Baŵa si Tölu

Lö omasi ita na fatiu dödö niha böʼö khöda hegöi na lafakao ita börö wamatida. Na simanö, hana wa lö tebulö tarasoi waʼomuso dödö hewaʼae na fatiu dödö niha gulidanö khöda? Si löʼö-löʼönia, so tölu dane-danenia. Si oföna, na anau gölöda, omuso dödö Yehowa khöda. (1 Fe. 4:13, 14) Si dua, itugu aro wamatida me no tetandraigö. (1 Fe. 1:7) Ba si tölu, tola tatema howu-howu sebua böli, yaʼia daʼö faʼauri si lö aetu. (Rom. 2:6, 7) Lö ara me no aefa tesusugi Yesu, larasoi ira sinengenia waʼomuso dödö si no irai itutunö. Me no aefa laleasi ba lafaso ira enaʼö laböhöli wanuriaigö, ”omuso dödöra börö me no sinangea laʼoʼaya ira ba döi [Yesu] andrö”. (Hal. 5:40-42) Abölö ebua waʼomasira khö Zoʼaya yaʼira moroi ba waʼataʼura ba niha si faʼudu khöra. Ba no göi laforomaʼö waʼomasi me ”lö laböhöli” wanuriaigö turia somuso dödö. Iadaʼa, ato ndra talifusöda si lö faröi ba wamosumange Yehowa hewaʼae na oya gabula dödöra. Aboto ba dödöra wa lö iʼolifugö Yehowa waʼerege dödöra hegöi faʼomasi niforomaʼöra ba döinia. w21.03 25 ¶18-19

Tenga iʼotarai me tumbu ira laʼokhögö dötönafö faʼauri si lö aetu ba zorugo ira niha Keriso nibayoini. Yehowa zotanögö ba dödöra dötönafö andrö. Asese laʼangeragö dötönafö niʼokhögöra, laʼolohesi daʼö ba wangandrö, ba akhari-khari dödöra wombaloi tötönaföra ba zorugo. Lö laʼila lakhalaigö hewisa dania mbotora na no tobali ira boto eheha ba zorugo. (Fil. 3:20, 21; 1 Yo. 3:2) Ladöna-döna sibai falulu fohalöwö ira ba Wamatörö Lowalangi si so ba zorugo. Ladöna-döna ira biri-biri tanö böʼö hawaʼara tola laʼokhögö waʼauri si lö aetu ba gulidanö. Sindruhunia, daʼö nidöna-döna fefu niha iʼotarai me tumbu ira. Omasi sibai mbiri-biri tanö böʼö ba wombaliʼö faradaiso gulidanö andre. Labalo-baloi hawaʼara tola lafazökhi samösa nomora, latanö zinanö ba kabura, ba owua-wua dödöra wefao ba nösi nomora si lö fökhö ba soʼahonoa. (Yes. 65:21-23) Lakhalaigö hewisa dania na laʼanöröi gulidanö ba möi ira ba hili, ba gatua, hegöi ba nasi, ba lafahaʼö ira ba gomböila danga Yehowa. Ba faʼomuso dödö sabölö ebua khöra yaʼia daʼö börö me laʼila wa itugu aro dania wahuwusara khö Yehowa. w21.01 18 ¶17-18

Me no awai lasuwö soira ira niha Mbabilona, lamane wangumaʼö, ”Tanö si mate si lö niha-niha ba si lö urifö, ba no tebeʼe ba danga niha Galedaia.” (Yer. 32:43) Te mato 200 fakhe me no aefa ifaʼema wamaʼeleʼönia Yoeli, iʼogunaʼö Yeremia Yehowa ba wamaʼema salua tanö böʼö sanandrösa ba wanuwö andrö. Iwaʼö Yehowa wa lahaogö wangalui iraono Gizaraʼeli samalua si lö sökhi ira saradadu andrö dania, ba laraʼu ira fefu. ”Imane Yehowa, ’Ato dania ufatenge zi fagai ba si fagai andrö zondraʼu yaʼira. Aefa daʼö, ato dania ufatenge zi möi malu, ba si möi malu andrö zangalui yaʼira ba hili hegöi ba hili-hili maʼafefu, simanö göi ba gotalua hili sokara. . . . Uhuku ira moloʼö sala hegöi horö si no lafalua.” Gofu hezoso labiniʼö ira iraono Gizaraʼeli si lö mamalalini era-era, he ba nasi mazui ba gatua, tebai teʼefaʼö ira moroi ba wanguhuku Yehowa.—Yer. 16:16, 18. w20.04 5 ¶12-13

Lö iʼanemaiʼö iʼoʼö Loti wanuturu lala moroi khö Yehowa, ba ginötö moguna mufalua daʼö. Tola manö tawaʼö tödöda wa lö iʼameʼegö tödö Loti wamangelama moroi khö Yehowa mazui yaʼia andrö niha si lö moloʼö. Hewaʼae simanö, lö mamalö iforege Yehowa ba wanolo yaʼia. ”Börö me ihakhösi tödö ia Yehowa,” lagogohe dangania ira malaʼika ba wanolo yaʼia hegöi ösi nomonia ba wondröi banua andrö. (1 Mo. 19:15, 16) Te so ösa mbörö wa iforomaʼö Yehowa waʼahakhö dödö khö Loti. Tola manö abua khönia ba wondröi omonia, börö me ataʼu ia ba niha si so ba zi fasui Zodoma. Baero daʼö, so ösa deʼala tanö böʼö. Tola manö iʼila Loti wa so darua razo si no aekhu ba dögi safönu aspal, si so ba mbawa danö sahatö ba daʼö. (1 Mo. 14:8-12) Börö me yaʼia andrö samösa foʼomo hegöi ama, tatu manö iʼaombösi tödö zalua ba nösi nomonia. Oya göi gokhötania, ba tola manö sökhi sibai nomonia si so ba Zodoma. (1 Mo. 13:5, 6) Sindruhu sa, fefu zalua andrö tebai mubaliʼö dane-dane wa lö iʼanemaiʼö iʼoʼö fareta Yehowa. Hizaʼi, lö iʼosambuaʼö dödönia Yehowa ba zala nifalua Loti. Ba dödönia, Loti andrö no ”niha satulö”.—2 Fe. 2:7, 8. w20.04 18 ¶13-14

