बाइबलका आफ्ना विद्यार्थीहरूको हृदयलाई प्रभावित पार्नु होस्
१ तपाईंसित बाइबल अध्ययन गर्ने विद्यार्थीले सिकेका कुराहरूलाई प्रयोगमा ल्याएको के तपाईं चाहनु हुन्छ? प्रयोगमा ल्याएनन् भने उनले सिकिरहेको ज्ञानबाट लाभ उठाउन सक्ने छैनन्। अतः विद्यार्थीलाई सिकेका कुराहरू प्रयोगमा ल्याउन प्रेरित गर्न तपाईंले उनको हृदयलाई प्रभावित पार्नु पर्छ। सा० यु० ३३-को पेन्तीकोसको दिनमा प्रेरित पत्रुसको जोसिलो भाषण करीब ३,००० मानिसहरूको “हृदयमा गड़यो,” तिनीहरूले “कुरा ग्रहण गरे” र बप्तिस्मा लिए। (प्रेरित २:३७, ४१) तपाईंसित बाइबल अध्ययन गर्ने विद्यार्थीको हृदयलाई तपाईंले कसरी प्रभावित पार्न सक्नुहुन्छ?
२ राम्ररी तयारी गर्नुहोस्: एकै पटकमा थुप्रै कुरा अध्ययन गर्ने कोशिश नगर्नु होस् नत्र भने अध्ययनको विषयमाथि विचारविमर्श गर्न थोरै मात्र समय रहला। कुन-कुन कुरामाथि जोड दिनु हुनेछ, त्यो पहिले बाट नै निर्धारित गर्नुहोस्। दिइएका शास्त्रपदहरूलाई पनि तपाईंले बुझ्नु भएको छ र तिनलाई प्रभावकारी ढङ्गमा प्रयोग गर्न सक्नुहुन्छ भनेर मनमा पक्का गरी लिनु होस्। विद्यार्थीको पृष्ठभूमिले गर्दा उनको मनमा उठ्न सक्ने प्रश्नहरूबारे पहिले नै विचार गर्नु होस्। आफ्नो विद्यार्थीसित राम्ररी परिचित हुनुहुन्छ भने उनलाई चाहिएको खास जानकारी आफूसित हुनु तपाईंका लागि मद्दतकारी हुनेछ।
३ येशूको शिक्षा-प्रणाली अनुकरण गर्नुहोस्: गाह्रो कुरालाई सरल पार्न र आफ्ना विद्यार्थीहरूलाई हर परिस्थितिको मर्म बुझाउन येशू उदाहरणहरू चलाउनु हुन्थ्यो। (लूका १०:२९-३७) त्यसैगरी तपाईं पनि आफ्नो विद्यार्थीको हृदयमा असल-असल शिक्षाहरूको छाप बसाल्न चाहनु हुन्छ भने सरल उदाहरणहरू प्रयोग गर्नुहोस्। दैनिक जीवनका सामान्य कुराहरूबाट ती उदाहरणहरू लिने गर्नुहोस् र तिनलाई विद्यार्थीको विशेष परिस्थितसित मिल्ने गरी प्रयोग गर्नु होस्।
४ येशूले देखाउनु भए झैं हामीले पनि बाइबलका विद्यार्थीहरूको हृदयलाई प्रभावित पार्ने प्रश्नहरूको मदत लिन सक्छौं। (लूका १०:३६) तर विद्यार्थीले पुस्तकबाट जवाफ पढेर सुनाइ दिए भन्दैमा तपाईं सन्तुष्ट हुनु भएन। उनले पहिले विचारै नगरेको निष्कर्षतिर उनको ध्यान आकर्षित गराउने प्रश्नहरू सोध्नु होस्। यसले विद्यार्थीलाई आफ्नो सोच्ने शक्तिको विकास गर्ने मदत पनि दिन्छ। कुनै खास विषयबारे उनको दृष्टिकोण पता लाउने प्रश्नहरू सोध्ने गर्नुहोस्। यसप्रकार उनलाई कुन कुन क्षेत्रमा मदतको खाँचो छ, सो बुझ्न सकिन्छ र त्यही बमोजिम सहायता दिन सक्नुहुनेछ।
५ बाइबल विद्यार्थीले प्रगति गरेको छैन भने यसको कारण तपाईंले उनलाई नै भन्न लाउने प्रयास गर्नु आवश्यक छ। यसो गर्नका लागि तपाईं सायद नियमित बाइबल अध्ययनको समयबाहेक अरू नै समयमा उनलाई भेट्न जान सक्नुहुन्छ। उनी किन कदम चाल्न हिचकिचाइ रहेछन्? शास्त्रका कुनै कुरा उनले बुझेका छैनन कि? आफ्नो जीवनशैलीमा कुनै खास छाँटकाँट ल्याउन उनी अनिच्छुक छन् कि? बाइबल विद्यार्थी ‘दोधारमा बस्न’ खोज्दैछन् भने यसको खतरा बुझ्ने उनलाई मदत दिनुहोस्।—१ राजा १८:२१.
६ चासो देखाउने मानिसहरूलाई सच्चाइ सिकाउने काम जीवन बचाउने काम हो भनेर प्रेरित पावलले बुझेका थिए। त्यसैकारण त उनले सबै मसीहीहरूलाई ‘आफ्नो विषयमा र आफ्नो शिक्षाको विषयमा होसियार’ हुन आग्रह गरे। (१ तिमो० ४:१६) तपाईं जुनजुन व्यक्तिहरूसित बाइबल अध्ययन गर्नुहुन्छ, तिनीहरूले बाइबल र विश्व घटनाहरूको मोटामोटी ज्ञान लिएर मात्र पुग्दैन। तिनीहरूले यहोवा र येशूको विषयमा सही ज्ञान लिनु पर्छ र उहाँहरूसित न्यानो व्यक्तिगत सम्बन्ध बढाउने मदत तपाईंले तिनीहरूलाई दिनु पर्छ। तिनीहरूले सो गरे भने मात्र कामद्वारा आफ्नो विश्वासको प्रमाण दिन सक्नेछन्। (याकूब २:१७, २१, २२) विद्यार्थीको हृदय प्रभावित भएपछि यहोवाको महिमा बढाउने र आफ्नै जीवन बचाउने मार्ग अपनाउन उनी उत्प्रेरित हुनेछन्।—हितो० २:२०-२२.