Nkene to vulu okumona uuyelele washili

MOMASIKU 18 Desemba 1810, sho etango lya li li li pokuningina, osikepa yaakwiita yomomeya yaBritania yedhina HMS Pallas oya li ya puka mo mondjila yayo mefuta lyoshikungulu okuza komunkulofuta gwokuuzilolukadhi waSkotolanda. Okwa li ku na omilema nolumi mbyoka ya li ye shi ningi oshidhigu noonkondo koonakulonga mosikepa ndjoka ya mone uuyelele mboka tau vulu oku ya fala pehala lyegameno. Kaya li tuu yu uvite ya pepelelwa sho hugunina ya li ya mono uuyelele e tayu ukitha osikepa yawo kuwo! Mupya munene, uuyelele mboka ya mono hawo mboka ya li ya pumbwa. Dhoshili, uuyelele mboka ya li ya mono owa li waaniilonga mboka ya li ya tema omililo popepi nomunkulofuta. Osikepa ndjoka Pallas oya li yi ipumu momamanya e tayi teka thiluthilu. Omulongo nagumwe yomaaendifuta mboka ya li mo, oya si omeya. Oluhodhi olu thike peni!

Moshinima shi na ko nasha nosikepa ndjoka Pallas, okwaahatala nawa oko kwa li kwe etitha oshiponga shoka. Ihe omathimbo gamwe aaendifuta oya li nokuli ya taalelwa koshiponga oshinene, sha hala okutya, uuyelele wiifundja. Embo Wrecks, Wreckers and Rescuers otali ti kutya uuyelele mboka owa li hau tulilwa po owina opo oosikepa dhi ipume momamanya nongele dha teka dhi vule okuyugwa iinima yadho.

‘Omanyolo omayapuki ngoka taga vulu oku ku thikitha mehupitho’

Mokukonga kwoye uuyelele, owa taalelwa kiiponga ya faathana naambyoka ya li ya tsakanekwa kaaendifuta mboka. Otashi vulika to landula uuyelele wa puka, nenge tashi vulika wa ninga oshihakanwa shokupukithwa owina. Kutya nduno oshike tashi ningwa, otashi vulu oku ku fala moshiponga. Mbela oshike to vulu okuninga opo wi igamene? Shilipaleka ngele onzo yoye yuuyelele oyoshili noyi shi okwiinekelwa. Oshifo shika osha kala nokupopila Oohapu dhaKalunga dha nwethwa mo, Ombiimbeli, uule woomvula dhi vulithe 125, yi li onzo yi shi okwiinekelwa noonkondo yuuyelele molwaashoka oyi na ‘omanyolo omayapuki ngoka taga vulu oku ku pa oondunge tadhi ku thikitha mehupitho.’—2 Timoteus 3:15-17.

Odhoshili kutya opo u kale u na einekelo mOmbiimbeli yi li uuyelele u shi okwiinekelwa mokuwilika, oshi li pandunge opo u konakone uushili wayo. (Episalomi 119:105; Omayeletumbulo 14:15) Kala wa manguluka okunyolela kaanyanyangidhi yoshifo shika opo u mone uuyelele mboka wa kwathele aantu omamiliyona yi itaale kutya Ombiimbeli oya nwethwa mo shili kuKalunga. Pashiholelwa, lesha ontopolwa onti-2 membo Ontseyo Ndjoka Tayi Fala kOmwenyo Gwaaluhe.a Otayi gandja uuyelele oundji mboka tau ulike kutya Ombiimbeli oyi li mondjila, oyi shi okwiinekelwa noya nwethwa mo.

Omalongo gopetameko

Omalongo geni ge li ‘momanyolo omayapuki’ gopetameko? Tala iiholelwa tayi landula:

Oku na Kalunga Omunankondoadhihe gumwe awike e li Omushiti gwiinima ayihe. (Genesis 1:1) Otu li po owala ‘oshoka Kalunga oye a shiti iinima ayihe’ nokwe tu pe omwenyo. (Ehololo 4:11) Omolwaashoka oye awike a gwana okulongelwa. Omushiti oye Onzo ya simanenena yuuyelele auhe. (Episalomi 36:9; Jesaja 30:20, 21; 48:17, 18) Oku na edhina lyopaumwene ndyoka a hala tu li longithe. (1 Samuel 2:3, OB-1954) MOmbiimbeli yopetameko edhina ndyoka olya nyolwa moondanda dhOshihebeli nohali leshwa YHWH, notali holoka mo lwiikando 7 000 lwaampono. Olya kala hali longithwa mOshindonga uule woomvula odhindji hali nyolwa “Jehova.”—Eksodus 15:3, OB-1954.

