Lafotöi Niha Satulö Börö Wamati hegöi Bua-Bua

1. Ba ginötö taʼangerönusi wamati Gaberahamo, hadia wanofu si tumbu ba dödöda?

HEWAʼAE ato niha si no irai mamondrongo töi Gaberahamo, ha maʼifu niʼilara sanandrösa khönia. Hizaʼi, te oya niʼilamö sanandrösa khö Gaberahamo. Duma-dumania, öʼila wa tefotöi ia ”ama zamati ba niha fefu”. (Rom. 4:11) Hizaʼi, te manofu ndraʼugö, ’Hadia tola uʼoʼö nifalua Gaberahamo ba uʼokhögö wamati saro simane yaʼia?’ Hasambalö tola.

2. Hana wa moguna tafahaʼö ita ba duma-duma Gaberahamo? (Yakobo 2:22, 23)

² Sambua lala enaʼö taʼokhögö wamati simane Aberahamo yaʼia daʼö tafahaʼö ita ba duma-dumania. Iʼoʼö wehede Lowalangi, findra ia ba soi saröu, toröi ia ba nose-ose ngafulu fakhe waʼara, ba itehegö nono niʼomasiʼönia sotöi Izaʼaki tobali sumange. Daʼö fefu zangoromaʼö wa mamati ia. Börö wamati hegöi bua-bua niforomaʼönia, omuso sibai dödö Lowalangi khönia ba omasi ia tobali si fahuwu khö Gaberahamo. (Baso Yakobo 2:22, 23.) Omasi göi Yehowa na fefu ita, farahu ndraʼugö ba daʼö, taʼomusoiʼö dödönia ba tobali si fahuwu khönia. Börö daʼö, ibeʼe gehehania khö Waulo hegöi Yakobo ba wanura duma-duma Gaberahamo ba Zura Niʼamoniʼö. Datatutunö hadia zi no lasura ba Roma faza 4 hegöi Yakobo faza 2. Ba zi dombua faza daʼö, so wehede si tohude niwaʼöra sanandrösa khö Gaberahamo.

3. Hadia ayati niʼogunaʼö Waulo hegöi Yakobo?

³ Faulo hegöi Yakobo, laʼogunaʼö wehede nisura ba 1 Moze 15:6 sangumaʼö, ”Mamati [Gaberahamo] khö Yehowa ba daʼö mbörö wa satulö ia iwaʼö Lowalangi.” Khalaigö atö, niha si so horö ba si lö moʼahonoa simane Aberahamo tola atulö mazui lö fasala ia ba wamaigi Yehowa! Tatu omasiʼö na simane daʼö wamaigi Lowalangi yaʼugö. Hizaʼi, hadia tola? Tatu manö. Datatutunö hadia mbörö wa atulö Gaberahamo ba wamaigi Yehowa ba hewisa enaʼö tola simane daʼö göi wamaigi Yehowa yaʼita.

ATULÖ BÖRÖ WAMATI

4. Hana wa sindruhunia tebai atulö niha gulidanö ba wamaigi Lowalangi?

⁴ Ifatunö Faulo ba zura nifaʼoheʼönia ba niha Roma wa dozi niha oi mamalua horö. (Rom. 3:23) Na simanö, hewisa wa tola iʼomusoiʼö dödö Lowalangi si samösa niha ba tefotöi ia niha satulö? Iʼogunaʼö duma-duma Gaberahamo Faulo ba wanolo niha Keriso satulö tödö enaʼö lasöndra wanema linia.

5. Hana wa tola atulö Gaberahamo ba wamaigi Yehowa? (Roma 4:2-4)

⁵ Atulö Gaberahamo ba wamaigi Yehowa me toröi ia ba danö Ganaʼana. Hizaʼi, hadia atulö ia börö me moʼahonoa wamaluania Oroisa Moze? Tenga. (Rom. 4:13) Awena tebeʼe Goroisa daʼö ba ndraono Gizaraʼeli töra 400 fakhe me no aefa iwaʼö Lowalangi wa niha satulö Gaberahamo. Na simanö, hadia mbörö wa atulö Gaberahamo ba wamaigi Lowalangi? Börö me mamati Gaberahamo khö Yehowa, andrö wa iforomaʼö waʼasökhi dödönia Yehowa ba ifotöi Gaberahamo andrö niha satulö.—Baso Roma 4:2-4.