Yaʼami si bohou ebua, moguna ginötö ba niha ba wamaduhuʼö wa tenga iraono saʼae ami, hizaʼi niha satua-tua fangera-ngera. Yafaduhu dödömi wa lö iʼosambuaʼö dödönia Yehowa ba waʼalawa ndröfimi. Aboto ba dödönia haniha ami, ba iʼila hadia zi tola mifalua. (1 Sa. 16:7) Moguna göi miʼaroʼö wahuwusami khö Lowalangi. Ifalua daʼö Dawido me inehegö gomböila danga Yehowa, ba iʼangerönusi hadia wamahaʼö nihalönia sanandrösa khö Zomböi. (Si. 8:3, 4; 139:14; Rom. 1:20) Lala tanö böʼö si tola mifalua yaʼia daʼö ba wangandrö faʼabölö khö Yehowa. Duma-dumania, hadia laʼoʼaya ami ira awömi sekola börö me Samaduhuʼö Yehowa ami? Na yaʼia, miʼangandrö khö Yehowa enaʼö ibeʼe khömi waʼabölö ba wanaögö abula dödö andrö. Aefa daʼö, miʼoʼö mene-mene si tefaudu nisöndrami ba Daromalinia hegöi ba publikasi awö video si teʼodane-dane ba Zura Niʼamoniʼö. Ero na mirasoi wa itolo ami Yehowa ba wanaögö abula dödö, itugu tedou waʼafaduhu dödömi khönia. Ba na laʼila niha wa miʼodaligö Yehowa, tola lafaduhusi tödö ami. w21.03 4 ¶7

Darua niha si fahuwu, si toʼölönia omasi latutunö khö nawöra zamösana hadia niʼera-erara hegöi nirasoira. Hadia simane daʼö göi wahuwusada khö Yehowa? Yaʼia! Fahuhuo göi khöda Yehowa. Ba Daromalinia Sura Niʼamoniʼö, ifatunö khöda hadia niʼera-erania hegöi nirasoinia. Fahuhuo ita khö Yehowa ba wangandrö. Na mangandrö ita tola tatutunö hadia niʼera-erada hegöi nirasoida. Hizaʼi, börö me Si Fahuwu khöda Yehowa, tenga ha ifondrondrongo manö wangandröda, omasi göi ibeʼe wanema li. Itaria alio tatema wanema li moroi ba wangandröda. Hizaʼi itaria, moguna lö aetu-aetu mangandrö ita enaʼö tola tatema wanema linia. Hewaʼae simanö, tola faduhu dödöda wa hasambalö ifondrondrongo wangandröda ba ginötö si tefaudu hegöi ba lala si sökhi. Sindruhu sa wa fanema li nibeʼe Yehowa itaria tenga simane nitötönada. Duma-dumania, te lö iʼanemaiʼö iheta gabula dödö salua khöda. Hizaʼi, ibeʼe khöda waʼatua-tua ba faʼabölö enaʼö ’anau gölöda ba wanaögö yaʼia’. (1 Ko. 10:13) Hewisa wangoromaʼöda wa taʼameʼegö tödö mbuala fangandrö? Sambua lala si tola tafalua yaʼia daʼö taʼoʼö mene-mene moroi ba Zura Niʼamoniʼö ba lö taböhöli wangandrö.—1 Te. 5:17. w20.05 27-28 ¶7-8

Enaʼö lö manendre niha si fagohi, moguna lafaigi-faigi lala si so fönara. Hizaʼi, hewaʼae na alau ira, ifuli zui lalau mosindro ba latohugö fagohi. Lö laʼosambuaʼö dödöra ba zameʼe manendre ira. Hizaʼi, laʼosambuaʼö dödöra ba gamozua hegöi ba mbuala nidöna-dönara. Ba watandrisa ba wamati andre, tola manö asese manendre ita, fasala wehededa mazui amutada. Mazui, te so ndra talifusöda samalua zala sangafökhöiʼö tödöda. Sindruhunia, lö moguna tokea ita na alua daʼö. Fefu ita lö moʼahonoa, ba fagohi ita ba lala sise-ise saekhu ba waʼauri. Andrö, itaria ”fatandru” ita khö ndra talifusöda ba tumbu ’waʼabao dödöda’ khö ndra talifusöda. (Kol. 3:13) Hizaʼi, moroi na taʼosambuaʼö dödöda ba zameʼe manendre ita, abölö sökhi na taʼosambuaʼö dödöda ba mbuala nitemada ba tatohugö fagohi. Na lö aetu-aetu wönuda ba lö saʼae tafosumange Yehowa, tebai tarugi gamozua ba lö tatema mbuala. Baero daʼö, tola manö tobali ita daha-taha ba niha böʼö samorege ba wagohisa. w20.04 26 ¶1; 28 ¶8-9

Itutunö Danieli sanandrösa ba zi sambua nadu sebua, sangokhögö ndroto-ndroto moroi ba loga si faböʼö-böʼö. Ero sambua ndroto-ndroto, daʼö zoʼamaedolagö famatörö sangokhögö kuaso si tola molua-lua ba nono mbanua Lowalangi. Faböʼö-böʼö ginötö wamatöröra. Tefazökhi gahe nadu andrö moroi ba ziʼöli hegöi tambu laʼuri. Manandrösa daʼa ba wamatörö safuria, yaʼia daʼö Kuaso Gulidanö Inggris hegöi Amerika Serikat. Famaʼeleʼö andrö zangoromaʼö wa lö tebulö so daʼö irege mofozu Wamatörö Lowalangi ba wodudugö fefu wamatörö niha gulidanö. Ifaʼeleʼö sinenge sotöi Yohane sanandrösa khö ndra samatörö sangokhögö kuaso si tola molua-lua ba nono mbanua Yehowa. Ba wamaʼeleʼönia, muʼamaedolagö fefu wamatörö simane urifö samuʼi si fitu högö. Högö si fitu moroi ba gurifö samuʼi andrö, yaʼia daʼö Kuaso Gulidanö Inggris-Amerika. Moguna aboto ba dödöda daʼa, börö me lö hadöi saʼae högö tanö böʼö baero högö si fitu andrö. Börö daʼö, lö aetu mamatörö högö si fitu ba gurifö samuʼi andrö irugi tohare Yesu hegöi ira saradadunia ba wodudugö yaʼia hegöi fefu ndroto-ndrotonia tanö böʼö.—Fam. 13:1, 2; 17:13, 14. w20.05 14 ¶11-12

