पुस्तिकाहरूद्वारा परमेश्वरको राज्यको सुसमाचार उद्घोषणा गर्नुहोस्
१ सत्य थाह पाउनु र जोशका साथ सुसमाचार उद्घोषणा गरिरहेका मानिसहरू माझ हुनु कति आनन्दमय कुरा हो! परमेश्वरको संगठनभित्र नभएका मानिसहरूले परमेश्वरको राज्यको सुसमाचार सुन्नु अत्यन्त जरुरी छ। हाम्रा समस्याहरू—तिनीहरूको समाधान गर्न हामीलाई कसले मद्दत दिनेछ?, पृथ्वीमा सधैं जीवनको आनन्द उठाउनुहोस्! र “हेर! म सबै थोक नयाँ तुल्याउँदैछु” पुस्तिकाहरूमा परमेश्वरको राज्यको सत्यलाई सरल ढंगमा वर्णन गरिएको छ। परमेश्वरको राज्यअन्तर्गत पृथ्वीमा हुने जीवनलाई सजीव ढंगमा चित्रण गरिएको छ र यसले परमेश्वरको वचनमा बताएअनुसार परमेश्वरको राज्यका वास्तविकताहरूप्रति पाठकहरूको ध्यानाकर्षण गर्छ। निस्सन्देह, जिज्ञासु व्यक्तिलाई पुस्तिका दिनु त हाम्रो कार्यको सुरुआत मात्रै हो। (१ कोरि. ९:२३) ज्ञान जसले अनन्त जीवनतर्फ डोऱ्याउँछ पुस्तकद्वारा अध्ययन गर्ने प्रस्ताव राख्ने ध्येय राख्दै पुस्तिकाहरू दिएका सबै ठाउँहरूमा तदारुकता साथ फर्किहालौं। अगस्त महिनाको दौडान हामी यो कसरी गर्नसक्छौं?
२ “हाम्रा समस्याहरू—तिनीहरूको समाधान गर्न हामीलाई कसले मद्दत दिनेछ?” पुस्तिका प्रस्तुत गर्दा तपाईं यसो भन्न सक्नुहुन्छ:
▪“मैले कुरा गरेका थुप्रै मानिसहरूले संसारमा धेरै समस्याहरू छन् भनेर स्वीकार्छन् र ती समस्याहरू समाधान भएको हेर्न चाहने तिनीहरू बताउँछन्। [बेरोजगारी, बढ्दो अपराध वा लागू पदार्थको दुर्व्यसनजस्ता स्थानीय समस्याहरू उल्लेख गर्नुहोस्।] यी कुराहरूले गर्दा हामीलाई आफ्नै र हाम्रा प्रिय जनहरूको भविष्य एकदमै असुरक्षित भएको महसुस गराउँछ। यस्ता समस्याहरू केही पनि नभएको समय कहिल्यै आउला जस्तो के तपाईंलाई लाग्छ? [जवाफ दिने मौका दिनुहोस्।] तपाईंले बाइबलका केही अंशहरू पढ्ने मौका पाउनुभएको होला। पढ्नुभएको छ भने, त्यसले भविष्यबारे के प्रतिज्ञा गरेको छ तपाईंले पढ्नुभयो?” हाम्रा समस्याहरू पुस्तिकाको पृष्ठ १९ र २० पल्टाउनुहोस् अनि नयाँ संसारबारे त्यहाँ उद्धरित यशै. ३३:२४; ३५:५, ६, ७ र भज. ४६:९ वा ७२:१६ जस्ता केही प्रोत्साहनदायी शास्त्रपदहरू पढेर सुनाउनुहोस्। पुस्तिका प्रस्तुत गर्नुहोस्।
३ “हाम्रा समस्याहरू—तिनीहरूको समाधान गर्न हामीलाई कसले मद्दत दिनेछ?” पुस्तिका दिनुभएको थियो भने तपाईंले पुनःभेटमा यसरी वार्तालाप सुरु गर्न सक्नुहुन्छ:
▪“अघिल्लो भेटमा हामीले हाम्रा समस्याहरूको समाधान तथा उत्तम संसार स्थापना गर्ने परमेश्वरका प्रतिज्ञाहरूबारे छलफल गरेका थियौं। मैले तपाईंलाई दिएको पुस्तिकाले हामी बाइबलमा विश्वास गर्नसक्छौं कि सक्दैनौं र हाम्रै समयमा राम्रो अवस्थाहरू हुनेछन् भनेर कसरी थाह पाउनसक्छौं भन्ने विषयमा छलफल गर्छ। उदाहरणका लागि, हजारौं वर्षअधि बाइबलले हाम्रो समयमा हुने अवस्थाहरूबारे गरेको सही भविष्यवाणी र यी खराब अवस्थाहरू संसारमा हुने सन्निकट परिवर्तनको चिह्नका भाग हुन् भनेर यसले देखाउँछ।” हाम्रा समस्याहरू पुस्तिकाको पृष्ठ १२ पल्टाउनुहोस् र ‘चिह्न’ शीर्षकअन्तर्गत पहिलो अनुच्छेद पढेर सुनाउनुहोस्। अनि भन्नुहोस्: “के आज हामी यस्तै अवस्थाहरू देख्दैनौं र? यी कुराहरूले के संकेत गर्छ, तपाईंलाई थाह छ?” जवाफ दिने मौका दिनुहोस्। अनि २ पत्रुस ३:९, १३ पढ्नुहोस्। गृह बाइबल अध्ययनद्वारा अझ बढी सिक्न प्रोत्साहन दिनुहोस्।
४ “पृथ्वीमा सधैं जीवनको आनन्द उठाउनुहोस्!” पुस्तिका एकदमै संक्षिप्त प्रस्तुतिसहित प्रस्तुत गर्न सकिन्छ। यसको आवरण पृष्ठ देखाउँदै तपाईं यसो भन्न सक्नुहुन्छ:
▪“म तपाईंलाई रमाइलो सन्देश भएको एउटा कुरा देखाउन चाहन्छु।” पृथ्वीमा जीवन पुस्तिका पल्टाउनुहोस् र परिचयको पहिलो अनुच्छेद पढ्नुहोस्। अनि फेरि भन्नुहोस्: “यसले यो प्रश्नको जवाफ पनि दिन्छ [चित्र संख्या ८ माथिको शीर्षक पल्टाउनुहोस्] ‘मानिस किन मर्छ?’ चित्रहरू हेरेर अध्ययन गर्नु र यस पुस्तिकामा भएका उद्धरणहरू पढ्नु तपाईंलाई चाखलाग्दो लाग्नेछ। तपाईं त्यसो गर्न चाहनुहुन्छ भने यो प्रति राख्न सक्नुहुन्छ।” पुस्तिका स्वीकारेमा घरधनीलाई कुनै यस्तो प्रश्न सोध्नुहोस्: “यस्ता अवस्थाहरूमा बस्न के गर्नुपर्छ जस्तो तपाईंलाई लाग्छ?” अनि यस प्रश्नको जवाफ दिन फेरि आउनेछु भन्नुहोस्।
५ “पृथ्वीमा जीवन” पुस्तिका दिनुभएका ठाउँमा पुनःभेट गर्दा तपाईं के भन्नुहुनेछ? तपाईंले यसो भन्नुभए कसो होला:
▪पृथ्वीमा जीवन पुस्तिकाको चित्र संख्या ४९ देखाउनुहोस् र सोध्नुहोस्, “के यो चित्र राम्रो छैन? [जवाफ दिने मौका दिनुहोस्।] मैले तपाईंलाई पहिलो चोटि भेट्दा दिएको पुस्तिकामा यो चित्र छ। म तपाईंलाई अर्को पृष्ठको प्रश्न सोध्न चाहन्छु।” चित्र संख्या ५० पल्टाउनुहोस् अनि प्रश्न पढ्नुहोस्: “‘त्यो सुन्दर प्रमोदवनमा के तपाईं संधै भरी बांच्न चाहनु हुन्छ?’ [जवाफ दिने मौका दिनुहोस्।] तपाईं चाहनुहुन्छ भने, ध्यान दिनुहोस् तपाईंले गर्नुपर्ने कुराबारे यसले के भन्छ: ‘त्यसो भए, परमेश्वरले भन्नु भएको कुरोहरू सिख्नु होस।’ [यूहन्ना १७:३ पढ्नुहोस्।] म तपाईंसित निश्शुल्क बाइबल अध्ययन गर्न खुशी हुनेछु। के तपाईं चाहनुहुन्छ?” पुनः आउने निश्चित समय मिलाउनुहोस्।
