बाइबलले सिकाउँछ किताबबाट अध्ययन गर्न तयार नभएकाहरूलाई मदत गर्नुहोस्
१. बाइबलले सिकाउँछ किताब सुरुको भेटमै सबैका निम्ति उपयुक्त हुँदैन, किन?
१ यहोवाको उपासक बन्न बाइबलको शिक्षा सिक्नै पर्छ। तर कतिपय मानिस ख्रीष्टियन धर्म मान्दैनन् र बाइबललाई परमेश्वरको वचन भनेर मानिलिंदैनन्। अरू भने परमेश्वरमा नै विश्वास गर्दैनन् र बाइबलप्रति कुनै आदर देखाउँदैनन्। सुरुको भेटमा बाइबलले सिकाउँछ किताब स्वीकार्न नचाहनेहरूलाई कुन प्रकाशनहरू मदतकारी साबित भएका छन्? विभिन्न २० देशका प्रकाशकहरूको रायमा आधारित केही सुझाव तल दिइएका छन्।
२. यदि कसैले ‘म परमेश्वरमा विश्वास गर्दिनँ’ भन्छ भने के कुरा पत्ता लगाउनुपर्छ र किन?
२ परमेश्वरमा विश्वास नगर्नेहरूलाई भेट्दा: कसैले ‘म परमेश्वरमा विश्वास गर्दिनँ’ भन्छ भने त्यसको कारण पत्ता लगाउनु बेस हुन्छ। क्रमविकासमा विश्वास गरेकोले हो कि? संसारमा व्याप्त अन्याय वा धर्ममा भइरहेको कपटले गर्दा परमेश्वरप्रति भरोसा गुमेको छ कि? धर्ममा प्रतिबन्ध लगाइएको अथवा धर्ममा चासो नराख्ने ठाउँबाट आएका पो हुन् कि? हुन सक्छ उनी परमेश्वरको अस्तित्वलाई पूरै नकार्दैनन् तर उहाँमाथि भरोसा गर्नुपर्ने कुनै कारण पनि देख्दैनन्। “के तपाईंलाई पहिल्यैदेखि त्यस्तो लाग्थ्यो?” भनेर सोध्दा घरधनीले आफ्नो कुरा बताउने गरेको थुप्रै प्रकाशकले अनुभव गरेका छन्। घरधनीको कुरा सुन्नुहोस्, बीचैमा कुरा नकाट्नुहोस्। ती व्यक्तिले परमेश्वरमा किन विश्वास गर्दैनन् भनेर पत्ता लगाउन सक्यौं भने कसरी जवाफ दिने र कुन प्रकाशन प्रस्तुत गर्ने, हामी थाह पाउन सक्छौं।—हितो. १८:१३.
३. घरधनीको र उनको विश्वासको कदर गरेको कुरा हामी कसरी देखाउन सक्छौं?
३ जवाफ दिनुहुँदा घरधनीलाई उनको विचारधाराको आलोचना गरेको भान नपार्न होसियार हुनुहोस्। अमेरिका शाखाबाट आएको एउटा सुझाव यस्तो छ: “आफूले के विश्वास गर्ने भनेर छान्न पाउनु व्यक्तिगत स्वतन्त्रताको कुरा हो र यसको हामीले कदर गर्नुपर्छ। विवाद जित्न खोज्नुको साटो मानिसहरूलाई सोच्न लगाउने र निष्कर्षमा पुग्न मदत गर्ने किसिमको प्रश्न सोध्नु राम्रो हो।” घरधनीले आफ्नो कुरा बताइसकेपछि एक परिभ्रमण निरीक्षक अक्सर यसरी कुरा सुरु गर्छन्, “के तपाईंले यो कुरा पनि सोच्नुभएको छ?”
४. बौद्ध धर्मावलम्बी र चिनियाँहरूलाई हामी कसरी मदत गर्न सक्छौं?
