भविष्यवक्ताहरूलाई नमुनाको रूपमा लिनुहोस्—आमोस
१. आमोसको उदाहरण हाम्रो लागि किन प्रोत्साहनको स्रोत हुन सक्छ?
१ “म जस्तो साधारण र अनपढ मान्छेले पनि प्रचार गर्न सक्छु होला र” भन्ने जस्तो भावना तपाईंको मनमा कहिल्यै आउँछ? आउँछ भने तपाईंले आमोसको उदाहरणबाट प्रोत्साहन पाउन सक्नुहुन्छ। तिनी गोठालो थिए र खेतबारीमा मौसमी काम गर्थे। तर एउटा महत्त्वपूर्ण सन्देश घोषणा गर्न यहोवाले तिनलाई चलाउनुभयो। (आमो. १:१; ७:१४, १५) त्यसैगरि आज हाम्रो दिनमा पनि यहोवा साधारण र नम्र मानिसहरू चलाउनुहुन्छ। (१ कोरि. १:२७-२९) भविष्यवक्ता आमोसबाट प्रचारको सन्दर्भमा अरू कस्तो पाठ सिक्न सक्छौं?
२. प्रचारकार्यमा विरोधको सामना गर्नुपर्दा हामी किन दृढ रहन सक्छौं?
२ विरोधको बेला दृढ रहनुहोस्: इस्राएलको दस कुलको उत्तरी राज्यमा बाछो उपासना गर्ने पुजारी अमस्याहले आमोसको भविष्यवाणी सुनेपछि यस्तो आशय लाग्ने कुरा गरे: ‘यहाँबाट गइहाल्! हाम्रो आफ्नै धर्म छ!’ (आमो. ७:१२, १३) आमोसको काममा रोक लगाउने हेतुले अमस्याहले राजा यारोबामकहाँ अपिल गर्दा तिनले आमोसको कुरा बङ्ग्याएर बताए। (आमो. ७:७-११) तर आमोस डराएनन्। आज पनि केही पादरीहरूले यहोवाका जनहरूलाई दुःख दिन राजनीतिको आड लिन्छन्। तर हाम्रो विरुद्ध उठाइने जुनसुकै हतियार बेकामको हुनेछ भनेर यहोवा आश्वासन दिनुहुन्छ।—यशै. ५४:१७.
३. आज हामीले घोषणा गर्ने सन्देशको दुई पक्ष के-के हुन्?
३ परमेश्वरको न्याय र भावी आशिष्बारे घोषणा गर्नुहोस्: आफ्नै नाममा भएको बाइबल किताबमा आमोसले इस्राएलको दस कुलले पाउने न्यायबारे भविष्यवाणी गरे तापनि तिनले अन्तिम अध्यायमा यहोवाले गर्नुहुने पुनर्स्थापना र उहाँले दिनुहुने प्रशस्त आशिष्बारे पनि बताए। (आमो. ९:१३-१५) अहिले पनि हामी आउँदै गरेको ‘न्यायको दिनबारे’ बताउँछौं तर त्यो त हामीले घोषणा गर्ने ‘राज्यको सुसमाचारको’ एउटा भाग मात्र हो। (२ पत्रु. ३:७; मत्ती २४:१४) आरमागेडोनमा यहोवाले दुष्टहरू सबैको नाश गर्नुभएपछि प्रमोदवनको लागि बाटो खुल्नेछ।—भज. ३७:३४.
४. हामीले यहोवाको इच्छा पूरा गर्न सक्छौं भन्ने कुरामा किन ढुक्क हुन सक्छौं?
४ विरोधीहरूले भरिएको यस संसारमा राज्य सन्देश प्रचार गर्दा यहोवाप्रतिको हाम्रो समर्पणको र उहाँको इच्छाअनुसार गर्ने हाम्रो अठोटको जाँच हुन्छ। (यूह. १५:१९) तर यहोवाले आमोसलाई जस्तै हामीलाई उहाँको इच्छा पूरा गर्न चाहिने बल दिनुहुन्छ भन्ने कुरामा हामी ढुक्क हुन सक्छौं।—२ कोरि. ३:५.