa co mundhu ega. Imwimwi pamunowona muripo ngo njira iyi, muzovangisa kuthemba kenyu kuti Jehovha unomuda maningi.

¹¹ Tinobonga maningi Jehovha, ngo kutuma mwanake Jesu panyika kuti atifire. Asi, cikonzero cimweni Jesu caakaviira pasi pano, ngo cokuvhunja vamweni cokwadi ngo pamusoro pa Mwari. (Johani 18:37) Cokwadi ici cinobatanija mazwire a Jehovha ngo pamusoro po vana vake.

JESU UNGATIBESESA KUDINI KUTI TITHEMBE KUTI JEHOVHA UNOTIDA?

12. Ngenyi tingathemba zvakabhuiwa ndi Jesu ngo pamusoro pa Jehovha?

¹² Jesu paainga ari pasi pano, iyena waidakarira kuvhunja vandhu ngo pamusoro po undhu una Jehovha. (Ruka 10:22) Tino zvikonzero zvinotiita kuti tithembe zvakabhuiwa ndi Jesu ngo pamusoro pa Jehovha. Ngenyi, ngokuti Jesu wakamborarama na Jehovha kudenga konguva yakareba asati aviya pasi pano. (VaK. 1:15) Jesu unoziva kuti, Baba vake vanomuda. Iyena wakawona makhombijire aaita Baba vake rudo ku ngirosi jakagondeka, no kuvana vake vese vo panyika. Jesu unobesesa kudini vandhu kuti vathembe kuti Mwari unovada?

13. Jesu unoda kuti tizwisisenyi ngo pamusoro pa Jehovha?

¹³ Jesu unoda kuti tizive kuti Jehovha unozwa kudini ngo pamusoro pedu. Mumavhangeri, Jesu wakabhuya ngo pamusoro pa Jehovha inga “Baba” kunopindirija 160. Paaibhuya no vajiji vake, iyena waishandisa magama okuti “baba venyu” kana kuti “baba venyu vokudenga.” (Mateu 5:16; 6:26) Masoko okujija ari pana Mateu 5:16 mu ciputukezi anoti: “Jesu asati aviya pasi pano, vashandiri va Jehovha vakagondeka vaidanija Jehovha inga wo ‘Masimba ese’, ‘Mukuru-kuru’, ‘Musiki Mukuru’ no madanijire amweniwo, asi kakawanda Jesu waidaija Jehovha inga Baba. Madanijire aya, akakhombija kuti Jehovha unoda kuti vanamati vake vazwe vesidiwa, inga mazwire anoita mwana mudoko paanonga ari phedo no vabereki vake”. Ngatiwone muezaniso muviri jakashandiswa ndi Jesu pa gama rokuti “Baba” esibhuira Jehovha.

14. Jesu wakakhombijisa kudini kuti umwe nga umwe wedu unokosha maningi kuna Baba vedu vokudenga, Jehovha? (Mateu 10:29-31) (Wonanyi foto.)

¹⁴ Wo kutanga, ngatimbobhuisana ngo masoko a Jesu ari pana Mateu 10:29-31. (Verenganyi.) Zvishiri zvidoko azvikhombijiri rudo uye azvizombonamati Jehovha. Ngo kudaro, Baba vedu vanokoshesa maningi zvishiri izvi, zvokuti vanoziva cishiri cimwe pacinowa uye no kacinowanira zvakuha. Kudai Jehovha esikoshesa shiri zvakadai, tingava no cokwadi cokuti iyena unokoshesa maningi umwe nga umwe wedu, ngo kuti unoda vanamati vake! Jesu wakabhuyazve kuti baba vedu vokudenga vanoziva mutengo wo vhuji redu rese ratinaro mumusoro. Zvesiwoneka kuti Jehovha unoziva zviro zvidoko zvatinazvo, tingava no cokwadi cokuti Jehovha unoneseka maningi tisu. Jesu unoda kuti, umwe nga umwe wedu azive kuti tinokosha maningi mu meso ma Baba vedu, Jehovha.

