मण्डली पुस्तक अध्ययनले शैक्षिक क्रियाकलापहरू प्रवर्धन गर्छ
१ यहोवाको सङ्गठनको शैक्षिक कार्यक्रममा मण्डली पुस्तक अध्ययनले महत्त्वपूर्ण भूमिका खेल्छ। सबैलाई यस अध्ययनमा उपस्थित हुन सुविधा पर्ने गरी पुस्तक अध्ययन केन्द्रहरू ठाउँ ठाउँमा छरिएका हुन्छन्। आफ्नै छिमेकमा अध्ययन समूह भएकोले सभामा उपस्थित हुने निमन्त्रणा इच्छुक व्यक्तिहरूले सजिलै स्वीकार्न सक्छन्।
२ प्रत्येक समूहलाई सानो राख्ने प्रयास गरिन्छ। यसो गर्दा सञ्चालकले सबैलाई व्यक्तिगत मदत पुऱ्याउन सक्छ। सबैले एउटै गतिमा सिक्दैनन्। अग्रिम तयारी गरेर पनि कुनै बुँदा बुझ्न कसैलाई गाह्रो परेको छ भने सञ्चालकले अध्ययनपश्चात् पुनः छलफल गर्न सक्छ। यसबाहेक, समूह सानो भएमा टिप्पणीहरू गर्ने र शास्त्रपदहरू पढेर भाग लिने मौका बढी पाइन्छ। नियमित तवरमा टिप्पणी दिएर के तपाईं छलफलमा योगदान दिनुहुन्छ? के तपाईं आफ्नै शब्दमा जवाफ दिने प्रयास गर्नुहुन्छ? सहभागी हुने तपाईंको तत्परता तपाईं र अरूको निम्ति लाभदायक हुन सक्छ। तयारी गर्दा पाठका केही बुँदाहरू व्यक्तिगत तवरमा तपाईंले कसरी प्रयोग गर्न सक्नुहुन्छ भनी बुझ्न आफ्ना ज्ञानेन्द्रियहरूको अभ्यास गर्नुहोस्।—हिब्रू ५:१४.
३ पुस्तक अध्ययन सञ्चालकले प्रयोग गरेका शिक्षण पद्धतिहरू माथि ध्यान दिनुभएर तपाईंले चाखलाग्दो तथा शिक्षाप्रद ढङ्गमा गृह बाइबल अध्ययनहरू सञ्चालन गर्न सिक्न सक्नुहुन्छ। योग्य भाइले अनुच्छेदहरू पढिसकेपछि प्रश्नहरू छलफल गरिन्छ। सबैले बुझ्न सकिने गरी बोल्न अध्ययन सञ्चालकले सबैलाई प्रोत्साहन दिन्छ। समयले भ्याएमा उद्धरित शास्त्रपदहरू कसरी लागू हुन्छन् भनी बुझ्ने मदत दिन सञ्चालकले स्रोताहरूबाट टिप्पणीहरू पाउने प्रयास गर्नेछ। (नहेम्याह ८:८ तुलना गर्नुहोस्।) मुख्य बुँदा बुझाउन उनले कहिलेकाहीं आफ्नै छोटो स्पष्टीकरण थप्न अथवा सहायक प्रश्नहरू सोध्न सक्छ। दिइएको जानकारी हाम्रो जीवनसित कसरी सम्बन्धित छ भनेर उदाहरण अथवा दृष्टान्तले पनि हामीलाई बुझ्न मदत दिन सक्छ।
४ कुनै कुनै मण्डली पुस्तक अध्ययन समूहको उपस्थिति तुलनात्मक अनुपातमा कम हुन्छ। के तपाईं नियमित तवरमा उपस्थित हुनुहुन्छ? हुनुहुन्न भने तपाईंले एउटा महत्त्वपूर्ण प्रबन्ध गुमाइरहनु भएको छ। यहोवाले हाम्रो हेरचाह गर्नुहुन्छ भनी प्रदर्शन गर्नुहुने एउटा तरिका पुस्तक अध्ययनको प्रबन्ध हो। (१ पत्रु. ५:७) हामी आध्यात्मिकतामा बलियो होस् भनेर ज्ञान र बुद्धिमा बढेको उहाँ चाहनुहुन्छ। तर अर्कोतिर, यहोवा र उहाँको सङ्गठनका लागि हामी कम उपयोगी होस् भनेर शैतानले हाम्रो आध्यात्मिक वृद्धिमा अवरोध खडा गरी कमजोर बनाउन चाहन्छ। यसो हुन नदिनुहोस्! यस घनिष्ठ समूहको न्यानो, मायालु वातावरणले तपाईंको हृदय छोओस् र यहोवाको प्रशंसा गरिरहन उत्प्रेरित गरोस्।—भजन. १११:१ तुलना गर्नुहोस्।
५ प्रकाशकहरूको सुविधा हेरेर मण्डली पुस्तक अध्ययन समूहहरूमा सेवकाईको सभा प्रबन्ध गरिन्छ। ती सभा हप्ताको बीचमा, सप्ताहन्तमा अथवा सन्ध्याकालीन साक्षी दिनको निम्ति हुन सक्छ। पर्याप्त क्षेत्र र क्षेत्रमा अगुवाई लिने कोही छ भनी पुस्तक अध्ययन सञ्चालकले निश्चित गर्छ। क्षेत्र सेवकाईको निम्ति सभाहरू १०-१५ मिनेटभन्दा लामो हुनुहुँदैन। प्रचार कार्यसित सम्बन्धित सञ्चालकले छोटकरीमा दैनिक पद छलफल गर्न र क्षेत्र सेवकाईको निम्ति एक दुई वटा विशिष्ट सुझावहरू दिन तथा तत्कालीन प्रस्तुतिको छोटो प्रदर्शन देखाउन सक्छ।
६ समयको दौडान सञ्चालकले आफ्नो समूहका प्रत्येक व्यक्तिसित व्यक्तिगत तवरमा क्षेत्र सेवकाईमा भाग लिने र उपयुक्त प्रोत्साहन तथा प्रशिक्षण दिने प्रयास गर्छ।—तुलना गर्नुहोस् मर्कूस ३:१४; लूका ८:१.