Baŵa si Dua

Forege enaʼö itugu aboto ba dödömö ndra talifusömö. Lau fahuhuo khöra fatua lö tebörögö hegöi na no teʼasiwai gangowuloa, fao khöra ba wanuriaigö, ba na tola, kaoni ira wemanga. Na öfalua daʼö, tola manö so zawena aboto ba dödömö sanandrösa khöra. Duma-dumania, hulö lö omasi fariawö zi samösa dalifusöda ira alawe, sindruhunia yaʼia andrö niha saila-aila. Mazui, talifusöda ira matua sangokhögö kefe soya, sindruhunia yaʼia andrö niha soböwö sibai ba tenga sangomasiʼö anaʼa. Mazui, so sambua fongambatö sasese ahou weʼamöi ba gangowuloa, sindruhunia so gabula dödö nitaögöra. (Yob. 6:29) Tatu manö, tebai ’taʼurusai zi tenga urusada’. (1 Ti. 5:13) Hewaʼae simanö, moguna taforege enaʼö aboto ba dödöda ndra talifusöda ba taʼila hadia zi no irai alua khöra. Na tafalua daʼö, tola itugu aboto ba dödöda ndra talifusöda. Tola manö fatuwu ndraʼugö khö zi samösa dalifusöda. Hizaʼi, na öforege ba wangila waö-waö waʼaurinia, tola manö aoha khömö ba wangoromaʼö khönia faʼahakhö dödö. Sindruhu sa, moguna khöda wamorege enaʼö aboto ba dödöda ndra talifusöda. Hizaʼi, na öʼoʼö mene-mene Zura Niʼamoniʼö ba wamokai tödömö, no öʼoʼö duma-duma Yehowa sangomasiʼö ”fefu niha”.—1 Ti. 2:3, 4; 2 Ko. 6:11-13. w20.04 16-17 ¶10-12

Ba mbongi fatua lö mate ia, ifasugi ba dödö ndra nifahaʼönia Yesu enaʼö faoma laʼomasiʼö nawöra. Aboto ba dödönia wa tola so khöra wahasara dödö ba faʼanau gölö hewaʼae na fatiu dödö niha gulidanö khöra, asala faoma laʼomasiʼö ba latolo nawöra. Nehegö hadia zalua ba mbanua niha Keriso ba Desalonika. Iʼotarai me awena mufasindro mbanua niha Keriso andrö, no göna ndra talifusöda folohi. Hizaʼi, no tobali ira duma-duma ba wangoromaʼö faʼalöfaröi hegöi faʼomasi. (1 Te. 1:3, 6, 7) Iʼamenesi ira Faulo enaʼö lö tebulö laforomaʼö waʼomasi ”soroi ba dödö”. (1 Te. 4:9, 10) Na laʼomasiʼö niha böʼö, tola terou dödöra ba wondrara tödö niha sabu tödö ba latolo niha sambö faʼabölö. (1 Te. 5:14) Laʼoʼö mene-mene Waulo. Tola oroma daʼö ba zurania si dua, nisurania döfi aefa daʼö. Iwaʼö khöra Faulo wa no ’tedou waʼomasira khö nawöra zamösana’. (2 Te. 1:3-5) Börö me faoma laʼomasiʼö nawöra, tola anau gölöra ba wanaögö abula dödö hegöi folohi. w21.03 22 ¶11

Na omasi ita tatema mbuala yaʼia daʼö faʼauri si lö aetu, moguna taʼoʼö lala waʼauri si no ituturu Keriso. (Hal. 20:24; 1 Fe. 2:21) Hizaʼi, lö omasi Zatana hegöi niha si so barö wamatörönia, na taʼoʼö lala waʼauri si no ituturu Keriso. Omasi ira na tatörö ”lala si lö sökhi andrö khöra”. (1 Fe. 4:4) Laʼoʼaya lala waʼaurida, ba lawaʼö wa abölö sökhi lala waʼaurira. Lawaʼö tödöra wa tola lafalua gofu hadia ia börö me daʼö lala waʼauri nitöröra. Hizaʼi, lö atulö daʼö. (2 Fe. 2:19) Moguna sibai tafili lala satulö! Omasi Zatana na tabato wagohisa ba lala sise-ise ”saekhu ba waʼauri”, ba numalö ita ba lala sebolo nitörö niha sato ba gulidanö andre. Ato niha somasi ba wanörö lala sebolo ba aoha khöra ba wanörö yaʼia. Hizaʼi, lala andrö no ”saekhu ba waʼatekiko”. (Mat. 7:13, 14) Enaʼö lö mamalö tatörö lala satulö ba lö mangoloi dödöda, moguna faduhu dödöda khö Yehowa ba tafondrondrongo ia. w20.04 26 ¶1; 27 ¶5, 7

Barö zi hauga fakhe andre, hewisa lala Rusia hegöi soi sotuhini yaʼia ba weʼamöi ba ”Danö si sökhi”? (Dan. 11:41) Me 2017, lö itehegö razo tanö yöu na lafalua halöwöra iraono mbanua Yehowa ba so ösa ndra talifusöda nikurunia. Lö itehegö so publikasida, farahu ba daʼö Sura Niʼamoniʼö Famoʼeluaha Gulidanö si Bohou. Baero daʼö, ihalö gödo ndraha niʼokhögöda si so ba Rusia, awö Nahia Gangowuloa hegöi Balai Kebaktian. Börö daʼö, me döfi 2018, hasara dödö Mboto Solohe ba wangumaʼö wa no razo tanö yöu Rusia hegöi soi sotuhini yaʼia. Hewaʼae tefakao nono mbanua Yehowa, lö lalawa ndra samatörö mazui laʼalui lala enaʼö tebohouni lala ba wamatörö. Hizaʼi, laʼoʼö mene-mene Zura Niʼamoniʼö enaʼö mangandrö ira salahi ’ndra samatörö fefu’, mendrua manö na so gangetula sedöna laʼetuʼö ira samatörö si tola molua-lua ba lala wamosumangeda. w20.05 14 ¶9

