परमेश्वरका सेवकहरू—सङ्गठित तथा आनन्दित मानिसहरू
“ती मानिसहरू सुखी हुन्छन्, जसका परमेश्वर परमप्रभुनै हुनुहुन्छ।”—भजनसंग्रह १४४:१५.
यहोवा सार्वभौम सत्ताधारी, सर्वशक्तिमान परमेश्वर र सृष्टिकर्त्ता हुनुहुन्छ। (उत्पत्ति १:१; भजनसंग्रह १००:३) त्यसैकारण आफ्ना सेवकहरूको आचरणको स्तर तोक्ने अधिकार उहाँसित छ किनकि तिनीहरूका लागि के असल छ, त्यो उहाँलाई थाहा छ। (भजनसंग्रह १४३:८) साथै उहाँ तिनीहरूको सबैभन्दा ठूलो नमूना पनि हुनुहुन्छ। तिनीहरूले उहाँका गुणहरूको अनुसरण गर्नु आवश्यक छ। “परमेश्वरका देखा-सिकी गर्नेहरू होओ,” एक जना प्रेरितले यसप्रकार लेखे।—एफिसी ५:१.
२ हामीले अनुकरण गर्नुपर्ने परमेश्वरको एउटा गुण सङ्गठनसित सम्बन्धित छ। उहाँ ‘गोलमालको परमेश्वर हुनुहुन्न।’ (१ कोरिन्थी १४:३३) परमेश्वरले सृष्टि गर्नुभएका कुराहरूलाई नियाँलेर हेर्ने हो भने उहाँ ब्रह्माण्डको सबैभन्दा सङ्गठित व्यक्ति हुनुहुन्छ भनी निष्कर्षमा आउन हामी बाध्य हुन्छौं। तथापि, आफ्ना सेवकहरूले अनुकरण गरून् भनी परमेश्वरले चाहनुहुने अर्को गुण आनन्द हो, किनभने उहाँ “आनन्दित परमेश्वर” हुनुहुन्छ। (१ तिमोथी १:११, न्युव) यसप्रकार उहाँको सङ्गठनात्मक क्षमता र आनन्द आपसमा सन्तुलित छ। एकलाई नोक्सान पुऱ्याएर अर्को ठूलो हुने किसिमले यी गुणहरू बनिएका छैनन्।
३ यहोवाले बनाउनु भएका विशालदेखि सूक्ष्म सबै चीजहरूले उहाँ सङ्गठनको परमेश्वर हुनुहुन्छ भन्ने प्रमाण दिन्छ। उदाहरणको लागि, दृश्य ब्रह्माण्डलाई विचार गर्नुहोस्। करोडौं ताराहरूले त्यो भरिएको छ। तर ताराहरू जथाभावी छरिएका छैनन्। खगोल भौतिकशास्त्री जर्ज ग्रिनस्टेनको अवलोकनअनुसार “ताराहरूको सङ्गठनमा एक किसिमको ढाँचा पाइन्छ।” तिनीहरू समूहमा सङ्गठित भएका हुन्छन् जसलाई तारापुञ्ज भनिन्छ र कुनै कुनै तारापुञ्जमा अरबौं ताराहरू हुन्छन्। र तारापुञ्जहरू करोडौंको सङ्ख्यामा भएको अनुमान गरिएको छ। तारापुञ्जहरू पनि सङ्गठित हुन्छन्। धेरैजसो (कम सङ्ख्यादेखि लिएर केही हजारसम्म) तारापुञ्जहरू झुण्ड बनाएर बसेका हुन्छन्। र तारापुञ्जको झुण्डहरू विशाल झुण्ड बनाएर बसेका हुन्छन् भनी अनुमान गरिएको छ।—भजनसंग्रह १९:१; यशैया ४०:२५, २६.