15. Masoko a Jesu ari pana Johani 6:44 anobhuyenyi ngo pamusoro pa Baba vedu vo kudenga?

¹⁵ Ngatiwone muezaniso wo cipiri wakashandiswa ndi Jesu pa gama rokuti “Baba.” (Verenganyi Johani 6:44.) Baba venyu vokudenga, vakamubesa kuti muvazive uye muvade. Ngenyi iyena wakaita izvi? Ngokuti iyena wakawona kuti imwimwi muno mwoyo wakanaka uye no cido co kumushandira. (Mabasa 13:48) Masoko okujija ari pana Johani 6:44 mu ciputukezi, Jesu paakabhuya masoko aya, dangani wainga esibhuya masoko a Jehovha ari pana Jeremiya 31:3, Jehovha paakavhunja vandhu vake kuti: ‘Ndakamukwevera kandiri ngo rudo usingacinji.’ (Jer. 31:3; ezanisanyi na Ozeya 11:4.) Rangariranyi kuti izvi zvinoda kubhuyenyi. Baba vedu vo kudenga, vanoramba vesiwona zviro zvakanaka zvamunoita zvokuti imwimwi amukwanisi kuzviwona.

16. (a) Jesu uri kutivhunjenyi uye ngenyi teidikana kumuthemba? (b) Mungaitisa kudini kuti muvangise gonda renyu kuti Jehovha ndi Baba vamunoda? (Wonanyi bhokiso rinoti “Baba Vazvese Zvatinoda.”)

¹⁶ Esibhuya ngo pamusoro pa Jehovha inga Baba vedu, iyena waida kubhuya kuti: “Jehovha asipi Baba vangu basi asi ndi Baba venyuwo. Uye ndinomuthembesa kuti Jehovha unomuda uye unonesekawo maningi ndimwi.” Kudai mukatama kuva no cokwadi cokuti Jehovha unomuda, rangariranyi ngo pamusoro po masoko akabhuya Jesu uye mathembenyi. Ngo kudaro, kudai nguva jimweni mukatama kuva no cokwadi cokuti Jehovha unomuda, mungajivhunjisa kuti: ‘Andidikani kuthemba magama a Jesu uwo unonasa kuziva Baba vedu uye no kubhuya cokwadi here.’—1 Ped. 2:22.

ITANYI ZVESE ZVAMUNOKONA KUTI MUVE NO COKWADI COKUTI JEHOVHA UNOMUDA

17. Ngenyi tinodikana kuenderera mberi tesivangisa gonda redu kuti Jehovha unotida?

¹⁷ Tinodikana kuita zvese zvatinokona kuti tirambe tesivangisa kuthemba kedu kuti Jehovha unotida. Inga zvatajija kuti, muvengi wedu Sathana aaemi kuita zvese zvaanokona kuti tisiye kushandira Jehovha. Cinangwa cake ngo cokutirembesa pakunamata. Ngo kudaro, iyena anozoenderera mberi esitieja kuti tithembe kuti Jehovha aatidi. Atidikani kusiya kuti Sathana atinyise!—Job. 27:5.

18. Mungaitisa kudini kuti muvangise kuthemba kenyu rudo ra Jehovha?

¹⁸ Mucijijo cino, tajija zvatingaita kuti tithembe kuti Jehovha unotida. Imwimwi mungaita mukumbiro kuna Jehovha mesikumbira kuti, amubesere kuwona undhu wakanaka waari kuwona kamuri kana kuti muzwisise kuti ngenyi iyena unomuda. Rangarijisisanyi ngo pamusoro po mavhesi ari mu Bhaibheri, anobhuya ngo madire anoita Jehovha vaya vanomudavo. Rangariranyi kuti Jehovha unozoramba esida vaya vanomuda. Musakanganwa kuti Jehovha wakamupa mwana wake inga cipo cinokosha kamuri. Thembanyi kuti Jehovha ndi Baba venyu inga zvakabhuiwa ndi Jesu. Ngo kudaro, kudai mundhu umweni akamuvhunjisa kuti: “Imwimwi munothemba kamare kuti Jehovha unomuda here?” imwimwi munozodavira kuti: “Eya, unondida kamare! Uye inini ndinoita zvese zvandinokona zuva ngo zuva kuti ndikhombijire rudo rangu kaari!”