केटाकेटीहरू हो—स्कूलमा सिक्नुभएका कुराहरूको फाइदा उठाउनुहोस्
१ गर्मीको छुट्टीपछि स्कूल जानुपर्दा कस्तो लाग्यो? के तपाईंले थप शैक्षिक सत्रको फाइदा उठाइरहनुभएको छ? अनि स्कूलमा साथीभाइ र शिक्षकशिक्षिकाहरूलाई सत्य कुरा बाँड्ने जुन मौका पाउनुहुन्छ, के तपाईंले त्यसको फाइदा उठाउने विचार गर्नुभएको छ? हामीलाई पक्का विश्वास छ, तपाईं स्कूलमा राम्रै गर्न चाहनुहुन्छ।
२ जेहेनदार विद्यार्थी हुनुहोस्: कक्षा सुरु हुनुअघि राम्ररी तयारी गर्नुभएको छ र ध्यान पनि त्यसरी नै दिइरहनुभएको छ भने तपाईंलाई पछिसम्म फाइदा हुन्छ। त्यसकारण, जेहेनदार भएर गृहकार्य पूरा गर्नुहोस् तर स्कूलका कामहरूले गर्दा ईश्वरतान्त्रिक कामहरूमा बाधा पुग्न चाहिं नदिनुहोस् नि।—फिलि. १:१०.
३ नयाँ कक्षा उक्लने बित्तिकै यहोवाका साक्षीहरू र शिक्षा (अंग्रेजी) पुस्तिका पढ्न थाल्नुहोस्। त्यसपछि तपाईं आफैले वा आमाबाबुलाई भनेर आफ्ना शिक्षकशिक्षिकाहरूलाई एक/एक प्रति दिनुहोस्। उहाँहरूको मनमा उठेका कुनै पनि प्रश्नको जवाफ दिन तपाईं वा तपाईंको आमाबाबु तयार हुनुहुन्छ भन्न नबिर्सनुहोस्। तपाईंले त्यसो गर्नुभयो भने उहाँहरूले तपाईंका सिद्धान्त अनि विश्वास के रहेछ राम्ररी बुझ्नुहुनेछ र तपाईंले आफूले सिकेको कुरा व्यवहारमा उतार्नुहुँदा विरोध गर्नुहुनेछैन। यसबाहेक, तपाईंलाई अमूल्य शिक्षादीक्षा दिने काममा उहाँहरूलाई सहयोग गर्न तपाईं र तपाईंका आमाबाबु तयार हुनुहुँदो रहेछ भनेर पनि उहाँहरू ढुक्क हुनुहुनेछ।
४ असल साक्षी बन्नुहोस्: तपाईंले आफ्नो स्कूललाई अनौपचारिक साक्षी दिने व्यक्तिगत इलाका ठाने कसो होला? अब नयाँ कक्षामा उक्लनुहुँदा तपाईंले साक्षी दिने विशेष मौका पाउनुहुनेछ। आफूसित भएको उत्कृष्ट आध्यात्मिक ज्ञान अरूसित बाँड्नुभयो भने तपाईंले “आफूलाई र . . . सुन्नेलाई समेत उद्धार ग[र्न]” सक्नुहुन्छ। (१ तिमो. ४:१६) सधैं राम्रो बानीबेहोरा देखाउनुभयो र मौका पाउने बित्तिकै साक्षी दिनुभयो भने तपाईंलाई अनि अरूलाई पनि फाइदा हुन्छ।
५ हाम्रा किशोर भाइले आफ्ना स्कूलका साथीहरूलाई अनौपचारिक साक्षी दिएछन्। त्यसरी साक्षी दिंदा परमेश्वरमाथि विश्वास गर्नेजतिको खिसी गर्ने नास्तिक अनि चौबीसै घण्टा चुरोट तान्ने र रक्सी खाने एक जना क्याथोलिक विद्यार्थीले राम्ररी सुने। यसरी हाम्रा किशोर भाइले साक्षी दिंदा जम्माजम्मी १५ जना साथीहरूले आफ्नो जीवन समर्पण गरेर बप्तिस्मा लिए।
६ त्यसकारण केटाकेटीहरू हो, जेहेनदार भएर पढ्नुहोस् अनि तपाईंले मात्र पाउनुभएको विशेष इलाकामा साक्षी दिन नछाड्नुहोस्। त्यसो गर्नुभयो भने स्कूल जाँदा हुने सबैभन्दा ठूलो फाइदा तपाईंले उठाउनुहुनेछ।