४ बौद्ध धर्मावलम्बी र चिनियाँहरूलाई परमेश्वर हुनुहुन्छ भन्ने कुरा नौलो लाग्छ। बेलायतका केही प्रकाशक त्यस्ता मानिसहरूलाई भेट्दा चिरकालीन शान्ति र आनन्द कसरी पाउने (अङ्ग्रेजी) पुस्तिका चलाउँछन्। परिचयको भाग छलफल गरिसकेपछि “सर्वोच्च सृष्टिकर्ता साँच्चै हुनुहुन्छ?” भन्ने भाग छलफल गर्छन्। त्यसपछि “सम्पूर्ण मानिसजातिको लागि एउटा किताब” भन्ने भाग छलफल गर्छन्। अनि बाइबलले सिकाउँछ किताब प्रस्तुत गर्दै घरधनीलाई यसो भन्छन्, “तपाईं परमेश्वरमा विश्वास गर्नुहुन्न भने पनि बाइबल अध्ययन गरेर हेर्नुहोस् न। यसमा थुप्रै व्यावहारिक सल्लाह पाउन सकिन्छ।” अमेरिकाको चिनियाँ भाषा बोल्ने इलाकामा सेवा गरिरहेका एक अग्रगामीले यसो भने: “हाम्रो इलाकाका थुप्रै व्यक्तिहरू पढ्न मन पराउँछन्। त्यसैले फेरि भेट्न जाँदासम्म अक्सर उनीहरूले पूरै प्रकाशन पढ्न सिध्याइसकेका हुन्छन्। तर सँगै बसेर बाइबल अध्ययन गर्ने कुराचाहिं उनीहरूको लागि नयाँ हो। त्यसैले म पहिलो भेटमै सुसमाचार पुस्तिका प्रस्तुत गर्छु किनभने यो छलफल गर्ने किसिमले तयार पारिएको छ।” अमेरिकाकै चिनियाँ भाषा बोलिने क्षेत्रका एक परिभ्रमण निरीक्षक पहिलो भेटमै बाइबलले सिकाउँछ किताबबाट छलफल गर्न सकिने कुरा बताउँछन्। तर परमेश्वरबारे चर्चा गरिएको अध्याय १ बाट नभई बाइबलबारे छलफल गरिएको अध्याय २ बाट अध्ययन सुरु गर्नु बेस हुन्छ।
५. किन धैर्य गर्नुपर्छ?
५ कसै-कसैलाई परमेश्वरमा विश्वास गर्न समय लाग्छ। त्यसैले धैर्य गर्नुपर्छ। हामीले सुरु-सुरुमा गर्ने कुराकानीको आधारमै घरधनीले सृष्टिकर्ता हुनुहुन्छ भनेर स्वीकार्छन् भन्ने छैन। तर समय बित्दै जाँदा तिनलाई कता-कता परमेश्वर हुनुहुन्छ कि जस्तो लागेको कुरा बताउन सक्छन् अथवा कोही व्यक्ति किन परमेश्वरमा विश्वास गर्छन् बल्ल बुझें भनेर बताउन सक्छन्।
६. कसै-कसैलाई बाइबलमा किन चासो हुँदैन?
६ बाइबलमा भरोसा वा चासो नभएकाहरूलाई भेट्दा: कोही-कोही परमेश्वर हुनुहुन्छ भनेर विश्वास त गर्छन् तर बाइबलको शिक्षामा भने चासो लिंदैनन् किनभने उनीहरू बाइबललाई परमेश्वरको वचनको रूपमा मानिलिंदैनन्। सायद उनीहरू ख्रीष्टियन धर्म नमान्ने ठाउँमा बस्छन् र बाइबललाई चर्चको किताब ठान्छन्। अथवा उनीहरू आध्यात्मिक कुराहरूको त्यति वास्ता नगर्ने ख्रीष्टियन भनौंदा ठाउँमा बस्छन् र बाइबल उपयोगी छैन भन्ने विचार राख्छन्। त्यस्ता व्यक्तिहरूको बाइबलप्रति कसरी चासो जगाउन सक्छौं? साथै उनीहरूलाई बाइबलले सिकाउँछ किताबबाट अध्ययन गर्न कसरी मनाउन सक्छौं?
७. बाइबलमा चासो जगाउने राम्रो तरिका के हो?
