चासो देखाउने जति सबैको निष्कपट चिन्ता गर्नुहोस्
१ विश्वव्यापी राज्य उद्घोषणाको चाँडै अन्त हुनेछ। त्यसपछि, “परमेश्वरलाई नचिन्नेहरू” विनाश हुनेछन्। (२ थिस्स. १:७-९) त्यसैले, अरूको जीवनप्रति साँच्चै चिन्तित भएको हुँदा यहोवाका जनहरू धेरैभन्दा धेरै मानिसहरूकहाँ राज्य सन्देश पुऱ्याउन उत्प्रेरित भइरहेका छन्।—सप. २:३.
२ “कल्याणको शुभ समाचार” सुन्न चाहने मानिसहरूको खोजीमा प्रत्येक महिना लाखौं घण्टा बिताइन्छ। (यशै. ५२:७) सबैभन्दा नयाँ नयाँ साहित्यहरू वितरणको नतिजा स्वरूप प्रहरीधरहरा र ब्यूँझनुहोस्!-को धेरै जना ग्राहक बन्न वा प्रति लिन अथवा परमेश्वर हामीबाट के चाहनुहुन्छ? पुस्तिका लिन राजी भएका छन्। ती मानिसहरूप्रतिको निःस्वार्थ चिन्ताले हामीलाई चासो देखाउने सबैलाई छिट्टै फेरि भेटेर कुरा गर्न जान उस्काउनुपर्छ।—हितो. ३:२७.
३ सही रेकर्ड राख्नुहोस्: घरधनीले देखाएको चासो र प्रस्तुत गरेको साहित्यको पूर्ण र सही रेकर्ड राख्नुभयो भने, तपाईंलाई धेरै सजिलो हुनेछ। घरधनीको नाउँ, ठेगाना, भेट गर्नुभएको दिन र समय, प्रस्तुत गर्नुभएको साहित्य र छलफल गर्नुभएको विषयजस्ता जानकारीहरूले तपाईंलाई पुनःभेट गर्न जाँदा अझ प्रभावकारी बनाउँछन्। साथै, यदि तपाईंले घरधनीले सुरुको भेटमा गरेको कुनै टिप्पणी पनि लेखेर राख्नुभएको छ भने, फर्केर जानुहुँदा प्रभावकारी ढंगमा त्यसै कुरालाई उल्लेख गर्दै छलफल सुरु गर्न सक्नुहुन्छ।
४ पुनःभेट गर्न छरितो हुनुहोस्: गत महिनामा तपाईंले साहित्य दिनुभएको मानिसहरूमध्ये कति जनालाई फेरि भेट्ने प्रयत्न गर्नुभयो? तिनीहरूसँग भेटघाटै नगरी हप्ता दिनै बितिसक्यो कि? तिनीहरूको अनन्त भलाइप्रतिको साँचो चिन्ताले जतिसक्दो चाँडो भेट्न तपाईंलाई घचघचाउनु पर्ने हो। हुनसक्छ भने अझ केही दिनमै भेट्नुहोस् ताकि तपाईंहरूले गर्नुभएको कुराकानी दिमागमा ताजै होस्। तिनीहरूले चासो देखाएको विषयमा छिट्टै गएर कुरा गर्दा ‘शैतानले छरिएको वचन लैजान पाउनेछैन।’—मर्कू. ४:१५.
५ तयारी अत्यावश्यक छ: पुनःभेटमा तपाईंको प्रभावकारिता तपाईंको तयारी गर्ने तरिकासँग सोझै सम्बन्धित छ। जानुभन्दा पहिले नै के कसो भन्ने हो, योजना बनाउनुहोस्। ग्राहक बन्ने अनुरोध गर्दा र चाहनुहुन्छ पुस्तिका प्रस्तुत गर्दा सफल हुन प्रयोग गर्न सकिने विभिन्न प्रस्तुतिहरूको नमुना अप्रिल १९९७ को हाम्रो राज्य सेवकाई-को अन्तिम पृष्ठमा दिइएको छ। त्यसपछि, तपाईं फर्किनु हुँदा घरधनीलाई बताउन केही सोचेको हुनुपर्छ। चासो सेलाउन नदिन के के भन्न सकिन्छ? बाइबल अध्ययन कसरी सुरु गर्न सकिन्छ?
