सफल विद्यार्थीहरूबाट सफल मिसनरीहरू
“हामीले यो सुअवसर पायौं भनेर पत्याउनै गाह्रो लाग्छ!” पत्नी पात्सी र आफूले पाएको प्रशिक्षणबारे विलले त्यसरी उद्गार व्यक्त गरे। तिनीहरूले वाचटावर बाइबल स्कूल अफ गिलियडको १०३ औं कक्षा भर्खरै पूरा गरेका थिए। जाहिद र जेनीले पनि उक्त कुरामा समर्थन जनाए। तिनीहरूले यसो भने, “हामी यहाँ हुन पाएकोमा गौरवान्वित छौं।” सबै विद्यार्थीहरूले लगनशील भएर आफ्नो प्रशिक्षण पूरा गरे। अब तिनीहरू मिसनरी जीवनयात्रा थाल्न उत्सुक थिए। तर पहिला तिनीहरूले सेप्टेम्बर ६, १९९७ मा सम्पन्न स्नातक समारोहमा मायालु सल्लाह पाए जसले तिनीहरूलाई मिसनरी कार्यभार सँभाल्न मदत गर्नेथियो।
कार्यक्रमको अध्यक्षता परिचालक निकायका सदस्य थियोडर जारसले गरे। यी विद्यार्थीहरूप्रति आफ्नो समर्थन तथा प्रेम दर्साउन क्यानाडा, युरोप, पोर्टो रिको र संयुक्त राज्यबाट तिनीहरूका साथी तथा नातेदारहरूका साथै बेथेल परिवार र वाच टावर सोसाइटीको ४८ वटा शाखा कार्यालयका प्रतिनिधिहरू त्यहाँ उपस्थित भएको कुरा भाइ जारसले बताए। भाइ जारसले यो कुरा पनि भने, मसीहीजगत्का चर्चहरूले पठाएका मिसनरीहरू प्रायजसो मिसनरी कार्य गर्नुको साटो अलमलिएर प्राज्ञिक पठनपाठनमा लाग्छन् वा राजनीतिमा समेत मुछिन्छन्। त्यसको विपरीत, गिलियडका स्नातकहरूले जुन कुराको लागि प्रशिक्षण पाएका छन्, त्यही गर्छन्। तिनीहरू मानिसहरूलाई बाइबल शिक्षा दिन्छन्।
त्यसपछि सोसाइटीको ब्रूक्लिन कार्यालयका रबर्ट बट्लरले “तपाईंको मार्ग सफल बनाउनुहोस्” विषयक भाषण दिए। मानिसहरूको नजरमा सम्पत्ति वा अन्य निजी लाभहरू सफलताको चिह्न भए तापनि परमेश्वरको दृष्टिमा सफलता के हो, त्यो बुझ्नु महत्त्वपूर्ण छ भनी तिनले बताए। थुप्रैलाई धर्म परिवर्तन गराउन सक्नु भएर होइन तर आफूलाई सुम्पिएको कार्य वफादारपूर्वक गर्नुभएकोले येशूको सेककाई सफल भयो। उहाँले यहोवाको महिमा गर्नुभयो र संसारदेखि आफूलाई निष्कलंक राख्नुभयो। (यूहन्ना १६:३३; १७:४) हरेक मसीहीले यसो गर्नसक्छन्।
पूर्वीय देशमा पहिले मिसनरी सेवा गरिसकेका रबर्ट पेभीले यस्तो सल्लाह दिए, “सबै मानिसहरूका दास हुनुहोस्।” प्रेरित पावल एक सफल मिसनरी थिए। तिनी सफल हुनुको कारण के थियो? तिनी सबैका दास बने। (१ कोरिन्थी ९:१९-२३) वक्ताले अझ यसो भने: “यस्तो मनोवृत्ति राख्ने गिलियड स्नातकले मिसनरी सेवालाई आफ्नो पेसागत पदोन्नति, संगठनमा महत्त्वपूर्ण ओहदामा पुग्ने खुड्किलो ठान्दैन। केवल एउटै उद्देश्य राखेर मिसनरी आफूलाई खटाइएको क्षेत्रमा जान्छन्। त्यो हो, सेवा गर्ने। किनभने दासको काम त्यही हो।”
परिचालक निकायका सदस्य गेरिट लोशले २ कोरिन्थी अध्याय ३ र ४ मा आधारित सल्लाह दिंदै विद्यार्थीहरूलाई “ऐनाले जस्तै यहोवाको महिमा प्रतिविम्बित गर्नुहोस्” भनी प्रोत्साहन दिए। परमेश्वरको ज्ञान भनेको मसीहीले हृदय खोलेर यो ज्ञान लिन खोज्दा उसलाई चम्काउने ज्योतिजस्तै हो भनी तिनले सम्झना गराए। सुसमाचार प्रचार गर्नुका साथै असल आचरण कायम गरेर हामी त्यो ज्योति प्रतिविम्बित गर्छौं। तिनले यो कुरा स्वीकारे, “कहिलेकाहीं तपाईंलाई हीनताबोध हुनसक्छ। त्यस्ता भावनाहरू आउँदा यहोवाको ‘असामान्य शक्तिमा’ भरोसा राख्नुहोस्।” (२ कोरिन्थी ४:७, NW) भाइ लोशले २ कोरिन्थी ४:१ मा उल्लिखित पावलका शब्दहरू गुञ्जाउँदै विद्यार्थीहरूलाई यस्तो अपील गरे: “मिसनरी कार्य कहिल्यै नछोड्नुहोस्। ऐनालाई सधैं टल्काइरहनुहोस्!”
