प्रश्न पेटी
▪ मण्डली सेवा समितिको सदस्यको निर्देशनअनुसार निष्क्रिय भाइ वा बहिनीसित गृह बाइबल अध्ययन गर्नु के अझै पनि उपयुक्त छ?
कुनै पनि निष्क्रिय सदस्यलगायत मण्डलीको गोठालो गर्ने कार्य प्राचीनहरूको हो। त्यस्ताहरूलाई तिनीहरू भेट्न जान्छन् र कस्तो व्यक्तिगत मदत खाँचो परेको छ निधो गर्छन्। उपयुक्त भएमा निष्क्रिय भएकाहरूलाई व्यक्तिगत बाइबल अध्ययन गर्ने सुझाउ दिनु पनि समावेश छ। क-कसको निम्ति यस्तो प्रबन्ध मिलाउनुपर्ने हो भनी मण्डली सेवा समितिले निर्णय गर्नेछ भनेर हाम्रो सेवकाई पूरा गर्न व्यवस्थित (अंग्रेजी), पृष्ठ १०३ ले बताउँछ।
कसले मदत दिंदा बेस हुन्छ, कुन विषयमा अध्ययन गर्ने र कुन प्रकाशन सबैभन्दा मदतकारी हुन्छ भनी सेवा निरीक्षकले निर्णय गर्छन्। सायद त्यस व्यक्तिसित सुरुमा अध्ययन गर्ने व्यक्ति वा तिनले राम्ररी चिन्नुका साथै आदर गर्ने व्यक्तिले मदत गर्नु बेस होला। योग्य र पाको बहिनीले निष्क्रिय बहिनीलाई मदत गर्नसक्छिन्। साधारणतया यस्तो अध्ययनमा अर्को प्रकाशक जानु आवश्यक हुनेछैन। यस्तो जिम्मेवारी पाउने प्रकाशकले समय, पुनःभेट र अध्ययनको रिपोर्ट दिनसक्छन्।—नोभेम्बर १९८७, हाम्रो राज्य सेवकाई (अंग्रेजी) पृष्ठ १-२ हेर्नुहोस्।
विद्यार्थी बप्तिस्माप्राप्त व्यक्ति भएकोले लामो समयसम्म अध्ययन गरिरहनु आवश्यक छैन। हाम्रो लक्ष्य निष्क्रिय व्यक्तिलाई मण्डलीका सभाहरूमा पुनः उपस्थित हुने तथा सुसमाचारका नियमित प्रकाशक हुने मदत दिनु हो। त्यस्तो अध्ययनहरूद्वारा के कस्तो प्रगति भइरहेको छ भनी सेवा निरीक्षकले हेर्नेछन्। यस मायालु प्रबन्धको लक्ष्य निष्क्रिय भाइबहिनीहरूलाई यहोवासमक्ष आफ्नो भार उठाउनसक्नुका साथै सत्यमा “जरा हालेका र जग बसालिएका” बनाउनु हो।—एफि. ३:१८; गला. ६:५.