४ दृश्य आकाशमा मात्र नभइ पृथ्वीका हजारौं जीवित वस्तुहरूमा पनि परमेश्वरको सृष्टिको उत्कृष्ट सङ्गठन देख्न सकिन्छ। यी सब कुराहरूको सम्बन्धमा भौतिक विज्ञानका प्राध्यापक पल डेभिजले लेखे, “भौतिक संसारको भव्यता र जटिल सङ्गठन” देखेर अवलोकनकर्त्ताहरू “चकित” भएका छन्।—भजनसंग्रह १०४:२४.
५ जीवित वस्तुहरूमा पाइने “जटिल सङ्गठन” का केही उदाहरणहरूलाई विचार गर्नुहोस्। स्नायु शल्य चिकित्सक जोसेफ इभान्सले मानव मष्तिस्क र सुषुम्नाबारे यसो भने: “त्यहाँ देखिने उच्च कोटिको सुव्यवस्था साह्रै विस्मयकारी छ।” अति सूक्ष्म जीवित कोषबारे जीवाणुविद एच. जे. शोनेसीले यस्तो बयान दिए: “सूक्ष्म जीवाणु संसारको जटिलता र सुन्दर सुव्यवस्था यति अद्भुत तरिकामा रचिएका छन्, त्यो ईश्वररचित प्रणालीको भागजस्तै देखिन्छ।” अनि परमाणु जीवशास्त्री माइकल डेन्टनले कोषको आनुवंशिक कोडबारे (डिएनए) यसो भने: “डिएनए यति दक्ष छ, आजसम्म अस्तित्वमा आएजति सबै प्राणीहरूको रचना निर्धारण गर्न . . . चाहिने सम्पूर्ण जानकारी . . . सानो चम्चामा राख्न सकिन्छ र त्यतिले नपुगेर अहिलेसम्म लेखिएका सम्पूर्ण पुस्तकहरूको जानकारी त्यसमा अटाउन सकिन्छ।”—भजनसंग्रह १३९:१६ हेर्नुहोस्।
६ भौतिक सृष्टिलाई मात्र नभइ स्वर्गमा आफ्नो आत्मिक सृष्टिलाई पनि यहोवाले सङ्गठित गर्नुहुन्छ। स्वर्गदूतहरू ‘लाखौं लाखको सङ्ख्यामा यहोवाको सामु खडा भइरहन्छन्’ भनी दानियल ७:१० ले हामीलाई बताउँछ। भिन्दा-भिन्दै काममा खटाइएका लाखौं लाख शक्तिशाली आत्मिक प्राणीहरू उहाँसमक्ष खडा छन्! यति धेरैलाई सङ्गठित गर्न कति दक्षता चाहिंदो हो, कल्पना गर्न कठिन छ। त्यसैकारण पूर्ण औचित्यका साथ बाइबल यसो भन्छ: “हे परमप्रभुका दूत हो, हे शक्तिमान वीर हो, जसले उहाँको वचन शिरोपर गर्दछ, उहाँकै वचनको शब्द सुन्दै उहाँलाई धन्यको भन। हे परमप्रभुको सारा सेना हो, हे उहाँका सेवक हो, जो उहाँको इच्छाबमोजिम गर्दछौ, परमप्रभुलाई धन्यको भन।”—भजनसंग्रह १०३:२०, २१; प्रकाश ५:११.
७ हाम्रो सृष्टिकर्त्ताका कामहरू कति भव्यतासाथ सङ्गठित र दक्ष छन्! अतः स्वर्गमा भएका शक्तिशाली आत्मिक प्राणीहरूले विस्मित् अनि विनम्र ढङ्गमा यसो भन्नु कुनै आश्चर्यपूर्ण होइन: “हे हाम्रा प्रभु र परमेश्वर, तपाईं महिमा, आदर र शक्ति ग्रहण गर्ने योग्यको हुनुहुन्छ, किनभने सबै कुरा तपाईंलेनै सृष्टि गर्नुभएको हो, र तपाईंकै इच्छाबमोजिम ती भए, र सृजिए।”—प्रकाश ४:११.