गिलियड विभागका सदस्य कार्ल आडम्सले “यहोवा कहाँ हुनुहुन्छ?” भन्ने विषयमा रोचक भाषण दिए। यस प्रश्नले यहोवा ब्रह्माण्डको कुन ठाउँमा हुनुहुन्छ भनेर होइन तर यहोवाको दृष्टिकोण तथा उहाँको निर्देशन विचार गर्नुपर्ने खाँचोलाई औंल्याउँछ। तिनले भने, “तनाउपूर्ण अवस्था आइपर्दा यहोवाको सेवामा धेरै वर्ष बिताइसकेका व्यक्तिले समेत उहाँको दृष्टिकोण बिर्सनसक्छन्।” (अय्यूब ३५:१०) वर्तमान समयमा नि? सन् १९४२ मा परमेश्वरका जनहरूलाई डोऱ्याइ चाहिएको थियो। त्यतिबेला प्रचारकार्य पूरा हुन लागेको थियो वा काम अझै बाँकी थियो? आफ्ना जनहरूले के गरून् भन्ने यहोवाको इच्छा थियो? तिनीहरूले परमेश्वरको वचन अध्ययन गर्दै जाँदा उक्त प्रश्नको जवाफ स्पष्ट भयो। भाइ आडम्सले यस्तो घोषणा गरे, “त्यो वर्ष सिद्धिनुअघि नै वाचटावर बाइबल स्कूल अफ गिलियडको लागि योजना तय भइसकेको थियो।” उक्त स्कूलले पठाएका मिसनरीहरूको कार्यलाई यहोवाले साँच्चै आशिष् दिनुभएको छ।
यसपछि भाषण दिने पालो अर्को प्रशिक्षक मार्क नुमारको थियो। “तपाईं तोडा कसरी चलाउनुहुनेछ?” भन्ने भाषणमा तिनले विद्यार्थीहरूलाई आफूलाई जिम्मामा लगाएको ठाउँमा पुग्नेबित्तिकै गिलियडमा पाएको प्रशिक्षण व्यवहारमा उतार्न प्रोत्साहन दिए। तिनले भने, “चासो देखाउनुहोस्। घुलमिल हुनुहोस्। स्थानीय जनताको रहनसहन, इतिहास र हँसीमजाक बुझ्न उत्सुक हुनुहोस्। तपाईंले स्थानीय भाषा जति चाँडो सिक्न सक्नुहुन्छ, त्यति नै सजिलो हुनेछ।”
जोसिला विद्यार्थीहरूले सेवकाईबाट आनन्द उठाउँछन्
विद्यार्थीहरू ११ वटा स्थानीय मण्डलीहरूमा खटाइएका हुँदा गिलियडमा आफूले पढेका कुराहरू व्यवहारमा उतार्ने मौका पाए। सप्ताहन्तमा तिनीहरूले जोसका साथ प्रचार क्रियाकलापमा भाग लिए। गिलियड विभागका वलेस लिभरेन्सले केही विद्यार्थीहरूलाई अनुभव बताउन निम्त्याए। बजार, गाडी बिसौनी, व्यापारिक इलाका, सडक वा घर-घर साक्षी दिंदाका अनुभवहरू बताउँदा तिनीहरूको आनन्द प्रस्टै झल्कन्थ्यो। कोही कोहीले आफ्नो मण्डलीको इलाकामा बस्ने र काम गर्ने विदेशी भाषीहरूलाई सुसमाचार सुनाए। यस १०३ औं कक्षाको पाँच महिने प्रशिक्षणको दौडान कम्तीमा दशवटा गृह बाइबल अध्ययन सञ्चालन गरियो।
लामो समयसम्म मिसनरी कार्यमा लागेकाहरूले सफलताको रहस्य बताउँछन्
