सत्य बाँड्न पत्रिकाहरू प्रयोग गर्नुहोस्
१ बढाइचढाइ गरिने विज्ञापन, भ्रमात्मक राजनैतिक प्रतिज्ञाहरू र छली अन्तर्राष्ट्रिय दाबीहरूले गर्दा सत्य, तथ्यपूर्ण जानकारी आजको समाजमा पाउन निकै गाह्रो छ। यस सन्दर्भमा प्रहरीधरहरा तथा अवेक! अतुलनीय छन् किनभने ती पत्रिकाहरूले मात्र परमेश्वरको राज्यसित सम्बन्धित सत्यको घोषणा गर्छ र त्यसले ल्याउने अनन्त आशिषहरूको आनन्द उठाउन सबैले के गर्नुपर्छ भनी वर्णन गर्छ।
२ एउटा देशको सूचना मन्त्रालयका अधिकृतले ती पत्रिकाहरू वितरण गर्ने अनुमति प्राप्त गर्न खुशीसाथ मदत दिए, तिनले यी दुई पत्रिकाहरूको मूल्याङ्कन गर्थे। तिनले भने: “मेरो विचारमा प्रहरीधरहरा सर्वोत्तम पत्रिकाहरूमध्ये एक हो; मदत गर्ने मौका पाएकोमा म निकै खुशी छु।” जीवनदायी ज्ञान दिन सक्ने यी पत्रिकाहरू वितरण गरेर अरूलाई मदत गर्न पाउनु हाम्रो सुअवसर हो। (यूह. १७:३) यी मूल्यवान पत्रिकाहरू साथै ग्राहक बन्ने प्रस्ताव तपाईंले मे महिनामा कसरी प्रस्तुत गर्नुहुनेछ? शायद निम्न सुझावहरू मदतकारी हुनेछन्।
३ मे १५ को “वाचटावर” का मुख्य लेखहरू प्रस्तुत गर्दै हुनुहुन्छ भने यसो भन्न सक्नुहुन्छ:
▪“संसारमा सबैभन्दा बढी बिक्ने पुस्तकबारे हामी मानिसहरूसित कुरा गरिरहेका छौं। त्यो कुन हो, के तपाईंलाई थाहा छ? [जवाफ दिने मौका दिनुहोस्।] हामी बाइबलबारे कुरा गरिरहेका छौं। यत्तिका धेरै मानिसहरूले बाइबल किन्नुमा पक्कै पनि राम्रो कारण होला। त्यो कारण २ तिमोथी ३:१६ मा पाइन्छ।” त्यो पद पढिसक्नुभएपछि कुनै एउटा लेखका उपयुक्त बुँदाहरू प्रकाश पार्नुहोस्।
४ अथवा छोटो परिचय दिइसक्नुभएपछि तपाईंले यस्तै केही भन्न सक्नुहुन्छ:
▪“बच्चाहरूले सामना गर्ने समस्याहरूबारे हालका वर्षहरूमा विश्वव्यापी तवरमा निकै चिन्ता व्यक्त भइरहेको शायद तपाईंले याद गर्नुभएकै होला। स्थानीय क्षेत्रमा बच्चाहरूका समस्याहरूमध्ये कुन चाहिं तपाईंलाई चिन्ताजनक लाग्छ?” जवाफ दिने मौका दिनुहोस्। मे ८ को अवेक! मुख्य लेखहरूमा छलफल गरिएअनुसार संसारभरि बच्चाहरूले भोग्नु परिरहेका केही गम्भीर समस्याहरूलाई औंल्याउन सक्नुहुन्छ। (अर्ध-मासिक संस्करणहरू; मासिक संस्करणहरू प्रस्तुत गर्दा तपाईंले लागू पदार्थको कुलत समस्याबारे उल्लेख गर्न सक्नुहुन्छ।) अनि परमेश्वरको राज्यले प्रदान गर्ने समाधानतर्फ ध्यान केन्द्रित गर्नुहोस्।
५ सुरुमा अलिक चासो देखाएको तर कुनै खास परिणाम नआएका व्यक्तिहरूको लामो सूची तपाईंको पुनः भेटको रेकर्डमा होला। कम चासो देखाएकोले तिनीहरूकहाँ पुनः फर्केर जाने आवश्यकता तपाईंले नदेख्नु होला। तर तपाईंले यो सूची प्रयोग गरेर पत्रिका मार्ग बनाउन सक्नुहुन्छ। कुनै व्यक्ति विशेषलाई चासो लाग्ने विषय पाउनु भयो भने त्यस व्यक्तिकहाँ गएर पत्रिका प्रस्तुत गर्न नबिर्सनुहोस्।
६ अनौपचारिक साक्षी: पत्रिकाहरूमा चासो जगाउने यो एउटा अत्युत्तम तरिका हो। ध्यानाकर्षक आवरणहरूलाई बुद्धिमानीसाथ प्रदर्शन गर्नाले पनि वार्तालाप सुरु गर्न पर्याप्त हुन्छ। सहकर्मीहरूले देखोस् भनेर एउटी बहिनीले पत्रिकाका केही अङ्कहरू आफ्नो टेबुलमा राखिन्; यसरी तिनले थुप्रै प्रतिहरू वितरण गर्न सकिन्। केही प्रतिहरू सधैं आफूसित राख्ने गर्नुहोस् र यो महिना तपाईं बजार जाँदा, स्कूल जाँदा, बस चढ्दा अथवा अन्य ठाउँमा मानिसहरूलाई भेट्नु हुँदा ती वितरण गर्न अग्रसर हुनुहोस्।
७ प्रहरीधरहरा र अवेक! पत्रिकाद्वारा हामीले यहोवा र उहाँको उपासनाबारे महत्त्वपूर्ण प्रश्नका उत्तरहरू पाएका छौं। अरूलाई “सत्य परमेश्वर [यहोवा]” लाई चिन्न मदत दिन हामी यथासम्भव हर तरिकाबाट यी पत्रिकाहरू प्रयोग गर्न चाहन्छौं।—भजन. ३१:५.