Fehedenia sadogo-dogo andre zamasugi ba dödöda wa Yehowa andrö Umbu waʼomasi, tenga ha Umbu waʼauri. Sindruhu-ndruhu wa iʼomasiʼö sibai ita Yehowa! Börö waʼomasinia khöda, tola tarasoi waʼahono dödö hegöi faʼomuso dödö, ba moʼeluaha waʼaurida. Yaʼita niha Keriso, lö taʼila tafili hadia taforomaʼö waʼomasi mazui löʼö. Daʼö no sambua oroisa si lö tola löʼö tafalua. (Mat. 22:37-40) Me no aboto ba dödöda sanandrösa khö Yehowa, tola manö aoha khöda ba woloʼö oroisa si oföna, börö me moʼahonoa Yehowa andrö. Sindruhu-ndruhu wa iʼameʼegö tödö ita ba iforomaʼö khöda waʼasökhi dödö. Hizaʼi, te abua khöda ba woloʼö oroisa si dua. Hadia mbörö? Börö me fefu niha lö moʼahonoa, tefarahu ba daʼö ndra talifusöda. Itaria laʼafökhöiʼö dödöda moroi ba wehede mazui ba nifaluara. Aboto ba dödö Yehowa wa tola manö abua khöda ba wamalua oroisa daʼa. Daʼö mbörö wa ibeʼe wanuturu lala khö ndra sanura Sura Niʼamoniʼö ba wanutunö hadia mbörö wa moguna faoma taʼomasiʼö nawöda ba hewisa lala wamalua yaʼia. Samösa zanura andrö yaʼia daʼö sinenge sotöi Yohane.—1 Yo. 3:11, 12. w21.01 8 ¶1-2

Hewaʼae na no ara tafosumange Yehowa mazui löʼö, moguna taʼangerönusi wanofu andre: ’Hadia no uforege ba wolawa Satana enaʼö lö mamodombua dödögu?’ Duma-dumania, hadia nifaluamö na öʼila gambara ba TV mazui ba Internet sondrönisi tödömö ba woʼangeragö amuata fohorö? Tola manö öwaʼö tödömö wa tenga pornografi daʼö. Hizaʼi, tola iʼogunaʼö daʼö Satana enaʼö mamodombua dödömö. Gambara andrö hulö simane fato niʼogunaʼö ba wanila eu sesolo. Na awena sakali muhawiagö wato, lö iʼanemaiʼö asila geu andrö. Hizaʼi, na no hauga kali muhawiagö ia, hasambalö asila geu andrö ba gafuriata. Simane daʼö göi, na tafaigi gambara sondrönisi tödöda ba woʼangeragö ngawalö zoʼamakhaita ba wohorö, te lö iʼanemaiʼö oroma hadia lua-luania. Hizaʼi ba gafuriata, tola mamodombua dödöda irege tafalua horö ba faröi ita khö Yehowa. Börö daʼö, böi tehegö tefaʼamöi ba dödömö ngawalö zi lö tefaudu! Böi tebulö osambalöʼö dödömö ba wangataʼufi töi Yehowa! w20.06 12 ¶14-15

Moguna lö aetu-aetu tatolo ba tafarou dödö ndra talifusöda si no mamöhöli halöwö ba wamati. Simane iraono nitutunö ba gamaedola Yesu, tola manö lö alio taya waʼafökhö nirasoira. (Luk. 15:17-24) Baero daʼö, börö me no irai farahu ira ba gulidanö Zatana, tola manö lö aro ira ba wamati. Andrö wa moguna tatolo ira ba wangaroʼö famatira khö Yehowa. Ba gamaedola Yesu sanandrösa ba mbiri-biri si taya, itutunö Yesu wa ibeʼe ba galisinia mbiri-biri andrö kubalo ba iʼohe ia mangawuli ba ngawawa. Oya ginötö hegöi faʼabölö niʼogunaʼö gubalo andrö ba wangalui mbiri-birinia si no taya. Hewaʼae simanö, aboto ba dödönia wa so nasa zinangea ifalua. Börö me lö faʼabölö khö mbiri-biri daʼö, moguna iforege kubalo andrö ba wolohe yaʼia mangawuli ba ngawawa. (Luk. 15:4, 5) Tola manö oya ginötö hegöi faʼabölö niʼogunaʼöda ba wanolo niha samöhöli halöwö ba wamati enaʼö tola lataögö gabula dödö si tobali fanaisira ba wamosumange Yehowa mangawuli. Hizaʼi, börö wanolo moroi ba geheha Yehowa, Taromalinia, hegöi publikasi si no ihenaigö organisasi, tola tatolo ira ba wangaroʼö fahuwusara khö Yehowa. Na yaʼugö nituyu ba wamalua daʼö, moguna ötema halöwö andrö si fao faʼomuso dödö. w20.06 28 ¶14-15

