“छुटकारा नजिकै छ!” जिल्ला अधिवेशनको विज्ञापन गर्ने विश्वव्यापी अभियान
सबै मण्डलीका प्रकाशकहरूले विशेष हातेपर्ची वितरण गर्नेछन्
१ लगभग १५५ मुलुकमा सम्पन्न हुने जिल्ला अधिवेशनबारे विशेष हातेपर्चीद्वारा विज्ञापन गर्न एउटा विश्वव्यापी अभियान सञ्चालन गरिनेछ। यो अभियान कहिलेदेखि कहिलेसम्म चल्नेछ? सन् २००६ को मे महिनादेखि कुनै-कुनै मुलुकबाट सुरु भएर एकपछि अर्को गर्दै विश्वभरि सम्पन्न हुने जिल्ला अधिवेशन नसकुञ्जेलसम्म चल्नेछ। यस अभियानमा विशेष अधिवेशनको पनि विज्ञापन गरिनेछ। यो विशेष अधिवेशन सन् २००६ को जुलाईदेखि अगस्त महिनाको पहिलो हप्तासम्ममा पालैपालो गरी जर्मनी, गणतन्त्र चेक र पोल्याण्डमा सम्पन्न हुँदैछ।
२ अहिले हामी आखिरी समयको पनि अन्तिम घडीमा बाँचिरहेका छौं। त्यसैले, यस दुष्ट रीतिरिवाजबाट छुटकारा दिनेछु भनी परमेश्वरले गर्नुभएको प्रतिज्ञालाई जोड दिने यसपालिको जिल्ला अधिवेशनले इमानदार हृदय भएका मानिसहरूलाई आकर्षित गर्नुपर्छ। यस छुटकाराको सन्देशले, भविष्यमा हुन लागेका कुराबारे सोच्न तिनीहरूलाई उत्प्रेरित गर्नुपर्छ। विश्वभरि रहेका यहोवाका साक्षीहरूको ९८,००० भन्दा बढी मण्डलीलाई आ-आफ्नो ठाउँमा सम्पन्न हुने अधिवेशनको जोडदार विज्ञापन गर्न आग्रह गरिएको छ। किन? लाखौं मानिसले सान्त्वना र आशाको सन्देश सुन्न पाऊन् भनी।
३ मण्डलीहरूलाई प्रशस्त मात्रामा त्यो विशेष हातेपर्ची पठाइनेछ। आफ्नो मण्डलीलाई जुन भाषाको अधिवेशनमा जान भनिएको छ, ती मण्डलीका प्रत्येक प्रकाशकले १५ वटा सम्म हातेपर्ची लिन सक्नेछन्। अधिवेशन हुने सहरकै मण्डलीका प्रत्येक प्रकाशकले भने ३० वटा हातेपर्ची पाउनेछन्। प्रकाशकहरूलाई बाँडेर पनि बाँकी रहेको हातेपर्ची अग्रगामीहरूले चलाउन सक्छन्। हरेक मण्डलीले यो अभियान आफू धाउनुपर्ने अधिवेशन सुरु हुनुभन्दा तीन हप्ता अघि थाल्नेछ। यसो गर्दा आफ्नो मण्डलीको इलाका धेरैभन्दा धेरै ढाक्न प्रशस्त समय मिल्नेछ।
४ प्रकाशकहरूले पाउने हातेपर्चीको पछाडि अधिवेशन हुने स्थान र मिति लेख्न वा छाप्न ठाउँ हुनेछ। सकभर घरधनीलाई भेटेरै हातेपर्ची दिनु उचित हो। तर घरधनीलाई घरमा भेटिएन भने चाहिं तिनले सजिलै देख्ने ठाउँमा पर्ची छोडिराख्नुहोस्। अधिवेशन हुने सहरमा नभई अर्कै सहरमा बस्ने प्रकाशकहरूले भने आफूले पुनःभेट गर्ने वा बाइबल अध्ययन गर्ने व्यक्तिहरूलाई यो हातेपर्ची दिएर निम्तो दिन सक्छन्। साथै, अधिवेशनको लागि यात्रा गर्दा पनि चलाउन सक्छन्। त्यो तीन हप्ते अभियानमा लगनशील भई सबै पर्ची वितरण गर्नुहोस्।
५ यस लेखमा दिइएको निर्देशनअनुसार “छुटकारा नजिकै छ!” जिल्ला अधिवेशनको विज्ञापन गर्न विश्वव्यापी तवरमा जोडदार प्रयास गरिनेछ। त्यसैले हामी विश्वस्त छौं, यस जोडदार प्रयासले गर्दा व्यापक साक्षीकार्य सम्पन्न हुनेछ। यस विश्वव्यापी अभियानमा भाग लिन तपाईंले गर्नुहुने अथक प्रयासमा यहोवाले भरपूर आशिष् देऊन् भनी हामी प्रार्थना गर्छौं।