Yaʼami ira satua, enaʼö tola faduhu dödö ndraonomi wa no so ira ba zindruhu, moguna laʼokhögö wahuwusa si sökhi khö Lowalangi, ba lafaduhusi tödö wa no sindruhu nifahaʼö Zura Niʼamoniʼö. Enaʼö tola öfahaʼö ndraonomö sanandrösa ba zindruhu soʼamakhaita khö Lowalangi, moguna tobali duma-duma si sökhi ndraʼugö ba wamahaʼö yaʼira samösa ba Zura Niʼamoniʼö. Moguna ua öbeʼe ginötömö ba woʼangerönusi hadia zi no öfahaʼö ndraʼugö, awena tola öfahaʼö ndraonomö ba wamalua simane nifaluamö andrö. Simane nifaluamö ba niha nifahaʼömö ba Zura Niʼamoniʼö, moguna göi öfahaʼö ndraonomö ba wangogunaʼö fakake ba wamalua riset. Na öfalua daʼö, tola ötolo ndraonomö ba wangomasiʼö Yehowa, ba faduhu göi dödöra wa iʼogunaʼö ”zawuyu si lö faröi ba satua-tua” Yehowa ba wameʼe soguna khöda ba wamati. (Mat. 24:45-47) Lö obönö na ha famahaʼö saoha nifahaʼömö ba ndraonomö. Enaʼö tola laʼokhögö wamati saro, moguna öfahaʼö ira sanandrösa ba ”wangera-ngera Lowalangi sabölö abakha” si tefaudu moloʼö faʼebua-bua hegöi faʼatua-tuara.—1 Ko. 2:10. w20.07 11 ¶10, 12-13

Hawaʼato niha si lö moʼahonoa si fahuwu khö Yehowa iadaʼa? So zuta waʼatora. Tola fahuwu ira khö Yehowa börö me mamati ira ba höli nibeʼe Yesu. Börö höli andrö, tola talulu waʼaurida khö Yehowa ba tebayagö idanö. Ba ginötö tafalua zi dombua lala si tohude andrö, no farahu ita ba niha Keriso si zuta faʼato si no tebayagö idanö, ’si fahuwu sibai’ khö Wondrege Zabölö ba mbanua si yawa awö danö! Hewisa lalada ba wangoromaʼö wa taʼameʼegö tödö wahuwusada khö Lowalangi? Moguna taʼoʼö duma-duma Gaberahamo hegöi Yobi si lö faröi khö Yehowa ba zi töra otu fakhe. Andrö moguna lö faröi ita khö Yehowa, he na awena mazui na no ara tafosumange ia. Ba simane Danieli, moguna abölö taʼameʼegö tödö wahuwusada khö Lowalangi moroi ba waʼaurida samösa. (Dan. 6:7, 10, 16, 22) Lö tebulö itolo ita Yehowa irege anau gölöda hewaʼae na oya wanandraigö salua khöda. Na tafalua daʼö, itugu aro wahuwusada khönia.—Fil. 4:13. w20.05 27 ¶5-6

Me mozizio Razo Dawido yawa ba dete nomo, iʼila samösa ndra alawe si mondri. No mangowalu ndra alawe sotöi Baseba andrö. Aboto ba dödö Dawido wa no ibeʼe gamakhoita Yehowa ba nono mbanuania, ’Böi isö woʼomo nawöu’. (2 Mo. 20:17) Hizaʼi, lö iböhöli Dawido ba wamaigi-maigi ira alawe andrö. Omasi ia ba wangomusoiʼö dödö Yehowa, hizaʼi iʼisö göi ndra alawe andrö. No mamodombua dödönia. Hewaʼae na iʼomasiʼö ba iʼataʼufi Yehowa ba zi sandrohu faʼaurinia, hizaʼi ba ginötö daʼö, so ösa gamuata fondrege zi lö sökhi nifalua Dawido. Börö horönia andrö, no iʼobousi döi Yehowa. No göi ifakao waʼauri niha si lö fasala, simane ösi nomonia. (2 Sa. 11:1-5, 14-17; 12:7-12) Itema Dawido wotu moroi khö Yehowa, ba ifuli iʼokhögö wahuwusa si sökhi khö Lowalangi. (2 Sa. 12:13; Si. 51:2-4, 17) Tatu itörö tödö Dawido fefu wamakao hegöi abula dödö niʼasogönia börö me no mamodombua dödönia. Fehede Dawido ba Zinunö 86:11, tola mufoʼeluaha ia tobali: ”Beʼe khögu dödö si lö mamodombua.” Hadia itolo Dawido Yehowa ba wangosambalöʼö tödönia, mazui enaʼö lö mamodombua dödönia? Tatu manö. Ba gafuriata, itutunö Sura Niʼamoniʼö wa ”soroi ba dödö wamosumangenia Lowalangi Yehowa”.—1 Ra. 11:4; 15:3. w20.06 11 ¶12-13