Moguna taforomaʼö waʼomasi si tobali tandra wa yaʼita andre niha Keriso sindruhu. Baero daʼö, moguna göi taʼokhögö ”waʼaboto ba dödö si tefaudu hegöi fangera-ngera si sökhi”. (Fil. 1:9) Na lö taʼokhögö daʼö, tola manö tedönisi dödöda ”ba ngawalö wamahaʼö faya moroi ba waʼonekhe zamaelungu andrö”, duma-dumania niha sangerogö sindruhu. (Ef. 4:14) Me ato nifahaʼö Yesu samöhöli ba woloʼö yaʼia, iʼombakhaʼö Fetero waʼafaduhu dödönia sanandrösa khö Yesu, imane, ”Ba wehedemö so waʼauri si lö aetu.” (Yoh. 6:67, 68) Hewaʼae na lö aboto sibai ba dödönia wehede Yesu andrö, lö faröi ia khö Yesu börö me no aboto ba dödönia zindruhu sanandrösa khö Keriso. Simane Fetero, tola göi öʼaroʼö waʼafaduhu dödömö ba wamahaʼö si so ba Zura Niʼamoniʼö. Na öfalua daʼö, lö mamalö aro wamatimö gofu hadia ia zalua, ba tola göi ötolo niha böʼö ba wangaroʼö famatira.—2 Yo. 1, 2. w20.07 8 ¶2; 13 ¶18

Moguna taforomaʼö waʼahakhö dödö ba wanolo ndra talifusöda enaʼö lö faröi ira ba zindruhu. (1 Yo. 3:10, 11, 16, 17) Moguna taʼomasiʼö nawöda, tenga ha ba ginötö waʼomuso dödö hizaʼi na alua göi gabula dödö. Duma-dumania, hadia so dalifusöda ba wamati sinangea mubeʼe fondrara dödö mazui fanolo tanö böʼö, börö me no mate niha niʼomasiʼönia? Mazui, hadia no örongo wa so ndra talifusöda si göna bencana alam, ba sinangea mutolo ba wangehaogö Nahia Gangowuloa niʼogunaʼöra mazui omora? Na omasi ita taforomaʼö waʼomasi hegöi faʼahakhö dödö, lö obönö na ha ba wehededa taforomaʼö daʼö. Sabölö tohude, moguna so zinangea tafalua ba wangoromaʼö yaʼia. Na faoma taforomaʼö waʼomasi, no taʼoʼö duma-duma Namada sebua faʼomasi. (1 Yo. 4:7, 8) Sambua lala si tola tafalua ba wangoromaʼö faʼomasi yaʼia daʼö faoma taʼefaʼö zala nawöda. Duma-dumania, na no iʼafökhöiʼö dödöda si samösa niha, moguna taforege ba wangefaʼö hegöi ba wangolifugö zala si no ifalua andrö.—Kol. 3:13. w20.07 24 ¶14-15

Hadia mufahaʼö dania niha ero zamösana, simane famahaʼö ba Zura Niʼamoniʼö nifaluada iadaʼa? Hadia mufataro dania ira ba zi sambua mbanua niha Keriso ba mufomaha ira ba wamahaʼö niha nisusugi aefa daʼö? Lö taʼila sibai. Hizaʼi, no aboto ba dödöda wa ba gangohorita Wamatörö Keriso si Saribu Fakhe dania, hasambalö ”anönö danö faʼaboto ba dödö sanandrösa khö Yehowa”. (Yes. 11:9) Sindruhu-ndruhu wa oya sibai halöwö sangaʼasogö faʼomuso dödö nifaluada ba Wamatörö si Saribu Fakhe! Na tesusugi niha si no mate dania, moguna laforege ba wolawa isö-isö dödöra si fasala, ba lafalua goi-goi Yehowa ba waʼaurira sero maʼökhö. Hizaʼi, sagötö Wamatörö Keriso si Saribu Fakhe, moguna göi labulöʼö gamuatara iraono mbanua Lowalangi na omasi ira laʼomusoiʼö dödö Yehowa. Daʼö mbörö wa tola larasoi hadia nirasoi niha nisusugi, me latolo ira ba wombulöʼö faʼaurira. (1 Fe. 3:8) Ba me laʼila ira niha nisusugi wa lö aetu laforege iraono mbanua Yehowa ba wombulöʼö amuatara, tola aboto ba dödöra wa so wangide-ngideʼö ba gotalua nono mbanua Lowalangi. Buania, tola terou dödöra wefao ba wamosumange Yehowa.—Fil. 2:12. w20.08 16 ¶6-7

Na taʼoʼö mene-mene nibeʼe zinenge sotöi Faulo ba wamareso hadia nifaluada zamösana, tola aboto ba dödöda wa so waʼonekhe niʼokhögöda si lö laʼokhögö niha böʼö. Duma-dumania, te lö onekhe zi samösa satua sokubaloi ba wamaʼema huhuo ba gangowuloa, hizaʼi onekhe sibai ia ba wamahaʼö niha nifalukhaisinia ba wanuriaigö. Mazui, te lö onekhe ia ba wameʼe fanuturu lala simane ira satua sokubaloi tanö böʼö, hizaʼi laʼila ira talifusöda wa yaʼia andrö satua sokubaloi si sökhi amuata ba safönu faʼomasi, irege lö alawö ira ba wangandrö khönia mene-mene Zura Niʼamoniʼö. Mazui te no laʼila ira talifusöda wa oböwö sibai ia. (Heb. 13:2, 16) Na sindruhu-ndruhu aboto ba dödöda hadia waʼonekhe hegöi faʼabölö niʼokhögöda, tola faduhu dödöda wa so zi tola tafalua ba mbanua niha Keriso. Baero daʼö, lö saʼae afökhö dödöda na so ndra talifusöda sangokhögö faʼonekhe si faböʼö ba niʼokhögöda. Gofu hadia halöwö niʼokhögöda ba mbanua niha Keriso, moguna so khöda waʼedöna ba wondrouʼö faʼonekheda ba wamalua halöwö ba wamati. w20.08 23-24 ¶16-18

