बाइबलका भविष्यवाणीमा तपाईं किन भरोसा गर्न सक्नुहुन्छ
उत्तरपश्चिम ग्रीसस्थित इपारसका राजा पाईरस लामो समयदेखि रोमी सम्राज्यसित लडाइँ गरिरहेका थिए। तिनी लडाइँको परिणाम थाह पाउने उत्कट चाहना लिएर डेल्फीको वेदीमा गए। तर तिनले पाएको जवाफ यी दुईमध्ये एक हुनसक्थ्यो: (१) एकुशका पुत्रले रोमीहरूलाई परास्त गर्नसक्छन्। तिनी युद्धमा जानेछन्, विजयी हुनेछन्, कहिल्यै परास्त हुनैछैनन्।” (२) रोमीहरूले एकुशका पुत्रलाई परास्त गर्नसक्छन्। तिनी युद्धमा जानेछन् तर कहिल्यै विजयी हुनेछैनन्, तिनी परास्त हुनेछन्।” तिनले पहिलो तरिकामा देववाणी बुझे अनि रोमविरुद्ध युद्ध जारी राखे। तर पाईरसले नमिठो पराजय भोग्नुपऱ्यो।
पुरातन देववाणीहरू यस्तो अस्पष्ट र अनेकार्थी भएकाले बदनाम भए। तर बाइबल भविष्यवाणी नि? केही आलोचकहरू बाइबल भविष्यवाणीहरू पनि देववाणीहरूजस्तै हुन्, केही फरक छैन भन्ने गर्छन्। यी आलोचकहरू बाइबलका अगमवाणीहरू बुद्धिमान् तथा विवेकी मानिसहरू र विशेष गरी पूरोहितहरूले भविष्यका घटनाहरूबारे चतुराइँसाथ गरेका भविष्यवाणीहरू मात्र हुन् भनी अड्कल काट्छन्। भनिन्छ, ती पुरुषहरूले आफ्नो अनुभव वा विशेष चासोको भरमा कुनै कुनै परिस्थिति यस्तो वा उस्तो होला भनी पूर्वानुमान लगाउँथे। देववाणीहरू र बाइबल भविष्यवाणीहरूका विभिन्न विशेषताहरू तुलना गरेर हामी सही निष्कर्षमा पुग्नसक्छौं।
विषमता
देववाणीहरूको चिनारी भन्नु नै त्यसको अस्पष्टता हो। उदाहरणका लागि, डेल्फीमा दिइएका जवाफहरू एकदमै अस्पष्ट हुन्थ्यो। फलतः पूजाहारीहरूले त्यसको अर्थ खोल्नुपर्थ्यो र त्यो उल्टो अर्थ पनि हुनसक्थ्यो। यसको एउटा ज्वलन्त उदाहरण, लिडियाका राजा क्रिससलाई दिइएको जवाफ हो। वेदीमा तिनलाई यसो भनियो: “क्रिससले हलेस पार गऱ्यो भने एउटा शक्तिशाली साम्राज्यलाई तहसनहस गर्नेछ।” वास्तवमा, त्यो तहसनहस भएको “शक्तिशाली साम्राज्य” तिनको आफ्नै थियो! कपोदिसियामाथि आक्रमण गर्न हलेस नदी पार गर्दा फारसी कोरसद्वारा क्रिसस पराजित भए।
बाइबल भविष्यवाणीहरू मूर्तिपूजक देववाणीहरू जस्ता नभई एकदमै सत्य अनि स्पष्ट छन्। उदाहरणका लागि, बेबिलोनको पतनबारे यशैयाको पुस्तकमा लिपिबद्ध भविष्यवाणीलाई लिनसक्छौं। उक्त घटना हुनुभन्दा करिब २०० वर्षअघि अगमवक्ता यशैयाले मादी-फारसीले बेबिलोनलाई परास्त गर्नेछ भनी विस्तृत अनि सही अग्रिमवाणी गरे। उक्त भविष्यवाणीले लडाइँमा कोरस नाउँ भएको व्यक्ति विजयी हुनेछन् भनी बताउनुका साथै सुरक्षा दिने नदीमा बाँध बाँधेर तिनी खुल्ला ढोकाहरूबाट सुरक्षित शहरमा प्रवेश गर्नेछन् भनी प्रस्ट गरेको थियो। यी सबै कुरा जसो भनिएको थियो, त्यसै भयो। (यशैया ४४:२७–४५:२) अन्ततः बेबिलोन कहिल्यै आबाद हुनेछैन भनेर पनि सही भविष्यवाणी गरिएको थियो।—यशैया १३:१७-२२.