Itutunö Sura Niʼamoniʼö wa faʼomasi Yehowa ba nono mbanuania, tola muʼamaedolagö ia simane sinali. Hadia mbörö? Angeragö duma-duma daʼa: Khalaigö atö na no arakhagö alömö ndraʼugö ba nasi. Abölö-bölö mbade ba okafu sibai nidanönia. Aefa daʼö, so niha yawa ba göfa samazaumba khöu gama-gama si tola ögogohe enaʼö lö ahöndrö ndraʼugö. Tatu öʼandrö sibai saohagölö ba daʼö. Hizaʼi, na ha daʼö wanolo nitemamö lö tola teʼorifi ndraʼugö. Moguna so niha samazaumba khöu sinali ba idöni ndraʼugö moroi ba nidanö. Simane niwaʼö Yehowa ba ayati maʼökhö andre, sanandrösa ba ndraono Gizaraʼeli si no elungu ba wamati, ’idöni’ ira si fao faʼomasi. Daʼö göi nirasoi Yehowa ba niha si no mamöhöli halöwö ba wamati hegöi ba niha sanaögö abula dödö ba faʼaombö dödö. Omasi ia enaʼö laʼila wa iʼomasiʼö ira ba itolo ira enaʼö mangawuli ira khönia. Tola iʼogunaʼö ndraʼugö Yehowa ba wanolo niha böʼö irege tola larasoi wa iʼomasiʼö ira Yehowa. Moguna taʼaroʼö dödö niha si no mamöhöli halöwö ba wamati wa iʼomasiʼö ira Yehowa ba taʼomasiʼö göi ira. w20.06 27 ¶12-13

Me labunu nifahaʼö sotöi Sitefano, ato niha Keriso soloi moroi ba Yeruzalema ba ”oi zara muzawili zato ba zi sagörö Yudea hegöi Samaria” irugi Zifirusi hegöi Andriokhia. (Hal. 7:58–8:1; 11:19) Oya wamakao nitaögö ndra nifahaʼö. Hewaʼae simanö, lö tebulö owölö-ölö ira ba wanuriaigö turia somuso dödö gofu hezo so möi ira. Buania, oya mbanua niha Keriso nifasindro ba zi sagörö Famatörö Romawi. (1 Fe. 1:1) Hizaʼi aefa daʼö, itugu oya manö wamakao salua khöra. Duma-dumania, te me döfi 50 M, ifaretakö fefu niha Yahudi kaisaro Romawi sotöi Kalaudio ba wondröi banua Roma. Börö daʼö, lafaso niha Yahudi si no tobali niha Keriso ba wondröi omora ba lasawa nahia böʼö. (Hal. 18:1-3) Te me döfi 61 M, isura sinenge sotöi Faulo wa no laʼoʼaya föna niha sato ndra talifusönia niha Keriso, lakuru, ba larabu gokhötara. (Heb. 10:32-34) Ba simane niha tanö böʼö, lataögö waʼanumana hegöi fökhö ira niha Keriso.—Rom. 15:26; Fil. 2:25-27. w21.02 26-27 ¶2-4

Na taforege ba wangaroʼö famatida, tebai idönisi dödöda Satana hegöi niha si no so barö wamatörönia, enaʼö taböhöli ba wanörö lala sindruhu. (2 Yo. 8, 9) Hasambalö wa fatuwu khöda gulidanö andre. (1 Yo. 3:13) Ifasugi ba dödöda Yohane wa ”Satana zamatörö ulidanö”. (1 Yo. 5:19) Lö ara tö gamozua gulidanö andre, daʼö mbörö wa itugu abölö-bölö wönu Zatana. Ba wamakiko famatida, iʼogunaʼö Satana lala si lö alio taʼila, simane fondrönisi dödö ba wamalua amuata fohorö mazui falimosa moroi ba niha si no mondröi sindruhu. Baero daʼö, iʼogunaʼö göi lala salio taʼila, simane famakao. Aboto ba dödö Zatana wa hatö maʼifu tö ginötönia. Daʼö mbörö wa iforege sibai ba wanaisi halöwö fanuriaigö, mazui iʼalui lala enaʼö awuwu wamatida. Börö daʼö, lö tokea ita na so ösa soi zanaisi mazui si lö manehegö halöwöda. Hewaʼae simanö, lö aetu anau gölö ndra talifusöda si toröi ba soi andrö. Andrö, gofu hadia lala niʼogunaʼö Zatana ba wamakiko famatida, tola anau gölöda! w20.07 24 ¶12-13

Omasi Yehowa na auri niha sagötö faʼara ba gulidanö nifazökhinia si sökhi sibai famaigi. Hizaʼi, börö me no mamadaö Gadamo hegöi Khawa khö Namara safönu faʼomasi, tebai saʼae laʼokhögö waʼauri si lö aetu. Hasambalö mate ira hegöi ngaʼötöra. (Rom. 5:12) Hadia nifalua Yehowa? Iʼanemaiʼö ifatunö hewisa lalania ba wangorifi niha gulidanö. (1 Mo. 3:15) No itatugöi wa hasambalö ibeʼe Yesu si tobali höli ba wangefaʼö ngaʼötö Gadamo hegöi Khawa moroi ba horö hegöi faʼamate. Daʼö mbörö wa tola ibeʼe waʼauri si lö aetu Yehowa ba niha samosumange yaʼia. (Yoh. 3:16; 1 Ko. 15:21, 22) Iʼogunaʼö dania Nononia Yehowa ba wanusugi niha si miliaran faʼato. Hizaʼi, tola tawaʼö wa tenga niʼosamuzaigö wanusugi yaʼira. Hadia mbörö? Börö me tola alua waʼafawuka na izumaigö tedou waʼato niha ba gulidanö. Faduhu dödöda wa lö alua zimane daʼö börö me toföfö wamalua Yehowa fefu halöwönia. Aboto ba dödö Yehowa wa moguna toföfö wamaluania fefu hadia ia enaʼö lö tebulö so waʼahono dödö ba niha gulidanö.—1 Ko. 14:33. w20.08 14 ¶3; 15 ¶5