६ पृथ्वीलाई सफा पारेर बस्न योग्य बनाउन के गर्नुपर्छ भन्ने विषयलाई अगाडि बढाउन तपाईंले यसो भन्नुभए पनि हुन्छ:
▪“यसअघि तपाईंलाई भेट्दा पृथ्वीलाई शान्त प्रमोदवन बनाउने हो भने, ठोस कदम नै चाल्नुपर्छ भन्ने निष्कर्षमा हामी पुगेका थियौं। के तपाईंलाई मानवजातिले त्यस्तो ठोस कदम चाल्नसक्छ जस्तो लाग्छ? [जवाफ दिने मौका दिनुहोस्।] यहाँ हेर्नुहोस् न, मानिसहरूको क्रियाकलापमा परमेश्वरले हस्तक्षेप गर्नुहुँदा के हुनेछ।” यशैया ३५:१ पढ्नुहोस्। त्यसपछि ज्ञान पुस्तकको पहिलो अध्याय पल्टाएर अनुच्छेद ११-१६ बाट मुख्य मुख्य कुराहरू देखाउँदै परमेश्वरले फत्ते गर्नुहुने कामहरू बताउनुहोस्। त्यसै पुस्तकबाट बाइबल अध्ययन गर्ने प्रस्ताव राखेर त्यस व्यक्तिलाई भेटिरहनुहोस्।
७ तपाईंले पहिलो भेटमा परमेश्वरको राज्यबारे कुरा गरेर “चाहनुहुन्छ” पुस्तिका प्रस्तुत गर्नुभएको थियो भने, अर्को पटक भेट्दा यस्तै केही भन्न सक्नुहुन्छ:
▪ “हामीले पछिल्लो पटक कुरा गर्दा परमेश्वरको राज्य वास्तविक सरकार हो र त्यसले पूरै पृथ्वीमाथि शासन गर्नेछ भनेर छलफल गरेका थियौं। येशू ख्रीष्ट यसको राजा हुनुहुनेछ भनेर बाइबलले बताउँछ। त्यस्तो प्रकारको सरकार र नेताबाट हुने फाइदाहरू के तपाईं बताउन सक्नुहुन्छ?” जवाफ दिने मौका दिनुहोस्। चाहनुहुन्छ पुस्तिकाको पाठ ६ पल्टाउनुहोस्। अनुच्छेद ६-७ का मुख्य मुख्य बुँदाहरू र पृष्ठ १३ मा भएको चित्र प्रयोग गर्दै परमेश्वरको राज्यले भविष्यमा मानिसजातिको लागि के के गर्नेछ, देखाउनुहोस्। दानियल २:४४ पढ्नुहोस् र उपयुक्त परिस्थिति छ भने ज्ञान पुस्तक देखाएर बाइबल अध्ययन गर्ने प्रस्ताव राख्नुहोस्।
८ संसारका धर्महरूले समस्या उत्पन्न गरेका छन् भन्ने कुरामा सहमत भएका कुनै व्यक्ति भेट्नुभएको थियो भने, पुनःभेट गर्न जाँदा तपाईंले यसो भन्नुभए पनि हुन्छ:
▪ “कुन धर्मले परमेश्वरको अनुमोदन पाएको छ होला भनेर के तपाईंले कहिल्यै सोच्नुभएको छ? [जवाफ दिने मौका दिनुहोस्।] परमेश्वर हामीबाट के चाहनुहुन्छ? नाउँ भएको यो पुस्तिकाले साँचो धर्मका लक्षणहरू चिन्न मदत गर्छ।” पाठ १३ पल्टाउनुहोस् र अनुच्छेद ३-७ बाट तेर्सो अक्षरमा भएका पाँच बुँदाहरू प्रकाश पार्नुहोस्। तपाईं अझ यसो भन्न सक्नुहुन्छ: “हामीले साँचो धर्म चिन्नु बाहेक, परमेश्वरले हामी प्रत्येकबाट के चाहनुहुन्छ, त्यो पनि थाह पाउनु अत्यावश्यक छ।” यूहन्ना ४:२३, २४ पढ्नुहोस्। अझ बढी छलफल गर्ने प्रस्ताव राख्नुहोस्। पुस्तिकाको पहिलो पाठ पल्टाउनुहोस् अनि अध्ययन गर्ने तरिका देखाउनुहोस्।
९ पारिवारिक आनन्दबारेको छलफललाई कायमै राख्न फर्कनुहुँदा तल उल्लेख गरिएजस्तै तरिकामा पनि भन्न सक्नुहुन्छ:
▪ “तपाईंलाई मैले पहिलो पटक भेट्दा परमेश्वरको वचन, बाइबलको सल्लाह पालन गर्नुमा नै पारिवारिक आनन्दको रहस्य छ भन्नेबारे बताएको थिएँ। जहाँसम्म आधुनिक पारिवारिक आवश्यकताको कुरा छ, तपाईंलाई बाइबल पुरानो जमानामा मात्रै काम लाग्ने पुस्तक जस्तो लाग्छ कि आज पनि उत्तिकै काम लाग्छ जस्तो लाग्छ?” जवाफ दिने मौका दिनुहोस्। ज्ञान पुस्तक झिक्नुहोस्। अध्याय २ पल्टाएर अनुच्छेद १३ पढ्नुहोस्। अनुच्छेद ३ मा दिइएका बुँदाहरूलाई चलाउँदै पारिवारिक बाइबल अध्ययन गर्ने प्रस्ताव राख्नुहोस्।
१० यसरी, सही रेकर्ड राखेर, आवश्यक तयारी गरेर र तिनीहरूको चासोलाई अझ अगाडि बढाउन छिट्टै भेट्न गएर हामी छिमेकीप्रति प्रेम प्रदर्शित गर्नसक्छौं र त्यस प्रेमले तिनीहरूलाई मुक्तिको मार्गतर्फ आकर्षित गर्नेछ।—मत्ती २२:३९; गला. ६:१०.