“ख्रीष्टको पछि लागौं!” जिल्ला अधिवेशनको विश्वव्यापी विज्ञापन सबै प्रकाशकले विशेष निम्तोपर्ची यसपाली पनि बाँड्नेछन्
१ गत वर्ष, “छुटकारा नजिकै छ!” जिल्ला अधिवेशनको विश्वव्यापी विज्ञापन अभियानले चासो दिने व्यक्तिहरूमाथि निकै राम्रो छाप पाऱ्यो। ज-जसले यो विशेष निम्तो स्वीकारे, तिनीहरूले यहोवाका साक्षीहरूसँग अति मीठो आध्यात्मिक भोजको आनन्द उठाउनुको अर्थ के हो, पहिलो पटक थाह पाए। (यशै. ६५:१३) तिनीहरू हाम्रो भ्रातृत्व देखेर पनि रमाए। (भज. १३३:१) “ख्रीष्टको पछि लागौं!” जिल्ला अधिवेशनमा धेरैभन्दा धेरैलाई निम्तो दिन यसपाली पनि हामी संसारभरि विशेष निम्तोपर्ची बाँड्नेछौं।
२ पोहोर साल कस्तो भयो? “छुटकारा नजिकै छ!” जिल्ला अधिवेशनको विज्ञापन गर्दा परिणाम निकै राम्रो भएको रिपोर्ट संसारभरिबाट प्राप्त भएको छ। धेरै ठाउँमा मानिसहरूले राम्रो प्रतिक्रिया देखाए। जस्तै, एउटा सहरको पत्रिकामा हामीले वितरण गरिरहेको निम्तोपर्चीबारे लगभग आधा पानाको लेख थियो। उक्त लेखमा यस्तो लेखिएको थियो: “सबैले छिट्टै निम्तो पाउन सकून भनेर साक्षीहरूले विशेष प्रयास गरे। निम्तो बाँड्न उनीहरू छोटो-मीठो कुरा गर्थे, पहिलेभन्दा धेरै घण्टा खटे र टाढा-टाढासम्म पुगे।” निम्तोपर्ची वितरण गर्ने सुव्यवस्थित तरिकाले अर्को सहरको सञ्चारमाध्यमको पनि ध्यान खिच्यो र तिनीहरूले तुरुन्तै विस्तृत समाचार सम्प्रेषण गरे। सम्मेलन हुनुअघि नै कम-से-कम तीनवटा पत्रिकाले हामीले वितरण गरेको निम्तोबारे राम्रो समाचार छापिसकेका थिए। यसबारे एक जना पत्रकारले विस्तृत लेखहरू लेखे। ती लेखहरूले समाचार पत्रिकाको आइतबारको अंकमा दुई पानाभन्दा बढी ठाउँ ओगटेको थियो। उक्त लेखमा हाम्रो विश्वास, हाम्रो भ्रातृत्व, निम्तोपर्ची वितरण र अधिवेशनबारे विस्तृत जानकारी दिइएको थियो। एउटी बहिनी एउटा घरमा निम्तो दिंदै थिइन्, बीचैमा कुरा काटेर त्यस घरकी महिलाले भनिन्: “लौ! भर्खरै तपाईंहरूबारे छापिएको लेख पत्रिकामा पढ्दै थिएँ।” अर्को घरमा भेटिएकी महिलाले भनिन्: “तपाईंहरूबारे छापिएको लेख पढ्दै थिएँ। तपाईं त आइपुगिहाल्नुभएछ! मलाई पनि निम्तो दिन आउनुभएको हो?” तिनले अझै भनिन्: “तपाईं यहोवाका साक्षीहरूले एकदमै राम्रो गर्दै हुनुहुन्छ।”
३ चासो दिने थुप्रै मानिस हातमा निम्तोपर्ची लिएरै अधिवेशन आएको देखियो। कोही-कोही नयाँ व्यक्ति त निकै टाढाबाट अधिवेशनमा आए। यसरी अरूलाई निम्तो दिन हामीले गरेको मिहेनतले अधिवेशनमा उपस्थिति बढेको छ। एउटा देशमा गत सालको तुलनामा अधिवेशनको उपस्थिति एक चौथाइले बढ्यो।
४ इलाका ढाक्ने: जिल्ला अधिवेशन सुरु हुनुभन्दा तीन हप्ताअघि निम्तो बाँड्न सुरु गर्नुपर्छ। मण्डलीको सबै इलाकामा निम्तो बाँड्न सक्दो प्रयास गर्नुपर्छ। मण्डलीको इलाका ठूलो छ भने, अधिवेशन हुनुभन्दा अघिल्लो हप्तामात्र घरमा नभेटिएकाहरूको ढोकामा निम्तोपर्ची छोड्न सकिन्छ। आफ्नो मण्डलीको सबै इलाका सकेसम्म ढाक्न र मण्डलीले पाएको सबै निम्तोपर्ची बाँडिसक्न सक्दो प्रयास गर्नुपर्छ। निम्तोपर्ची उब्रेको छ भने अग्रगामीहरूलाई दिन सकिन्छ।
५ निम्तो बाँड्दा के भन्ने? तपाईं यसो भन्न सक्नुहुन्छ: “एउटा महत्त्वपूर्ण कार्यक्रम हुँदैछ, त्यसको लागि संसारभरि नै हामी यो निम्तो बाँड्दैछौं। तपाईंलाई पनि निम्तो छ। थप जानकारी यो निम्तोपर्चीमै लेखिएको छ।” निम्तो बाँड्दा छोटो कुराकानी मात्रै गऱ्यौं भने धेरैलाई निम्तो दिन भ्याउँछौं। तर घरधनीले कुनै प्रश्न सोधेमा जवाफ दिन समय दिनुहोस्। चासो दिने व्यक्ति भेटिएमा नाम, ठेगाना टिप्नुहोस् र छिट्टै भेट्न गइहाल्नुहोस्।
६ ख्रीष्टको पछि लाग्न कत्ति धेरै प्रयास गर्नुपर्ने रहेछ! (यूह. ३:३६) आउँदै गरेको जिल्ला अधिवेशनले उपस्थित सबैलाई ख्रीष्टको पछि लाग्न मदत गर्नेछ। “ख्रीष्टको पछि लाग्नुहोस्!” जिल्ला अधिवेशनको विज्ञापन गर्न हामी सबैले यस्तो प्रयास गरे पनि फेरि विस्तृत साक्षी दिनै पर्नेछ भन्ने हामीलाई थाह छ। त्यसकारण सकेसम्म धेरैलाई निम्तो दिन जोसिलो हुनुहोस्। विश्वभरि निम्तो बाँड्ने यो विशाल कार्यक्रममा तपाईंले गर्ने प्रयासमाथि यहोवाले प्रशस्त आशिष् देऊन्।