Moguna aboto ba dödö niha nifahaʼö hadia gohitö dödö wa mufalua khönia wamahaʼö ba Zura Niʼamoniʼö, yaʼia daʼö ba wanolo yaʼia tobali Samaduhuʼö Yehowa. So ösa zinangea ifalua niha nifahaʼöda ba Zura Niʼamoniʼö enaʼö tola tebayagö ia idanö. Si oföna, moguna aboto ba dödönia Yehowa, iʼomasiʼö ia, ba mamati ia khönia. (Yoh. 3:16; 17:3) Moguna fahuwu ia khö Yehowa hegöi khö ndra talifusöda ba mbanua niha Keriso. (Heb. 10:24, 25; Yak. 4:8) Aefa daʼö, moguna mangesa ia ba ngawalö zi lö sökhi si no irai ifalua ba lö saʼae ifuli ifalua daʼö. (Hal. 3:19) Moguna göi ifatunö ba niha böʼö, hadia zi no ifaduhusi tödö iadaʼa. (2 Ko. 4:13) Aefa daʼö, moguna ilulu waʼaurinia khö Yehowa ba iforomaʼö daʼö na tebayagö ia idanö. (1 Fe. 3:21; 4:2) Tatu omuso dödöda fefu ba ginötö tebayagö ia idanö! Na iforege niha nifahaʼöda ba Zura Niʼamoniʼö ba wamalua fefu daʼö enaʼö tebayagö ia idanö, moguna asese tasuno ia ba tafarou dödönia. w20.10 18 ¶12-13

Böi faedo-faedogö ndraʼugö ba niha böʼö. Na öfalua daʼö, tola manö örasoi wa lö moguna ndraʼugö ba mbanua niha Keriso. Ba mbanua niha Keriso, so ösa ndra talifusöda sonekhe ba wamahaʼö niha, ba wameʼe fanuturu lala, hegöi ba wameʼe fondrara dödö mazui famarou dödö ba niha böʼö. Tola manö örasoi wa tebai öʼokhögö waʼonekhe simane niʼokhögöra. Daʼa zangoromaʼö wa so khöu wangide-ngideʼö, ba aboto ba dödöu wa so zi tebai öfalua. (Fil. 2:3) Hizaʼi, moguna mangelama ndraʼugö. Na lö aetu öfaedo-faedogö ndraʼugö ba niha sangokhögö faʼonekhe, tola manö ide-ide dödömö. Ba simane nitutunö Waulo, tola manö örasoi wa lö hadöi halöwö si tola öfalua ba mbanua niha Keriso. Me abad siföföna, iʼogunaʼö gehehania Yehowa ba wameʼe buala sahöli-höli dödö ba niha Keriso. Hizaʼi, no faböʼö-böʼö mbuala nibeʼenia khöra. (1 Ko. 12:4-11) No sebua böli fefu ira ba wamaiginia. Ba götöda iadaʼa, lö saʼae iʼogunaʼö dandra sahöli-höli dödö Yehowa ba wameʼe khöda faʼonekhe hegöi faʼabölö. Hizaʼi, lö tebulö moguna khöda goi-goi nibeʼe Waulo andre: Hewaʼae na faböʼö-böʼö waʼonekhe niʼokhögöda, no sebua böli fefu ita ba wamaigi Yehowa. w20.08 22-23 ¶13-15

Ba ginötö öʼandrö waʼabarani khö Yehowa ba wangandrö, hasambalö ifondrondrongo wangandröu. (Hal. 4:29, 31) No ihenaigö ginötönia ba wanolo yaʼugö ba lö irai iröi ndraʼugö. Tola göi öʼangerönusi hewisa lala Yehowa ba wangorifi iraono mbanuania ba götö föna. Duma-dumania, no irai ifabali Nasi Soyo ba wangefaʼö iraono Gizaraʼeli. (2 Mo. 14:13) Na omasi ifalua daʼö Yehowa ba ndraono mbanuania ba götö föna, tatu omasi göi itolo ndraʼugö iadaʼa. Baero daʼö, angeragö hewisa lalania ba wanolo yaʼugö ba wanaögö abula dödö hegöi ba wameʼe khöu faʼabölö ba wombulöʼö faʼauriu. Moguna mamati ndraʼugö khö Yehowa, simane nisura ba ayati maʼökhö andre. Baero daʼö, ibeʼe göi wanolo Yehowa khö ndra sanuriaigö si bohou enaʼö barani ira manuriaigö. Daʼö nirasoi dalifusöda ira alawe sotöi Tomoyo. Me awena sibai möi ia manuriaigö, fakara khönia niha si oföna sibai ifalukhaisi, imane, ”Samaduhuʼö Yehowa ami lö? Lö omasido fahuhuo khömi.” Aefa daʼö, iʼolobigö mbawandruhö nomonia. Hizaʼi, lö möi faʼataʼu Tomoyo daʼö. Imane khö nawönia wanuriaigö, ”Iʼanemaiʼö iʼila wa Samaduhuʼö Yehowa ndraʼodo hewaʼae na lö nifatunögu khönia. Omuso sibai dödögu!” Iadaʼa, no tobali perintis biasa Tomoyo. w20.09 6 ¶13-14

