ती घिनलाग्दा झिंगाहरू—तपाईंले सोच्नुभएकोभन्दा धेरै उपयोगी?
हामीमध्ये धेरैले झिंगालाई दिक्कलाग्दो वा समाजका लागि निकै खतरा ठान्छौं। तर जीवशास्त्रीहरूले के पत्ता लाउँदैछन् भने, झिंगाहरू केही हदसम्म हानिकारक भए तापनि हामीले सोचेभन्दा ती धेरै उपयोगी छन्।
मानिसहरू चाँड-चाँडो भोजन तयार पार्ने भोजनालयहरूमा झुम्मिएजस्तै धेरै थरिका झिंगाहरू फूलहरूमा प्रायः दिनभरि घुम्छन्। ती फूलहरूले यी ग्राहकरूपी कीराहरूलाई मधु र पराग दिन्छन्। केही झिंगाहरूले परागबाट उचित मात्रामा पौष्टिक खाद्य निकाल्नसक्छन्। अण्डा विकसित गर्न यही अधिक ऊर्जा भएको खाद्यमा तिनीहरू निर्भर गर्छन्।
एक फूलदेखि अर्को फूलमा घुम्दा झिंगाहरूले चालै नपाइकन परागकणहरू टिप्छन्। यी कणहरू तिनीहरूको जीउमा टाँसिएका हुन्छन्। जीवशास्त्रीहरूले एउटा झिंगाको शरीरलाई राम्ररी नियालेर हेर्दा परागका १,२०० कणहरू पाए! झिंगाको परागसेचन भूमिकाबारे अझ धेरै अनुसन्धान गरिएको छ। केही फूलहरू त बाँच्नका लागि झिंगामाथि भर पर्छन् भनेर वैज्ञानिकहरूले पत्ता लगाएका छन्।
प्राकृतिक इतिहास-ले (अंग्रेजी) अमेरिकाको कोलोराडोमा गरेका परीक्षणहरूको विवरण दिएको छ। घरमा हुने झिंगाजस्तै सामान्य मस्कइड झिंगाहरूलाई सजिलै चिन्न सकियोस् भनेर जीवशास्त्रीहरूले झिंगाको जीउमा चहकिलो रंग छर्के। तिनीहरूको दैनिक क्रियाकलाप जाँचेपछि अनुसन्धानकर्ताहरू चकित भए। किनभने केही जंगली फूलहरूका लागि मौरीभन्दा झिंगा धेरै महत्त्वपूर्ण परागसेचक थिए। अनि तिनीहरू मौरीभन्दा धेरै टाढासम्म घुमफिर गरे।
झिंगाको काम कत्तिको महत्त्वपूर्ण छ? यसको जवाफ पाउन जीवशास्त्रीहरूले केही फूलहरू जालीले ढाके ताकि कीराहरू ती फूलहरूमा जान नसकोस्। झिंगाद्वारा परागसेचन भएका फलदायी फूलहरूको विपरीत यी फूलहरूले बीउ उत्पादन गरेनन्। केही फूलहरू मौरीद्वारा मुख्यत: परागसेचन भए तापनि केही उचाइमा पाइने जंगली आलसको फूल वा जंगली जेरानियम फूलहरूमा झिंगाले ९० प्रतिशतभन्दा धेरै यो कार्य सम्पन्न गर्छ।
दुइ अन्वेषकहरू केरल कर्न्ज र डेविड ईनुवि कुन निष्कर्षमा पुगे? “कोलोराडो रकिज्का धेरै फूलहरू परागसेचन गर्ने सम्बन्धमा झिंगाले मौरी, पुतली तथा हमिंगबर्डलाई उछिनेको छ। . . . अधिकांश मानिसहरूले घिनाउने यी कीराहरूबिना पहाडी भञ्ज्याङ घुम्दा आनन्दित पार्ने धेरै जंगली फूलहरूले बीउ दिन सक्दैन।” निस्सन्देह, झिंगा उपयोगी छ!