Jehova okwa shiti aalumentu naakiintu ya kale nomwenyo sigo aluhe mOparadisa huka kombanda yevi. Okwa pe aantu omaukwatya gopambepo ngoka ga fa ge. Okwe ya pe iipewa nuunkulungu mbyoka tayi ya vulitha ya nyanyukilwe onkalamwenyo kaayi na ehulilo noyimbilipaleka kombanda yevi. (Genesis 1:26-28) Ka li nando e na elalakano opo evi li kale ehala lyokumakela aalumentu naakiintu, sha hala okutya, li kale ehala lyoku ya longekidhila onkalamwenyo yopambepo megulu, sha fa owala omo ye na okukala nekwatathano naKalunga.

Sho Kalunga a shiti aantu, muyo kamwa li nando uuwinayi washa. Uuwinayi owe ya po owala sho yimwe yomeshito lyaKalunga, aantu niishitwa yopambepo, ya longitha nayi emanguluko lyayo lyokuhogolola e tayi mu tukuluthile oshipotha. (Deuteronomium 32:5) Aakuluntu yetu yopetameko oyi ikuthile uuthemba wokutokola kuyo yene shoka oshiwanawa naashoka oshiwinayi. (Genesis 2:17; 3:1-5) Shoka oshe etele aantu eso. (Genesis 3:19; Aaroma 5:12) Opo ompata ndjoka ya penduthwa kaanashipotha yi kandulwe po, Jehova okwa tokola okwiidhidhimikila uukolokoshi uule wethimbo lyontumba. Ihe elalakano lye li na ko nasha nevi nosho wo naantu inali lunduluka. (Jesaja 45:18) Aalumentu naakiintu otaya ka kala natango nomwenyo sigo aluhe mOparadisa kombanda yevi lya yogoka.—Mateus 6:10; Ehololo 21:1-5.

Jesus Kristus ke shi Kalunga Omunankondoadhihe, ihe Omwana gwaKalunga. Jesus Kristus okwa longo aalanduli ye ya galikane taya ti: “Tate yetu, ngu u li megulu: Edhina lyoye nali yapulwe.” (Mateus 6:9) Ina tya nando kutya oku thike pamwe nahe. Pehala lyaashono, okwa ti: “Tate oye omunene e vule ndje.”—Johannes 14:28.

Jesus ota dhana onkandangala ya simanenena mokugwanithwa kwelalakano lyaKalunga. Kalunga okwe mu tumu ‘a kale uuyelele wuuyuni, opo kehe ngoka te mu itaale, kaa kale we momilema.’ (Johannes 12:46) Pakupopya kwomuyapostoli Petrus, “omuye awike tamu tu zile ehupitho.” (Iilonga 4:12) Shika osho shi li ngawo molwaashoka ehupitho lyetu olyi ikolelela kombinzi yaKristus yi na ondilo. (1 Petrus 1:18, 19) Jesus Kristus okwa gandja omwenyo gwe gu li iikulila okukulila aantu muulunde mboka aakuluntu yetu yotango, Adam naEva ye tu etele. (Mateus 20:28; 1 Timoteus 2:6) Jesus okwa li a longithwa wo kuKalunga a holole ehalo nosho wo elalakano Lye.—Johannes 8:12, 32, 46, 47; 14:6; Iilonga 26:23.

Kalunga okwa dhiki po Uukwaniilwa nenge epangelo lyomegulu, wa thikama po muJesus Kristus naamboka ya hogololwa maantu. Edhiladhilo ndika ohali holoka mOmbiimbeli iikando niikando. Kalunga okwi inekelela epangelo ndyoka oshilonga shokushilipaleka kutya ehalo lye otali gwanithwa kombanda yevi ngaashi megulu. (Mateus 6:10) Petameko kasha li nando elalakano lyaKalunga opo aantu ya ye megulu. Oya li ye na okukala kombanda yevi. Sho aantu ya yono, Kalunga okwa kala e na elalakano lyasha oshipe. Okwa ningi elongekidho okuhogolola aantu “ya za momaludhi agehe, momalaka agehe, miigwana ayihe” ya ka ‘pangele’ pamwe naKristus mepangelo lyomegulu. (Ehololo 5:9, 10) Uukwaniilwa mboka masiku otau ka “yonagula po” omapangelo agehe gaantu, ngoka ge etele aantu oluhodhi olunene nuuwehame oundji.—Daniel 2:44.

Omwenyo ohagu si. Elongo ndika lyopetameko lyOmbiimbeli otali yelitha oshindji kombinga yomuntu nosho wo etegameno lyonkalamwenyo ye. Otali kutha po wo euvoko lyopombambo nuuyelele wa puka mboka wa tompakanitha aantu kombinga yonkalo yoonakusa.

