आमाबाबु हो—आफ्ना बच्चाहरूलाई प्रचार गर्न प्रशिक्षण दिनुहोस्
१ परमेश्वरलाई सेवा गर्न चाहने साँचो इच्छा भएका थुप्रै बच्चाहरू हाम्रो मण्डलीहरूमा हुनु आनन्दको कुरा हो। (उप. १२:१) यहोवाले उहाँको नाउँ प्रशंसा गर्न आमन्त्रित गर्नुभएको झुण्डमा तिनीहरू पनि समावेश छन्। (भज. १४८:१२-१४) तसर्थ, आमाबाबुले आफ्ना बच्चाहरूलाई दिनदिनै दिने प्रशिक्षणमा राज्य प्रचारबारे अरूलाई आफ्नो विश्वासबारे कसरी बताउने, त्यो पनि सिकाउनसक्छन्।—व्यव. ६:६, ७.
२ प्रगतिशील ढंगमा बच्चाहरूलाई प्रशिक्षण दिनुहोस्: क्षेत्र सेवकाईमा आमाबाबुसँगसँगै जान बच्चाहरूलाई कलिलै उमेरदेखि प्रशिक्षण दिनुपर्छ। सेवकाईमा जानुअघि बच्चालाई अर्थपूर्ण ढंगमा भाग लिन सिकाउनुहोस्। ढोकामा पुगेपछि केटाकेटीहरूले के गरेको चाहनुहुन्छ, पहिल्यै स्पष्ट पार्नुहोस्। स-साना केटाकेटीहरूले पनि पर्चा, हातेपर्ची दिएर मानिसहरूलाई राज्यभवनमा आउने निमन्त्रणा दिनसक्छन्। राम्ररी पढ्न जान्ने बच्चाहरूलाई कुनै शास्त्रपद पढ्न लगाउन सकिन्छ। छोटो प्रस्तुतिहरू चलाएर तिनीहरूले पत्रिकाहरू प्रस्तुत गर्नसक्छन्। अनुभव बढ्दै गएपछि तिनीहरूको प्रस्तुतिमा बाइबल चलाउन सिकाउनुहोस्। थुप्रै जवान प्रकाशकहरूले पत्रिका रूट सुरु गरेका छन् र नियमित तवरमा पुनःभेटहरू गर्छन्। आफ्नै उमेरको अर्को बच्चासित काम गर्नुभन्दा वयस्कसित काम गर्नु उत्तम हुनेछ। त्यस बच्चालाई सेवकाईको निम्ति प्रशिक्षण दिइँदैछ भनेर वयस्कले घरधनीलाई बताउनसक्छन्।
३ राज्य प्रकाशकको रूपमा योग्य हुन एउटी बच्चीले प्राचीनहरूको मदत मागिन्। त्यतिबेला तिनी पाँच वर्षकी मात्र थिइन् र पढ्न नजाने तापनि तिनले प्रभावकारी ढंगमा राज्य सन्देश प्रस्तुत गर्न सक्थिन्। तिनले प्रकाशनमा कहाँ कुन शास्त्रपद छ कण्ठ पार्थिन् र घरधनीलाई पढ्न आग्रह गर्थिन् अनि त्यसको अर्थ के हो बुझाउँथिन्।
४ नियमित तवरले सेवकाईमा भाग लिनको लागि व्यवस्थित तालिका बनाउनुपर्ने महत्त्वबारे पनि आमाबाबुले राम्रो नमुना बसाल्नुपर्छ। आमाबाबुले सेवकाईको निम्ति साप्ताहिक तालिका बनाएर त्यसैअनुसार लागिरहनुपर्छ ताकि बच्चाहरूले हप्ताको त्यस भाग प्रचारकार्यको लागि हो भनेर बुझ्नेछन्।
५ कलिलै उमेरदेखि बच्चाहरूलाई सेवकाईप्रति प्रेम जगाउन र आनन्द उठाउन प्रशिक्षण दिएमा भविष्यमा तिनीहरू धेरै सुअवसरहरूका लागि अघि बढ्न प्रेरित हुनेछन्। जस्तै, अग्रगामी सेवा। (१ कोरि. १५:५८) हामीमाझ भएका बच्चाहरूलाई यहोवाका प्रशंसकहरूको हैसियतमा राम्रो उन्नति गर्न सबैले प्रोत्साहन दिनुपर्छ।