८ पृथ्वीमा भएका आफ्ना सेवकहरूलाई पनि यहोवाले सङ्गठित गर्नुहुन्छ। सा.यु.पू. २३७० मा जलप्रलय ल्याउनुहुँदा नूह र अरू सात जना, पारिवारिक सङ्गठनको रूपमा बचे। सा.यु.पू. १५१३ को प्रस्थानमा यहोवाले आफ्ना लाखौं जनहरूलाई मिस्री दासत्वबाट छुटाउनुभयो र तिनीहरूको दैनिक क्रियाकलाप तथा उपासनालाई सङ्गठित पार्न उहाँले विस्तृत कानुन-व्यवस्था दिनुभयो। पछि प्रतिज्ञा गरिएको देशमा मन्दिरमा गरिने विशेष सेवाका लागि हजारौंलाई सङ्गठित गरियो। (१ इतिहास २३:४, ५) प्रथम शताब्दीमा मसीही मण्डलीहरू ईश्वरीय निर्देशनअनुरूप सङ्गठित थिए: “उहाँलेनै कुनैलाई प्रेरित, कुनैलाई अगमवक्ता, कुनैलाई प्रचारक र कुनैलाई मण्डलीको गोठालो र शिक्षक हुनालाई, सेवाको काममा र . . . पवित्र जनहरूको सिद्धता हुनाको निम्ति नियुक्त गर्नुभयो।”—एफिसी ४:११, १२.
आधुनिक समयका सेवकहरू पनि सङ्गठित छन्
९ त्यस्तैगरि हाम्रो दिनका लागि दिनुभएको काम अर्थात् वर्तमान अभक्त रीतिरिवाजलाई नष्ट गर्नुअघि यहोवाको राज्यको सुसमाचार सुनाउने काममा प्रभावकारी होऊन् भनेर उहाँले आधुनिक समयका आफ्ना सेवकहरूलाई सङ्गठित गर्नुभएको छ। (मत्ती २४:१४) यस विश्वव्यापी कार्यमा के कस्ता कुराहरू समावेश छन् र सुसङ्गठन कति आवश्यक छ, विचार गर्नुहोस्। अरूलाई बाइबलका सत्य सिकाउन लाखौं पुरुष, महिला तथा केटाकेटीहरूलाई प्रशिक्षण दिंइदैछ। यस प्रशिक्षणलाई सहयोग पुऱ्याउन बृहत् मात्रामा बाइबल र बाइबलआधारित प्रकाशनहरू छापिन्छन्। भनौं भने, प्रहरीधरहरा को प्रत्येक अङ्क ११८ भाषाहरूमा एक करोड ६० लाख प्रतिहरू छापिन्छन्। त्यस्तैगरि अवेक! ७३ भाषाहरूमा एक करोड ३० लाख प्रतिहरू छापिन्छन्। वास्तवमा यहोवाका सबै सेवकहरूले एकै समयमा एकै किसिमको जानकारी प्राप्त गरून् भन्ने हेतुले लगभग सबै अङ्कहरू एकसाथ छापिन्छन्।