६ “हेर! म सबै थोक नयाँ तुल्याउँदैछु” पुस्तिका प्रस्तुत गर्दा तपाईंले सम्पूर्ण आवरण चित्र देखाएर यस्तो प्रश्न सोध्न सक्नुहुन्छ:
▪“तपाईंको विचारमा सम्पूर्ण पृथ्वी यस्तो देखिन के गर्नुपर्छ होला?” जवाफ दिने मौका दिनुहोस्। त्यस चित्रबारे पृष्ठ ३ मा उल्लिखित केही विशेषताहरू बताउनुहोस्। अनि भन्नुहोस्: “अधिकांश मानिसहरूलाई यस्तो संसार बनाउन असम्भव लाग्छ। तर परमेश्वरको निम्ति यो कार्य असम्भव छैन। [अनुच्छेद ४३ का केही बुँदाहरू बताउनुहोस्; त्यसपछि यशैया ९:६, ७ पढ्नुहोस्।] सारा राष्ट्रका मानिसहरूले अद्भुत प्रमोदवनमा आनन्द उठाउने नयाँ संसारको प्रतिज्ञा परमेश्वरले गर्नुभएको छ। म चाहन्छु, तपाईं यो पुस्तिका पढ्नुहोस्। परमेश्वरले दिनुहुने अद्भुत भविष्यमा तपाईं अनि तपाईंको परिवारले कसरी आनन्द उठाउनसक्छ भनेर यस पुस्तिकाले देखाउनेछ।”
७ तपाईंले “हेर!” पुस्तिका चलाएर बाइबलबारे अझ बढी सिक्न किन आवश्यक छ भनी पुनःभेटमा बुझाउन सक्नुहुन्छ। फेरि आवरण पृष्ठ देखाएर यसो भन्नुभए कसो होला:
▪“मैले तपाईंलाई प्रथम चोटि यो चित्र देखाउँदा हामी दुवै यस्तो सुन्दर संसारमा बस्न चाहन्छौं भनी सहमत भएका थियौं। यो सम्भव पार्न हामी सबैले केही गर्नु आवश्यक छ।” “हेर!” पुस्तिकाको अनुच्छेद ५२ पल्टाएर त्यस अनुच्छेद र यूहन्ना १७:३ को शास्त्रपद पढ्नुहोस्। बाइबलको उचित शिक्षाबारे अनुच्छेद ५३ मा दिइएको उदाहरणसित मिल्दो सम्बन्धित जानकारी दिनुहोस् अनि यहोवाका साक्षीहरूले त्यस्तो निर्देशन घरमै निश्शुल्क दिन्छन् भनेर बताउनुहोस्। ज्ञान पुस्तक चलाएर अध्ययन गर्ने तरिका देखाउने प्रस्ताव राख्नुहोस्।
८ तपाईं अरू नै पुस्तिकाहरू चलाउँदै हुनुहुन्छ भने, उक्त सुझाउहरू नमुनाको रूपमा लिएर आफ्नै प्रस्तुतिहरू तयार पार्न सक्नुहुन्छ। चासो देखाएका सबै घरधनीहरूसित फलदायी पुनःभेट गर्न तिनीहरूको नाउँ, ठेगाना र चर्चा गरेको विषय टिपोट गर्न नबिर्सनुहोस्। राम्रो तयारी गर्नुहोस् र परमेश्वरको राज्यको सुसमाचार उद्घोषणा गर्दा यहोवाको आशिष् माग्नुहोस्।