Ifaʼema huhuo talifusöda J. F. Rutherford me döfi 1935 ba gangowuloa sebua nifalua ba Washington, DC, AS, tuhonia ”Ngawawa Sato Sibai”. Ba huhuo nifaʼemania, itutunö talifusöda Rutherford sanandrösa ba ”ngawawa sato sibai” nitötöi ba Wamaʼeleʼö 7:9. Ba zilalö, so ba dödö ndra Samaduhuʼö Yehowa wa manandrösa ngawua wehede daʼa ba ngawawa niha si möi ba zorugo, hizaʼi lö tobali ira razo awö Yesu börö me faʼalöfaröira tenga simane faʼalöfaröi zi 144.000. Iʼogunaʼö Zura Niʼamoniʼö talifusöda Rutherford ba wanutunö wa tenga ba zorugo auri ngawawa sato sibai andrö. Yaʼira andrö biri-biri tanö böʼö khö Keriso, niʼorifi sagötö alua ”wamakao sabölö-bölö”, ba sangokhögö faʼauri si lö aetu ba gulidanö. (Fam. 7:14) No ifabuʼu Yesu, ”Ba so khögu mbiri-biri tanö böʼö si tenga moroi ba kandra andre, ba lö tola löʼö uʼohe ira ba lafondrondrongo ligu dania ba tobali ha sambawa nikubaloi ba ha samösa gubalo.” (Yoh. 10:16) Börö daʼö, biri-biri tanö böʼö eluahania ono mbanua Yehowa si lö faröi sangokhögö tötönafö faʼauri si lö aetu ba gulidanö Faradaiso.—Mat. 25:31-33, 46. w21.01 14 ¶1-2

Moguna taforege ba wamalua zi no tatatugöi, enaʼö tola anau gölöda ba wamalua halöwö fanuriaigö. (Mat. 28:19, 20) Sindruhu sa, abua sibai ba niha ba wamalua zi no latatugöi. Abölö omasi ita ba wamalua halöwö saoha. Börö daʼö, enaʼö tola taforege ba wamalua zi no tatatugöi, moguna taʼokhögö wanaha tödö. Tobali, enaʼö tola tafomaha ita ba wamalua halöwö sabua, moguna khöda wanolo. Hasambalö iʼogunaʼö gehehania niʼamoniʼö Yehowa ba wanolo yaʼita. (Gal. 5:22, 23) Mofozu sibai zinenge sotöi Faulo ba wamalua zi no itatugöi. Hizaʼi, ifaduhuʼö wa moguna ’ifakao’ mbotonia enaʼö tola ifalua zatulö. (1 Ko. 9:25-27) Iʼamenesi göi niha böʼö enaʼö laforege ba wamalua zi no latatugöi, ba enaʼö ”sökhi ba toföfö” wamaluara fefu hadia ia. (1 Ko. 14:40) Börö me niha Keriso ita, moguna taforege ba wamalua zi no tatatugöi enaʼö lö mamalö tafalua halöwö ba wamati, tefarahu ba daʼö wamalua fanuriaigö hegöi famahaʼö.—Hal. 2:46. w20.09 6-7 ¶15-17

Oya soi ba ginötö andre si lö manaisi halöwö fanuriaigö nifaluada. Hadia ba soi simane daʼö toröi ndraʼugö? Na yaʼia, sofu khöu samösa, ’Hewisa wangogunaʼögu inötö waʼahono dödö andre ba lala si tefaudu?’ Ba ngaluo safuria andre, omuso dödö ndraono mbanua Lowalangi börö me laforege ba wamalua halöwö fanuriaigö hegöi ba wamahaʼö niha böʼö. Daʼa no halöwö sebua sibai, nifalua ba zi sagörö ulidanö. Börö daʼö, oya sibai zi tola tafalua na fao ita ba halöwö daʼa. Hewisa wangogunaʼömö inötö waʼahono dödö ba lala si tefaudu? (2 Ti. 4:2) Angeragö atö hewisa waʼaurimö iadaʼa, ba nehegö hadia zi tola öbulöʼö enaʼö itugu oya ginötö niʼogunaʼömö mazui niʼogunaʼö nösi nomou ba wanuriaigö, irege tola mangai halöwö tobali perintis. Tenga inötönia iadaʼa ba wolohi faʼakayo börö me tenga daʼö zangorifi yaʼita dania na alua wamakao sabölö-bölö. (Amd. 11:4; Mat. 6:31-33; 1 Yo. 2:15-17) Ato ndra sanuriaigö iadaʼa si no mamahaʼö yaʼira ba li si bohou irege tola laʼogunaʼö li daʼö ba wanuriaigö hegöi ba wamahaʼö. Ba wanolo yaʼira, no ihenaigö organisasida publikasi ba zi töra 1.000 ngawalö li! w20.09 16 ¶9-11

Lö faröi zi samösa saradadu si sökhi. Hasambalö iforege wasöndrata ba wolumöʼö niha niʼomasiʼönia mazui ngawalö zebua böli ba wamaiginia. Ifarou Dimoteo Faulo enaʼö lö faröi ia ba wamosumange Lowalangi soroi ba dödö. (1 Ti. 4:7) Na itugu taʼomasiʼö Lowalangi ba lö faröi ita khönia, itugu terou dödöda ba woʼameʼegö tödö zindruhu. (1 Ti. 4:8-10; 6:6) Moguna iforege si samösa saradadu enaʼö lö mamalö tefaʼanö ia ba wamalua halöwönia. Lö aetu tefaʼanö Dimoteo ba wamalua halöwönia ba wamati, börö me iʼoʼö mene-mene nibeʼe Waulo ba wondröi isö-isö dödö si fasala, ba wondrouʼö bua-bua si sökhi, hegöi ba wariawösa khö ndra talifusönia ba wamati. (2 Ti. 2:22) Enaʼö tola ifalua daʼö Timoteo, moguna ifomaha ia ba wamalua satulö. Moguna göi tafalua zimane daʼö enaʼö tola talawa gisö-isö dödöda si fasala. (Rom. 7:21-25) Baero daʼö, moguna tafomaha ita ba wamalua satulö enaʼö tola taheta khöda gamuata si tohöna ba tabohouni gamuatada. (Ef. 4:22, 24) Na no marase mbotoda me no aefa tafalua halöwöda sero maʼökhö, te moguna tafaso ita weʼamöi ba gangowuloa.—Heb. 10:24, 25. w20.09 28 ¶9-11