१० यसको अलावा, बाइबल निर्देशनका लागि नियमित तवरले भेला हुन संसारभरि यहोवाका साक्षीहरूको ७३,००० भन्दा बढी मण्डलीहरू सङ्गठित गरिएका छन्। (हिब्रू १०:२४, २५) साथै सालिन्दा क्षेत्रीय सम्मेलन र जिल्ला सम्मेलनजस्ता ठूल-ठूला जमघटहरू पनि हुन्छन्। संसारभरि नयाँ तथा उन्नत राज्यभवन, सम्मेलन भवन, बेथेल घर र बाइबल साहित्य छापाखानाहरूको विशाल निर्माण-कार्य सञ्चालन हुँदैछ। बाइबल शिक्षकहरूको उच्च प्रशिक्षणका लागि वाचटावर बाइबल स्कूल अफ गिलियड फर मिसिनरिज् र पायनियर सर्भिस स्कूलजस्ता पाठशालाहरू विश्वको चारैकुनामा सञ्चालन भइरहेका छन्।
११ आफ्ना स्वर्गदूतहरूको सहयोगमा ‘सेवाको काम पूरा गर्न’ यहोवाले कति व्यवस्थित ढङ्गमा आफ्ना पार्थिव जनहरूलाई सङ्गठित गर्नुभएको छ! (२ तिमोथी ४:५; हिब्रू १:१३, १४; प्रकाश १४:६) सुसङ्गठित ढङ्गमा आफ्ना सेवकहरूलाई निर्देशन दिनुभएर परमेश्वरले अर्को कुरा पनि पूरा गर्नुहुँदैछ। त्यो हो, वर्तमान रीतिरिवाजको अन्तपश्चात् नयाँ संसारमा जीवन बिताउन सङ्गठित भइसक्न उहाँका सेवकहरूलाई तम्तयार पारिंदैछ। त्यसपछि यहोवाको निर्देशनअनुरूप सङ्गठित ढङ्गमा तिनीहरूले विश्वव्यापी प्रमोदवनको निर्माण-कार्य थाल्नेछन्। मृत्युबाट पुनरुत्थान हुने करोडौं मानिसहरूलाई जीवन प्राप्त गर्न परमेश्वरले दिनुभएको सविवरण आवश्यकताहरू सिकाउन पनि तिनीहरू राम्ररी तयार हुनेछन्।—यशैया ११:९; ५४:१३; प्रेरित २४:१५; प्रकाश २०:१२, १३.
सङ्गठित तर आनन्दित
१२ यहोवा असाधारण कामदार अनि उत्कृष्ट सङ्गठनकर्त्ता हुनु भए तापनि उहाँ भावशून्य, अरट्ठो वा यन्त्रवत् हुनुहुन्न। बरु उहाँ साह्रै स्नेही तथा हाम्रो खुशीको विचार राख्नुहुने आनन्दित व्यक्ति हुनुहुन्छ। ‘उहाँले हाम्रो फिक्री गर्नुहुन्छ’ भनेर १ पत्रुस ५:७ ले बताउँछ। उहाँले आफ्ना सेवकहरूको ख्याल राख्नुहुन्छ र तिनीहरू आनन्दित भएको चाहनुहुन्छ भन्ने तथ्य मानिसहरूका निम्ति उहाँले निर्माण गर्नुभएका कुराहरूबाट हामी देख्नसक्छौं। उदाहरणको लागि, सिद्ध पुरुष र स्त्रीको सृष्टि गर्नुहुँदा परमेश्वरले तिनीहरूलाई आनन्दले भरपूर प्रमोदवनमा राख्नुभएको थियो। (उत्पत्ति १:२६-३१; २:८, ९) तिनीहरू साह्रै सुखी होऊन् भनेर उहाँले चाहिनेजति सबै कुराहरू तिनीहरूलाई दिनुभयो। तर विद्रोह गरेर तिनीहरूले ती सबै गुमाए। तिनीहरूको पापको फलस्वरूप हामीले असिद्धता अनि मृत्यु पायौं।—रोमी ३:२३; ५:१२.
