प्रचारकार्यमा अझै उन्‍नति गर्ने—परमेश्‍वरबाट आएको सुसमाचार! पुस्तिका प्रयोग गरेर ढोकैमा बाइबल अध्ययन सुरु गर्नुहोस्‌

यसो गर्नु किन महत्त्वपूर्ण छ? चेला बनाउन हामीले परमेश्‍वरको वचन अरूलाई सिकाउनुपर्छ। (मत्ती २८:१९, २०) हामीसित भएको पुस्तिका प्रयोग गरेर प्रभावकारी तरिकामा अरूलाई सिकाउन सक्छौं। परमेश्‍वरबाट आएको सुसमाचार! पुस्तिका विशेषगरि अरूलाई सत्य सिकाउन तयार पारिएको हो। पहिलो भेटमा घरधनीसित ढोकैमा बाइबल अध्ययन सुरु गर्न यो पुस्तिका प्रयोग गर्न सक्छौं।

हामी कसरी यसो गर्न सक्छौं?

तलको पेटीमा दिइएको प्रस्तुति विचार गर्नुहोस्‌।—मार्च २०१३ को हाम्रो राज्य सेवा पनि हेर्नुहोस्‌।
आफ्नो पुस्तिका झोलामा राख्नुहोस्‌। अरूलाई दिनको लागि पनि केही पुस्तिका लैजानुहोस्‌।
एक वा दुई अनुच्छेद मात्र छलफल गर्नुहोस्‌ अनि दस मिनेट वा सोभन्दा कम समयमा नै कुराकानी सिध्याउनुहोस्‌।

यो महिना यसो गरे कसो होला?

बाइबल अध्ययन सञ्चालन गर्ने इच्छा जगाइदिनुहोस्‌ भनेर प्रार्थना गर्नुहोस्‌। साथै बाइबल अध्ययन सुरु गर्न अनि सत्यको प्रभावकारी शिक्षक बन्‍न यहोवासित मदत माग्नुहोस्‌।—फिलि. २:१३.
तल दिइएको प्रस्तुति मनमा ठप्प राख्न पारिवारिक उपासनाको बेला वा व्यक्‍तिगत अध्ययनको बेला अभ्यास गर्न समय निकाल्नुहोस्‌। त्यसपछि तपाईं ढुक्कसित कुराकानी गर्न र ढोकैमा बाइबल अध्ययन सुरु गर्न सक्नुहुन्छ।

घरघरमा जाँदा:

“यो संसार कतातिर लम्कँदै छ भनेर मानिसहरू चिन्ता गरिरहेका छन्‌। के तपाईंलाई अहिलेको अवस्था सुध्रिएला जस्तो लाग्छ? [जवाफ दिने मौका दिनुहोस्‌।] बाइबलमा पाइने सुसमाचारले हामीलाई अहिले र भविष्यको लागि आशा दिन्छ भन्‍ने कुरा सुन्दा थुप्रै मानिस छक्क पर्छन्‌। यी प्रश्‍नहरूको बाइबलले चित्तबुझ्दो जवाफ दिन्छ।” घरधनीलाई पुस्तिका दिनुहोस्‌ अनि अन्तिम पृष्ठमा भएका प्रश्‍नहरूबाट उनलाई बुझ्न मन लागेको एउटा प्रश्‍न रोज्न लगाउनुहोस्‌। त्यसपछि उनले रोजेको पाठ पल्टाएर अध्ययन गर्ने तरिका देखाउनुहोस्‌। त्यस पाठको अर्को प्रश्‍न छलफल गर्न समय मिलाउनुहोस्‌।