Ifatunö ba ndraono mbanuania Asa wa no ”ibeʼe [khöra] waʼohahau dödö” Yehowa. (2 Ng. 14:6, 7) Hewaʼae na so waʼahono dödö ba ginötö daʼö, lö iwaʼö tödönia Asa wa daʼö ginötö ba wangofönaiʼö faʼasana dödö. Hizaʼi, ibörögö ba wangotomosi banua, öli, malige, hegöi bawa göli. Imane ba niha Yehuda, ”Okhötada nasa soi andre.” Eluahania, lö hadöi nudu ba soi andrö zi tola manaisi yaʼira ba wamalua fangotomosi. Börö daʼö, ifarou ndraono mbanuania ba wangogunaʼö inötö waʼahono dödö andrö ba lala si tefaudu. Sagötö waʼahono dödö andrö, inönö waʼato ndra saradadunia Asa. (2 Ng. 14:8) Hadia daʼa zi tobali tandra wa ambö iʼodaligö Yehowa? Tenga. Börö me razo ia, aboto ba dödö Asa wa moguna ifaʼanö nono mbanuania ba wanaögö abula dödö salua khöra ba zi so miföna. Iʼila Asa wa tenga sagötö faʼara larasoi ginötö waʼahono dödö andrö, ba sindruhu göi wa simane daʼö zalua. w20.09 15 ¶4-5

Börö me iʼameʼegö tödö sibai ndra talifusöda ba mbanua niha Keriso, tola manö iwaʼö tödönia si samösa satua sokubaloi wa sinangea itatugöi amakhoita ba wolumöʼö biri-biri Lowalangi. Hizaʼi so ösa gamaehuta noro dödö zatua sokubaloi ba noro dödö högö yomo ba nomo. Duma-dumania, no ifataro ndra satua sokubaloi Yehowa enaʼö tobali ira sangetuʼö huku. Na so niha samalua horö si lö mamalalini era-era, ira satua sokubaloi zangefasi niha daʼö moroi ba mbanua niha Keriso. Hizaʼi, lö nibeʼe Yehowa noro dödö simane daʼö khö ndra matua si tobali högö yomo ba nomo. (1 Ko. 5:11-13) So ösa noro dödö nibeʼe Yehowa khö ndra matua si tobali högö yomo ba nomo, si lö nibeʼenia khö ndra satua sokubaloi. Sambua ba gotaluania, no ibeʼe khöra noro dödö ba wamazökhi amakhoita hegöi ba wotatugöi enaʼö lafalua daʼö ösi nomora. (Rom. 7:2) Duma-dumania, tola itatugöi hawaʼalawa mbongi mangawuli ndraononia ba nomo. Tola göi ihuku ndraononia na lö lafalua zi no ifakhoi andrö. (Ef. 6:1) Tatu manö, fatua lö ifazökhi gamakhoita si samösa ira matua si tobali högö si sökhi yomo ba nomo, moguna ifahuhuosi daʼö khö woʼomonia börö me ”ha sambua boto” ira.—Mat. 19:6. w21.02 16-18 ¶10-13

Sambua dane-dane wa no sebua böli zindruhu si so ba Zura Niʼamoniʼö börö me ha ba niha ”si sökhi amuata” sangokhögö fangide-ngideʼö ifatunö daʼö Yehowa. (Hal. 13:48) Niha sangokhögö fangide-ngideʼö, lafaduhusi tödö wa iʼogunaʼö ndra sawuyu si lö faröi ba satua-tua Yehowa ba wamahaʼö yaʼita sanandrösa ba Zura Niʼamoniʼö ba ginötö andre. (Mat. 11:25; 24:45) Lö tola aboto ba dödöda Zura Niʼamoniʼö na lö sanolo yaʼita. No fondrege zebua böli waʼaboto ba dödö si tefaudu niʼokhögöda sanandrösa ba Zura Niʼamoniʼö. (Amd. 3:13) No göi ibeʼe khöda döi si sökhi Yehowa ba wamahaʼö niha böʼö ba zindruhu sanandrösa khönia hegöi ohitö dödönia. (Mat. 24:14) No sebua böli duria nifaʼemada börö me daʼa zanolo niha tobali ösi nomo Yehowa ba sameʼe khöra inötö ba wangokhögö faʼauri si lö aetu. (1 Ti. 4:16) Gofu hawaʼoya ginötö si tola taʼogunaʼö ba wamalua halöwö fanuriaigö, no tatuhini halöwö sabölö tohude nifalua ba ginötö andre. (1 Ti. 2:3, 4) Sindruhu-ndruhu wa no töi sökhi me tola tobali ita si falulu fohalöwö khö Lowalangi!—1 Ko. 3:9. w20.09 26-27 ¶4-5

