ख्रीष्टियन जीवन
यहोवाले तोक्नुभएको नैतिक स्तरको समर्थन गर्नुहोस्
यहोवाले मानिसजातिका लागि नैतिक स्तर तोक्नुहुन्छ। जस्तै: विवाह एक पुरुष र एक स्त्रीबीच हुनुपर्छ र वैवाहिक बन्धन स्थायी हुनुपर्छ। (मत्ती १९:४-६, ९) हरकिसिमको अवैध यौनसम्बन्धलाई उहाँ घृणा गर्नुहुन्छ। (१को ६:९, १०) यसबाहेक उहाँले पहिरन र कोरीबाटी सम्बन्धी पनि सिद्धान्त दिनुभएको छ। त्यसअनुसार चल्दा उहाँका सेवकहरू अरूभन्दा फरक देखिन्छन्।—व्य २२:५; १ति २:९, १०.
अहिलेको संसारमा धेरै मानिसहरू यहोवाले तोक्नुभएको स्तरलाई बेवास्ता गर्छन्। (रोमी १:१८-३२) तिनीहरू आचरण, पहिरन र कोरीबाटीको सन्दर्भमा वरपर जे प्रख्यात छ त्यसैको पछि दौडन्छन्। कतिपय त आफ्नो गलत आचरणप्रति गर्व गर्छन् अनि आफ्नो भन्दा फरक स्तरअनुसार चल्नेहरूलाई खिल्ली उडाउँछन्।—१प ४:३, ४.
हामी यहोवाका साक्षीहरूले साहसी भई परमेश्वरले तोक्नुभएको नैतिक स्तरलाई समर्थन गर्नुपर्छ। (रोमी १२:९) कसरी गर्न सक्छौं? एउटा तरिका, कौशलतापूर्वक उहाँको स्तरबारे अरूलाई बताएर। अर्को, हामी आफै पनि उहाँको स्तरअनुसार चलेर। जस्तै: पहिरन र कोरीबाटीको स्टाइलबारे यस्ता प्रश्नहरू सोध्न सक्छौं: ‘मैले गर्ने छनौटहरूले कसको स्तर झल्काउँछ यहोवाको वा संसारको? मेरो पहिरन र कोरीबाटीले के मलाई परमेश्वरको स्तरबमोजिम चल्ने ख्रीष्टियन भनेर चिनाउँछ?’ अनि मनोरञ्जनको छनौट गर्दा आफैलाई सोध्न सक्छौं: ‘यो मनोरञ्जन यहोवालाई कस्तो लाग्छ? अनि मैले कसको स्तरलाई बढावा दिइरहेको छु? मैले छानेको मनोरञ्जनले नैतिक तवरमा स्वच्छ रहने मेरो सङ्कल्पलाई कतै कमजोर त बनाउँदैन? (भज १०१:३) यसले मेरो परिवार अनि अरूलाई ठेस पुऱ्याउँछ कि?’—१को १०:३१-३३.
यहोवाले तोक्नुभएको नैतिक स्तरलाई समर्थन गर्नु किन महत्त्वपूर्ण छ? किनभने अब चाँडै येशू ख्रीष्टले दुष्टहरूलाई नाश गर्नुहुनेछ। (इज ९:४-७) अनि परमेश्वरको इच्छाबमोजिम चल्नेहरू मात्र रहिरहनेछ। (१यू २:१५-१७) त्यसैले आउनुहोस्, हामी यहोवाको नैतिक स्तरअनुरूप जीवन बिताउन कटिबद्ध होऔं। अनि हाम्रो असल आचरण देखेर मानिसहरूले यहोवाको महिमा गरून्।—१प २:११, १२.
मैले छानेको पहिरन र कोरीबाटीले मेरो नैतिक स्तरबारे कस्तो परिचय दिन्छ?
यहोवाको साथी बनौं—एक पुरुष, एक स्त्री भन्ने भिडियो हेरेपछि निम्न प्रश्नहरू छलफल गर्नुहोस्:
यहोवाको स्तरअनुरूप जीवन बिताउनु किन बुद्धिमानी हो?
आमाबाबुले छोराछोरीलाई किन सानैदेखि यहोवाको नैतिक स्तर सिकाउनुपर्छ?
वृद्ध होस् वा केटाकेटी सबैले परमेश्वरको भलाइबाट लाभ उठाउन अरूलाई कसरी मदत गर्न सक्छन्?