Moguna taʼokhögö waʼebolo dödö ba wanolo niha nifahaʼöda enaʼö tedou ba wamati, irege tola ilulu waʼaurinia ba tebayagö idanö. Hizaʼi, moguna göi taʼila hadia sindruhu-ndruhu omasi ia tobali samosumange Yehowa. Hadia so dandra-tandra sangoromaʼö wa iforege ba woloʼö oroisa Yesu? Mazui ha börö me so wamahaʼö sadöni dödönia wa ifahaʼö ia ba Zura Niʼamoniʼö? Aseseʼö fareso hadia waʼatedou niforomaʼö niha nifahaʼömö. Duma-dumania, hadia itutunö nösi dödönia khö Yehowa? Hadia khö Yehowa itandrösaigö wangandrönia? (Si. 116:1, 2) Hadia omasi ia wombaso Sura Niʼamoniʼö? (Si. 119:97) Hadia lö iböhöli weʼamöi ba gangowuloa? (Si. 22:22) Hadia no iforege ba wombulöʼö lala waʼaurinia? Hadia no itutunö ba nösi nomonia hegöi khö ndra awönia hadia zi no ifahaʼö yaʼia? (Si. 9:1) Sabölö tohudenia, hadia omasi ia tobali Samaduhuʼö Yehowa? (Si. 40:8) Na lö manö mufaluania zi no mututunö andrö, si fao faʼatua-tua tandraigö alui hadia mbörö wa lö mufaluania daʼö, ba böi taha-taha ba wamatunöisi khönia si fao faʼasökhi. w20.10 18 ¶14-15

Lö aetu ihalö gangetula si tefaudu Ama Yesu si so ba zorugo, ba lahalö göi gangetula si sökhi ira satuania si so ba gulidanö. Hizaʼi, me itugu ebua-bua Yesu, moguna ihalö samösa gangetula. (Gal. 6:5) Simane yaʼita, no göi tebeʼe ginötö khö Yesu ba wangai angetula samösa. Sindruhunia, tola ifili ba wangofönaiʼö somasi-masi dödönia. Hizaʼi, lö ifalua daʼö Yesu. Ifili ba wondrorogö fahuwusania khö Yehowa. Me iʼila Yesu hadia noro dödö nibeʼe Yehowa khönia, ihalö gangetula ba wamalua daʼö. (Yoh. 6:38) Tola manö abu dödönia börö me iʼila wa hasambalö fatuwu khönia niha sato. Hewaʼae simanö, lö tebulö gangetulania ba wamosumange Yehowa. Me no aefa tebayagö ia idanö me döfi 29 M, famalua ohitö dödö Yehowa zabölö iʼofönaiʼö ba waʼaurinia. (Heb. 10:5-7) Me so ia ba döla geu famakao, lö tebulö ihalö gangetula ba wamalua ohitö dödö Namania.—Yoh. 19:30. w20.10 29 ¶12; 30 ¶15

Ba mbanua niha Keriso si farahu yaʼugö, hadia so ndra talifusöda sanaögö abula dödö börö wökhö mazui tanö böʼönia? Mazui, hadia so ndra talifusöda sorasoi faʼabu dödö börö me no mate niha niʼomasiʼöra? Na so ndra talifusöda sinangea mutolo, tola taʼandrö khö Yehowa enaʼö itolo ita ba wangoromaʼö faʼasökhi dödö moroi ba wehede hegöi amuatada. Tola manö tefarou sibai dödöra na tafalua daʼö. (1 Fe. 4:10) Aboto ba dödöda wa tola taʼokhögö waʼabarani hegöi faʼanau gölö börö me aboto ba dödöda wa fao khöda Yehowa. Iʼogunaʼö Yesu hegöi ira malaʼikania ba wanolo yaʼita. Tola göi iʼogunaʼö ndra niha si so kuaso Yehowa ba wanolo yaʼita, na iwaʼö tödönia wa sinangea mufalua daʼö. Ba simane si no irai tarasoi samösa, iʼogunaʼö gehehania niʼamoniʼö Yehowa ba wamarou tödö ndra talifusöda enaʼö labeʼe khöda wanolo. Börö daʼö, simane Faulo, tola tamane si fao faʼafaduhu dödö, ”Yehowa zanolo yaʼo; lö ataʼu ndraʼo. Hadia zi tola lafalua niha khögu?”—Heb. 13:6. w20.11 17 ¶19-20

Me föna, ibeʼe Yehowa waʼabölö khö ndra sinenge ba wamalua tandra sahöli-höli dödö. Daʼö mbörö wa faduhu dödöra wa fao khöra Yehowa. (Hal. 5:12-16; 6:8) Iadaʼa, lö saʼae tebeʼe khöda waʼabölö simane daʼö. Hizaʼi, ba Daromalinia, ifaduhuʼö khöda Yehowa si fao faʼomasi wa omuso dödönia khöda, ba ibeʼe khöda gehehania niʼamoniʼö ba ginötö göna ita folohi börö wamalua satulö. (1 Fe. 3:14; 4:14) Börö daʼö, lö moguna taʼaombösi tödö hadia zinangea tafalua na göna ita folohi ba zi so miföna. Hizaʼi, dataforege ba wangaʼaroʼö faʼafaduhu dödöda wa hasambalö ituhini ba iʼefaʼö ita Yehowa. Tola faduhu dödöda ba mbuʼusa li Yesu andre, ”Yaʼo zamofaʼatua-tua yaʼami enaʼö miʼila hadia zinangea miwaʼö. Hewaʼae no hasara dödö zi faʼudu khömi, tebai lalawa mazui ladaʼawaini ami.” No göi ifabuʼu Yesu, ”Na anau gölömi, ba teʼorifi ami.” (Luk. 21:12-19) Ba böi olifuʼö wa itörö tödö Yehowa fefu zoʼamakhaita ba nono mbanuania si lö faröi, irugi wondrege zide-ide. Börö daʼö, hasambalö isusugi fefu nono mbanuania si no mate. w21.01 4 ¶12