१३ अहिले असिद्ध भए तापनि परमेश्वरले बनाउनुभएका कुराहरूबाट हामी अझै आनन्द उठाउन सक्छौं। हामीलाई आनन्द दिने थुप्रै कुराहरू छन्—विशाल पर्वत; सुन्दर ताल, खोला, सागर अनि समुद्री तटहरू; विभिन्न प्रकारका रङ्गीबिरङ्गी सुवासित फूल तथा अन्य वनस्पति; प्रशस्त स्वादिला भोजनहरू; जति हेऱ्यो उति हेरौं हेरौं लाग्ने मनमोहक सूर्यास्त; राती आकाशमा उदाउने नौलाखे ताराहरू; विभिन्न जातका पशुहरू अनि तिनीहरूका चुलबुले बच्चाहरू; मनलाई प्रफुल्ल पार्ने सङ्गीत; चाखलाग्दो अनि लाभदायी काम; असल मित्रहरू। प्रष्ट छ, यस्ता कुराहरूको प्रबन्ध गर्नुहुने व्यक्ति त्यस्तो आनन्दित व्यक्ति हुनुहुन्छ जो अरूलाई आनन्दित बनाउन रमाउनुहुन्छ।
१४ तसर्थ, कार्यक्षमता बढाउन सङ्गठित होऊन् भनेर मात्र यहोवा चाहनुहुन्न। उहाँ आफूजस्तै आफ्ना सेवकहरू आनन्दित भएको चाहनुहुन्छ। आफ्नै आनन्दलाई नोक्सानी हुने गरी हठधर्मी भएर तिनीहरूले कामकुरा सङ्गठित गरून् भनी उहाँ चाहनुहुन्न। परमेश्वरका सेवकहरूले उहाँले जस्तै सङ्गठनात्मक निपुणतालाई आनन्दसित सन्तुलित गर्नुपर्छ, किनकि जहाँ उहाँको शक्तिशाली आत्मा हुन्छ त्यहाँ आनन्द हुन्छ। यो कुरा एकदम सत्य छ, किनकि परमेश्वरका जनहरूमाथि चल्ने उहाँको पवित्र आत्माको दोस्रो फल “आनन्द” हो भनी गलाती ५:२२ ले देखाउँछ।
प्रेमले आनन्द उत्पन्न गर्छ
१५ “परमेश्वर प्रेम हुनुहुन्छ” भनी बाइबलले उल्लेख गर्नु निकै चाखलाग्दो छ। (१ यूहन्ना ४:८, १६) “परमेश्वर सङ्गठित हुनुहुन्छ” भनेर बाइबलले कहिल्यै भन्दैन। प्रेम नै परमेश्वरको प्रमुख गुण हो र उहाँका सेवकहरूले त्यसको अनुकरण गर्नुपर्छ। त्यसैकारण त गलाती ५:२२ मा सूचीबद्ध परमेश्वरका आत्माका फलहरूमध्ये पहिलो फल “प्रेम” अनि त्यसपछि “आनन्द” आउँछ। प्रेमले आनन्द उत्पन्न गर्छ। अरूसँग व्यवहार गर्दा यहोवाको प्रेमको अनुकरण गऱ्यौं भने त्यस सँगसँगै आनन्द आउँछ, किनकि मायालु व्यक्तिहरू आनन्दित हुन्छन्।
१६ ईश्वरीय प्रेमको अनुकरण गर्नुपर्ने महत्त्वले येशूको शिक्षाहरूमा विशिष्ट स्थान पाएको छ। उहाँले यसो भन्नुभयो: “जसो पिताले मलाई सिकाउनुभयो तिनै कुरा बोल्दछु।” (यूहन्ना ८:२८) आफूलाई सिकाइएका कुराहरूमध्ये विशेषगरि कुन चाहिं कुरा येशूले अरूलाई सिकाउनुभयो? त्यो थियो, परमेश्वरलाई अनि छिमेकीलाई प्रेम गर्नु नै सबैभन्दा ठूला आज्ञाहरू हुन्। (मत्ती २२:३६-३९) येशू आफैले त्यस्तो प्रेमको उदाहरण बनेर देखाउनुभयो। उहाँले भन्नुभयो: “म पितालाई प्रेम गर्छु,” र मृत्युपर्यन्त परमेश्वरको इच्छा पूरा गर्नुभएर उहाँले त्यसको प्रमाण दिनुभयो। आफ्नो प्राण अर्पण गर्नुभएर उहाँले मानिसहरूप्रति आफ्नो प्रेम दर्शाउनुभयो। एफिससका मसीहीहरूलाई प्रेरित पावलले यसो भने: “ख्रीष्टले तिमीहरूलाई प्रेम गर्नुभएर तिमीहरूका निम्ति आफैलाई अर्पण गर्नुभयो।” (यूहन्ना १४:३१; एफिसी ५:२) त्यसैकारण येशूले आफ्ना अनुयायीहरूलाई यसो भन्नुभयो: “मेरो आज्ञा यही हो, कि तिमीहरू आपसमा प्रेम गर, जस्तो मैले तिमीहरूलाई प्रेम गरेको छु।”—यूहन्ना १५:१२, १३.
