धेरै सुम्पिएको छ—धेरै मागिन्छ
१ सत्य पाएर हामी कतिको कृपापात्र भएका छौं! यहोवाप्रति हाम्रो समर्पणले गर्दा हामीलाई ‘सुसमाचार सुम्पिएको’ छ। (१ थिस्स. २:४) यसले हामीमाथि अझै ठूलो जिम्मेवारी थप्छ। येशूले यसो भन्नुभयो: “धेरै सुम्पिएको जुनसुकैसँगबाट मानिसहरूले धेरै माग्नेछन्।”—लूका १२:४८ख.
२ ती शब्दहरू कति सत्य छन्! परमेश्वरको वचनको ज्ञान, भाइहरूको अद्भुत भ्रातृत्व र उदेकपूर्ण आशा हामी सबैले पाएको हुँदा हामीलाई धेरै सुम्पिएको छ भनी सत्यतापूर्वक भन्न सक्छौं। त्यसको बदलामा धेरै मागिनु तर्कपूर्ण छ।
३ आवश्यकताहरूको उचित दृष्टिकोण कायम गर्नुहोस्: हामीबाट अचाक्ली मागिएको छ भन्ने निष्कर्षमा केही व्यक्तिहरू पुगेका छन्। मसीही मण्डलीको शिरको हैसियतमा ती सुचारुरूपले चलाउन “ठीक मापको” आवश्यक कुराहरू येशू ख्रीष्टले नै निर्धारण गर्नुहुन्छ। (एफि. ४:१५, १६) “मेरो जुवा सजिलो र मेरो भारी हलका छ” भनी उहाँले हामीलाई आश्वासन दिनुहुन्छ। (मत्ती ११:२८-३०) अभावमा परेकाहरूलाई उहाँले प्रेमपूर्वक छुट दिनुहुन्छ। (लूका २१:१-४) जतिसुकै मात्रामा भएपनि यथासक्दो गऱ्यौं भने हामीले आशिष् पाउनेछौं।—कल. ३:२३, २४.
४ आफैलाई सोध्नुहोस्, ‘के राज्यसम्बन्धी कामकुराहरूले मेरो जीवनमा प्राथमिकता पाएको छ? परमेश्वरको नाउँको प्रशंसा र अरूको लाभ हुने ढंगमा के मैले मेरो समय तथा स्रोतहरू प्रयोग गरिरहेको छु? भौतिक कुराहरू स्वार्थीपूर्वक उपभोग गर्नुभन्दा यहोवाको सेवाबाट के म बढी आनन्द प्राप्त गर्छु?’ यी प्रश्नहरूको इमान्दार जवाफले हाम्रो हृदयभित्रको मनोवृत्ति प्रकट गर्छ।—लूका ६:४५.
५ खराब गर्न प्रलोभित हुनबाट जोगिनुहोस्: स्वार्थपूर्ति, लोभ र कामुक आनन्दहरूप्रति प्रलोभन तथा दबाब अहिलेजति कहिल्यै परेको छैन। प्रत्येक दिन हामी नैतिक चुनौतीहरू र सम्झौता गर्ने प्रलोभनहरू सामना गर्छौं। यी चुनौतीहरू सफलतापूर्वक सामना गर्न हामीले यहोवासित मदत माग्नुपर्छ। (मत्ती २६:४१) आफ्नो आत्माद्वारा उहाँले हामीलाई बलियो बनाउन सक्नुहुन्छ। (यशै. ४०:२९) परमेश्वरको वचन दिनहुँ पढ्नु निकै मदतकारी हुन्छ। (भजन. १:२, ३) आत्म-अनुशासन र आत्म-संयमले पनि प्रमुख भूमिका खेल्छ।—१ कोरि. ९:२७.
६ असल कुरालाई प्रेम गर्नु मात्रै पर्याप्त छैन तर हामीले खराब कुरालाई घृणा पनि गर्नुपर्छ। (भजन. ९७:१०) यसको अर्थ खराब कुराहरूप्रति लालसा खेती नगर्नु हो। यहोवाले घृणा गर्नुहुने सात कुराहरू हितोपदेश ६:१६-१९ मा सूचीबद्ध छन्। स्पष्ट छ, यहोवालाई खुशी तुल्याउन चाहने व्यक्तिले त्यस्ता कुराहरू पनि घृणा गर्नुपर्छ। सत्यको सही ज्ञान पाएकोले असल कुराहरूमा ध्यान केन्द्रित गरेर त्यही ज्ञानअनुसार चल्ने चाह हामीमा हुनुपर्छ।
७ “सधैं प्रभुको काममा प्रशस्त हुँदै” जान अनुकूल परिस्थितिहरूको लागि प्रार्थना गर्नु उचित हो। (१ कोरि. १५:५८) यहोवाको सेवामा व्यस्त हुँदा धेरैले सुरक्षा पाएका छन् किनभने यसो गर्दा निरर्थक कुराहरू पछ्याउन समय नै हुँदैन।
८ सबै कुराहरू विचार गर्ने हो भने यहोवाले हामीबाट माग गर्नुहुने कुराहरू असाध्यै व्यवहारिक छन्। (मीका ६:८) सेवाको हरेक सुअवसरको लागि कृतज्ञ हुनुपर्ने कारणहरू हामीसित छन्। (एफि. ५:२०) तसर्थ, हामीबाट माग गरिएका कुराहरूभन्दा हाम्रो इनाम निकै ठूलो हुनेछ भनी निर्धक्क भएर हामी “परिश्रम र प्रयत्न गर्दछौं।”—१ तिमो. ४:१०.