Ba Zura Niʼamoniʼö, tenga sinenge sotöi Faulo zi oföna sibai manutunö sanandrösa ba wanusugi. No göi irai itutunö zimane daʼö Yobi. Faduhu dödönia wa lö iʼolifugö ia Lowalangi, ba hasambalö isusugi dania ia ba zi so miföna. (Yob. 14:7-10, 12-15) ”Fanusugi niha si no mate”, no ’famahaʼö si oföna’ nifaduhusi tödö niha Keriso. (Heb. 6:1, 2) No tesura wehede Waulo sanandrösa ba wanusugi ba 1 Korindro faza 15. Tatu möi fangabölöʼö niha Keriso me abad siföföna nisurania andrö. Tola göi möi fangabölöʼöda wehede nisura ba faza andrö, irege itugu mamati ita ba dötönafö fanusugi si no ara tafaduhusi tödö. Fanusugi Yesu zangaroʼö tödöda wa so dötönafö fanusugi ba niha niʼomasiʼöda si no mate. Fanusugi Yesu, no tefarahu ba ”duria somuso dödö” nifaʼema Waulo khö ndra niha Keriso si so ba Gorindro. (1 Ko. 15:1, 2) Sindruhunia, no iwaʼö Faulo wa zaya-zaya gölö wamati zi samösa niha na lö faduhu dödönia wa no tesusugi Yesu.—1 Ko. 15:17. w20.12 2 ¶2-4

Hadia zanolo Fetero ba wolawa faʼide-ide dödö? No irai mangandrö Yesu enaʼö lö taya wamati Wetero, ba ifondrondrongo wangandrönia andrö Yehowa. Ba gafuriata, tohare Yesu ba wamalukhaisi Fetero ba zi ha yaʼi-yaʼia, tola manö ba wangabölöʼö Fetero. (Luk. 22:32; 24:33, 34; 1 Ko. 15:5) Möi göi Yesu ba wamalukhaisi ira sinenge me no aefa lalau fagai ba zi sara wongi faʼara hizaʼi lö hadöi ahuluara. Me luo daʼö, ibeʼe ginötö khö Wetero Yesu ba wangoromaʼö wa iʼomasiʼö ia. No iʼefaʼö zala zi fahuwu khönia andrö Yesu ba ifaduhusi tödö khönia halöwö sabölö oya. (Yoh. 21:15-17) Nifalua Yesu khö Wetero zangoromaʼö wa iʼokhögö waʼahakhö dödö simane Amania. Börö daʼö, na tafalua zala, böi tawaʼö tödöda wa tebai saʼae iʼefaʼö zalada andrö Yehowa. Böi taʼolifugö wa omasi Zatana na taʼokhögö lala wangera-ngera simane daʼö. Daʼö mbörö wa moguna tahaogö taʼangeragö hewisa wamaigi Yehowa ita. Ebua sibai waʼomasinia khöda, aboto ba dödönia zi tebai tafalua, ba omasi ia ba wangefaʼö salada. Moguna göi taʼoʼö waʼahakhö dödö Yehowa na so niha böʼö sangafökhöiʼö tödöda.—Si. 103:13, 14. w20.12 20-21 ¶17-19

Ba Zura Niʼamoniʼö, so duma-duma niha sangiwa tödö ba si lö mangodaligö Yehowa. Moguna tafahaʼö ita moroi ba duma-duma si lö sökhi andrö, enaʼö lö tafalua zala simane daʼö. Duma-dumania, me awena mamatörö Razo Asa, iʼodaligö Yehowa ba ginötö göna ia abula dödö. Hizaʼi ba gafuriata, lö saʼae iʼandrö wanolo moroi khö Yehowa. Iforege ba wangasiwai samösa abula dödö salua khönia. (2 Ng. 16:1-3, 12) Me lasuwö Yehuda ira niha Gizaraʼeli, mangandrö tolo Asa ba niha Siria. Hizaʼi, lö arara waʼamofozu daʼö. Ifatenge samösa zamaʼeleʼönia Yehowa ba wangombakhaʼö khö Razo Asa, ”Börö me öʼodaligö razo Siria, tenga Lowalangimö Yehowa, hasambalö aheta ba dangamö zaradadu razo Siria.” (2 Ng. 16:7) Hadia wamahaʼönia? Moguna mangelama ita enaʼö lö tawaʼö tödöda wa tola taʼasiwai samösa gabula dödö salua khöda, ba lö moguna taʼandrö wanuturu lala moroi khö Yehowa ba Daromalinia. Na lö mangiwa dödöda ba taʼodaligö Yehowa, hasambalö itolo ita ba wangai angetula si tefaudu hewaʼae na basaki zalua khöda. w21.01 6 ¶13-15

So ösa nono mbanua Yehowa sambö balazo börö me lö kefera mazui börö me alua wasuwöta ba soi si so yaʼira. So göi nikuru börö wamatira. Hizaʼi, omuso dödö ngawawa sato sibai börö me laʼila wa fahöna dania zoguna khöra ba mboto hegöi ba wamati, na no tedudugö gulidanö si lö sökhi andre. Na idudugö gulidanö nifatörö Zatana andre Yehowa ba wönunia si no amaedola ’zino siriri-riri’, lö zi lö itatugöi wa telumöʼö ngawawa sato sibai andrö. Na no aefa wamakao sabölö-bölö, iʼohe ira Yesu ba ”nidanö fangorifi”. (Fam. 7:17) Moroi ba zi hauga miliar niha si no irai auri, te ha ngawawa sato sibai zi lö irai manörö faʼamate. No tötönafö si tohude daʼö! (Yoh. 11:26) No sahöli-höli dödö dötönafö niʼokhögö mbiri-biri tanö böʼö! Daʼö mbörö wa laʼandrö sibai saohagölö khö Yehowa hegöi Yesu. w21.01 16-17 ¶11-12