कार्यक्रमको यस रमाइलो भागपछि पाट्रिक लाफ्रांक र विलियम भान डे वलले विद्यार्थीहरूको हितको लागि विभिन्न शाखा समितिका सात जना सदस्यहरूलाई आफूले मिसनरी कार्यमा सिकेका पाठहरू बताउन लगाए। तिनीहरूले यी स्नातकहरूलाई आ-आफ्नो मिसनरी कार्यभारलाई यहोवाबाट आएको जिम्मेवारी सम्झन र त्यसमा लागिरहन कटिबद्ध हुन जोड दिए। गिलियड प्रशिक्षित मिसनरीहरूले अन्य मुलुकहरूमा पारेका सकारात्मक असरहरूबारे तिनीहरूले बताए।
यी शाखा समितिका सदस्यहरूलाई दशकौंसम्म आनन्दित अनि फलदायी मिसनरीहरूको हैसियतमा सेवा गर्न कुन कुराले मदत गऱ्यो? तिनीहरूले स्थानीय भाइहरूसँग घनिष्ठ भएर काम गरे र तिनीहरूबाट सिके। नयाँ ठाउँमा पुग्नेबित्तिकै स्थानीय भाषा सिक्न थाले। लचकदार हुन तथा स्थानीय रहनसहनअनुसार छाँटकाँट गर्न सिके। गिलियडको प्रथम कक्षाका स्नातक तथा मिसनरी कार्यमा ५४ वर्ष बिताइसकेका चार्ल्स आइजनहावरले सफल मिसनरीहरूले सिकेका पाँचवटा “रहस्य” बताए: (१) नियमित बाइबल अध्ययन गर्नु, (२) स्थानीय भाषा सिक्नु, (३) सेवकाईमा सक्रिय हुनु, (४) मिसनरी गृहको शान्ति भंग नगर्नु र (५) नियमित तवरमा यहोवालाई प्रार्थना गर्नु। यी अनुभवी मिसनरीहरूले दिएका व्यवहारिक सल्लाहले मात्र होइन तर यहोवाको सेवामा तिनीहरूले पाएको अनुभवी मिसनरीहरूको आनन्द देखेर पनि विद्यार्थीहरू असाध्यै प्रभावित भए। आर्मान्डो र लुपले भनेझैं “आफ्नो जीवनबारे बताउँदा तिनीहरू रमाउँछन्।”
यी अन्तर्वार्ताहरूपछि एउटा भाषण बाँकी रह्यो। त्यो हो, परिचालक निकायका सदस्य अल्बर्ट श्रोडरको र तिनको विषय थियो, “परमेश्वरको वचनको वफादार भण्डारेले सत्यका बहुमूल्य रत्नहरू प्रकट गर्छन्।” गिलियड स्कूलको प्रमुख पाठ्यपुस्तक बाइबल भएको हुँदा तिनको कुरा सुन्न विद्यार्थीहरू उत्सुक थिए। आजभन्दा ५० वर्षअघि पवित्र धर्मशास्त्रको नयाँ विश्व अनुवाद-सम्बन्धी (अंग्रेजी) कार्य सुरु हुँदा नयाँ विश्व बाइबल अनुवाद समितिका अभिषिक्त सदस्यहरूले मानिसको अनुमोदन नभई पवित्र आत्माको डोऱ्याइमा भरोसा राखेको कुरा भाइ श्रोडरले बताए। (यर्मिया १७:५-८) तर हालै आएर केही विशेषज्ञहरूले नयाँ विश्व अनुवाद-को उच्च स्तरलाई मानी लिएका छन्। एक बाइबलविद्ले सोसाइटीलाई यस्तो पत्र लेखे: “गुणस्तरीय प्रकाशनलाई म हेर्नेबित्तिकै चिनिहाल्छु र तपाईंहरूको ‘नयाँ विश्व बाइबल अनुवाद समिति’-को कृति उत्कृष्ट छ।”
