दोस्रो इतिहास
११ यरुसलेम पुग्नेबित्तिकै रहबामले यहुदा र बिन्यामिनको घरानाबाट+ १ लाख ८० हजार तालिमप्राप्त योद्धा जम्मा गरे किनकि तिनी इस्राएलसित युद्ध गरेर आफ्नो राज्य फिर्ता लिन चाहन्थे।+ २ तब साँचो परमेश्वर यहोवाका सेवक सेमायाहकहाँ+ उहाँको यो वचन आयो: ३ “सुलेमानका छोरा यहुदाका राजा रहबामलाई अनि यहुदा र बिन्यामिनको कुलका सबै इस्राएलीलाई यसो भन्नू: ४ ‘यहोवा यसो भन्नुहुन्छ: “तिमीहरू आफ्ना भाइबन्धुसित युद्ध गर्न माथि उक्लेर नजानू। तिमीहरू आ-आफ्नो घर फर्कनू किनकि मेरै इच्छाअनुसार यी सब भएको हो।”’”+ त्यसैले तिनीहरूले यहोवा परमेश्वरको वचन पालन गरे र आ-आफ्नो घर फर्के। तिनीहरू यरोबामसित युद्ध गर्न गएनन्।
५ रहबाम यरुसलेममा बसे अनि तिनले यहुदामा पर्खालले घेरिएका सहरहरू बनाए। ६ तिनले यी सहरहरू बनाए*—बेतलेहेम,+ एताम, तेको,+ ७ बेथ-जुर, सोको,+ अदुल्लाम,+ ८ गाथ,+ मारेसाह, जिफ,+ ९ अदोरेम, लाकिस,+ अजेकाह,+ १० जोराह, ऐय्यालोन+ र हेब्रोन।+ पर्खालले घेरिएका ती सहरहरू यहुदा र बिन्यामिनको इलाकामा पर्थे। ११ तिनले पर्खालले घेरिएका ती सहरहरूलाई अझ मजबुत बनाए र ती सहरहरूमा सेनापतिहरू खटाए। अनि तिनीहरूको लागि खानेकुरा, तेल र मद्यको व्यवस्था गरिदिए। १२ तिनले प्रत्येक सहरमा ठूलठूला ढाल र भालाहरू राखे अनि ती सहरहरूलाई निकै मजबुत बनाए। तिनले यहुदा र बिन्यामिनको कुलमाथि शासन गरिरहे।
१३ इस्राएलको पूरै इलाकामा भएका पुजारी र लेवीहरू रहबामलाई साथ दिन आ-आफ्नो इलाका छोडेर तिनीकहाँ आए। १४ यरोबाम र उनका छोराहरूले लेवीहरूलाई यहोवा परमेश्वरको पुजारीको रूपमा सेवा गर्न दिएनन्।+ त्यसैले लेवीहरू आफ्ना चरनहरू र आफ्नो अधिकारमा भएका कुराहरू छोडेर+ यहुदा र यरुसलेम आए। १५ त्यसपछि यरोबामले अग्ला थानहरू,* बोकाजस्तै देखिने पिशाचहरू*+ र आफूले बनाएका बाछाका मूर्तिहरूका+ निम्ति आफैले पुजारीहरू नियुक्त गरे।+ १६ इस्राएलका सबै कुलका मानिसहरूमध्ये ज-जसले आफ्नो हृदयमा इस्राएलका परमेश्वर यहोवाको खोजी गर्ने अठोट गरेका थिए, तिनीहरू पनि आफ्ना पितापुर्खाका परमेश्वर यहोवाको निम्ति बलि चढाउन पुजारी र लेवीहरूको पछिपछि यरुसलेम गए।+ १७ तिनीहरूले तीन वर्षसम्म यहुदाको राज्यलाई सुदृढ पारिरहे र सुलेमानका छोरा रहबामलाई साथ दिइरहे। तिनीहरू तीन वर्षसम्म दाउद र सुलेमानको मार्गमा हिँडे।
१८ रहबामले दाउदकी नातिनी, यरिमोथकी छोरी महलाथसित विवाह गरे। महलाथकी आमा अबिहेल थिइन्, जो एलिआबकी+ छोरी र यिसैकी नातिनी थिइन्। १९ केही समयपछि महलाथले रहबामबाट यी छोराहरू जन्माइन्: यउस, सेमर्याह र जहम। २० पछि रहबामले अब्सालोमकी+ नातिनी माकाहसित विवाह गरे। माकाहले रहबामबाट अबियाह,+ अबि, अत्तै, जिजा र सेलोमिथलाई जन्माइन्। २१ रहबामका १८ जना पत्नी र ६० जना उपपत्नी थिए अनि २८ जना छोरा र ६० जना छोरी थिए। तर तिनी आफ्ना सबै पत्नी र उपपत्नीमध्ये+ अब्सालोमकी नातिनी माकाहलाई सबैभन्दा धेरै माया गर्थे। २२ त्यसैले रहबामले माकाहका छोरा अबियाहलाई उनका दाजुभाइका प्रमुख र अगुवा बनाए। किनकि रहबाम उनलाई राजा बनाउन चाहन्थे। २३ रहबामले बुद्धिमानी कदम चाले। तिनले आफ्ना केही छोरालाई यहुदा र बिन्यामिनको पूरै इलाकामा भएका पर्खालले घेरिएका सबै सहरमा पठाए।*+ अनि उनीहरूको निम्ति खानपिनको राम्रो बन्दोबस्त मिलाइदिए र थुप्रै केटीसित उनीहरूको विवाह पनि गराइदिए।