Besanyi Ungano Yenyu

Mu nyika yese, ma miliyau no ma miliyau o vandhu varikunamata Jehovha mu ungano jakawanda. Vandhu ava vanokoshesa maningi ndhungamiriro jovanopuwa uye vanoda kubesawo vamweni. Munozvizwawo kudalo mu ungano yenyu here?

1. Mungaitenyi kuti mushandise nguva yenyu no simba kuti mubese ungano?

Tese tingabesa mu ungano. Inga muezaniso, mungabesa vasharuka uye vanoda kubeserwa kuenda kumusangano here? Kana kuti mungavabesa ngo zviro zvimweni zvakadai inga kootenga no kuvacenesera pamuzi pavo. (Verenganyi Jakobho 1:27.) Tingazvipirawo kuti tibese kucenesa no kuvaka Nyumba jo Kunamatira. Apana anovangirijwa kuita basa iri. Rudo la tinaro na Jehovha no hama jedu, ndilona rinoita kuti tizvipire ‘ngo mweyo wese’.—Mapisarema 110:3.

Zvapupu zva Jehovha zvakabhabhatijwa zvingabesa mu ungano ngo njira jakasiyana-siyana. Inga muezaniso, hama jingashanda ngo simba kuti jishande inga vabeseri vo ungano no vakuru vo ungano. Hama no hanzvaji jingabesawo mu basa lokuparijira uye kushanda inga ma piyona. Zvapupu zvimweni zvingabesa kovaka nyumba jokunamatira, vamweni vangathutha kuenda koogala kuno ungano jinoda besero.

2. Tingaitenyi kuti tishandise zvatinazvo kuti tibese ungano?

‘Tingakuja Mwari ngo zviro zvatinazvo.’ (Zvirevo 3:9) Katiri makomborero maningi kupa mupiro yedu kuitira kubesa basa lo nyika yese lo kuparijira. (Verenganyi 2 VaKorinde 9:7.) Mupiro yedu inoshandiswazve kuitira kubesa panonga paitika ngozi. Vakawanda vanogala vakaronga kuviga mare vhiki ngo vhiki kana kuti mweji ngo mweji kuti vazoita mupiro. (Verenganyi 1 VaKorinde 16:2.) Tingaita mupiro iyi tesishandisa mabhokisi ari munyumba yokunamatira, no mu saiti donate.jw.org. Mashandisire atinoita zviro zvedu anotipa mukana wo kuti tikhombije Jehovha kuti tinomuda maningi.

JIJANYI ZVIZINJI

3. Besanyi ungano ngo mupiro wenyu

Jehovha na Jesu vanoda vaya vanopa ngo mweyo wese. Inga muezaniso, Jesu wakawona noni imweni yesiita mupiro ngo mweyo wese. Verenganyi Ruka 21:1-4, mapeja bhuisananyi ngo muvhunjo jinotevera:

• Kubhuya kuti tinodikana kupira mare yakawanda kuti tidakaje Jehovha?

• Jehovha na Jesu vanozwa kudini ngo mupiro yedu yatinopa ngo mweyo wese?

Kuti muwone mashandisirwe anoizwa mupiro yedu, wonanyi VHIDHIYO. Mapeja bhuisananyi ngo muvhunjo unotevera:

VHIDHIYO: ‘Cipo Catinopa Jehovha’ (4:47)

• Mupiro yedu inoshandiswa kudini kuitira kubesa ungano jo nyika yese?

4. Tingazvipira kuti tibesere

Vanamati va Jehovha vokare vaida maningi kubesa pa kungwarira ndau yovainamatira. Asi kuti zviitike kaidiwa zviro zvimweni kusiripi mare basi. Verenganyi 2 Makoronike 34:9-11, mapeja bhuisananyi ngo muvhunjo unotevera:

• Vaiziraeri vaiitenyi kuti vabese kungwarira themberi?

Kuti tiwone kuti Zvapupu zva Jehovha zviri kutevejeresa kudini muezaniso uwu wo mu Bhaibheri, wonanyi VHIDHIYO. Mapeja bhuisananyi ngo muvhunjo jinotevera:

VHIDHIYO: Kungwarira Ndau Yatinonamatira (3:31)

• Ngenyi zvinokosha kuti nyumba yo kunamatira igare yakacena uye yakarongeka?

• Iyemwi mungaitenyi kuti mubesewo?

5. Hama jingaita zvakawanda mu ungano

Bhaibheri rinokurujira hama kuti jishande ngo simba kuti jibese ungano. Kuti muwone muezaniso wakona, wonanyi VHIDHIYO. Mapeja bhuisananyi ngo muvhunjo unotevera:

VHIDHIYO: Hama—Shandanyi ngo Simba Kuitira Jehovha (5:19)

• Mu vhidhiyo iyi, Riyani wakaitenyi kuti abese ungano?

Bhaibheri rinobhuya zvinodiwa kuti hama jitange kushanda inga vabeseri vo ungano no vakuru vo ungano. Verenganyi 1 Timoti 3:1-13, mapeja bhuisananyi ngo muvhunjo jinotevera:

• Ngazvipi zvinodiwa kuti hama jishande inga vabeseri vo ungano no vakuru vo ungano?

• Mbhuri javo jinodikana kuvawo no mugariro yipi?—Wonanyi mavhesi 4 na 11.

• Kudai hama jese jingashanda ngo simba kuti jive no mugariro jakadai, vandhu vese mu ungano vangabeserekawo kudini?

TAJIJENYI

Tajija kuti Jehovha unokoshesa maningi kushanda katinoita ngo simba. Uye patinopeja nguva no simba kuti tiite zviro zvinotibese ungano.

Muvhunjo Jokuhwirijira

• Tingashandisisa kudini nguva yedu no simba kuti tibese ungano?

• Tingashandisisa kudini zviro zvatinazvo kuti tibese ungano?

• Iyemwi maidakarira kuitenyi kuti mubese ungano?

JIJANYI ZVIMWENI

Wonanyi kuti ngenyi Jehovha asingasatenderizve cogumi.

‘Bhaibheri Rinoti Kudini ngo zvo Cogumi?’ (Mu saiti jw.org)

Bhaibheri rinopa mabasa ku vanarume vakabhabhatijwa. Vanakaji vakabhabhatijwa vangaitawo mabasa aya here?

“Kuzwisisa Shwiro yo Musoro wo Ungano” (Nharireyomurindi ya Fevereiro yo 2021)

Zivanyi Zvapupu zva Jehovha zvakashinga kukanda upenyu wazvo pa ngozi kuti zvitore mabhuku koopa hama jazvo.

Kukovaniswa ko Mabhuku ku Khongo (4:25)

Jijanyi musiyano uri pakati pedu no maceci amweni pakushandiswa kunoizwa mare yokutsigira basa redu.

‘Zvapupu zva Jehovha Zvinowana Kupi Mare Yokutsigira Basa Lazvo?’ (Mu saiti jw.org)