अगमवक्ता योनाले घोषणा गरेका यो सुस्पष्ट चेताउनीलाई पनि विचार गर्नुहोस्: “अबको चालीस दिनमा निनवे नाश हुनेछ!” (योना ३:४) यस चेताउनीमा कुनै अस्पष्टता छैन! यो सन्देश यति प्रभावशाली र स्पष्ट थियो कि निनवेबासीहरूले ढिलासुस्ती नगरी “परमेश्वरमा विश्वास गरे, र तिनीहरूले उपवास बस्न भनी प्रचार गरे। [अनि] . . . “भाङ्रा लगाए।” तिनीहरूले पश्चात्ताप गरेका हुनाले यहोवाले त्यतिखेर निनवेबासीहरूमाथि विपत्ति ल्याउनुभएन।—योना ३:५-१०.
देववाणीहरू राजनैतिक प्रभुताको निम्ति प्रयोग गरिन्थ्यो। शासक तथा सेनापतिहरूले आफ्नो स्वार्थ र कामकुराहरूलाई बढावा दिन अक्सर देववाणीहरूको आफ्नै अर्थ लगाउँथे जसले गर्दा ती साँच्चै “ईश्वरकै कुरा हुन् कि भन्ने भान पर्थ्यो।” तथापि, परमेश्वरका भविष्यसूचक सन्देशहरू कुनै व्यक्तिविशेषको पक्ष नलिई बताइन्थ्यो।
उदाहरणका लागि, गल्ती काम गर्ने राजा दाऊदलाई हप्काउन यहोवाका अगमवक्ता नातान पछि हटेनन्। (२ शमूएल १२:१-१२) यारोबाम द्वितीयको शासनकालमा विद्रोही राजा र तिनका समर्थकहरू धर्मत्यगी भई परमेश्वरको अनादर गरेका हुनाले अगमवक्ता होशे र आमोसले तिनीहरूको घोर आलोचना गरे। (होशे ५:१-७; आमोस २:६-८) यहोवाले अगमवक्ता आमोस मार्फत विशेष गरी राजालाई कठोर चोताउनी दिनुभयो: “म तरवार लिएर यारोबामको विरुद्धमा खड़ा हुनेछु।” (आमोस ७:९) यारोबामको परिवार खत्तम भयो।—१ राजा १५:२५-३०; २ इतिहास १३:२०.
पैसा नतिरिकन त्यस्ता देववाणीहरू कमै मात्र सुन्न पाइन्थ्यो। धेरै पैसा तिर्नसक्ने व्यक्तिले आफूले चाहेजस्तो देववाणी सुन्न पाउँथ्यो। डेल्फीको वेदीमा जानेहरूले व्यर्थको सूचनाका लागि निकै पैसा तिर्थे। फलतः अपोलोको मन्दिर र अरू भवनहरूमा धनसम्पत्तिको थुप्रो लाग्थ्यो। तर बाइबल भविष्यवाणी र चेताउनीहरू पैसाबिना अनि निष्पक्ष रूपमा दिइन्थ्यो। त्यसैले ती भविष्यवाणी र चेताउनीहरू दिइएको व्यक्तिको जस्तोसुकै ओहदा वा जतिसुकै धनसम्पत्ति भएता पनि कुनै पक्षपात गरिंदैनथ्यो किनकि साँचो अगमवक्ताले घूस लिने त कुरै आउँदैन। त्यसकारण, अगमवक्ता एवम् न्यायकर्ता शमूएलले निष्कपटसाथ यस्तो प्रश्न गरे: “मैले कसको कसूर लुकाउनलाई घूस लिएँ?”—१ शमूएल १२:३.
