तपाईंका छोराछोरीलाई यहोवाको प्रशंसा गर्न सिकाउनुहोस्
१. के साना केटाकेटीले यहोवाको प्रशंसा गर्न सक्छन्?
१ भजन १४८:१२, १३ ले केटाकेटीलाई यहोवाको नाउँको ‘प्रशंसा गर्न’ प्रोत्साहन दिन्छ। यस्तो प्रशंसा गर्ने थुप्रै केटाकेटीहरूको उदाहरण बाइबलमा पाइन्छ। उदाहरणका लागि, “शमूएल सानै बालक थिए, र . . . परमप्रभुको सेवामा निरन्तर लागिरहे।” (१ शमू. २:१८) इस्राएलमा भएका यहोवाका अगमवक्ताले नामानको कुष्ठरोग निको पार्न सक्छन् भनेर नामानकी पत्नीलाई सानी “ठिटीले” भनेकी थिइन्। (२ राजा ५:१-३) येशू मन्दिरमा प्रवेश गरेर अचम्मका कामहरू गर्दा “केटाकेटीहरू . . . होसन्ना दाऊदका पुत्रलाई” भन्दै चिच्याएका थिए। (मत्ती २१:१५) आमाबाबुले आफ्ना छोराछोरीलाई यहोवाको प्रशंसा गर्न कसरी सिकाउन सक्छन्?
२. आमाबाबुले आफ्ना छोराछोरीको लागि राम्रो उदाहरण बसाल्नु किन महत्त्वपूर्ण छ?
२ उदाहरण: आफ्ना छोराछोरीको हृदयसम्म सच्चाइ ठप्प बसाल्नुअघि इस्राएली बुबाहरूलाई नै पहिला यहोवालाई प्रेम गर्न अनि उहाँका आज्ञाहरू आफ्नो हृदयमा राख्न निर्देशन दिइएको थियो। (व्यव. ६:५-९) सेवकाईबारे प्रोत्साहनजनक कुरा गर्नुहुन्छ र यसलाई हरेक हप्ता आफ्नो तालिकाको भाग बनाउनुहुन्छ भने तपाईंका छोराछोरीलाई पनि सेवकाई महत्त्वपूर्ण र सन्तोषजनक लाग्नेछ।
३. एउटी बहिनीले आफ्नो आमाबाबुको उदाहरणबाट कसरी लाभ उठाइन्?
३ एउटी बहिनी विगतको मीठो सम्झना गर्दै भन्छिन्: “म सानी छँदा, हाम्रो परिवारको तालिकामा हरेक हप्ताको अन्तमा क्षेत्र सेवकाईमा भाग लिने योजना थियो। मेरा आमाबाबुलाई सेवकाई साँच्चै रमाइलो लाग्थ्यो भनेर मैले देखेकी थिएँ। समय बित्दै जाँदा हामीलाई पनि सेवकाई रमाइलो जस्तो लाग्न थाल्यो।” यो बहिनी सात वर्षको उमेरमा बप्तिस्मा अप्राप्त प्रकाशक बनिन् र अहिले पूर्ण समय सेवा गरिरहेको ३२ वर्ष भइसक्यो।
४. छोराछोरीलाई उमेरअनुसारको प्रशिक्षण दिनुको अर्थ के हो?
४ उमेरअनुसारको प्रशिक्षण: सेवकाईमा जाँदा आफ्ना छोराछोरीलाई पनि भाग लिन लगाउनुहोस्। उनीहरूले घण्टी बजाउने, घरधनीलाई पर्चा दिने वा बाइबल पद पढ्ने गर्न सक्छन् कि? यसो गर्दा उनीहरूलाई रमाइलो लाग्छ अनि राज्यको सन्देश अरूलाई सुनाउने क्षमतामा विश्वस्तता बढ्छ। ठूलो हुँदै जाँदा सेवकाईमा सहभागिता पनि बढ्दै जानुपर्छ। त्यसकारण, उनीहरूलाई प्रगति गर्न मदत दिनुहोस् अनि कस्ता आध्यात्मिक लक्ष्यहरू राख्न सक्छन्, सो विचार गर्नुहोस्।
५. तपाईंको छोरा वा छोरी कति बेला बप्तिस्मा अप्राप्त प्रकाशक बन्न योग्य हुन सक्छ?
५ तपाईंको छोरा वा छोरी बप्तिस्मा अप्राप्त प्रकाशक बन्न योग्य भए जस्तो लाग्छ र उसले पनि त्यस्तो इच्छा प्रकट गरेको छ भने प्राचीनहरूसित कुरा गरिहाल्नुहोस्। प्रकाशक भइसकेपछि उसले नै यहोवाको प्रशंसा गर्नुपर्ने जिम्मेवारी महसुस गर्नेछ। एउटा कुरा नबिर्सनुहोस्, केटाकेटी प्रकाशक बन्न योग्य हुनको लागि बप्तिस्माप्राप्त वयस्कले जत्ति नै सबै कुरा थाह पाउनु जरुरी छैन। के तपाईंको छोरा वा छोरीले बाइबलका आधारभूत शिक्षाहरू बुझेको छ? के ऊ बाइबलको नैतिक स्तरअनुसार हिंड्छ? के ऊ सेवकाईमा भाग लिन अनि यहोवाका साक्षीको रूपमा चिनिन चाहन्छ? त्यसो हो भने, ऊ बप्तिस्मा अप्राप्त प्रकाशक बन्न योग्य छ भनेर प्राचीनहरूले ठहर गर्न सक्छन्।—हाम्रो राज्य सेवकाई, नोभेम्बर २००६ को परिशिष्ट हेर्नुहोस्।
६. छोराछोरीलाई प्रशिक्षण दिने आमाबाबुको प्रयास किन बेकार जाँदैन?
६ भित्री हृदयदेखि यहोवालाई प्रशंसा गर्न आफ्ना छोराछोरीलाई सिकाउन मेहनत गर्नुपर्छ। तर आफ्ना छोराछोरीले आध्यात्मिक प्रगति गरेको देख्न पाउनुभन्दा ठूलो आनन्द आमाबाबुको लागि अरू कुनै छैन। सबैभन्दा महत्त्वपूर्ण कुरा, यहोवाका अचम्मका कामहरूबारे साना केटाकेटीले अरूलाई बताउँदा उहाँ प्रसन्न हुनुहुन्छ।