७ ग्रीस शाखाको रिपोर्टमा यस्तो लेखिएको थियो: “बाइबलमा चासो नभएकाहरूलाई मदत गर्ने सबैभन्दा राम्रो तरिका भनेको बाइबल खोलेरै यसमा भएको कुरा देखाउनु हो। मानिसले भन्ने कुराले भन्दा बाइबलको सन्देशले घरधनीको हृदयमा कता हो कता धेरै प्रभाव पार्छ भनेर थुप्रै प्रकाशकले याद गरेका छन्। (हिब्रू ४:१२) बाइबलमा परमेश्वरको नाम देखेपछि धेरै जना बाइबलको कुरा बुझेर हेर्न उत्प्रेरित भएका छन्।” भारत शाखाको रिपोर्टमा यस्तो लेखिएको थियो: “जीवन र मृत्युबारे साँचो कुरा थाह पाएपछि थुप्रै हिन्दूहरू बाइबलप्रति आकर्षित हुन्छन्। त्यसैगरि जातीय भेदभाव नहुने संसारको विषयमा बाइबलको प्रतिज्ञाले पनि उनीहरूको मन छुन्छ।” स्थानीय समस्याहरूबारे चर्चा गर्दा प्रकाशकहरूले परमेश्वरको राज्यले ती समस्या हटाउने विषयमा बाइबलको सन्देश बताउने मौका पाउँछन्।
८. चर्चजगत्ले गर्दा बाइबलप्रति नकारात्मक दृष्टिकोण भएका मानिसहरूलाई भेट्दा हामी के भन्न सक्छौं?
८ कसै-कसैको बाइबलप्रति नकारात्मक दृष्टिकोण हुनुको कारण चर्चजगत् हुन सक्छ। त्यसो हो भने तिनलाई चर्चजगत्ले बाइबलका शिक्षालाई बङ्ग्याएको छ भन्ने कुरा बुझाउनुहोस्। भारत शाखाको रिपोर्ट यस्तो छ: “कहिलेकाहीं हामीले मानिसहरूलाई चर्च बाइबलको रक्षक होइन भनेर बुझ्न मदत गर्नुपर्छ।” उक्त रिपोर्टअनुसार हिन्दूहरू अक्सर जीवनको उद्देश्य के हो? तपाईं त्यसलाई कसरी प्राप्त गर्न सक्नुहुन्छ? पुस्तिकाको भाग ४ पढ्दा प्रभावित भएका छन्। त्यस भागमा चर्चहरूले कसरी बाइबलको शिक्षालाई बङ्ग्याउन खोजेका छन् भनेर बताइएको छ। ब्राजिलका एक अग्रगामी मानिसहरूलाई यसो भन्छन्: “बाइबलले के भन्छ भनेर अझै राम्ररी बुझे कसो होला? धेरै जना कुनै करकापमा नपरी खुला मनले बाइबलको कुरा बुझ्दैछन्। आफूले सिकेका कुराहरूबाट तपाईं छक्कै पर्नुहोला।”
९. कसैले सुरुमा बाइबलले सिकाउने कुरामा चासो दिएन भने पनि किन हरेस खानुहुँदैन?