Sagötö wofanö Waulo ba Roma, no hauga kali itema wanolo moroi khö ndra talifusönia ba wamati, niʼodela Yehowa ba wangabölöʼö yaʼia. Lahalö gangetula ira si fahuwu khö Waulo si lö faröi sotöi Arisaro hegöi Luka, ba wefao khö Waulo me mofanö ia moroi ba Kaisarea numalö ba Roma. Lö nitutunö Zura Niʼamoniʼö wa no göi ifabuʼu Yesu khö ndra Arisaro hegöi Luka wa hasambalö telumöʼö ira ofeta ba Roma. Me molombase göfa nitörönia ba Zidona, latehegö khö Waulo ”wamalukhaisi ira awönia ba itema wanolo moroi khöra”. (Hal. 27:1-3) Ba gafuriata, falukha Waulo, Luka, hegöi Arisaro khö ndra talifusö si so ba mbanua Wuteoli, ba ’laforege khöra enaʼö toröi ira khöra fitu hari waʼara’. Ira niha Keriso si so ba mbanua si dombua andrö, labönökhi zoguna khö Waulo hegöi ira awönia. Ba tatu göi itutunö khöra Faulo ngawalö zi no irai alua si tobali fangabölöʼöra.—Fareso göi Halöwö Zinenge 15:2, 3. w20.11 15-16 ¶15-17

Ira satua, moguna öforomaʼö moroi ba wehede hegöi amuatamö wa öʼomasiʼö sibai Yehowa. Ba moguna göi öfahaʼö ira hewisa lala enaʼö owölö-ölö ira ba wamalua famahaʼö ba Zura Niʼamoniʼö, fangandrö, feʼamöi ba gangowuloa, hegöi fanuriaigö. No famahaʼö fondrege zebua böli daʼö si tola öbeʼe khöra. (1 Ti. 6:6) Tatu manö, moguna göi öbönökhi zoguna ba ndraonomö. (1 Ti. 5:8) Hizaʼi, böi olifuʼö wa tebai möi fanolo ndraonomö harato andrö, irege tola teʼorifi ira ba gamozua götö danö andre ba lakhamö gulidanö si bohou. Ha fahuwusa saro khö Yehowa zi tola mangorifi yaʼira. (Hez. 7:19) Tatu omuso dödöda me taʼila wa ato ndra satua si no tobali niha Keriso sangai angetula si tefaudu, irege tola fahuwu ndraonora khö Yehowa. Ato ndraono niʼebuaʼö ba nösi nomo simane daʼö, si lö mamöhöli ba wamalua ngawalö zi sökhi andrö irugi ba waʼebua-buara. Tatu laʼandrö sibai saohagölö börö me no latema wamahaʼö simane daʼö moroi khö ndra satuara!—Amd. 10:22. w20.10 28-29 ¶10-11

Itaria, iwaʼö wehede mazui ifalua gamuata si lö fakhamö iʼangeragö zinenge sotöi Fetero, irege maniasa ia ba gafuriata. Duma-dumania, me iʼombakhaʼö Yesu khö ndra sinengenia wa hasambalö tefakao ba mate ia, itegu ia Fetero simane niwaʼö ba ayati maʼökhö. Börö daʼö, itegu ia Yesu. (Mat. 16:21-23) Aefa daʼö, me tohare sambua ngawawa niha ba wondraʼu Yesu, iʼanemaiʼö itaba Fetero dalinga zawuyu gere sebua. Ifuli zui itegu ia Yesu. (Yoh. 18:10, 11) Baero daʼö, no göi irai iwaʼö Fetero wa hasambalö lö faröi ia khö Keriso hewaʼae na faröi ndra sinenge tanö böʼö. (Mat. 26:33) Hizaʼi, talafo ifaduhusi tödö ia samösa. Bongi daʼö, so khönia waʼataʼu ba niha, ba tölu kali iʼosilöʼögö Yesu. Ide-ide sibai dödö Wetero irege ”mofanö ia baero aefa daʼö iduhugö wege-ege”. (Mat. 26:69-75) Tatu manö manofu-nofu dödönia, hadia omasi Yesu ba wangefaʼö salania. Hewaʼae na irasoi waʼide-ide dödö Fetero, lö itehegö tobali fangawuwunia daʼö irege iböhöli wamosumange Yehowa. Ba gafuriata, ifuli zui owulo ia khö ndra sinenge tanö böʼö.—Yoh. 21:1-3; Hal. 1:15, 16. w20.12 20-21 ¶17-18

Oya lala si tola ifalua si samösa ira matua si tobali högö yomo ba nomo ba wangoromaʼö fangide-ngideʼö. Duma-dumania, lö itötöna wa moʼahonoa woʼomonia hegöi iraononia. Ifondrondrongo ba iʼameʼegö tödö mbua gera-era nösi nomonia hewaʼae lö fao dödöra ba mbua gera-erania. Baero daʼö, foʼomo ira matua sangokhögö fangide-ngideʼö, omasi ia ifalua halöwö yomo ba nomo hewaʼae na halöwö ndra alawe daʼö moloʼö famaigi niha si so ba mbanua si toröi yaʼia. Hizaʼi, lö aoha wamalua daʼö. Hadia mbörö? Imane talifusöda ira alawe sotöi Rachel, ”Ba mbanuama, na so woʼomo ira matua sanolo foʼomonia ba wanasa figa mazui ba wamöföʼö omo, lawaʼö ira si falazi omo khönia hegöi si fahatö khönia wa tenga ’sindruhu-ndruhu ira matua’ ia andrö. Lawalinga tebai ifatörö woʼomonia.” Na no toʼölö lala wangera-ngera simane daʼö ba mbanuamö, törö tödöu wa omasi Yesu wanasai ahe ndra nifahaʼönia, hewaʼae na halöwö zawuyu daʼö ba wamaigi niha sato. Ira matua si tobali högö si sökhi yomo ba nomo, lö iʼosambuaʼö dödönia ba lala wangera-ngera niha sanandrösa khönia. Hizaʼi, iʼofönaiʼö wangomusoiʼö tödö woʼomonia hegöi iraononia. w21.02 2 ¶3; 4 ¶11

