ईश्वरतान्त्रिक सेवकाई पाठशालाबाट पूर्ण लाभ उठाउने
१ प्रभावशाली ढङ्गमा अरूलाई बाइबलका सत्यताहरू बताउने “शिक्षण कला” को प्रशिक्षण दिन ईश्वरतान्त्रिक सेवकाई पाठशाला सहायक प्रमाणित भएको छ। (२ तिमो. ४:२ न्यु व.) बाइबलका विभिन्न विषयहरूमा हामी प्रत्येक हप्ता मूल्यवान अन्तर्दृष्टि प्राप्त गर्छौं। यस पाठशालाले प्रदान गर्ने महत्त्वपूर्ण सल्लाहबाट पूर्ण लाभ उठाइरहेका छौं भनी हामी कसरी निश्चित गर्न सक्छौं?
२ सभामा तपाईंले सिक्न सक्नु हुने चाखलाग्दा बुँदाहरूबारे पाठशाला निरीक्षकले सभाको आरम्भमा प्रकाश पार्नुहुने टिप्पणीहरूलाई ध्यान दिएर सुन्नुहोस्। उनले उठाउन सक्ने कुनै पनि प्रश्नहरू र त्यसका उत्तरहरू तपाईंले क्षेत्र सेवकाईमा कसरी प्रयोग गर्न सक्नुहुन्छ, त्यो सोच्नुहोस्।
३ निर्देशन भाषण मुद्रित पाठ्यक्रमको पुनरावृत्ति मात्र होइन। जानकारीको व्यावहारिक मूल्य र त्यसबाट तपाईंले व्यक्तिगत तवरमा कसरी लाभ पाउन सक्नुहुनेछ, त्यसमा यो केन्द्रित हुन्छ। अग्रिम तयारी गर्नाले मुख्य बुँदाहरूमा ध्यान केन्द्रित गर्न र भाषणपश्चात् हुने मौखिक पुनरावृत्तिमा भाग लिन मदत दिनेछ।
४ नियमित तवरमा साप्ताहिक बाइबल पढाइ गर्नाले परमेश्वरको वचनप्रति तपाईंको मूल्याङ्कन अझ गहिरो हुनेछ। थप अनुसन्धान गर्नाले नयाँ तथा चाखलाग्दा विवरणहरू प्रशस्त पाउन सकिन्छ जसले सत्य अझ राम्ररी बुझ्न तपाईंलाई मदत दिनेछ। बाइबल पढाइका विशेषताहरू प्रस्तुत गर्दा बाइबलको विवरण मात्र दोहोऱ्याईंदैन। यो प्रस्तुत गर्ने वक्ताले संक्षिप्त पुनरावृत्तिपछि निर्दिष्ट अंशका उल्लेखनीय बुँदाहरू प्रकाश पार्नेछ र हाम्रो जीवन तथा उपासनासित ती कुराहरू कसरी सम्बन्धित छन् भनी देखाउनेछ। अझ राम्ररी बाइबलका निर्देशनहरू प्रयोग गर्न सिक्न ध्यान दिएर सुन्नुहोस्।—भजन. ११९:१०५.
५ तपाईंलाई विद्यार्थी भाषण दिने जिम्मा दिइएको छ भने हाल काम गरिरहनुभएको सल्लाह बुँदामाथि ध्यान दिनुहोस्। त्यस भाषा खूबीसित सम्बन्धित सुझावहरू स्कूल गाइडबुक मा पढ्नुहोस् र त्यसलाई प्रयोग गर्ने प्रयास गर्नुहोस्। आफ्नो भाषणको निम्ति चाहिने सामग्रीहरू छान्नुहुँदा क्षेत्र सेवकाईमा व्यावहारिक हुने बुँदाहरूलाई जोड दिने प्रयास गर्नुहोस्।—sg pp. 96-9.
६ यदि तपाईं भाषण न. ३ अथवा भाषण न. ४ दिन खटाइएको बहिनी हुनुहुन्छ भने विषयवस्तुलाई वास्तविक परिस्थितिमा प्रस्तुत गर्ने प्रयास गर्नुहोस्। तपाईंले भन्नुहुने प्रत्येक बुँदासित घरधनी सहमत हुन पनि सक्छ, नहुन पनि सक्छ; त्यस बुँदासित सम्बन्धित बाइबलको आधारभूत सिद्धान्त एक जना व्यक्तिलाई कसरी बुझाउनुहुनेछ भनी देखाउने प्रयत्न गर्नुहोस्। (sg pp. 153-8) यसो गर्नाले क्षेत्र सेवकाईमा त्यस्तै प्रकारका अवरोधहरू आइपर्दा कसरी सामना गर्ने भनी बुझ्न स्रोताहरूलाई मदत गर्नेछ। अग्रिम तयारी गर्नुहोस् र तपाईंको घरधनीसित पूर्वाभ्यास गर्ने प्रबन्ध मिलाउनुहोस्। सभा सुरु भइसकेपछि अभ्यास गर्ने खाँचो पर्नु नपर्ने हो।
७ भाषण दिने विद्यार्थीहरूलाई मञ्चको अगिल्तिर बस्न प्रोत्साहन दिइएको छ। यसो गर्दा समय बच्छ र पाठशाला निरीक्षकले आफ्ना टिप्पणीहरू व्यक्तिगत ढङ्गमा दिन सक्छन्। उनले दिने स्कूल गाइडबुक मा आधारित दयालु तथा विशिष्ट सल्लाहहरूबाट सबैले लाभ उठाउन सक्छन्। उनले भाषा खूबी सल्लाह सूचीको क्रमानुसार भाषा खूबी बुँदाहरू नहेर्न पनि सक्छ; तपाईंको सर्वोत्तम उन्नति गर्न तत्काल आवश्यक बुँदा उनले छान्नुहुनेछ।
८ प्रत्येक हप्ता ईश्वरतान्त्रिक सेवकाई पाठशालाको निम्ति तयारी गर्ने र उपस्थित हुने यी असल कारणहरू हुन्। प्राप्त सल्लाहले हामीलाई बुद्धिमान र सेवकाईमा निपुण हुन मदत दिन सक्छ।—हितो. १:५.