९ यहोवा प्रत्येक व्यक्तिको हृदय जाँच्नुहुन्छ। (१ शमू. १६:७; हितो. २१:२) असल हृदय भएकाहरूलाई उहाँ साँचो उपासनातर्फ खिच्दै हुनुहुन्छ। (यूह. ६:४४) त्यस्ता धेरै व्यक्तिहरूलाई परमेश्वरबारे कहिल्यै सिकाइएको थिएन अथवा उनीहरूलाई बाइबलको खासै ज्ञान थिएन। हाम्रो प्रचारकार्यले उनीहरूलाई ‘उद्धार पाउने र सत्यको सही ज्ञान लिने’ मौका दिन्छ। (१ तिमो. २:४) त्यसैले कोही व्यक्तिले सुरुमा बाइबलले सिकाउने कुरामा चासो दिएन भने पनि हरेस नखानुहोस्! उनीहरूको चासो जगाउन आफ्नो भाषामा भएको कुनै साधन प्रयोग गर्नुहोस्। अन्ततः अध्ययन गराउन हामीले चलाउने प्रमुख साधन बाइबलले वास्तवमा के सिकाउँछ? किताबबाट तपाईंले घरधनीसित छलफल गर्न सक्नुहुनेछ।
[पृष्ठ ४-मा भएको पेटी]
घरधनीले ‘म परमेश्वरमा विश्वास गर्दिनँ’ भन्छ भने यसो गर्नुहोस्:
• कारण थाह पाउन “के तपाईंलाई पहिल्यैदेखि त्यस्तो लाग्थ्यो?” भनेर सोध्नुहोस्।
• बौद्ध धर्मावलम्बी हुन् भने शान्ति र आनन्दको बाटो पुस्तिकाको पृष्ठ १४-२३ देखाउनुहोस्।
• क्रमविकासमा विश्वास गर्छन् भने यी प्रकाशन मदतकारी हुन सक्छ:
ब्यूँझनुहोस्!-मा “सृष्टि या संयोग?” शृङ्खला
सृष्टिका आश्चर्यजनक कुराले परमेश्वरको महिमा प्रकट गर्छ (अङ्ग्रेजी) भिडियो
जीवनको सुरुवातबारे पाँच महत्त्वपूर्ण प्रश्न (अङ्ग्रेजी) पुस्तिका
• अन्याय र दुःखकष्टको कारण भगवान्प्रति विश्वास गुमाएका हुन् भने यी प्रकाशन मदतकारी हुन सक्छ:
पुस्तिकाहरू: के परमेश्वर साँच्चै नै हाम्रो चिन्ता गर्नुहुन्छ?, भाग ६ र जीवनको उद्देश्य के हो?, भाग ६
• परमेश्वर हुनुहुन्छ कि भनेर घरधनीले आफ्नो कुरा व्यक्त गर्न थालेपछि बाइबलले सिकाउँछ किताबबाट छलफल सुरु गर्नुहोस्। अध्याय २ अथवा घरधनीलाई उपयुक्त हुने कुनै अरू अध्यायबाट छलफल सुरु गर्नु राम्रो हुन्छ।
[पृष्ठ ५-मा भएको पेटी]
घरधनी बाइबलमा विश्वास गर्दैनन् भने यसो गर्नुहोस्:
• जीवनको उद्देश्य के हो? तपाईं त्यसलाई कसरी प्राप्त गर्न सक्नुहुन्छ? पुस्तिकाको भाग ३ छलफल गर्नुहोस्।
• बाइबल सिद्धान्तअनुसार जीवन बिताउँदा हुने फाइदाहरूबारे छलफल गर्नुहोस्। बाइबल व्यावहारिक छ भनेर देखाउन तपाईं यी प्रकाशन प्रयोग गर्न सक्नुहुन्छ:
ब्यूँझनुहोस्!-मा “परिवारका लागि” शृङ्खला
बाइबल—यसले तपाईंको जीवनमा पार्ने प्रभाव (अङ्ग्रेजी) भिडियो
पुस्तिकाहरू: परमेश्वरबाट आएको सुसमाचार!, पाठ ९ र ११; सबैका लागि उपयोगी किताब, पृष्ठ २२-२६
बौद्ध धर्मावलम्बीहरूका लागि शान्ति र आनन्दको बाटो पुस्तिकाको पृष्ठ ३-७ प्रयोग गर्नुहोस्।
मुस्लिमहरूका लागि आनन्दित जीवनको लागि साँचो विश्वास (अङ्ग्रेजी) पुस्तिकाको भाग ३ प्रयोग गर्नुहोस्।