6. Hewisa wa tola atulö ba wamaigi Yehowa niha si so horö?

⁶ Imane Faulo sanandrösa ba niha samati khö Lowalangi, ”Börö wamatinia wa lafotöi ia satulö. Simane niwaʼö Dawido sanandrösa ba waʼomuso dödö niha satulö ba wamaigi Lowalangi tenga börö gamuatania, ’Yaʼahowu niha si no muʼefaʼö lalö ba si no mubalugö horö; yaʼahowu niha si lö itörö tödö Yehowa horönia.’” (Rom. 4:5-8; Si. 32:1, 2) Iʼefaʼö zala niha samati khönia Lowalangi. Sindruhu-ndruhu iʼefaʼö zalara ba lö saʼae itörö-törö tödönia horö nifaluara. Atulö ira ba wamaiginia ba lö hadöi salara börö me mamati ira.

7. Hana wa tefotöi niha satulö ndra enoni Lowalangi me götö föna?

⁷ Hewaʼae tefotöi niha satulö Gaberahamo, Dawido, ba simanö göi genoni Lowalangi tanö böʼö, hizaʼi lö moʼahonoa ira nasa ba itaria lafalua zala. Hewaʼae simanö, börö me mamati ira, andrö wa hulö zi lö hadöi salara ba wamaigi Lowalangi, mendrua manö na lafaedogö ira ba niha si lö mamosumange Yehowa. (Ef. 2:12) Itutunö Faulo ba zurania wa moguna sibai wamati enaʼö tola fahuwu zi samösa niha khö Lowalangi. Simane Aberahamo hegöi Dawido, tola tobali ita si fahuwu khö Lowalangi na mamati ita khönia.

AMAKHAITA WAMATI BA GAMUATA

8-9. Hadia zi fasala niwaʼö niha sanandrösa ba nisura Waulo hegöi Yakobo, ba hana wa fasala daʼö?

⁸ Ba zi hauga wulu fakhe, fabuʼa-buʼa ndra sondröniaʼö agama sanandrösa hawaʼamoguna wamati hegöi amuata. So zangumaʼö wa tola teʼorifi ita asala faduhu dödöda khö Zoʼaya yaʼita Yesu Keriso. Te no irai örongo wehedera andre, ”Faduhusi tödö Yesu enaʼö teʼorifi ndraʼugö.” Tola manö latötöi wehede Waulo sangumaʼö, ’Atulö niha ba wamaigi Lowalangi tenga börö gamuatara.’ (Rom. 4:6) Hizaʼi, so göi danö böʼö zangumaʼö enaʼö tola teʼorifi ita, moguna tafalua zi sökhi ba möi ita ba nahia niʼamoniʼö gosali. Te itörö tödöra nisura ba Yakobo 2:24, ”Atulö zi samösa niha börö mbua-bua, tenga ha börö wamati.”

⁹ Börö wabuʼa-buʼasa daʼö, so ösa zamareso Sura Niʼamoniʼö zangumaʼö wa faböʼö mbua gera-era Yakobo ba Faulo sanandrösa ba wamati hegöi amuata (bua-bua). Lawaʼö ira sondröniaʼö agama, eluaha wehede Waulo yaʼia daʼö obönö asala mamati zi samösa niha enaʼö teʼorifi ia. Hizaʼi, na moloʼö Yakobo, moguna göi gamuata. Imane samösa profesor ba bidang teologi, ”Lö aboto ba dödö Yakobo hadia mbörö wa fatandro Waulo me iwaʼö [atulö zi samösa niha] börö wamatinia tenga ha börö gamuatania.” Hizaʼi, böi olifu ita wa Faulo hegöi Yakobo fagölö-gölö nifarou geheha Yehowa ba wanura fehede daʼö. (2 Ti. 3:16) Sindruhunia, lö faböʼö mbua gera-erara andrö. Tola taʼila hadia geluaha wehedera na tafahaʼö ita ba nösi zurara maʼafefu mazui hadia mbörö wa lasura daʼö.