Ba mbongi safuria waʼaurinia ba gulidanö, iʼangeragö Yesu gabula dödö salua khö ndra nifahaʼönia dania. Börö me iʼomasiʼö ira, iʼandrö khö Namania ba ’wolumöʼö yaʼira moroi khö Zatana’. (Yoh. 17:14, 15) Iʼila Yesu wa lö ara tö mangawuli ia ba zorugo. Aboto göi ba dödönia wa lö iböhöli Satana ba woʼuduni niha somasi mamosumange Yehowa. Börö daʼö, moguna telumöʼö nono mbanua Yehowa. Ba ginötö andre, moguna khöda wolumöʼö moroi khö Yehowa, töra moroi ba zi no numalö. Hadia mbörö? Börö me no tetiboʼö Zatana moroi ba zorugo, ba ”ebua wönunia”. (Fam. 12:12) Iʼalui lala ba wamaduhuʼö ba dödö niha wa no sambua ”halöwö niʼamoniʼö khö Lowalangi” na lafakao ita. (Yoh. 16:2) Lafakao göi ita ira niha si lö faduhu tödö khö Lowalangi börö me faehu sibai ita moroi ba niha gulidanö. Hewaʼae simanö, lö ataʼu ita gofu hadia zalua. Hadia mbörö? Fanema linia simane nitutunö ba ayati maʼökhö andre. w21.03 26 ¶1, 3

Fefu nifalua Yehowa, teʼodane-dane ba waʼomasi. Si fao faʼomasi, ibönökhi fefu zoguna khöda. Börö waʼomasi, ihenaigö khöda höli. Simanö göi Yesu, börö me iʼomasiʼö ita, itehegö nosonia salahida. (Yoh. 3:16; 15:13) Lö hadöi si tola manaha Yehowa hegöi Yesu ba wangomasiʼö niha si lö faröi khöra. (Yoh. 13:1; Rom. 8:35) Simane daʼö göi, fefu nifalua zi samösa ira matua si tobali högö yomo ba nomo, moguna teʼodane-dane ba waʼomasi. Hana wa moguna sibai daʼö? Imane sinenge sotöi Yohane ba wameʼe fanema li, ”Si lö mangomasiʼö talifusönia [mazui ösi nomonia] niʼila hörönia, tebai iʼomasiʼö Lowalangi si lö iʼila hörönia.” (1 Yo. 4:11, 20) Ira matua sangomasiʼö ösi nomonia ba somasi moloʼö duma-duma Yehowa hegöi Yesu, hasambalö ibönökhi zoguna khöra ba wamati, itolo ira ba worasoi faʼahono dödö, ba iʼasogö zoguna khöra sero maʼökhö. (1 Ti. 5:8) Ifahaʼö ba ibeʼe degu-tegu ba ndraononia. Lö göi tebulö ifahaʼö ia ba wangai angetula samolakhömi töi Yehowa ba sangaʼasogö bua si sökhi ba nösi nomonia. w21.02 5 ¶12-13

Iʼila Amada sebua faʼomasi hadia nirasoi nono mbanuania. Iʼila Yehowa wa tola manö tarasoi wa si lö eluaha waʼaurida börö zi no irai alua khöda ba zilalö. Anehe göi ia mbua-bua si sökhi niʼokhögöda, hewaʼae na lö taʼila wa no taʼokhögö daʼö. (1 Yo. 3:19, 20) Niha samorege ba wamöhöli amuata si lö sökhi sasese ifalua, tola manö irasoi waʼide-ide dödö na ifuli ifalua gamuata daʼö. Sindruhu sa wa itegu-tegu ita tödöda na no aefa tafalua zala. (2 Ko. 7:10) Hizaʼi, lö moguna itahi-tahigö manö ita tödöda, ba tamane wangumaʼö: ’Si lö eluaha saʼae waʼaurigu andre. Hasambalö wa lö iʼefaʼö zalagu Yehowa.’ Lö tefaudu lala wangera-ngera simane daʼö, ba tola möi fangawuwuda irege taböhöli wamosumange Yehowa. Börö daʼö, na ifuli zui öfalua gamuata si lö sökhi, tutunö gabula dödömö andrö khö Yehowa. Angandrö khönia ba andrö enaʼö iʼefaʼö zalamö. (Yes. 1:18) Na sindruhu-ndruhu mangesa dödömö ba öforege ba wombulöʼö amuatamö, hasambalö iʼefaʼö zalamö Yehowa. Baero daʼö, andrö wanolo moroi khö ndra satua sokubaloi. Si fao faʼebolo dödö, hasambalö latolo ndraʼugö enaʼö ifuli aro ba wamati.—Yak. 5:14, 15. w20.12 23 ¶5-6

Iʼameʼegö tödö sibai ndra alawe Yesu. Lö iʼoʼö lala wangera-ngera niha Farizaiʼo sangumaʼö wa abölö tohude ndra matua moroi khö ndra alawe. Lö omasi ira fahuhuo khö ndra alawe föna niha sato, mendrua manö ba wanutunö ösi Mbuku Niʼamoniʼö. Hizaʼi, omasi Yesu ba wanutunö ösi Mbuku Niʼamoniʼö khö ndra matua hegöi ira alawe. (Luk. 10:38, 39, 42) Itehegö göi enaʼö fao khönia ösa ndra alawe ba wamalua fanuriaigö ba mbanua sagaröu. (Luk. 8:1-3) Ibeʼe göi halöwö si tohude khö ndra alawe ba wangombakha khö ndra sinengenia wa no tesusugi ia. (Yoh. 20:16-18) Iforomaʼö Sura Niʼamoniʼö wa iʼameʼegö tödö ndra alawe Faulo, ifaduhuʼö göi Faulo wa ina Dimoteo hegöi nenenia zi oföna sibai mamahaʼö Timoteo ba ”Mbuku Niʼamoniʼö”. (2 Ti. 1:5; 3:14, 15) Me ifaʼoheʼö zurania Faulo ba mbanua niha Keriso si so ba Roma, itötöi ösa döi ndra talifusöda ira alawe. Itötöi hadia manö zi no lafalua ira talifusöda andrö, ba ifatunö wa iʼandrö sibai saohagölö ba waʼerege dödöra.—Rom. 16:1-4, 6, 12; Fil. 4:3. w21.02 15 ¶5-6