Faʼaombö Dödö Ba Nomo

Imane janet, ”Lö ara me no aefa mate namagu, imane foʼomogu wa omasi ia ndra alawe böʼö. Lö ara aefa daʼö, ihalö nukhania ba lamari ba lö mangona ia khöma iröi ndraʼo ba iraonoma si darua.” Isöndra halöwönia Janet, hizaʼi lö abönö gazinia ba wombönökhi soguna ba nomo. Tenga ha ba wangalui kefe so gabula dödönia. ”Sabölö abu dödögu yaʼia daʼö ba wangebuaʼö iraonogu. Itaria utahigödo samösa börö me tebai uʼasogö fefu hadia ia zoguna khö ndraonogu simane nifalua zatua böʼö khö ndraonora. Sabu dödögu iadaʼa, halawaʼö niha böʼö khögu hegöi khö ndraonogu. Hadia lawaʼö niha börö ndraʼo waʼalua simane daʼa ba wongambatögu?”

Fangandrö zi tola manolo Janet enaʼö so khönia waʼahono dödö ba irorogö wahuwusania khö Yehowa. ”Na ba zi bongi, itaria so ba wangera-ngeragu waʼaombö-aombö dödö. Fangandrö ba fombaso Sura Niʼamoniʼö daʼö zanolo yaʼo enaʼö tola uʼila mörö. Ayati somasido yaʼia daʼö Filifi 4:6, 7: ’Böi mibusi tödö hadia ia, ba gofu hadia ia mbörö, na so zabu dödömi, ba mibokai khö Lowalangi, ba wangandrö ba ba wangalulu, yafao wangandrö saohagölö. Ba irorogö dödömi, awö gera-erami faʼohau-hau dödö andrö.’ Oya uʼogunaʼö ginötö ero bongi khö Yehowa ba wangandrö ba so khögu waʼohau-hau dödö ba faʼahono dödö.”

Duma-duma wangandrö nibeʼe Yesu daʼö zi tola manolo yaʼita enaʼö böi taʼabusi tödö sibai fefu hadia ia, ”Noa sa iʼila Amami andrö, hadia zoguna khömi, he löʼö na niʼandrömi khönia.” (Mataiʼo 6:8) Moguna taʼandrö khönia. Fangandrö no sambua lala enaʼö ”miʼondrasi Lowalangi.” Hadia lua-luania? ”Iʼondrasi ami.”​—Yakobo 4:8.

Na no mangandrö ita tenga ha ibeʼe khöda waʼahono dödö. ”Samondro-ndrongo fangandrö” Yehowa, ibeʼe wanolo ba faʼabölö ba niha samati khönia. (Zinunö 65:3) Daʼö mbörö wa ifarou ndra nifahaʼönia Yesu enaʼö ’böi adage-dage ira wangandrö.’ (Luka 18:1) Moguna taʼandrö khö Yehowa enaʼö ibeʼe khöda wanuturu lala ba faduhu dödöda wa isulöni wamatida. Böi aombö dödöda waʼabölö ba faʼomasi Lowalangi ba wanolo yaʼita. Na ’lö aetu-aetu wangandröda’ daʼö zangoromaʼö wa so khöda wamati si ndruhu.​—I Tesalonika 5:17.

HADIA GELUAHANIA MAMATI

Hadia geluaha wamati andrö? Famati yaʼia daʼö ”faʼaboto ba dödö” Lowalangi si ndruhu. (Yohane 17:3) Aboto ba dödöda gera-era Lowalangi moroi ba Zura Niʼamoniʼö. No tafahaʼö ita wa iʼameʼegö tödö ita Lowalangi ba omasi ia itolo ita. Hizaʼi, famati andrö tenga ha asala aboto ba dödöda haniha Lowalangi. Eluahania so khöda wahuwusa si sökhi khö Lowalangi. Faböʼö na fahuwu ita ba niha, fahuwusa khö Lowalangi tebai ha ba zi sabata. Tola ’tedou wamatida’ na lö taböhöli wamahaʼö yaʼita khönia, ba ’lö mamalö-malö tafalua zomasi ia’, ba lö tebulö ibeʼe khöda wanolo. (II Korindro 10:15; Yohane 8:29) Famati daʼa zanolo Janet me alua khönia gabula dödö.

Imane Janet, ”Famati zanolo yaʼo, urasoi wanolo Yehowa ba waʼaurigu. Oya sibai zalua si tebai matimbagö me lö khöma faʼabölö. Börö me asese mangandrö, lö aetu ibeʼe wanolo Yehowa hewaʼae lö aboto ba dödögu hadia nifaluania. Ba ginötö uʼandrö saohagölö, daʼö zamasugi ba dödögu wa oya nifalua Lowalangi ba wanolo yaʼo. Lö iböhöli wameʼe fanolo ero-ero inötö, ba ginötö si tefaudu. No ibeʼe khögu ndra talifusö si ndruhu ba wamati si fahuwu khögu. Lö faröi ira khögu ba tobali duma-duma ira ba ndraonogu.”a

”Aboto ba dödögu hana wa iwaʼö Yehowa ba Maleakhi 2:16, ’Fatuwu khögu wanibo andrö.’ Khö ngambatö si lö fasala, daʼa faʼafökhö dödö fondrege zebua. No haʼuga fakhe si lalö me no iröi ndraʼo foʼomogu, itaria so khögu wa ide-ide dödö ba zi ha yaʼo. Na alua khögu zimane daʼö, utandraigö utolo niha böʼö, daʼö zi tola manolo yaʼo ba wanaögö abula dödö salua khögu.” Börö me ifalua goi-goi Zura Niʼamoniʼö Janet, daʼö zanolo yaʼia ba woʼalösi abula dödönia.b—Gamaedola 18:1.

Imane Janet, ”Faʼohahau dödö sabölö ebua” yaʼia daʼö ”me no aboto ba dödögu wa Yehowa ’ama zi lö ama, zi lö ina’ ba solumöʼö lakha mbanua.’ Lö irai faröi ia khöma tenga simane nifalua woʼomogu.” (Zinunö 68:6) Aboto ba dödö Janet wa lö irai itandraigö niha Lowalangi ba ”zi lö sökhi.” Si ndruhunia, ibeʼe waʼatua-tua ”fefu gofu haniha zangandrö” ba ibeʼe ”fahöna waʼabölö” si tola manolo yaʼita ba gabula dödö salua.​—Yakobo 1:5, 13; II Korindrö 4:7.

Hewisa na abu dödöda me no so ita ba wangala?