No buala moroi khö Yehowa fefu zi sökhi salua khöda ba zilalö, hizaʼi gofu hewisa waʼaurida ba zilalö, abölö sökhi nasa dania waʼaurida ba gulidanö si bohou. Tola manö laʼafökhöiʼö dödöda niha böʼö, hizaʼi na taʼefaʼö zalara, tola taʼosambuaʼö dödöda ba wamosumange Yehowa iadaʼa. Na lö aetu itahigö ita tödöda, tola tobali fanaisida daʼö irege lö khöda faʼomuso dödö ba wamosumange Yehowa. Hizaʼi, simane sinenge sotöi Faulo, moguna faduhu dödöda wa no iʼefaʼö zalada Yehowa. (1 Ti. 1:12-15) No taʼokhögö dötönafö faʼauri si lö aetu. Na auri ita ba gulidanö si bohou, lö saʼae itörö tödöda fefu zi lö sökhi salua ba zilalö. Iwaʼö Sura Niʼamoniʼö wa ba ginötö daʼö, ”Lö saʼae itörö tödö zi no numalö”. (Yes. 65:17) Angeragö atö: So ösa ba gotaluada zi no numalö döfi ba wangai halöwö khö Yehowa, hizaʼi ifuli dania awuyu-wuyu ita ba gulidanö si bohou. (Yob. 33:25) Börö daʼö, datahalö gangetula ba wangosambuaʼö tödöda ba gulidanö si bohou, ba taforege ba wamalua si sagu khöda iadaʼa enaʼö tola auri ita ba daʼö! w20.11 24 ¶4; 29 ¶18-19

Hewisa göi ba zi so miföna? Sagötö famakao sabölö-bölö, hasambalö ilumöʼö nono mbanuania Yehowa. Si oföna, ilumöʼö ita na owulo razo ba zi sagörö ulidanö ba wanudugö Babilona Sebua, angorudua agama sofaya. (Fam. 17:16-18; 18:2, 4) Si dua, ilumöʼö göi ita na ihori dania ba Hamagedo fefu zi tosai ba gulidanö nifatörö Zatana. (Fam. 16:14, 16) Na lö tebulö ahatö ita khö Yehowa, tebai ifakiko waʼaurida Satana sagötö faʼara. Sindruhunia, yaʼia dania nihori sagötö faʼara. (Rom. 16:20) Börö daʼö, ogunaʼö fefu wangöna ba wasuwöta, ba böi tebulö ogunaʼö daʼö! Böi tandraigö ba wanuwö Satana hegöi ulidanö nifatörönia ba zi ha yaʼu-yaʼugö. Tuhini ndra talifusöu ba wamati, ba oʼö wanuturu lala moroi khö Yehowa. Na öfalua daʼö, tola faduhu dödöu wa hasambalö iʼabölöʼö ba ilumöʼö ndraʼugö Amada sebua faʼomasi si so ba zorugo.—Yes. 41:10. w21.03 30 ¶16-17

Hawaʼara tola taforomaʼö wa tafaduhusi tödö Yehowa? Ba ginötö taʼoʼö wanuturu lala nibeʼe Yehowa. Ba Zura Niʼamoniʼö, oya waö-waö waʼauri sangoromaʼö wa moguna sibai waʼahono dödö hegöi faʼafaduhu dödö khö Yehowa. Na öfahaʼö ndraʼugö ba waö-waö waʼauri andrö, angeragö hadia mbörö wa lö tebulö so waʼahono dödö ba gotalua nono mbanua Lowalangi hewaʼae na göna ira folohi. Duma-dumania, me lafaretakö ndra sinenge ira sangetuʼö huku Yahudi enaʼö laböhöli wanuriaigö, lö ataʼu ira. Hizaʼi, si fao faʼabarani, lamane wangumaʼö, ”Abölö sökhi woloʼö khö Lowalangi me yaʼia zamatörö yaʼaga moroi ba woloʼö ba niha.” (Hal. 5:29) Ba ginötö daʼö, lö faʼataʼu khö ndra sinenge hewaʼae na no fakhamö laleasi ira. Hadia mbörö? Börö me faduhu dödöra wa fao khöra Yehowa ba omuso dödönia khöra. Andrö, lö laböhöli wanuriaigö. (Hal. 5:40-42) Angeragö göi duma-duma Zitefano. Me arakhagö lahuku mate ia, lö mangiwa dödö Zitefano ba irasoi waʼahono dödö, irege ”hulö mbawa malaʼika” mbawania. (Hal. 6:12-15) Hadia mbörö? Börö me faduhu dödönia wa omuso dödö Yehowa khönia. w21.01 4 ¶10-11

Daʼa zangoromaʼö wa omuso dödö Yehowa khöra ba laʼokhögö dödö side-ide si lö sinegu. (Yes. 1:18) Yaʼira andrö niha Keriso si no tebayagö idanö, sindruhu-ndruhu mamati ira ba höli nibeʼe Yesu, ba fahuwu ira khö Yehowa. (Yoh. 3:36; 1 Fe. 3:21) Daʼö mbörö wa omuso dödö Yehowa khöra, ba tola ”lafalua halöwö niʼamoniʼö khönia bongi maʼökhö” ba gulidanö. (Fam. 7:15) Iadaʼa, si fao faʼowölö-ölö, yaʼira zabölö oya mamalua halöwö fanuriaigö hegöi fombaliʼö nifahaʼö, börö me Famatörö Lowalangi zabölö laʼofönaiʼö ba waʼaurira. (Mat. 6:33; 24:14; 28:19, 20) Faduhu dödö ngawawa sato sibai si teʼorifi ba wamakao sabölö-bölö wa lö tebulö irorogö ira Lowalangi. Iwaʼö Sura Niʼamoniʼö wa ”si dadao ba dadaoma andrö zolumöʼö yaʼira”. Ba luo daʼö, laʼila ira biri-biri tanö böʼö hewisa waʼalua nifabuʼu Lowalangi andre: ”Iʼosi dawa hörö fefu ba höröra.”—Fam. 21:3, 4. w21.01 16 ¶9-10