10. Hadia ’gamuata’ nitutunö Waulo? (Roma 3:21, 28) (Faigi göi gambara.)

¹⁰ Hadia ’gamuata’ nitutunö Waulo ba Roma 3 ba 4? Eluahania ’mamalua oroisa’, yaʼia daʼö Oroisa Moze nibeʼe ba Hili Zinaʼi. (Baso Roma 3:21, 28.) Te so ösa niha Keriso Yahudi ba götö Waulo sangumaʼö wa moguna nasa lafalua Goroisa Moze. Börö daʼö, iʼogunaʼö Faulo duma-duma Gaberahamo ba wamaduhuʼö wa tola atulö zi samösa niha ba wamaigi Lowalangi börö me mamati ia, tenga börö ’me ifalua goroisa’. Möi fangaʼaroʼö dödöda daʼa, börö me taʼila wa tola atulö ita ba wamaigi Lowalangi na mamati ita khönia hegöi khö Keriso.

11. Hadia geluaha ”mbua-bua” mazui amuata nitutunö Yakobo?

¹¹ ’Bua-bua’ mazui amuata nitutunö ba Yakobo faza 2, tenga simane nitutunö Waulo. Mufanandrösa wehede Yakobo ba gamuata mazui nifalua niha Keriso sero maʼökhö. Amuata daʼö zangoromaʼö hadia sindruhu-ndruhu mamati ira khö Lowalangi mazui löʼö. Datafaigi dombua duma-duma niʼogunaʼö Yakobo.

12. Hewisa wanutunö Yakobo gamakhaita wamati ba gamuata? (Faigi göi gambara.)

¹² Ba duma-duma si oföna, ifatunö Yakobo wa tebai ebua dödö zambuana niha Keriso. Itutunö sanandrösa khö zi samösa niha samosumange niha si kayo hizaʼi iʼaohasi ba dödö niha si numana. Tola manö iwaʼö niha daʼö wa mamati ia, hizaʼi lö tefaudu daʼö ba mbua-buania. (Yak. 2:1-5, 9) Ba duma-duma si dua, itutunö Yakobo sanandrösa khö zi samösa niha sangila ’dalifusönia si lö nukha ba lö balazo’, hizaʼi lö itolo ira. Hewaʼae na iwaʼö niha daʼö wa mamati ia, hizaʼi lö ifalua hadia ia. Sindruhunia tenga niha samati ia. Simane niwaʼö Yakobo, ’famati si lö bua-bua, ba mate’.—Yak. 2:14-17.

13. Hewisa wanutunö Yakobo wa moguna muforomaʼö wamati ba gamuata? (Yakobo 2:25, 26)

¹³ Itutunö göi Yakobo duma-duma Rakhaba sangoromaʼö famati ba gamuatania. (Baso Yakobo 2:25, 26.) No irongo Rakhaba sanandrösa khö Yehowa ba iʼila hewisa wolumöʼönia ndraono Gizaraʼeli. (Yos. 2:9-11) Hadia nifalua Rakhaba? Ilumöʼö zi darua samauze enaʼö lö mate ira. Ba gafuriata, tefotöi ia niha satulö simane Aberahamo hewaʼae lö moʼahonoa ia ba tenga moroi ba gotalua ndraono Gizaraʼeli. Ba daʼa taʼila wa moguna muforomaʼö wamati ba gamuata.