१७ त्यो ईश्वरीय प्रेम कति आवश्यक छ भनेर पावलले यसरी व्यक्त गरे: “यदि म मानिसहरू र स्वर्गदूतहरूका भाषामा बोलें, तरैपनि ममा प्रेम छैन भने, म हल्ला र फोस्रो आवाज गर्ने घण्टा, कि झ्याली मात्र हुन्छु। यदि मलाई अगमवाणी बोल्ने शक्तिको वरदान छ, र म सबै रहस्यहरू र सबै बुद्धि जान्दछु, औ डाँड़ाहरू हटाउनसम्मको विश्वास मसित छ, तर ममा प्रेमचाहिं छैन भने, म केही पनि होइनँ। यदि मैले आफ्ना सारा सम्पत्ति गरीबहरूलाई खुवाउनलाई दिएँ, र मेरो शरीरै जलाइ दिएँ, तर मसित प्रेम छैन भने, मलाई केही लाभ हुँदैन। . . . विश्वास, आशा, प्रेम, यी तीन रहन्छन्, र यिनमा सर्वोत्तम चाहिं प्रेम हो।”—१ कोरिन्थी १३:१-३, १३.
१८ यहोवाको प्रेमको अनुकरण गऱ्यौं भने उहाँले हामीलाई प्रेम गर्नुहुन्छ र गल्ती गरिहाल्यौं भने पनि प्रेम गर्न छाड्नुहुन्न भनेर हामी निर्धक्क हुनसक्छौं, किनकि उहाँ “टिठाउनमा भरिपूर्ण र दयालु परमेश्वर, रीस गर्नमा ढीलो, र कृपा र सत्यतामा प्रशस्त हुनुहुन्छ।” (प्रस्थान ३४:६) गल्ती गर्दा इमानदारीपूर्वक पश्चात्ताप गऱ्यौं भने परमेश्वरले त्यसको लेखा राख्नुहुन्न बरु प्रेमपूर्वक क्षमा गर्नुहुन्छ। (भजनसंग्रह १०३:१-३) हो, यहोवा “टिठाइमा भरिपूर र कृपालु हुनुहुन्छ।” (याकूब ५:११) यी कुराको ज्ञानले हाम्रो आनन्दमा थप योगदान दिन्छ।
अहिले सापेक्षिक आनन्द
१९ तथापि, आज रोग अनि मृत्युको डर र अपराध, हिंसा तथा अनैतिकताले ग्रस्त शैतानी संसारको आखिरी दिनमा बाँच्नु परेको बेला के आनन्दित हुन सम्भव छ र? निस्सन्देह, परमेश्वरको नयाँ संसारमा हुने जति आनन्दको प्रत्याशा अहिले हामी गर्न सक्दैनौं, जसबारे उहाँको वचनले यस्ता अगमवाणी गर्छ: “म नयाँ आकाश र नयाँ पृथ्वी सृष्टि गर्नेछु, र अघिअघिका कुराहरूको सम्झना हुनेछैन, नता ती स्मरणमा आउनेछन्। तर तिमीहरू मैले सृष्टि गरेको कुरामा सदा सर्वदा आनन्द गर र हर्ष मनाऊ।”—यशैया ६५:१७, १८.