Omuso dödöda me tola tobali ita ösi nomo Yehowa ba taforege woloʼö amakhoita Yehowa sanandrösa ba wondröniaʼö. Iforomaʼö Sura Niʼamoniʼö wa iʼameʼegö tödö ndra matua hegöi ira alawe Yehowa. Duma-dumania, me abad siföföna, ibeʼe Yehowa geheha niʼamoniʼö khö ndra matua hegöi ira alawe irege tola lafalua dandra sahöli-höli dödö, simane fahuhuosa ba ngawalö li. (Hal. 2:1-4, 15-18) Ibayoini göi ira faoma ehehania niʼamoniʼö, enaʼö tola mamatörö ira awö Keriso ba zorugo. (Gal. 3:26-29) Ibeʼe göi ginötö khö ndra matua hegöi ira alawe ba wangokhögö faʼauri si lö aetu ba gulidanö. (Fam. 7:9, 10, 13-15) No göi ibeʼe halöwö khö ndra matua hegöi ira alawe ba wanuriaigö turia somuso dödö hegöi ba wamahaʼö niha böʼö. (Mat. 28:19, 20) Duma-dumania, itutunö buku Halöwö Zinenge sanandrösa khö zi samösa talifusöda ira alawe sotöi Firisikila. Yaʼia hegöi foʼomonia sotöi Akila, latutunö zindruhu sabölö tefaudu khö zi samösa ira matua salawa sekola sotöi Afolo.—Hal. 18:24-26. w21.02 14 ¶1; 15 ¶4

Yaʼami ira satua sokubaloi, no miʼokhögö noro dödö si tohude ba wanolo ira talifusöda enaʼö itugu onekhe ira ba wanuriaigö hegöi ba wamahaʼö. Itaria aila ndra sanuriaigö ba wondröniaʼö famahaʼö ba Zura Niʼamoniʼö na fao ndraʼugö khöra. Na daʼö nirasoira, tola öfatunö khöra wa lö fatimba khöu na yaʼugö zondröniaʼö famahaʼö andrö. Oya zi tola lafalua ira satua sokubaloi ba wamarou tödö ndra talifusöda sondröniaʼö famahaʼö ba Zura Niʼamoniʼö. (1 Te. 5:11) Hewaʼae na lö hadöi niha nifahaʼöda ba Zura Niʼamoniʼö iadaʼa, tola tatolo niha böʼö enaʼö tedou ira ba wamati. Na fao ita khö dalifusöda sondröniaʼö famahaʼö ba Zura Niʼamoniʼö, tola tabeʼe gonönöta sadogo-dogo si no tafaʼanö. Na no ibörögö iʼondrasi gangowuloada niha nifahaʼö ba Zura Niʼamoniʼö, moguna fahuwu ita khönia ba tabeʼe duma-duma si sökhi. Enaʼö terou dödö niha nifahaʼö ba Zura Niʼamoniʼö, moguna labeʼe ginötöra ira satua sokubaloi wefao ba wondröniaʼö famahaʼö. Tola göi labeʼe wamarou dödö khö ndra sondröniaʼö famahaʼö ba Zura Niʼamoniʼö, na lafahaʼö ira ba lasuno wamorege si no laforomaʼö. Gofu hawaʼoya zi tola tafalua, tola fao ita fefu ba wanolo niha nifahaʼö ba Zura Niʼamoniʼö enaʼö laʼomasiʼö ba lafosumange Yehowa. Tatu omuso sibai dödöda ba wamalua daʼö! w21.03 13 ¶18-19

No iforomaʼö Dawido wa tola mufaduhusi tödö ia ba iʼonorogö tödö halöwönia. Duma-dumania, me ono matua ia, owölö-ölö ia ba wondrorogö biri-biri namania. Tola teʼala waʼaurinia ba wamalua halöwö daʼa. Itutunö khö Razo Saulo, ”Yaʼodo andre zokubaloi biri-biri namagu. Na so zingo mazui berua sangoloiʼö biri-biri, ugohi, ubunu, ba uheta mbiri-biri ba mbawania.” (1 Sa. 17:34, 35) Iʼila Dawido wa yaʼia zangonorogö tödö ba wondrorogö biri-biri. Börö daʼö, na owölö-ölö ndra talifusöda ira matua si bohou ebua ba wamalua halöwö si no tebeʼe khöra, no laforomaʼö wa laʼoʼö duma-duma Dawido. Me awuyu-wuyu Dawido, aro sibai wahuwusania khö Yehowa. Abölö tohude wahuwusara andrö moroi ba waʼabaraninia mazui ba nekhe-nekhe dangania fa-musik. Tenga ha Lowalanginia Yehowa andrö, hizaʼi no Si Fahuwu khönia göi. Yaʼami talifusöma ira matua si bohou ebua, sabölö moguna sinangea miʼodödögö yaʼia daʼö fahuwusa saro khö Namami si so ba zorugo. w21.03 3 ¶4-5