यस भाषणपछि विद्यार्थीहरूले डिप्लोमा पाए र तिनीहरूलाई खटाइएका ठाउँहरू घोषणा गरियो। विद्यार्थीहरूका लागि यो क्षण असाध्यै हृदयस्पर्शी थियो। कक्षाको प्रतिनिधित्व गर्दै एक जना भाइले मूल्यांकन पत्र पढ्दा धेरैको भकानो फुटेर आयो र गहभरि आँसु भयो। कोही कोही विद्यार्थीहरूले वर्षौंदेखि मिसनरी कार्यको लागि तयारी गरिरहेका थिए। गिलियड कक्षा अंग्रेजीमा हुने थाह पाएर केहीले अंग्रेजी-भाषी मण्डलीहरूमा बसाइँ सरेर आफ्नो अंग्रेजी भाषालाई तिखारेका थिए। अरू कतिपय भने अग्रगामीहरूको खाँचो बढी भएको ठाउँमा सेवा गर्न आफ्नै देश वा विदेशमा बसाइँ सरेका थिए। त्यस्तै कोही कोहीले अनुभवहरू पढेर, अनुसन्धान गरेर वा पृथ्वीको अन्तसम्म (अंग्रेजी) नामक भिडियोक्यासेट दोहोऱ्याइ तेऱ्याइ हेरेर मिसनरी कार्यका लागि तयारी गरेका थिए।
विद्यार्थीहरूप्रति देखाइएको व्यक्तिगत चासोले गर्दा सुरुमा उल्लिखित विल र पात्सी भावविह्वल भएका थिए। “चिन्दै नचिनेका मानिसहरूले हामीलाई अंगालो मारिरहेका थिए, हाम्रो तस्बिर खिचिरहेका थिए। परिचालक निकायका एक जना सदस्यले हामीसित हात मिलाउँदै यसो भने, ‘हामी तपाईंहरूको गर्व गर्छौं!’ ” निस्सन्देह, १०३ औं कक्षाका विद्यार्थीहरू सबैका लागि प्रिय छन्। तिनीहरूले राम्रो प्रशिक्षण पाएका छन्। गिलियडमा पाएको प्रशिक्षणले तिनीहरूलाई सफल विद्यार्थीहरूबाट सफल मिसनरीहरू हुन मदत गर्नेछ।
[पृष्ठ २२-मा भएको पेटी]
कक्षाको तथ्यांक
प्रतिनिधित्व गरिएका देशहरूको संख्या: ९
मिसनरी सेवामा खटाइएका देशहरूको संख्या: १८
विद्यार्थीहरूको संख्या: ४८
विवाहित दम्पतीहरूको संख्या: २४
औसत उमेर: ३३
सच्चाइमा बिताएको औसत वर्ष: १६
पूर्ण-समय सेवकाईमा बिताएको औसत वर्ष: १२
[पृष्ठ २३-मा भएको चित्र]
वाचटावर बाइबल स्कूल अफ गिलियडको १०३ औं स्नातक कक्षा
देहायबमोजिम सूचीमा दिइएको लहर तथा नाउँहरू क्रमशः अगाडिबाट पछाडि र बायाँबाट दायाँतर्फ सुरु हुन्छ।
(१) बन, ए.; डाल्स्टेड, एम.; काम्पान्या, जी.; बोयाजुएलु, आर.; ओगान्डो जि.; निकनचक, टि.; मेल्भिन, एस. (२) मे, एम.; मापुला, एम.; ल्वीन, जे.; हिटेमा, डि.; हर्नान्डीज, सि.; बोयाजुएलु, एन.; स्टर्म, ए.; मेल्भिन, के. (३) टम, जे.; मापुला, इ.; नल, एम.; टेज्डाल, पि.; राइट, पि.; पेरेज, एल.; शेनफेल्ट, एम.; पाक, एच. (४) मर्फी, एम.; काम्पान्या, जे.; स्टिवर्ट, एस.; शरेडा, एम.; रीड, एम.; पेरेज, ए.; टेज्डाल, डब्ल्यु.; पाक, जे. (५) स्टिवर्ट, डि.; राइट, ए.; शरेडा, पि.; निकनचक, एफ.; रीड, जे.; हिटेमा, के.; ओगान्डो, सि.; शेनफेल्ट, आर. (६) मर्फी, टि.; हर्नान्डीज, जे.; नल, एम.; बन, बि.; टम, आर.; डाल्स्टेड, टि.; ल्वीन, जि.; मे, आर.; स्टर्म, ए.
[पृष्ठ २४-मा भएको चित्र]
हामीलाई कहाँ खटाइने हो?