२० अहिले परमेश्वरका सेवकहरूले पाउन सक्ने आनन्द केवल सापेक्षिक छ किनभने तिनीहरूलाई परमेश्वरको इच्छा थाहा छ र चाँडै नै उहाँको प्रमोदवनरूपी नयाँ संसारमा आउन लागेका अद्भुत आशिष्हरूबारे तिनीहरूसित सही ज्ञान छ। (यूहन्ना १७:३; प्रकाश २१:४) यही कारणले गर्दा बाइबलले यसो भन्न सक्छ: “हे सेनाहरूका परमेश्वर, तपाईंमा भरोसा राख्ने मानिस धन्यको हो।” “हरेक जो परमप्रभुदेखि डराउँछ, जो उहाँको मार्गमा हिंड़छ, त्यो धन्यको हो”, “धन्य नम्र हुनेहरू, किनभने तिनीहरूले पृथ्वीको अधिकार पाउनेछन्।” (भजनसंग्रह ८४:१२; १२८:१; मत्ती ५:५) तसर्थ, वर्तमान परिस्थिति कठिन भए तापनि हामीहरू पर्याप्त मात्रामा आनन्दित हुनसक्छौं भनेर सन्तुष्ट हुनुपर्छ। अनिष्टकारी कुरा आइपरिहालेमा पनि यहोवालाई नचिन्ने अनि अनन्त जीवनको आशा नभएकाहरूजस्तो हामी दुःखी हुँदैनौं।—१ थिस्सलोनिकी ४:१३.
२१ यहोवाका सेवकहरू यस कारणले पनि आनन्द पाउँछन्, अरूलाई र अझ विशेषगरि शैतानी संसारमा भइरहेका “सबै धिनलाग्दा कामहरू देखेर शोक र विलाप” गर्ने सबै मानिसहरूलाई बाइबलको सच्चाइ सिकाउन तिनीहरू आफ्नो समय, बल र सम्पत्ति खर्च गर्छन्। (इजकिएल ९:४) बाइबल यसो भन्छ: “त्यो धन्यको हो, जसले निर्धाहरूको चिन्ता गर्दछ। परमप्रभुले त्यसलाई विपत्तिको दिनमा छुटकारा दिनुहुनेछ। परमप्रभुले त्यसलाई रक्षा गरेर जीवित राख्नुहुनेछ, र त्यो पृथ्वीमा आशीर्वादी हुनेछ।” (भजनसंग्रह ४१:१, २) येशूले भन्नुभएजस्तै “लिनुभन्दा दिनु अझ असल हो।”—प्रेरित २०:३५.
२२ अतः वर्तमान समयमा परमेश्वरका सेवकहरूले चरम आनन्दको आशा गर्न नसक्ने भए तापनि परमेश्वरको उपासना नगर्नेहरूले उठाउन नसकेको आनन्द तिनीहरूले उठाउन सक्छन्। यहोवा यसरी घोषणा गर्नुहुन्छ: “हेर, मेरा दासहरू हृदयमा आनन्द भएकोले गाउनेछन्, तर तिमीहरू चाहिं हृदयमा दुःख भएकोले रुनेछौ, र आत्मामा खिन्न भएकोले चिच्चाई चिच्याई रुनेछौ।” (यशैया ६५:१४) यस बाहेक परमेश्वरको उपासना गर्नेहरू अहिले आनन्दित हुनुपर्ने एउटा अति विशेष कारण छ। त्यो हो, “परमेश्वरले आफ्ना आज्ञा मान्नेहरू जतिलाई दिनुभएको” पवित्र आत्मा तिनीहरूसित छ। (प्रेरित ५:३२) अनि स्मरण रहोस्, जहाँ परमेश्वरको आत्मा हुन्छ, त्यहाँ आनन्द हुन्छ।—गलाती ५:२२.
२३ आज परमेश्वरका सेवकहरूको सङ्गठनमा मण्डलीको नेतृत्व गर्ने र यहोवाका जनहरूबीच आनन्द ल्याउन योगदान दिने “धर्म-गुरुहरू” अर्थात् प्राचीनहरूले महत्त्वपूर्ण भूमिका निभाउँछन्। (तितस १:५) तिनीहरूले आफ्ना जिम्मेवारीहरू अनि आफ्ना आध्यात्मिक भाइ-बहिनीहरूसितको सम्बन्धलाई कुन दृष्टिकोणले हेर्नुपर्छ? आउँदो लेखमा त्यसको छलफल गरिनेछ। (w94 10/1)
तपाईं कसरी जवाफ दिनुहुन्छ?