केही खास खास ठाउँमा मात्र देववाणीहरू सुन्न पाइने हुनाले त्यहाँसम्म पुग्न मानिसहरूले निकै कठिन परिश्रम गर्नुपर्थ्यो। ती ठाउँहरू इपाइरसस्थित तोमारस पर्वतको डोडोना अनि मध्य ग्रीसको पहाडी क्षेत्र डेल्फीमा अवस्थित भएकाले धेरैजसो मानिसहरूका लागि त्यहाँ पुग्न एकदमै गाह्रो हुन्थ्यो। साधारणतया, त्यस्ता वेदीहरूमा धनाढ्य वा शक्तिसम्पन्न व्यक्तिहरूले मात्र देवताहरूसँग कुरा गर्नसक्थे। यसबाहेक, वर्षको कुनै कुनै दिनमा मात्र “देवताहरूको इच्छा” प्रकट हुन्थ्यो। यसको ठीक विपरीत, यहोवाले आफ्ना भविष्यसूचक सन्देशवाहकहरूलाई उहाँका भविष्यवाणीहरू घोषणा गर्न मानिसहरूकहाँ पठाउनुभयो। उदाहरणका लागि, यहूदीहरू बेबिलोनमा निर्वासनमा छँदा परमेश्वरका तीन अगमवक्ताहरूले परमेश्वरका जनहरूकै सेवा गरिरहेका थिए। यर्मिया यरूशलेममा थिए, इजकिएलचाहिं निर्वासनमा परेकाहरूसँग अनि दानियल बोबिलोनी साम्राज्यको राजधानीमा थिए।—यर्मिया १:१, २; इजकिएल १:१; दानियल २:४८.
देववाणीहरू साधारणतया गोप्य रूपमा सुनाइन्थ्यो। फलस्वरूप, सुन्ने व्यक्तिले आफ्नो फाइदाका लागि त्यसको आफ्नै अर्थ लगाउनसक्थे। यसको विपरीत, बाइबल भविष्यवाणीहरू सबैले सुनून् अनि अर्थ पनि बुझून् भनेर सार्वजनिक रूपमा सुनाइन्थ्यो। आफ्नो सन्देश नेता तथा शहरबासीहरूले मन पराउँदैनन् भनेर थाह भए तापनि अगमवक्ता यर्मियाले यरूशलेममा थुप्रैपल्ट सार्वजनिक रूपमा सन्देश सुनाए।—यर्मिया ७:१, २.
अहिले देववाणीहरूलाई प्राचीन इतिहासको रूपमा मात्र लिइन्छ। वर्तमान आखिरी दिनमा बाँचिरहेका मानिसहरूका लागि यसको कुनै महत्त्व छैन। त्यस्ता देववाणीहरू हाम्रो वर्तमान वा भविष्यबारे केही बताउँदैनन्। यसको विपरीत, बाइबलका भविष्यवाणीहरू ‘परमेश्वरको वचनका’ भाग हुन् जो “जीवित र प्रबल” छन्। (हिब्रू ४:१२) पूर्ति भइसकेका बाइबल भविष्यवाणीहरूले परमेश्वरले मानिसहरूसँग व्यवहार गर्नुहुने नमुना पेश गर्नुका साथै उहाँका उद्देश्य र व्यक्तित्वका महत्त्वपूर्ण पक्षहरू प्रकट गर्छन्। यसबाहेक, बाइबलका महत्त्वपूर्ण भविष्यवाणीहरू निकट भविष्यमा पूरा हुनेछन्। अब चाँडै हुन लागेका कुराबारे प्रेरित पत्रुसले यसरी लेखे: “[परमेश्वरको] प्रतिज्ञाबमोजिम हामी नयाँ स्वर्ग [स्वर्गमा स्थापित मसीही राज्य] र नयाँ पृथ्वी [धार्मिक मानव समाजको] बाटो हेर्छौं, जसमा धार्मिकताले बास गर्छ।”—२ पत्रुस ३:१३.