Embo lyotango lyOmbiimbeli otali tu lombwele tali ti: “OMUWA Kalunga okwa kutha ontsi yevi e te yi umbu omuntu. Okwe mu fudhile ombepo yomwenyo momayulu, omuntu nokwa ningi [omwenyo gu na omwenyo, KB].” (Genesis 2:7) Mbela ou uvite ko ngaa shoka shika tashi ti? Omwenyo kagu shi oshitopolwa shi ili shi li molutu lwomuntu ihaashi si. Ihe omuntu ye mwene oye omwenyo, ngoka gwa thikama po miitungithi mbyoka ya za “mevi” nosho wo oonkondo dhomwenyo ndhoka hadhi zi kuKalunga. Omwenyo ohagu si. Uuna omuntu a si, kungeyi omwenyo ogwa sa.—Genesis 3:19; Omuuvithi 9:5, 10.

Mboka ya sa otaya vulu okukala ishewe nomwenyo okupitila meyumuko. Ngele ethimbo ndyono Kalunga a pitika uukolokoshi u kale po pakathimbo lya pu ko, ‘ayehe mboka ye li moombila, otaa ka uva ewi lyaJesus. Oyo notaa ka za mo moombila dhawo: mboka ya longa uuwanawa, otaa ka yumudhwa e taa kala ye na omwenyo.’ (Johannes 5:28, 29; Iilonga 24:15) Eyumuko otali ka galulila aantu momwenyo okukala moparadisa kombanda yevi, ndjoka Kalunga a li a halela aantu petameko.

Konakona nuukeka omanyolo esiku kehe

Mbela owa mona nkene ontseyo yomalongo gopetameko tayi vulu oku ku kwathela? Momathimbo ngaka omadhigu, ontseyo ndjoka otayi vulu oku ku gamena ‘kuunongo wuugoya’ hau taandelithwa kuSatana Ondiaboli. Ohi ifethitha “omuyengeli guuyelele,” naakalelipo ye ohayi iningi “ongaayakuli aawanawa.” (1 Timoteus 6:20; 2 Aakorinto 11:13-15) Ontseyo yashili yOmbiimbeli otayi vulu oku ku gamena kwaashoka hashi ithanwa aniwa uuyelele wa kankamena komaufilosofi guuyuni ‘gaanongo naanamayele’ mboka ye “ekelehi oohapu” dhaJehova.—Mateus 11:25; Jeremia 8:9.

Molwaashoka pethimbo lye opwa li omalongo ogendji omapukithi naafilosofi oyendji, omuyapostoli Johannes okwa londodha Aakriste yomethelemumvo lyotango a ti: ‘Inamu itaala ayehe mboka taa ti kutya oye na Ombepo yaKalunga.’ Okwa ti: “Ihe ya konakoneni, mu tale kutya ombepo ndjoka ye yi na ngele oyaKalunga tuu.” (1 Johannes 4:1) Tala keudhi ndika. Ngele wa pewa etumwalaka ndyoka tali vulu okulundulula thiluthilu onkalamwenyo yoye, oto ke li taamba ko owala ngeya molwaashoka tali monika lya fa lya za konzo ombwaanawa? Hasho nando. Oto ka shilipaleka mpoka lya za e to konakona oshikalimo shalyo manga inoo li taamba.

Mokugandja omanyolo ga nwethwa mo ngoka ge na omalongo gopetameko, Kalunga okwe shi ningi tashi wapa kungoye opo u ‘konakone’ ngele uuyelele mboka wa landula owoshili. (1 Aatessalonika 5:21) Aantu aanandunge methelemumvo lyotango oya li ya pandulwa molwaashoka ‘esiku kehe ya kala nokukonakona Omanyolo’ opo ya tale ngele shoka yi ilonga oshoshili tuu. (Iilonga 17:11) Oto vulu okuninga sha faathana. Ombiimbeli nayi ku wilike ya fa “olamba tayi minikile momilema” opo u ende muuyelele. (2 Petrus 1:19-21) Ngele to shi ningi ‘oto ka mona ontseyo okutseya Kalunga’ ndjoka tayi ku pe uuyelele washili.—Omayeletumbulo 2:5.

[Enyolo lyopevi]

[Ethano pepandja 4]

Oohapu dhaKalunga odha fa olamba

[Ethano pepandja 5]

Edhina lyaKalunga olyo lye?

[Ethano pepandja 5]

Onakuyiwa yaantu oyini?

[Ethano pepandja 6]

Mbela Jesus oye Kalunga Omunankondoadhihe?

[Ethano pepandja 6]

Oonakusa oye li peni?

[Ethano pepandja 7]

Eyumuko lyoonakusa olyo elongo limwe lyopetameko ndyoka tali longwa kOmbiimbeli