परमेश्वरका आवश्यकताहरू सिक्न मदत दिने नयाँ साधन
“यसको सरल, स्पष्ट र सरर बग्ने प्रस्तुतिहरूले प्रत्याशा गरेभन्दा राम्रा परिणामहरू निकाल्नेछन्। विषयहरू सजिलो र रमाइलो तरिकामा प्रस्तुत गरिएकोले कुनै पनि निष्कपट र इच्छुक व्यक्ति ‘साँच्चि नै परमेश्वर तिमीहरूका बीचमा हुनुहुन्छ’ भन्न उत्प्रेरित हुनेछन्।” (१ कोरिन्थी १४:२५) यो कुरा परमेश्वरले हामीबाट के चाहनुहुन्छ? पुस्तिकाबारे बताउँदै थाइलैन्ड निवासी यहोवाका एक साक्षीले भनेका थिए। यो पुस्तिका १९९६/९७ “ईश्वरीय शान्तिका सन्देशवाहकहरू” जिल्ला अधिवेशनमा वाच टावर सोसाइटीद्वारा विमोचन गरिएको हो।
यो ३२ पृष्ठ भएको रंगीन पुस्तिका बाइबल अध्ययनको लागि तयार पारिएको हो। यसमा बाइबलका आधारभूत शिक्षाहरू पाइन्छन्। परमेश्वर हामीबाट के चाहनुहुन्छ भनेर हामीलाई छोटोमीठो तरिकामा स्पष्टसित बताइएको छ। यो पुस्तिका बुझ्न पाठकहरूलाई गाह्रो हुनेछैन। यस नयाँ पुस्तिकाद्वारा तपाईं कसरी बाइबल अध्ययन गर्न सक्नुहुन्छ?
प्रश्नहरू चलाउनुहोस्। प्रत्येक पाठको सुरुमा प्रश्नहरू छन्। प्रत्येक प्रश्नपछिका कोष्ठहरूमा तपाईंले अनुच्छेद संख्या पाउनुहुनेछ, जहाँ ती प्रश्नहरूको उत्तर पाइन्छ। यी प्रश्नहरू अध्ययनअघि र पछि शिक्षण सहायकको रूपमा चलाउन सकिन्छ। उदाहरणका लागि, गृह बाइबल अध्ययनको सुरुमा विद्यार्थीबाट जवाफ पाउन तिनलाई प्रश्नहरू सोध्न सक्नुहुन्छ। तिनले दिएका गलत जवाफहरूलाई तुरुन्तै सच्याउनुको साटो अध्ययनलाई अघि बढाउनुहोस्। विद्यार्थीले अब बाइबलअनुरूप जवाफ दिनसक्छन् कि सक्दैनन् भनेर बुझ्न पाठ सिद्धिएपछि फेरि ती प्रश्नहरू सोध्न सक्नुहुन्छ।
शास्त्रपदहरू हेर्नुहोस्। प्रत्येक पाठमा बाइबल सत्यका छोटो कथनहरूलाई समर्थन गर्ने शास्त्रपदहरू दिएका छन्। धेरैजसो शास्त्रपदहरू उद्धरण गरिएका भए तापनि विद्यार्थीलाई तिनको बाइबलमा यी पदहरू हेर्न प्रोत्साहन दिनु आवश्यक छ। तिनले परमेश्वरको वचनलाई आफ्नो जीवनमा प्रयोग गर्नुअघि पढ्नु र मनन गर्नु आवश्यक छ।—यहोशू १:८.