◻ यहोवा सङ्गठित हुनुहुन्छ भनेर सृष्टिले कसरी पुष्टि दिन्छ?
◻ अतित र वर्तमानमा यहोवाले कसरी आफ्ना सेवकहरूलाई सङ्गठित गर्नुभएको छ?
◻ हामीले कस्तो सन्तुलन देखाएको यहोवा चाहनुहुन्छ
◻ आनन्दित हुन प्रेम कत्तिको आवश्यक छ?
◻ हाम्रो समयमा हामी कस्तो आनन्दको आशा गर्न सक्छौं?
[अध्ययनका लागि प्रश्नहरू]
१, २. (क) आफ्ना सेवकहरूका लागि स्तर तोक्ने अधिकार यहोवासित किन छ? (ख) हामीले विशेषगरि अनुकरण गर्नुपर्ने यहोवाका दुई गुणहरू के के हुन्?
३. तारामय आकाशले परमेश्वरको सङ्गठनात्मक क्षमतालाई कसरी प्रदर्शित गर्छ?
४, ५. पृथ्वीमा भएका जीवित वस्तुहरूबीच सङ्गठनको उदाहरणहरू दिनुहोस्।
६, ७. आत्मिक प्राणीहरूबीच कस्तो सङ्गठन देखिन्छ र आफ्नो सृष्टिकर्त्ताप्रति तिनीहरूले कसरी मूल्याङ्कन जाहेर गर्छन्?
८. पृथ्वीमा भएका आफ्ना सेवकहरूलाई यहोवाले सङ्गठित गर्नुहुन्छ भनेर कुन उदाहरणहरूले देखाउँछन्?
९, १०. हाम्रो समयमा यहोवाले आफ्ना जनहरूलाई कसरी सङ्गठित गर्नुभएको छ?
११. अहिले सुसङ्गठित हुन सिक्यौं भने भविष्यमा कस्तो लाभ उठाउनेछौं?
१२, १३. आफ्ना जनहरू आनन्दित भएको यहोवा चाहनुहुन्छ भनेर हामी किन भन्नसक्छौं?
१४. यहोवाको अनुकरण गर्दा हामीले कस्तो सन्तुलन देखाओस् भनी उहाँ चाहनुहुन्छ?
१५. आनन्दित हुन प्रेम किन अत्यावश्यक छ?
१६. येशूले प्रेमको महत्त्वलाई कसरी दर्शाउनुभयो?
१७. अरूप्रति प्रेम व्यक्त गर्न अत्यावश्यक छ भनेर पावलले कसरी देखाए?
१८. हाम्रो आनन्द बढाउने कस्ता कुरा हामी यहोवाबाट आशा गर्नसक्छौं?
१९, २०. (क) अहिले पूर्णतया आनन्दित हुन किन सम्भव छैन? (ख) अहिले पनि सापेक्षिक आनन्द पाउन सकिन्छ भनेर बाइबलले कसरी देखाउँछ?
२१. यहोवाका सेवकहरूले दिने समय, शक्ति अनि सम्पत्तिले तिनीहरूको आनन्द बढाउन कस्तो योगदान पुऱ्याउँछ?
२२. (क) आनन्दको सम्बन्धमा परमेश्वरका सेवकहरू र परमेश्वरको सेवा नगर्नेहरूबीचको भिन्नता छुट्टयाउनुहोस्। (ख) कुन विशेष कारणका लागि हामीले आनन्दित हुने प्रत्याशा गर्नुपर्छ?
२३. आँउदो लेखमा हामी कुन कुरा छलफल गर्नेछौं?