जवानहरूलाई तिनीहरू कसरी ‘रमाउन’ सक्छन् भनी बताउने
१ बाइबलका भविष्यवाणीहरूले संकेत गरेअनुसार विपत्तिजनक परिस्थितिहरू पूरा भइरहेको समयमा हामी बाँचिरहेका छौं। जवानहरूलगायत धेरै मानिसहरू निश्चिन्त, शान्त जीवन बिताउन कष्टप्रद समस्याहरूको समाधान खोजिरहेका छन्। कसरी ‘असन्तुष्टतालाई मनबाट हटाउने र दुःखलाई टकटक्याउने’ भनी बाइबलको सल्लाहबाट तिनीहरूले लाभ उठाउन सक्छन्। (उप. ११:९, १०) मार्च महिनामा यंग पिपल आस्क (जवान मानिसहरूले सोध्ने प्रश्नहरू) पुस्तक प्रस्तुत गरेर तिनीहरूलाई ‘रमाउन’ मदत दिने अवसर हामीसित छ। जवानहरू तथा मानवजातिले आज साधारणतया सामना गर्ने समस्याहरू बाइबलमा भविष्यवाणी गरिएको थियो र बाइबलले त्यसको समाधान प्रदान गर्छ भन्ने कुरा हामीले यो पुस्तक प्रस्तुत गर्दा मनमा राख्नुपर्छ। त्यसोभए हामी के भन्न सक्छौं?
२ यो प्रस्तुति प्रभावकारी हुन सक्छ:
▪“यस २० औं शताब्दीमा पारिवारिक बेमेल, पारपाचुके, एकाकीपन, यौनजन्य रोगहरू, लागू पदार्थ तथा मद्यपानसित सम्बन्धित समस्याहरू र अरू थुप्रै समस्याहरूले जवानहरूलाई दुःखी तुल्याएको छ। के तपाईंलाई यी समस्याहरूको कुनै समाधान छ जस्तो लाग्छ? [जवाफ दिने मौका दिनुहोस्।] यी सबै समस्याहरू बाइबलमा उल्लेख गरिएको थाहा पाउँदा थुप्रै मानिसहरू छक्क पर्छन्। उदाहरणको लागि, साथी बनाउने र त्यसलाई कायम गर्ने सम्बन्धमा येशूले आफ्नो प्रख्यात उपदेशमा भन्नुभएको सुनौलो नियम तपाईंले सुन्नु भएको होला। [यंग पिपल आस्क (जवान मानिसहरूले सोध्ने प्रश्नहरू) पुस्तक पल्टाउनुहोस् र पृष्ठ १६३ को अनुच्छेद १ बाट सुनौलो नियम पढ्नुहोस्।] परिवारभित्र र अरूसित शान्ति तथा एकता कायम गर्न मदत दिने अर्को सिद्धान्त रोमी १२:१७, १८ मा दिइएको छ। [त्यही पृष्ठको अनुच्छेद ३ बाट यो पढ्नुहोस्।] तपाईंको दैनिक जीवन सुगम तथा बढी आनन्ददायी बनाउन यी र अन्य सिद्धान्तहरू कसरी प्रयोग गर्ने भनी के तपाईं सिक्न चाहनुहुन्छ?” छलफल गरिएका विषयवस्तुहरू पृष्ठ ८ र ९ को सूचीबाट देखाउनुहोस् अनि पुस्तक प्रस्तुत गर्नुहोस्।
३ शायद यो प्रश्नले चाखलाग्दो छलफल सुरु गर्न सक्छ:
▪“जवानहरूलाई आफ्ना समस्याहरू सफलतापूर्वक सामना गर्ने मदत दिन के तपाईंलाई केही गर्न सकिन्छ जस्तो लाग्छ? [जवाफ दिने मौका दिनुहोस्।] आज सैद्धान्तिक शिक्षा प्रशस्त उपलब्ध छ भनी धेरै मानिसहरूलाई थाहा छ। तर नैतिक शिक्षा—जीवनको शिक्षा नि? उत्तम, आनन्दित जीवन बिताउन जवान तथा वृद्धहरूलाई मदत दिने के कुनै भरपर्दो स्रोत छ?” यशैया ४८:१७, १८ पढ्नुहोस् र यंग पिपल आस्क (जवान मानिसहरूले सोध्ने प्रश्नहरू) पुस्तकको पृष्ठ ६ मा २ अनुच्छेदको पछिल्लो भागमा टिप्पणी गर्नुहोस्। यस पुस्तकमा दिइएको बाइबल-आधारित सिद्धान्तबाट घरधनीले व्यक्तिगत तवरमा कसरी लाभ उठाउन सक्छन् भनी बुझाउनुहोस्।
४ यसो भन्न तपाईंलाई सजिलो लाग्न सक्छ:
▪“धेरै जवानहरू आफ्नो भविष्यबारे निराश छन् र आफ्ना छोराछोरीको हितको लागि आमा-बाबुहरू पनि उत्तिकै चिन्तित छन्। क्वेश्चन्स् यंग पिपल आस्क—आन्सर्स द्याट वर्क (जवान मानिसहरूले सोध्ने प्रश्नहरू—उपयोगी जवाफहरू) पुस्तकले जवानहरूलाई अहिले सन्तोषजनक, अर्थपूर्ण जीवन बिताउन मदत दिनुको साथै भविष्यको निम्ति आशा प्रदान गर्छ।” अध्याय ३८ लगायत केही अध्यायहरूका शीर्षकहरू देखाउनुहोस्। त्यसपछि पृष्ठ ३०६ पल्टाउनुहोस् र भविष्यको निम्ति यहोवाको उद्देश्य बताउनुहोस्। यस पुस्तकको एक प्रति लिन घरधनीलाई निम्त्याउनुहोस् र यसको व्यवहारिक जानकारी कसरी पढ्न तथा परिवारमा छलफल गर्न सकिन्छ भनी देखाउनुहोस्, जुन सबैको लागि लाभकारी अनि आज जवानहरूले सामना गर्ने थुप्रै समस्याहरूबाट अलग बस्न मदतकारी हुन सक्छ।
५ परमेश्वरको वचनमा पाइने सल्लाह सारा मानवजातिको निम्ति व्यवहारिक छ। सबैले बाइबलका शब्दहरू सुन्नुपर्छ। जवानहरू र अरूलाई यो रमाहटको स्रोतबारे बताउन हामी यथाशक्य गरौं।