बाइबल भविष्यवाणी र झूटो धर्मका देववाणीहरूको यो संक्षिप्त तुलनाले तपाईं सायद महान् विचारहरू पुस्तकमा बताइएको जस्तै निष्कर्षमा पुग्नुहुनेछ: “जहाँसम्म मानिसहरूले भविष्यबारे बताउने कुरा छ, हिब्रू अगमवक्ताहरू जस्ता त अरू कोही पनि थिएनन्। मूर्तिपूजक जोखना हेर्ने वा ज्योतिषीहरू जस्तो . . . तिनीहरूलाई ईश्वरीय गोप्य कुरा बुझ्न कुनै कला वा युक्तिको आवश्यकता पर्दैनथ्यो। . . . तिनीहरूका प्रायजसो भविष्यसूचक शब्दहरू ती पुरुषहरूका जस्ता अस्पष्ट होइनन् तर स्पष्ट हुन्थे। ती हिब्रू अगमवक्ताहरूले कुरा लुकाउन होइन तर प्रकट गर्न चाहन्थे भनेर प्रस्ट हुन्छ किनकि परमेश्वरले पनि ती कुराहरू मानिसहरूले पहिल्यै थाह पाऊन् भन्ने चाहनुहुन्छ।”
के तपाईं बाइबलका भविष्यवाणीमा भरोसा गर्नुहुनेछ?
तपाईं बाइबलका भविष्यवाणीमा भरोसा गर्न सक्नुहुन्छ। साँच्चै भन्ने हो भने, यहोवा र उहाँका भविष्यसूचक शब्दको पूर्तिलाई तपाईं आफ्नो जीवनको प्रमुख कुरा बनाउन सक्नुहुन्छ। बाइबल भविष्यवाणी, पूर्ति भइसकेका पूर्वानुमानहरूको निरर्थक अभिलेख मात्र होइनन्। धर्मशास्त्रका थुप्रै भविष्यवाणीहरू अहिले पूरा भइरहेका छन् अथवा निकट भविष्यमा पूरा हुनेछन्। विगतका कुराहरू विचार गर्दा, ती भविष्यवाणीहरू पनि अवश्य पूरा हुनेछन् भनी हामी पूर्णतया विश्वस्त हुनसक्छौं। ती भविष्यवाणीहरू हाम्रो समय र भविष्यमा केन्द्रित भएकाले गम्भीरताका साथ लिनुपर्छ।
तपाईं यशैया २:२, ३ को बाइबल भविष्यवाणीमाथि निश्चय भरोसा गर्न सक्नुहुन्छ। त्यहाँ यसो भनिएको छ: “पछिल्ला दिनमा परमप्रभुको भवन बसालिएको पर्वत सबै पर्वतहरूभन्दा उच्च पारिनेछ। डाँड़ाहरूभन्दा माथि त्यो उच्च उठाइनेछ। . . . जाति जातिका धेरै मानिसहरू त्यहाँ गएर भन्नेछन्, आऊ हामी परमप्रभुको पर्वतमा उक्लेर याकूबका परमेश्वरको भवनमा जाऔं। उहाँले हामीलाई आफ्नो मार्ग देखाउनुहुनेछ, र हामी उहाँको बाटोमा हिंड़नेछौं।” साँच्चै आज लाखौं मानिसहरूले यहोवाको उच्च पारिएको उपासना अंगालिरहेका छन् अनि उहाँको बाटोमा हिंड्न सिकिरहेका छन्। के तपाईंले परमेश्वरका तौरतरिकाहरूबारे अझ बढी जान्ने अनि उहाँको बाटोमा हिंड्न उहाँ र उहाँका उद्देश्यहरूबारे सही ज्ञान लिने मौकाको फाइदा उठाउनुहुनेछ?—यूहन्ना १७:३.
बाइबलको अर्को भविष्यवाणीको पूर्तिका लागि हामीले ढिला नगरी कदम चाल्नु आवश्यक छ। निकट भविष्यमा हुने घटनाबारे भजनरचयिताले भविष्यसूचक शब्दमा यसरी गाए: “कुकर्मीहरू नष्ट हुनेछन्। . . . थोरै बेरपछि, दुष्ट रहनेछैन।” (भजन ३७:९, १०) तपाईंको विचारमा, बाइबल भविष्यवाणीको हाँसो उडाउनेहरूलगायत सबै दुष्टमाथि आउनै लागेको विनाशबाट बच्न के गर्नुपर्ला? उक्त भजन यस्तो जवाफ दिन्छ: “परमप्रभुको बाटो हेर्ने जतिले देश अधिकार गर्नेछन्।” (भजन ३७:९) यहोवामाथि आशा राख्नु भनेको उहाँका उद्देश्यहरूमाथि पूर्णतया भरोसा राख्नु अनि उहाँका स्तरहरूअनुरूप आफ्नो जीवन ढाल्नु हो।—हितोपदेश २:२१, २२.
