प्रचारकार्यमा अझै उन्‍नति गर्ने—मदतकारी साथी बन्‍नुहोस्‌

यसो गर्नु किन महत्त्वपूर्ण छ? साथीसित प्रचारकार्यमा जानुको महत्त्व येशूलाई थाह थियो। त्यसैले आफ्ना ७० जना चेलालाई प्रचारकार्यमा दुई-दुई जना गरी पठाउनुभयो। (लूका १०:१) मदतकारी साथीले प्रचारकार्यमा आफ्नो साथी अप्ठ्‌यारोमा पर्दा वा घरधनीलाई कसरी जवाफ दिने भनेर अलमलमा पर्दा आवश्‍यक मदत गर्छ। (उप. ४:९, १०) उसले आफ्नो अनुभव बताएर अनि कहिलेकाहीं सल्लाह-सुझाव दिएर साथीलाई राम्रो प्रचारक बन्‍न मदत गर्छ। (हितो. २७:१७) अनि प्रचारकार्यमा उत्थानदायी कुराकानी गरेर प्रोत्साहन पनि दिन्छ।—फिलि. ४:८.

हामी कसरी यसो गर्न सक्छौं?

साथी घरधनीसित कुरा गर्दै गर्दा ध्यान दिएर सुन्‍नुहोस्‌। (याकू. १:१९) तिनले बाइबल पढ्‌दा तपाईं पनि आफ्नो बाइबल हेर्नुहोस्‌। यसो गर्दा साथीलाई चाहिने मदत गर्न सक्नुहुनेछ।
कुराकानीको बीचमा बोल्ने हो भने कतिखेर बोल्न उपयुक्‍त हुन्छ, राम्ररी विचार गर्नुहोस्‌। (हितो. २५:११) साथीको बाइबल अध्ययनमा बस्दै हुनुहुन्छ भने तपाईंले पनि कहिलेकाहीं केही भनिदिंदा तपाईंको साथी पक्कै खुसी हुनेछन्‌। तर घरघरको प्रचारकार्यमा भने तपाईंको साथी आफ्नो पालोमा आफै बोल्न मन पराउँछन्‌ होला। घरधनीले कुनै प्रश्‍न गर्दा वा आपत्ति जनाउँदा कसरी जवाफ दिने भनेर तपाईंको साथीलाई थाह नभएको बेला मदत गर्नुभयो भने तिनी ढुक्क हुनेछन्‌। अनि नयाँ प्रकाशकले पनि तपाईंबाट त्यस्तै सहयोगको आशा गर्न सक्छन्‌। तर चाहे घरघरको प्रचारमा होस्‌, पुनःभेटमा होस्‌ वा बाइबल अध्ययनमा, साथीको कुरा बीचमा नकाट्‌नुहोस्‌ वा फरक विषयमा कुरा नथाल्नुहोस्‌।
आफ्नो अनुभव सुनाउनुहोस्‌। यदि तपाईंको सल्लाहले साथीलाई राम्रो प्रचारक बन्‍न मदत गर्छ भने कहिलेकाहीं सल्लाह दिनदेखि पछि नहट्‌नुहोस्‌। (हितो. ३:२७) उपयुक्‍त समयमा साथीलाई यसो भन्‍न सक्नुहुन्छ: “तपाईंले भर्खरै गर्नुभएको प्रस्तुति कस्तो लाग्यो?” वा “तपाईंलाई एउटा सुझाव दिऊँ?” वा “मचाहिं यस्तो गर्ने प्रयास गर्छु।” नबिर्सनुहोस्‌, कहिलेकाहीं मात्र दिइएको सुझावलाई तपाईंको साथीले खुसीसाथ स्वीकार्नेछन्‌ तर हरेक गल्ती औंल्याउनुभयो भने तिनी निराश हुनेछन्‌।

यो महिना यसो गरे कसो होला:

प्रचारकार्य सकेपछि साथीले भनेको वा गरेको कुनचाहिं कुराले तपाईंलाई मदत पुग्यो, तिनलाई बताउनुहोस्‌।