Lala ba Wangomasiʼö Niha Böʼö

Börö me ngaʼötö niha siföföna sotöi Adamo ita, andrö wa lafotöi ita si sambua omo. Daʼö mbörö wa omasi Lowalangi na taʼomasiʼö ba tafosumange nawöda. Hizaʼi, ato zi lö mamalua daʼö iadaʼa ba fatuwu Lowalangi khöra.

NIWAʼÖ ZURA NIʼAMONIʼÖ SANANDRÖSA BA WANGOMASIʼÖ AWÖDA NIHA

”Öʼomasiʼö nawöu, simane fangomasiʼömö yaʼugö.”​—3 MOZE 19:18.

”Böi tebulö miʼomasiʼö zi faʼudu khömi.”​—MATAIʼO 5:44.

HEWISA SIBAI NIHA SANGOKHÖGÖ FAʼOMASI?

Itutunö Lowalangi ba Daromalinia hewisa sibai niha sangokhögö faʼomasi. Tesura daʼö ba 1 Korindro 13:4-7:

”Faʼomasi andrö ba no sebolo tödö, si sökhi tödö.”

Angeragö: Hewisa dödöu na so niha si sökhi tödö ba sebolo tödö, ba lö mofönu ia ba ginötö öfalua zala?

Faʼomasi andrö ”lö iʼafökhöiʼö tödö nawönia”.

Angeragö: Hewisa dödöu na so niha sagafökhö tödö ba manahö-nahö dödöra khöu?

Faʼomasi andrö ”lö iʼalui dana khönia”.

Angeragö: Hewisa dödöu na so zangandrö saohagölö ba mbua gera-erau ba lö ifaso ndraʼugö ba woloʼö bua gera-erania?

Faʼomasi andrö ”lö itanö ba dödönia zi lö sökhi”.

Angeragö: Iʼefaʼö Lowalangi zala niha na sindruhu-ndruhu lafalalini gera-erara. ”Tenga si lö mamalö-malö watahisania, ba fönunia, ba tenga si lö aetu.” (Zinunö 103:9) Na no taʼafökhöiʼö dödö niha böʼö, tatu manö omuso dödöda na iʼefaʼö zalada. Andrö wa omasi ita na taʼefaʼö göi zala niha sangafökhöiʼö tödöda.​—Zinunö 86:5.

Faʼomasi andrö ”lö omuso dödönia ba zi lö atulö”.

Angeragö: Na so zomuso tödö ba wamakao salua khöda, tatu lö omasi ita. Na simanö, ba ginötö so zi göna famakao, böi omuso dödöda hewaʼae na no irai ifalua khöda zimanö.

Tola taʼogunaʼö lala nitutunö miyawa andrö ba wangomasiʼö awöda. Na tafalua daʼö, gofu haniha ita, hasambalö ifahowuʼö ita Lowalangi. Ba artikel aefa daʼa, itutunö hewisa lalada ba wanolo niha böʼö sedöna mutolo.