यहोवामा आशा राख्नेहरूले पृथ्वी अधिकार गर्दा कस्तो होला? आज्ञाकारी मानिसहरूका लागि गौरवमय भविष्य साँचेर राखिएको छ भनी बाइबलले बताउँछ। अगमवक्ता यशैयाले यसरी लेखे: “अन्धाहरूका आँखा खोलिनेछन्, र बहिराहरूका कान उघारिनेछन्। तब लंगड़ा मृगझैं उफ्रनेछ, र गूंगाको जिब्रोले स्तुति गर्नेछ, किनकि उजाड़–स्थानमा पानी फूटेर निस्कनेछ, र मरूभूमिमा खोलाहरू बग्नेछन्।” (यशैया ३५:५, ६) प्रेरित यूहन्नाले निम्न आश्वासनदायी शब्दहरू लेखे: “उहाँले [यहोवाले] तिनीहरूका आँखाबाट सबै आँसु पुछिदिनुहुनेछ, र फेरि मृत्यु हुनेछैन। औ शोक, रुवाइ, पीड़ा फेरि केही हुनेछैन। पहिलेका कुराहरू बितिसकेका छन्।’ औ सिंहासनमा विराजमान हुनुहुनेले भन्नुभयो, . . . ‘लेख, किनकि यी कुराहरू विश्वासयोग्य र सत्य छन्।’ ”—प्रकाश २१:४, ५.
बाइबल, भरोसायोग्य भविष्यवाणीको पुस्तक हो भनी यहोवाका साक्षीहरूलाई थाह छ। अनि तिनीहरू प्रेरित पत्रुसको आग्रहसित पूर्णतया सहमत छन्। तिनले यस्तो आग्रह गरे: “बढ़ता पुष्टि गराउने हामीसँग अगमवाणीको वचन छ। औ झिसमिसे उज्यालो नहोउञ्जेल, र तिमीहरूका हृदयमा बिहानको तारा नउदाउञ्जेल अन्धकारमा बलिरहेको दियोलाईझैं गरी तिमीहरूले त्यसलाई ध्यान दियौ भने असल गर्नेछौ।” (२ पत्रुस १:१९) हामी बाइबल भविष्यवाणीले प्रदान गर्ने भविष्यका उत्तम प्रत्याशाहरूद्वारा तपाईंहरू प्रोत्साहित हुनुहुनेछ भन्ने आशा गर्छौं!
[पृष्ठ ६-मा भएको पेटी/चित्रहरू]
पुरातन ग्रीसमा सबैभन्दा प्रसिद्ध थियो।
मादक धूवाँले अगमवादिनीलाई परमानन्द दिन्थ्यो
[चित्रहरू]
तीनखुट्टे भाँडामा बसेर अगमवादिनीले देववाणीहरू भन्थिन्
तिनले भनेका कुराहरू अपोलो देवले बोलेका हुन् भन्ने विश्वास गरिन्थ्यो
[स्रोत]
तीनखुट्टे भाँडा: Dictionary of Greek and Roman Antiquities पुस्तकबाट; अपोलो: The Complete Encyclopedia of Illustration/J. G. Heck
[पृष्ठ ७-मा भएको चित्र]
डेल्फीको वेदीमा दिइने पूर्वानुमानहरूमा पटक्कै विश्वास गर्न सकिंदैनथ्यो
[स्रोत]
डेल्फी, ग्रीस
[पृष्ठ ८-मा भएका चित्रहरू]
नयाँ संसारबारे बाइबलमा गरिएको भविष्यवाणीमा तपाईं पूर्णतया विश्वस्त हुन सक्नुहुन्छ