चित्रहरूमा जोड दिनुहोस्। यस पुस्तिकालाई जम्माजम्मी ५० वटा तस्बिर तथा चित्रहरूले सुस्पष्ट बुझ्ने बनाएका छन्। यी चित्रहरू हेर्नको लागि मात्र नभई थप शिक्षण सहायकहरूको रूपमा प्रस्तुत गरिएका छन्। उदाहरणका लागि, “अरूलाई परमेश्वरको इच्छा पूरा गर्न मदत दिने” र “परमेश्वरको सेवा गर्ने तपाईंको निर्णय” शीर्षक अन्तिम दुइ पाठहरू (दुवै मुख्य पृष्ठ) छन्। दुवै पृष्ठ ढाकेका तस्बिरहरूले एउटै व्यक्तिको आध्यात्मिक प्रगतिलाई देखाउँछ। तिनले त्यहाँ अनौपचारिक साक्षी दिइरहेको, घर-घरको प्रचार कार्य गरिरहेको, समर्पण गरिरहेको र अन्ततः बप्तिस्मा लिएको चित्र देखाइएको छ। तपाईंले यी चित्रहरूमा विद्यार्थीको ध्यान खिचेर परमेश्वरको सेवामा गर्नुपर्ने कुराहरू बुझ्न तिनलाई मदत दिनुहोस्।
इच्छुक व्यक्तिले राम्ररी पढ्न जान्दैनन् वा पढ्नै जान्दैनन् भने नि? सोसाइटीले यस नयाँ पुस्तिकालाई थुप्रै भाषामा श्रव्यक्यासेटद्वारा उपलब्ध गराउँदैछ। यस क्यासेटमा पुस्तिकाको मूलपाठका साथै थुप्रै उद्धरित शास्त्रपदहरू समावेश छन्। यो यसरी रेकर्ड गरिएको छ: उद्धरित शास्त्रपदहरूलगायत प्रश्नको उत्तर पाइने अनुच्छेद पढेपछि पहिलो प्रश्न (वा अनुच्छेदहरू) पढिन्छ। त्यसपछि अर्को प्रश्न पढ्नुभन्दा पहिला त्यस प्रश्नको जवाफ पाइने मूलपाठ र शास्त्रपदहरू पढिन्छ र त्यही प्रकारले पढ्दै लगिन्छ। विद्यार्थीले अध्ययनको निम्ति तयारी गर्दा रेकर्ड सुन्नसक्छन्। अध्ययन सञ्चालन गर्दा पनि क्यासेट प्रयोग गर्न सकिन्छ।
यो नयाँ पुस्तिका क्षेत्र सेवकाईमा प्रयोग गर्न अधिवेशनमा उपस्थित हुनेहरू उत्सुक भए। उदाहरणका लागि, यो पुस्तिका प्राप्त गरेको ठीक दुइ दिनपछि संयुक्त राज्य अमेरिकाका दुइ अग्रगामीहरूले (पूर्ण-समय सुसमाचारक) जवान दम्पतीलाई यो पुस्तिका दिए। अग्रगामीहरूले ती दम्पतीलाई पुनःभेट गरिरहेका थिए। विषयसूचीमा भएको “परमेश्वरका सेवकहरू स्वच्छ हुनैपर्छ” पाठले तिनीहरूको ध्यान खिच्यो। त्यस जवान स्त्रीले भनिन्, “परमेश्वर प्रेम हुनुहुन्छ र उहाँले कहिल्यै घृणा गर्न सक्नुहुन्न भनेर सिकेकी थिएँ। सबैभन्दा पहिला यही विषय म पढ्छु।” पछिल्लो हप्ता अग्रगामीहरू आएपछि त्यस जवान स्त्रीले भनिन्: “म नयाँ पुस्तिका पढिरहेको थिएँ। हामीले गर्नुपर्ने सबै कुरा एकदमै गाह्रो छ। हामीले विवाह गरेका छैनौं। त्यसैले यहोवा हामीसित खुशी हुनुहुन्न। तर हामीले निर्णय गरेका छौं। आउँदो शुक्रबार विवाह गर्ने प्रबन्ध मिलाएका छौं।” तिनीहरूले ती दुइ अग्रगामीलाई अंगालो हाल्दै अझ भने: “नियमित अध्ययन गर्न नसकेकोमा हामी क्षमाप्रार्थी छौं तर विवाह गर्ने निर्णयले हाम्रो मन हल्का भएको छ।”
नयाँ पुस्तिका चाहनुहुन्छ अवश्यै प्रयोग गर्नुहोस्। परमेश्वरका आवश्यकताहरू सिक्न अरूलाई मदत दिने यो उत्तम साधन हो।
[पृष्ठ १७-मा भएको चित्र]
यो नयाँ पुस्तिका तपाईं कसरी प्रयोग गर्नुहुनेछ?