तपाईंको इलाकाका मानिसहरूको बाइबलप्रति पूर्वाग्रही दृष्टिकोण छ भने सुरु-सुरुको भेटमै आफूले छलफल गरिरहेको बुद्धिमानी सल्लाहहरूको स्रोत उल्लेख नगर्नु बेस हो।
• बाइबल भविष्यवाणीहरू कसरी पूरा भएका छन्, बताउनुहोस्। तपाईं यी प्रकाशन चलाउन सक्नुहुन्छ:
बाइबल—सही इतिहास र भरपर्दो भविष्यवाणी (अङ्ग्रेजी) भिडियो
सबैका लागि उपयोगी किताब पुस्तिकाको पृष्ठ २७-२९
• विभिन्न विषयमा बाइबलले के सिकाउँछ भनेर घरधनीले सोध्न थालेपछि बाइबलले सिकाउँछ किताबबाट छलफल सुरु गर्नुहोस्।
[पृष्ठ ६-मा भएको पेटी]
घरधनीले ‘म परमेश्वरमा विश्वास गर्दिनँ’ भन्छ भने तपाईं यसो भन्न सक्नुहुन्छ:
• “सृष्टिकर्ता हुनुहुन्छ भनेर म किन विश्वस्त हुन सकें, तपाईंलाई छोटकरीमा बताऊँ?” त्यसपछि धर्मशास्त्रबाट तर्क गर्ने (अङ्ग्रेजी) किताबको पृष्ठ ८४-८६ बाट केही कुराहरू छलफल गर्नुहोस्। अथवा तपाईंलाई रोचक लागेको कुनै प्रकाशन ल्याइदिने प्रबन्ध मिलाउनुहोस्।
• “परमेश्वर हुनुहुन्छ भने तपाईं उहाँमा कस्ता गुणहरू भएको चाहनुहुन्छ?” यो प्रश्नको उत्तर दिंदा धेरैले प्रेम, न्याय, दया र निष्पक्षता जस्ता गुणहरू भएको परमेश्वरसँग नजिक हुन सकिन्छ भनेर बताउँछन्। त्यसपछि तिनलाई बाइबलबाट परमेश्वरसँग त्यस्ता गुणहरू छन् भनेर देखाउनुहोस्। (बाइबलले सिकाउँछ किताबको अध्याय १ को अनुच्छेद ६ बाट पनि छलफल सुरु गर्न सक्नुहुन्छ।)
घरधनीले ‘म बाइबलमा विश्वास गर्दिनँ’ भन्छ भने तपाईं यसो भन्न सक्नुहुन्छ:
• “धेरै जनाले त्यसै भन्छन्। कसै-कसैलाई बाइबल विज्ञानसित मेल खाँदैन वा यसका सिद्धान्तहरू व्यावहारिक छैन जस्तो लाग्छ। तर के तपाईंले बाइबल राम्रोसँग पढ्ने मौका पाउनुभएको छ? [जवाफ दिने मौका दिनुहोस्। त्यसपछि सबैका लागि उपयोगी किताब पुस्तिकाको पृष्ठ ३ मा भएको परिचयको भाग देखाउनुहोस् र पुस्तिका दिनुहोस्।] बाइबलप्रति थुप्रै मानिसको नकारात्मक दृष्टिकोण हुनुको एउटा कारण त धर्मले यसका शिक्षाहरूलाई बङ्ग्याएकोले हो। अर्को पटक यस पुस्तिकाको पृष्ठ ४ र ५ मा बताइएको एउटा उदाहरण तपाईंलाई देखाउन चाहन्छु।”
• “अरू थुप्रै मानिसले पनि त्यसै भन्ने गर्छन्। तर मैले बाइबलमा विश्वास गर्नुको एउटा कारण तपाईंलाई देखाऊँ? [नयाँ संशोधित संस्करण-बाट अय्यूब २६:७ वा यशैया ४०:२२ पढ्नुहोस्। यी पदले बाइबल वैज्ञानिक तवरमा सही छ भनेर देखाउँछन्।] बाइबलमा परिवारहरूलाई मदत गर्ने बुद्धिमानी सल्लाहहरू पनि पाउन सक्छौं। यसको एउटा उदाहरण म अर्को पटक आएर देखाउन चाहन्छु।”
• “आफ्नो विचार राख्नुभएकोमा धन्यवाद। परमेश्वरले मानिसजातिको निम्ति एउटा किताब लेख्नुभएको भए, त्यसमा के-के कुरा हुनुपर्छ जस्तो तपाईंलाई लाग्छ?” त्यसपछि उनले दिएको जवाफसँग मिल्ने कुरा बाइबलबाट देखाउनुहोस्।