“तपाईंहरूले यहोवाका साक्षीहरूबारे मेरो विचारधारा नै परिवर्तन गरिदिनुभयो”
पोल्याण्डका झ्यालखानाका अधिकारीले अक्टोबर १५, १९९८ अंकको एउटा लेखमा रिपोर्ट गरिएको यहोवाका साक्षीहरूको कार्यप्रति यस्तो प्रतिक्रिया देखाए। “जब ढुंगाजस्तो कठोर हृदय पग्लन्छ” लेखमा पोल्याण्डको भ्वउफ झ्यालखानाका कैदीहरूलाई यहोवाका साक्षीहरूले प्रचार गर्दा प्राप्त सफलताबारे रिपोर्ट गरिएको थियो।
माथि उल्लिखित प्रहरीधरहरा पत्रिका जनसाधारणको लागि उपलब्ध गर्नुअघि कैदीहरूलाई यस पत्रिका उपलब्ध गर्न सेप्टेम्बर १३, १९९८ मा भ्वउफ झ्यालखानामा विशेष सभाको आयोजना गरिएको थियो। त्यस सभामा स्थानीय साक्षीहरू, बप्तिस्माप्राप्त तथा अन्य जिज्ञासु कैदीहरू र झ्यालखानाका थुप्रै अधिकारीहरूलाई आमन्त्रित गरियो। उपस्थित भएका कोही कोहीले गरेका केही टिप्पणीहरू यसप्रकार छन्।
पाँच वर्षभन्दा अघि झ्यालखानामै बप्तिस्मा लिएका यर्जी नाउँ गरेका यहोवाका साक्षी यसो भन्छन्: “हामीलाई मदत गर्न नजिकैका मण्डलीका भाइहरूले धेरै प्रयास गरे भनी पढ्न पाउँदा मलाई असाध्यै खुसी लाग्यो।” तिनी अझ यसो भन्छन्: “म प्रगति गर्न सधैं प्रयास गरिरहन्छु र यहोवाले मलाई निकै छाँटकाँटहरू गर्न मदत दिनुभएको छ।”
जड्ज्शवाफ नाउँ गरेका अर्का कैदीले झ्यालखानामा साक्षी दिने सन्दर्भमा यसो भने: “अहिले चार जना बप्तिस्माको लागि तयार हुँदैछन् र अन्य नयाँ जिज्ञासु व्यक्तिहरू हाम्रो सभामा उपस्थित भइरहेका छन्। सेवकाई अझ राम्ररी गर्न यो लेख एउटा शक्तिशाली उत्प्रेरणा हो।” जड्ज्शवाफले झ्यालखानामा अझ १९ वर्ष बिताउन बाँकी भए तापनि कस्तो सकारात्मक मनोवृत्ति!
भ्वउफ झ्यालखानाको लेख पढेपछि झ्यालखानाका अधिकारीले यसो भने: “हामीले निकै सम्मानित महसुस गरेका छौं। हाम्रो यस झ्यालखानाले विश्वभरि १३० भाषाहरूमा यस्तो सकारात्मक प्रचारप्रसार पाउला भनेर मैले कहिल्यै सोचेको थिइनँ। मलाई तपाईंहरू मन पर्छ र कैदीहरूको खातिर तपाईंहरूले गर्नुभएको प्रयासको मूल्यांकन गर्छु।” अर्का अधिकारीले भने: “तपाईंहरूले यहोवाका साक्षीहरूबारे मेरो विचारधारा नै परिवर्तन गरिदिनुभएको छ। पहिला त मलाई तपाईंहरू धार्मिक कट्टरपन्थीहरू जस्तो लाग्थ्यो। अहिले चाहिं तपाईंहरू सैद्धान्तिक मानिसहरू हुनुहुन्छ भनी थाह पाएँ।”
भ्वउफ झ्यालखानाका निर्देशक मारेक गियोसले हाँस्दै यसो भने: “तपाईंहरू यस काममा सफल हुनुहोला भनेर मलाई पटक्कै लागेको थिएन। तपाईंहरू पनि कैदीहरूलाई बाइबलीय मदत दिन खोज्ने अन्य धार्मिक समूहहरूजस्तै ठानेका थियौं। तथापि, तपाईंहरूको सुरुको गतिविधिको नतिजा देखेपछि हामीले सहयोग गर्ने निर्णय गऱ्यौं। तपाईंहरू झर्को नमानी यहाँ लगातार आउनुभएको ९ वर्ष भइसक्यो र तपाईंहरूले जे गरिरहनुभएको छ, म त्यसको मूल्यांकन गर्छु।”
तर सामान्यतया कैदमा भएका अरूले कस्तो प्रतिक्रिया देखाए? कैदीहरूले यति धेरै चासो देखाए कि झ्यालखानामा भएका साक्षीहरूको पत्रिकाहरू सबै सिद्धियो। झ्यालखानाका अधिकारीहरूले पनि चासो देखाए र अझ थप ४० प्रतिहरू मगाए। बढ्दो मागलाई ध्यानमा राखेर स्थानीय मण्डलीहरूले कैदमा भएका भाइहरूलाई थप १०० प्रतिहरू उपलब्ध गरे। यसको साथसाथै झ्यालखानाको सभामा उपस्थिति पनि बढ्यो।
यहोवाका साक्षीहरूलाई निकै मदत गरेका झ्यालखानाका अधिकारी पियोट होडिनले यसो भने: “हाम्रो झ्यालखानाको सबै ठाउँहरूमा हामीले यस लेख प्रदर्शित गर्ने निर्णय गऱ्यौं। आशा छ, तपाईंहरूसित अहिलेसम्म अध्ययन नगरेका अन्य कैदीहरूले पनि यो पत्रिका पढ्नेछन्।”
साक्षीहरूको असल उदाहरण तथा प्रचार कार्यमा तिनीहरूको कटिबद्ध प्रयासले राम्रा नतिजाहरू भएको छ। बप्तिस्माको निम्ति तयार भइसकेका १५ कैदीहरूको अलावा झ्यालखानाका २ जना अधिकारीहरूले यहोवालाई आफ्नो जीवन समर्पण गरेका छन् र अर्का एक जनाले बाइबल अध्ययनको निम्ति आग्रह गरेका छन्। निस्सन्देह, भ्वउफ झ्यालखानामा प्रचार गरेका भाइहरू यो सफलताको श्रेय यहोवा परमेश्वरलाई दिन्छन्।—१ कोरिन्थी ३:६, ७ तुलना गर्नुहोस्।
[पृष्ठ २८-मा भएको चित्र]
झ्यालखानाको भाषण कक्षमा पत्रिका प्रस्तुतिको बेला तीन जना साक्षीहरू तथा एक कैदी