14. Hana wa tola tawaʼö wa nisura Waulo hegöi Yakobo ha faböʼö lala wanutunö?

¹⁴ No aboto ba dödöda wa famati hegöi amuata nitutunö Waulo ba Yakobo ha faböʼö lala wanutunö yaʼia. Omasi Waulo wamatunö khö ndra niha Keriso Yahudi wa lö ibönö na ha asala lafalua Goroisa Moze enaʼö tobali ira niha satulö föna Yehowa. Hizaʼi, sabölö itandrösaigö Yakobo yaʼia daʼö moguna lafalua zi sökhi ira niha Keriso ba niha böʼö ba wangoromaʼö famatira.

15. Hadia nifaluada ba wangoromaʼö famatida? (Faigi göi gambara.)

¹⁵ Lö niwaʼö Yehowa enaʼö tafalua simane sibai nifalua Gaberahamo enaʼö tefotöi ita niha satulö. Sindruhunia, oya sibai zi tola tafalua ba wangoromaʼö famatida. Duma-dumania, tola tatemaʼö ndra talifusöda mazui niha sawena möi ba gangowuloa, tatolo ndra talifusöda soʼamböta, ba tafalua göi zi sökhi ba nösi nomoda börö me fefu daʼö möi fangomuso dödö Lowalangi ba ifahowuʼö ita. (Rom. 15:7; 1 Ti. 5:4, 8; 1 Yo. 3:18) Sambua lala si tohude sangoromaʼö wa mamati ita yaʼia daʼö na owölö-ölö ita ba wanuriaigö turia somuso dödö. (1 Ti. 4:16) Na mamati ita wa hasambalö ifalua fefu mbuʼusa linia Yehowa ba faduhu dödöda wa fanuturu lala nibeʼenia zabölö sökhi, moguna taforomaʼö daʼö ba gamuatada. Na tafalua daʼö, faduhu dödöda wa tola atulö ita föna Lowalangi ba ifotöi ita si fahuwu khönia.

TÖTÖNAFÖ SANGAʼAROʼÖ FAMATI

16. Hadia nitötöna ba nifaduhusi tödö Gaberahamo?

¹⁶ Ba Roma faza 4, so sambua wamahaʼö si sökhi tanö böʼö si tola tahalö moroi khö Gaberahamo, yaʼia daʼö moguna sibai taʼokhögö dötönafö. No ifabuʼu Yehowa wa tefahowuʼö dania ”ngawalö soi” börö Gaberahamo. Sindruhu-ndruhu wa no tötönafö sahöli-höli dödö daʼö khö Gaberahamo! (1 Mo. 12:3; 15:5; 17:4; Rom. 4:17) Hizaʼi, hewaʼae no 100 fakhe ndröfi Gaberahamo ba 90 fakhe Zara, lö manö nasa si tumbu khöra ndraono. Ba wamaigi niha, lö saʼae tola moʼono ira. Tatu möi fanandraigö wamati Gaberahamo daʼa. Hizaʼi, lö tebulö ”manötöna ba mamati ia wa tobali ia ama dozi soi”. (Rom. 4:18, 19) Ba gafuriata, alua fefu nitötönania andrö. Tumbu khönia Gizaʼaki, ono si no ara ibalo-baloi.—Rom. 4:20-22.

17. Hana wa faduhu dödöda wa hasambalö tola atulö ita föna Lowalangi ba tobali si fahuwu khönia?

¹⁷ Tola atulö ita ba wamaigi Lowalangi ba tobali ita si fahuwu khönia simane Aberahamo. Imane Faulo, ”Tenga ha khö [Gaberahamo] manandrösa ngawua wehede ’lafotöi ia niha satulö’, hizaʼi khöda fefu. Lafotöi ita niha satulö börö me faduhu dödöda khö Lowalangi sanusugi Yesu.” (Rom. 4:23, 24) Simane Aberahamo, moguna göi mamati ita, taforomaʼö daʼö ba gamuatada, ba taʼokhögö dötönafö. Ba wamahaʼö aefa daʼa, tatutunö dania sanandrösa ba dötönafö nifatunö Waulo ba Roma faza 5.